1. Anni i makagi tam ta kabataan nga lallaki?

SIKAMU nga kabataan nga lallaki, aru i makuanu para ta kongregasion. Aru nikamu i masiki-sikan anna magawa-gawayyan. (Prov. 20:29) Dakal i meyuffunnu ta kongregasion. Baka kayà mu nga mabbalin tu ministerial nga aripan. Ngem baka abbo mu gapa nga abbing laman i paningan nikaw na tanakuan onu awan paga tu ekspiriensam tapenu metalo nikaw i importante ira nga annungan. Ngem maski nu mabbing ka paga, aru i makuam sangawe tapenu mala mu i pattalo anna pangirespeto na wawwaragi ta kongregasiommu.

2. Anni i gigiammuattam taw nga artikulo?

² Taw nga artikulo, gigiammuattam i pattolay ni Patul David. Ammuattam gapa nu anni i nesimmu ta dua nga patul na Juda nga si Asa anna si Jehosafat. Paguruvovugattam gapa nu anni ira i problemada, kunnasida nga inarubang danatun, anna nu anni i magigiammu na kabataan nga lallaki ta nira.

3. Kunnasi nga moffunan na kabataan ira danuri manakam ta kongregasion?

³ Ta kabagitolay ni David, napeggan yayya tu abilidad nga makoffun ta tanakuan. Espiritual yayya nga tolay anna nappursigi yayya tapenu mabbalin tu malalaki nga musikeru. Niyusana yatun nga talento tapenu banna-bannayan i sinunno  na Dios nga patul nga si Saul. (1 Sam. 16:16, 23) Sikamu nga kabataan nga lallaki, egga kari i abilidadnu nga makoffun ta kongregasion? Magga aru nikamu i kunnatun. Angngariganna, maappresia na lakay onu bako ira ta kongregasion nu tudduammu ira nu kunnasi usan i tablet anna i tanakuan nga gadyet para ta personal nga paggigiammu anna ta study ira. Dakal i meyuffun ta nira na kalalakim ta gadyet.

4. Kagitta ni David, anni ira nga kualidad i mawag tu pappursigian na kabataan nga lallaki? (Innan i letratu ta vungun.)

⁴ Kanayun nga nipasingan ni David nga responsable yayya anna mapattalakkan. Angngariganna, ta kabbinna, nallallappo yayya ta panangngal ta karneru na yamana. Delikadu yatun nga annungan nga netalo nisa. Mittan, niyistoria yatun ni David kani Patul Saul. Kunna: “I aripammu ay nappastor ta karneru ira na yamana, anna egga i tadday nga leon anna oso nga nangitammang tu karneru ta pastoranna. Zinaddanakku anna sinombà tapus kinurag ku yatun ta simuna.” (1 Sam. 17:34, 35) Ammu ni David nga mawag tu tangngallanna i karneru ira yatutta magutu yayya nga nakillaban tapenu protektan danatun. Maparigan na kabataan nga lallaki si David nu mallallappo ira ta pangituppal ta maski anni nga annungan nga netalo ta nira.

5. Segun ta Salmo 25:14, anni i pinaka-importante nga makua na kabataan nga lallaki?

⁵ Madukko i pakikkofun ni David kani Jehova. Mas importante yatun anne ta gutu ni David onu ta kalalakina ta pattugtug tu arpa. Si Jehova i Dios ni David anna yayya gapa i madukko nga Kofunna. (Bibbigan i Salmo 25:14.) Sikamu nga kabataan nga lallaki, i pinaka-importante nga makuanu ay i pamasikan ta relasionnu ta nelangitan nga Yamanu. Nu kuannu yatun, awayyana tu metalo nikamu i mas aru nga responsibilidad ta kongregasion.

6. Anni i nononopan na karuan nga totolay meyannung kani David?

⁶ Tadday nga problema ni David ay nononopan na totolay nga abbing laman yayya anna iresponsable. Angngariganna, ginamma yayya ni Patul Saul turi ta nabboluntariu yayya nga labanan si Goliat. Kunna nisa: “Abbikka laman.” (1 Sam. 17:31-33) Nige natun, kinagi na manungna nga iresponsable kanu yayya. (1 Sam. 17:26-30) Ngem ari nga kunnatun i paningan ni Jehova kani David.  Ammammu yayya tu mapia ni Jehova. Megafu ta nattalo si David ta sikan nga maggafu ta Kofunna nga si Jehova, napatena si Goliat.​—1 Sam. 17:45, 48-51.

7. Anni i magigiammum ta istoria ni David?

⁷ Anni i magigiammum ta ekspiriensa ni David? Mawag nga mappasensia ka. Egga danuri ammammu daka ngana ta kabbimmu pagalaman. Mappasa labbi i tiempo nige tu adulto ngana i paningadda nikaw. Ngem makasiguradu ka nga ari nga maffokus si Jehova ta itchuram. Ammuna i kata-katolem anna i potensial mu ira. (1 Sam. 16:7) Paladdammu gafu i relasiommu ta Dios. Kingngua yatun ni David gukaban na pangobserbana tu mapia ta pinaratu ira ni Jehova. Pinannonopanna tu mapia nu anni i ituddu danatun meyannung ta Namaratu. (Sal. 8:3, 4; 139:14; Roma 1:20) Egga paga i tadday nga makuam. Makkiddaw ka kani Jehova tu sikan. Angngariganna, asa-asaran naka kari na kaeskuelam megafu ta tadday ka nga Saksi ni Jehova? Nu kunnatun i situasiommu, makimallo ka kani Jehova tapenu uffunan naka nga marubang yatun. Iyaplikam i praktikal ira nga tabarang nga mabibbig mu ta Biblia anna ta nebase-Biblia ira nga publikasion anna video tam. Kada uuffunan naka ni Jehova ta problemam, mas dumakal i pattalo mu nisa. Mala mu gapa i pattalo na tanakuan nu masingi-singaddaka nga mattalo kani Jehova.

8-9. Anni i nakoffun kani David tapenu mapasensia yayya nga maginnag? Anni i magigiammu na kabataan nga lallaki ta nisa?

⁸ Kunnaw paga i tadday nga problema nga inarubang ni David. Kabalinna nga matunno bilang patul, mawagna labbi nga maginnag tu aru nga dagun nige yayya nga mammaguray bilang patul na Juda. (1 Sam. 16:13; 2 Sam. 2:3, 4) Anni i nakoffun nisa tapenu mapasensia nga maginnag? Naffokus yayya ta makuana imbes tu makkafi i nonona. Angngariganna, maski paga nu mattattammang yayya anna maddian ta teritoria na Filisteo ira, inusana yatun nga tiempo tapenu affutan i kalaban ira na Israel. Megafu tatun, naprotektanna i pagaddetan na teritoria na Juda.​—1 Sam. 27:1-12.

⁹ Anni i magigiammu na kabataan nga lallaki kani David? Usannu nakuan i kada oportunidad tapenu passerbian i wawwaraginu. Kunnaw i ekspiriensa na tadday nga brother nga si Ricardo. * Turi ta mafulu pagalaman i dagunna, kakayàna ngana i marregular payunir. Ngem kinagi na elder ira nga ari paga yayya kualipikadu. Imbes tu makkafi i nonona onu mapporay, mas lagu nga nallallappo si Ricardo ta ministeriona. Istorianna: “Nu nonopakku yatun nga nesimmu, ammù nga kawagakku talaga i mapprogreso. Yayya nga naffokus ngà ta passinoli anna mapprepara ngà nige ku kuan yatun. Nakapegafu ngà paga lagu tu ollu nga Bible study. Durante nga mas umaru i ekspiriensà, mas gapa nga ziminakal i komfiansà.” Tadday ngana sangawe nga efektibo nga regular payunir anna ministerial nga aripan si Ricardo.

10. Turi ta egga i importante nga desisionan ni David, anni labbi i kingnguana?

¹⁰ Nonopan paga yaw nga nesimmu kani David. Turi ta egga yayya anna i suddaluna ira ta teritoria na Filisteo megafu ta mattattammang ira kani Saul, pinanawadda i familiada tapenu umay nga makiggerra. Ta kawadda, sinallung na kalaban ira i babaleda anna inada i giffamiliada. Awayyana nakuan nga nonopan ni David nga megafu ta malalaki yayya ta pakiggerra, mabi laman para nisa nga mapplano nu kunnasi nga mabawi i familiada. Ngem arianna kingngua yatun. Nappoffun lallagu  yayya kani Jehova. Ta uffun na pari nga si Abiatar, nakkiavu si David kani Jehova: “Daddaggakku kari danuri nangatake?” Kinagi ni Jehova nisa nga daddagganna ira anna nipasiguraduna nisa nga mavviktoria yayya. (1 Sam. 30:7-10) Anni i magigiammum tatun?

11. Anni i kuammu nige ka nga maddesision?

¹¹ Makitabarang ka labbi nige ka nga maddesision. Makkonsulta ka ta magana mu. Makala ka gapa tu makasta nga tabarang nu makibbida ka ta ekspiriensadu ira nga elder. Mattalo si Jehova tatun ira nga natunno nga lallaki anna makapattalo ka gapa nira. Imammatan ira ni Jehova nga “regalu” ta kongregasion. (Efe. 4:8) Yayya nga makapaddesisiokka tu mapia nu parigammu i pangurugda anna nu ginnammu i masirib ira nga suhestiodda. Ammuattam ngana nu anni i magigiammu tam kani Patul Asa.

12. Anni ira i kualidad ni Patul Asa turi ta namegafu yayya nga nammaguray?

¹² Turi ta mabbing si Patul Asa, mapakalinno yayya anna magutu. Angngariganna, pinegafuananna nga alsan i idolatria turi ta natay i yamana nga si Abias anna yayya ngana i nabbalin tu patul. “Nikagina paga ta Juda nga alegadda si Jehova nga Dios na inafuda ira anna tuttuladda i Dob anna i bilin.” (2 Cro. 14:1-7) Turi ta inatake ni Zera nga Etiope anna na 1,000,000 nga suddaluna i Juda, nappoffun si Asa kani Jehova. Kunna: “O Jehova, ari nga importante nikaw nu danuri uffunammu ay aru onu awan tu awa-awayyada. Uffunan nakami, O Jehova nga Dios mi, megafu ta mattalo kami nikaw.” Ipasingan natun nga makakkasta nga kinagi ni Asa nga mattalo yayya nga ipaliag yayya ni Jehova anna i totolena. Megafu tatun, “inaffu ni Jehova i Etiope ira.”​—2 Cro. 14:8-12.

13. Anni i kaddaraddam nga kingngua ni Asa, anna anni i marake nga resulta natun?

¹³ Magga naganassing si Asa turi ta kinalabanna i 1,000,000 nga suddalu. Ngem megafu ta nattalo yayya kani Jehova, navviktoria yayya. Ngem kaddaraddam ta ari yayya nga nattalo kani Jehova turi ta neparubang yayya ta mas baddi nga problema. Turi ta inana-anassing ni Patul Baasa na Israel si Asa, nappoffun yayya ta patul na Siria. Marake i narresultan natun nga desision! Gukaban na profeta nga si Hanani, kinagi ni Jehova kani Asa: “Megafu ta nammakatalo ka ta patul  na Siria anna ari ka nga nammakatalo kani Jehova nga Dios mu, nakatammang ta limam i armada na patul na Siria.” Namegafu turi ta kingngua yatun ni Asa, kanayun ngana laman yayya nga makiggerra. (2 Cro. 16:7, 9; 1 Pat. 15:32) Anni i magigiammum tatun?

14. Kunnasim mepasingan nga mattalo ka kani Jehova? Segun ta 1 Timoteo 4:12, anni i resulta natun?

¹⁴ Mattalupaddiakka nga mapakalinno anna kanayukka nga mattalo kani Jehova. Turi ta nabawtisowakka, nepasingammu nga mangurug anna mattalo ka kani Jehova. Magayayya gapa si Jehova nga nitalo nikaw i pribilehio nga mabbalin tu miembro na familiana. Ngem mawag lagapa nga kanayukka nga mattalo kani Jehova. Awayyana nga mabi laman i mattalo kani Jehova nu magangngua ka tu darakal nga desision ta pattolem. Ngem kunnasi gapa i tanakuan ira nga desision nga kuammu? Angngariganna, mattalo ka kari kani Jehova nu maddesisiokka meyannung ta dibersion, sekular nga trabahu, anna goal mu ira? Ari ka nakuan nga mattalo ta sirib mu. Magaleg ka tu prinsipio ira na Biblia nga makoffun ta situasiommu anna iyaplikam danatun. (Prov. 3:5, 6) Nu kunnatun i kuammu, mapagayayya mu si Jehova anna mala mu i pangirespeto na kakongregasiommu.​—Bibbigan i 1 Timoteo 4:12.

15. Segun ta 2 Cronicas 18:1-3; 19:2, anni ira i nakaliwatan ni Patul Jehosafat?

¹⁵ Imperfekto ittam ngamin. Maski sikaw. Yayya nga nu mittan, makkamali ka. Ngem ari nakuan tu yatun i makefugag nikaw tapenu kuan i adde na mawayyam ta passerbi kani Jehova. Innattam i ehemplo ni Patul Jehosafat. Aru i makasta ira nga kualidadna. Namegafu ta nammaguray yayya, “inalegna i Dios na yamana anna sinuttulna i bilinna.” Zinogna paga i prinsipe ira nga levutadda i siudad ira ta Juda tapenu tudduan i totolay meyannung kani Jehova. (2 Cro. 17:4, 7) Ngem mittan, nakkamali si Jehosafat ta desisionna. Megafu tatun, sinabarangngan yayya na tadday nga profeta ni Jehova. (Bibbigan i 2 Cronicas 18:1-3; 19:2.) Anni i magigiammum tatun?

16. Anni i magigiammum kani Rajeev?

¹⁶ Magginna ka ta tabarang. Kagitta na aru nga kabataan nga lallaki, baka marigatakka gapa nga pagolluan i passerbi kani Jehova. Ari nakuan nga makkafi i nono mu. Kunnatun  i naekspiriensa na kabataan nga si Rajeev. Kunnaw i istorianna meyannung ta katinedyerna: “Kakku ammu nu anni talaga i kayà ku nga kuan ta pattolè. Gitta na aru nga kabataan, mas kayà ku i isports anna i magenjoy anne ta pakistudy onu pallayyagayya.” Anni i nakoffun kani Rajeev? Sinabarangngan yayya na tadday nga minangngikavurung nga elder. Istorian ni Rajeev: “Inuffunannà tapenu malippawa ku i prinsipio ta 1 Timoteo 4:8.” Mapakalinno nga gininna ni Rajeev yatun nga tabarang anna pinannonopanna tu mapia nu anni i kayàna nga pagolluan ta pattolena. Kunna: “Nadesisiokku nga pagolluan i goal ku ira ta espiritual.” Anni i resulta natun? Kunnaw i kagian ni Rajeev: “Piga dagun kabalikku nga natabarangngan, nabbalin ngà tu ministerial nga aripan.”

17. Anni i matageno na manakam ira ta kabataan nga lallaki nga masserbi kani Jehova?

¹⁷ Sikamu nga kabataan nga lallaki, kuruga appresian nakamu na manakam ira megafu ta “makiyabaga” kamu nira ta passerbi kani Jehova! (Zef. 3:9) Kakayàda i magayayya anna matalikarag nga pangituppalnu ta annungannu ira. Talaga iddukaddakamu.​—1 Juan 2:14.

18. Segun ta Proverbio 27:11, anni i matageno ni Jehova ta kabataan nga lallaki nga masserbi nisa?

¹⁸ Sikamu nga kabataan nga lallaki, ariannu nakuan vuluvuga kattaman nga iddukan anna pattalakkan nakamu ni Jehova. Niprofesiyana nga ta pangurianan nga aggaw, aru nga kabataan nga lallaki i sigga-paran nga masserbi nisa. (Sal. 110:1-3) Ammu ni Jehova nga iddukammu yayya anna kayà mu nga passerbian yayya adde ta mawayyam. Yayya nga pasensiammu nakuan i tanakuan anna pasensiammu i mismu nga baggim. Nu makkamali ka, magginna ka ta tabarang anna panisiplinada nikaw. Imammatammu nga naggafu kani Jehova danatun. (Heb. 12:6) Mallallappo ka nakuan ta panangngal ta maski anni nga annungan nga neyawa nikaw, anna pinaka-importante, pagayayyatammu nakuan i nelangitan nga Yamam ta ngamin nga kuammu.​—Bibbigan i Proverbio 27:11.