1. Ngatta nikiddaw ni Jesus kani Jehova nga paliaranna i disipulosna?

TA ULTIMU nga gabi ni Jesus taw ta davvun, agga-nonona i problema ira nga arubangan na disipulosna. Megafu ta ayatanna i disipulosna, nikiddona nga ‘paliaran ira na Yamana ta demonio.’ (Juan 17:14, 15) Ammu ni Jesus nga sonu makatoli ngana yayya ta langi, itulu-tuloy lagapa ni Satanas nga Diablo nga kontran danuri maya nga masserbi kani Jehova. Yayya nga kawagan na totolay ni Jehova i proteksion.

2. Ngatta makasiguradu ittam nga tabbagan ni Jehova i pakimallo tam ira?

² Ayatan ni Jehova si Jesus yayya nga sinabbagna i pakimallo na Anana. Nu kuattam gapa i adde na mawayya tam tapenu mapagayayya si Jehova, iddukanna ittam anna tabbaganna i pakkiddaw tam tu uffun anna proteksion. Megafu ta minangngikavurung nga Ulu na familia si Jehova, meddu nga tattangngallanna i ánana. Nu arianna nga kuan yatun, mepasiranan i ngaganna anna madaral i reputasionna.

3. Ngatta kawagattam i proteksion ni Jehova sangawe?

³ Sangawe i tiempo nga mas kawagattam i proteksion ni Jehova. Napatavvar si Satanas ta langi yatutta “nepallo i batù na.” (Nep. 12:12) Nakumbinsina i karuan nga totolay nga ‘passerbi ta Dios’ i pameppersigida nittam. (Juan 16:2) Persigian gapa ittam na karuan nga ari nga mangurug ta Dios megafu ta neruma ittam ta totolay taw nga mundo. Ngem maski anni paga i rason nu ngatta persigian ittam na totolay, ari ittam nga maganassing. Ngatta? Megafu ta kagian na Uvovug na Dios: “Pammakatalakkan i Yafu; yaya i mamasikan ta ginnonopan nu anna mamaliag nikamu ta Demonio.” (2 Tes. 3:3) Kunnasi nga kuan yatun ni Jehova? Gigiammuattam i dua nga iyawana nittam.

4. Segun ta Efeso 6:13-17, anni i niyawa ni Jehova tapenu maprotektan ittam?

⁴ Niddan ittam ni Jehova tu armas nga awayya tam nga iyellung onu ibaruasi anna iyusa tapenu maprotektan ittam ta pangatake ira ni Satanas. (Bibbigan i Efeso 6:13-17.) Maladda anna efektibo yatun nga armas nga maggafu ta Dios! Ngem maprotektan ittam laman natun nu iyusa tam i ngamin nga parte natun nga armas. Anni kari i irepresenta na kada tadday tatun? Gigiammuattam danatun.

5. Anni i sinturon na kinakurug, anna ngatta mawag tu usattam yatun?

⁵ Irepresenta na sinturon na kinakurug i kinakurug ira ta Biblia. Ngatta mawag tu iyellung tam yatun? Tapenu maprotektan ittam kontra kani Satanas, “i yama ngamin na siri.” (Juan 8:44) Rinivu dagun ngana yayya nga mallalladdug anna ilologona i “tanga-ravvunan”! (Nep. 12:9) Ngem protektan ittam na kinakurug ira ta Biblia tapenu ari ittam nga melogo. Kunnasi tam meyusa i sinturon na kinakurug? Gigiammuattam i kinakurug meyannung kani Jehova, dayawattam yayya ‘ta espiritu anna kakurug,’ anna mawag tu mapammakatalakkan ittam ta ngamin nga gannug.​—Juan 4:24; Efe. 4:25; Heb. 13:18.

6. Anni i kinatunung nga panakkag ta gakaw, anna ngatta mawag tu iyellung tam yatun?

⁶ Irepresenta na kinatunung nga panakkag ta gakaw i matunung ira nga estandarte ni Jehova. Ngatta mawag tu iyellung tam yatun? Ari nga maduddug i futu na suddalu megafu ta panakkag ta gakaw. Protektan gapa na kinatunung nga panakkag ta gakaw i figuratibo nga futu tam onu i kata-katoletam tapenu ari ittam nga mainfluwensian naw nga mundo. (Prov. 4:23) Kayà ni Jehova nga ayatan anna passerbiattam yayya ta interu nga futu tam. (Mat. 22:36, 37) Yayya nga purueban ni Satanas nga gadduan i futu tam. Kayàna nga ayatattam i ganna-gannug taw nga mundo anna danuri ikalussaw ni Jehova. (Sant. 4:4; 1 Juan 2:15, 16) Nu ari nga efektibo yatun, ananassinganna ittam tapenu ariattam nga tuttulan i estandarte ira ni Jehova.

7. Kunnasi tam nga meyellung i kinatunung nga panakkag ta gakaw?

⁷ Meyellung tam i kinatunung nga panakkag ta gakaw nu tuttulattam i estandarte ira ni Jehova ta mapia anna marake anna nu mattolay ittam segun tatun. (Sal. 97:10) Matageno na karuan nga sobra i ka-istrikto na estandarte ira ni Jehova. Ngem nu iyemmang tam nga iyaplika i prinsipio ira na Biblia ta pattoletam, megitta ittam ta tadday nga suddalu nga inalsana i panakkagna ta gakaw megafu ta madammakkan yayya maski nu maddaggun i gerra. Ari tu kinasirib yatun! Ngem nu ayatattam si Jehova, ‘ari nga mariga nga tuttulan’ (onu, “ari nga mamakadammo,” NW) i bili-bilinna. Ammu tam nga makepaliag tu inango yatun.​—1 Juan 5:3.

8. Anni i kayàna kagian nga passapatus tam i aya tam nga ilammuyag i mapia nga dumug?

⁸ Pagaramman ittam gapa ni Pablo nga i passapatus tam ay i aya tam nga mangilammuyag ta mapia nga dumug na imammo. Kayà kagian natun nga mawag tu kanayun ittam nga sigga-paran nga ilayyagayya i mapia nga dumug na Pappatulan. Nu ikagi tam ta tanakuan i mensahe na Biblia, mapasikan i pangurug tam. Mapagaram ittam nu masingattam i totolay ni Jehova ta interu nga mundo nga approbetsadda i kada oportunidad tapenu mallayyagayya maski nu sitaw i diadda. Angngariganna, mallayyagayya ira ta trabahu, ta eskuela, ta babalay, onu ta business territory, nu mamalengke ira, onu nu mabbisita ira ta paparientesda kunne na gapa ta kakilalada. Nu maganassing ittam tapus iyemmang tam i pallayyagayya, megitta ittam ta tadday nga  suddalu nga inalsana i passapatusna maski nu maddaggun paga i gerra. Megafu tatun, mabi laman nga mabigaran i takkina. Arianna gapa nga maprotektan i baggina nu egga i mangatake anna arianna matuttul i bili-bilin na komanderna.

9. Ngatta mawag tu agga-tammi tam i kunna dakal nga kalatag nga pangurug tam?

⁹ Irepresenta na dakal nga kalatag na pangurug i pangurug tam kani Jehova. Mangurug ittam nga tuppalanna i ngamin nga promesana. Yatun nga pangurug i makoffun nittam tapenu ‘maddo i ngamin nga umafa-afi nga pana na Demonio.’ Ngatta mawag tu agga-tammi tam yatun? Tapenu ari ittam nga melogo ta tuttuddu na apostata ira anna ari nga makkafi i nono tam nu kritikan ittam na totolay megafu ta kuru-kurugattam. Nu awan tu pangurug tam, awan gapa tu sikattam nga pammanakitan danuri mamilit nittam nga ari nga tuttulan i estandarte ira ni Jehova. Ngem kada itaddaggattam i pangurug tam ta trabahu onu ta eskuela, agga-tammi tam i kalatag tam. (1 Ped. 3:15) Kada pammanakitattam gapa i trabahu nga mas dakal i suelduna ta ammu tam nga makafekto yatun ta paddayaw tam, agga-tammi tam i kalatag tam. (Heb. 13:5, 6) Nu massesserbi lagapa ittam kani Jehova maski nu makokkontra ittam, popprotektan ittam na pangurug tam nga kunna kalatag.​—1 Tes. 2:2.

10. Anni i helmet na kapaliag, anna ngatta mawag tu iyellung tam yatun?

 ¹⁰ I helmet na kapaliag i iddanama nga iyawa ni Jehova nittam. Iddanamattam nga paginnolayan ittam ni Jehova maski nu matay ittam anna bala-balakkanna noka i ngamin nga magangngua ta urena. (1 Tes. 5:8; 1 Tim. 4:10; Tito 1:1, 2) Megafu ta helmet, maprotektan i ulu na tadday nga suddalu. Protektan gapa na iddanama tam nga kapaliag i appana-panono tam. Kunnasi? Megafu tatun nga iddanama, nakafokus ittam ta promesa ira na Dios anna ari nga makkafi i nono tam nu makkaproblema ittam. Kunnasi tam nga meyellung yatun nga helmet? Siguraduattam nakuan nga mekunnay ta appana-panono na Dios i appana-panono tam. Angngariganna, mammakatalo ittam ta Dios, ari nga ta kinariku nga mawawan gabbalaman.​—Sal. 26:2; 104:34; 1 Tim. 6:17.

11. Anni i espada na espiritu, anna ngatta mawag tu usattam yatun?

¹¹ Irepresenta na espada na espiritu i Biblia. Mawayya natun nga taffutan i ngamin nga klase na kinaladdug anna lallagurayan natun i totolay ta falsu ira nga tuttuddu anna makaperwisiu ira nga bisiu. (2 Cor. 10:4, 5; 2 Tim. 3:16, 17; Heb. 4:12) Magigiammu tam nu kunnasi nga usan tu mapia yatun nga espada gukaban na personal study anna na passanay nittam na organisasion na Dios. (2 Tim. 2:15) Egga paga i niyawa ni Jehova nga mapprotekta nittam. Anni yatun?

12. Anni paga i mawag tam, anna ngatta?

¹² Ammu na ekspiriensadu nga suddalu nga arianna maffu i dakal nga armada nu tattaddena laman. Kawaganna i uffun na kavuluna ira nga suddalu. Kunnatun gapa ittam. Ariattam nga maffu si Satanas anna i tagatuttulna ira nu tattadday tam laman. Niyawa nittam ni Jehova ‘i wawwagi tam ta angngurug’ ta interu nga mundo tapenu manguffun nittam.​—1 Ped. 2:17.

13. Segun ta Hebreo 10:24, 25, anni ira i meyuffun nittam na pakistudy?

¹³ Moffunan ittam na wawwaragi nu magatende ittam ta study. (Bibbigan i Hebreo 10:24, 25.) Nu mittan, makkafi i nono tam ngem mapasikan ittam nu magatende ittam ta study. Mapagaram ittam ta napafutuan nga komento na wawwaragi tam. Mapaguyu ittam gapa nga itulu-tuloy i passerbi tam kani Jehova megafu ta nebase-Biblia ira nga palappa anna demonstrasiodda. Mapasikan ittam gapa na pakibbida tam ta wawwaragi, nige anna kabalin na study. (1 Tes. 5:14) Magayayya ittam gapa ta moffunattam i tanakuan nu egga ittam ta study. (King. 20:35; Roma 1:11, 12) Makoffun gapa i study tapenu mabbalin ittam tu mas malalaki ta pallayyagayya anna panuddu. Angngariganna, magigiammu tam nu kunnasi nga usan tu mapia i rimienta ira ta Teaching Toolbox tam. Yayya nga mapprepara ka nakuan tu mapia para ta study ira. Magginna ka nakuan tu mapia ta study. Kabalin na study, iyaplikam i passanay nga nalawa mu. Nu kuammu danatun, mabbalikka tu “tadday nga mekatalo nga suddalu ni Cristo Jesus.”​—2 Tim. 2:3.

14. Anni paga nga uffun i niyawa ni Jehova nittam?

¹⁴ Uffunan ittam gapa na minillion nga makapangngua nga anghel. Nonopammu i makua na tattadday laman nga anghel. (Isa. 37:36) Kunnasi gafu ngana laman nu napakaru ira! Awan tu maski sinni nga tolay onu demonio i mangaffu kontra ta makapangngua nga armada ni Jehova. Si Jehova i Makapangngua-sa-ngamin. Nu yayya i kavulu tam, kanayun nga mas masikan ittam anne turi ira ta kumokkontra nittam, maski nu kunnasi paga i karuda. (Uk. 6:16) Makasiguradu ittam nga kurug  yatun! Daddammammu nakuan danatun nu makkafi i nono mu megafu ta kakkagian onu kukukuan na katrabahum, kaeskuelam, onu na parientes mu ira. Ari ka nga magitetadday ta pakillabammu. Suportan naka ni Jehova megafu ta tuttuttulammu i direksionna.

15. Segun ta Isaias 54:15, 17, ngatta ari vuluvuga mapagimmang i totolay na Dios ta pallayyagayyada?

¹⁵ Aru i rason naw nga mundo nga kontroladu ni Satanas tapenu ikalussaw ittam. Neutral ittam ta pulitika anna ari ittam makisali ta gerra. Ilayyagayya tam i ngagan na Dios anna kakkagiattam gapa nga i Pappatulanna laman i makeyawa tu imammo. Tuttuttulattam gapa i matunung ira nga estandartena. Pakurugattam ta totolay nga marake, laddug, anna minammapatay i mammaguray naw nga mundo. (Juan 8:44) Ilayyagayya tam gapa nga aranni ngana nga madaral yaw nga mundo ni Satanas. Ngem ari ittam vuluvuga mapagimmang ni Satanas anna na tagatuttulna ira. Kukukuattam lallagu i adde na mawayya tam tapenu ari nga magimmang ta paddayaw kani Jehova! Maski nu kuruga makapangngua si Satanas, arianna nga nafugaddan i kelayyagayya na mensahe na Pappatulan ta interu mundo. Posible laman yatun megafu ta protektan ittam ni Jehova.​—Bibbigan i Isaias 54:15, 17.

16. Kunnasi noka paliaran ni Jehova i totolena ta dakal nga ziga?

¹⁶ Anni i mesimmu ta mappange? Sonu dakal nga ziga, kappabbaw noka i mamiddua nga pangipaliag nittam ni Jehova. Ollu, paliaranna noka i matalo ira nga aripanna sonu paguyuanna i patul ira ta davvun nga daralan i Babilonia nga Dakal nga imperio na falsu nga relihion. (Nep. 17:16-18; 18:2, 4) Mekadua, paliaranna gapa noka i totolena sonu pawananna i nabattang ira nga parte na mundo ni Satanas ta Armagedon.​—Nep. 7:9, 10; 16:14, 16.

17. Anni i benefisiona nu mattalupaddian ittam nga madukko kani Jehova?

¹⁷ Nu mattalupaddian ittam nga madukko kani Jehova, awan vuluvuga tu makua ni Satanas nga permanente nga makaperwisiu nittam. Si Satanas i mannanayun noka nga madaral. (Roma 16:20) Yatutta iyellung tam nakuan i kumpleto nga armas anna ariattam vuluvuga alsan yatun! Ariammu magitetadday nga labanan si Satanas anna i mundona. Uffunammu i wawwaragim. Tuttulammu i direksion ni Jehova. Nu kuammu danatun, makasiguradu ka nga pasikannan anna protektan naka na minaggiddu nga Yamam ta langi.​—Isa. 41:10.