1. Segun ta Mateo 24:9, ngatta ari ngana ittam makaddag nu ikalussaw ittam na mundo?

PINARATU ittam ni Jehova nga egga i abilidad tam nga iddukan i tanakuan anna kayà tam nga iddukadda gapa ittam. Yatutta nu egga i mangikalussaw nittam, matakitan ittam anna baka maganassing ittam paga lagu. Angngariganna, kunnaw i kagian ni Sister Georgina nga taga-Europe: “Turi ta 14 anios ngà, ikalussonà na yenà ta passerbiakku si Jehova. Maraddam ngà anna magitetadday ngà tapus nanono ku paga lagu nga baka ari ngà nga mapia nga tolay.” * Kunnaw gapa i nitura ni Brother Danylo: “Binubbug, ininsulto, anna inananassinnà na suddalu ira megafu ta Saksi ngà ni Jehova. Naganassing ngà anna nepasiranan ngà.” Kuruga matakitan ittam nu ikalussaw ittam na totolay. Ngem ari ittam ngana nga makaddag tatun. Niprofesiya ni Jesus nga mekalussaw ittam.​—Bibbigan i Mateo 24:9.

2-3. Ngatta mekalussaw i tagatuttul ira ni Jesus?

² Ikalussaw na mundo danuri tagatuttul ni Jesus. Ngatta? Megafu ta kagitta ni Jesus, ‘ari ittam nga kukua na mundo.’ (Juan 15:17-19) Yayya nga maski nu irespeto tam i gobiernu ira na tolay, neutral ittam ta pulitika, ari ittam nga massaludo ta bandera, onu makkansion tu national anthem. Iyawa tam laman kani Jehova i eksklusibo nga debosiottam. Suportattam i kepangngattan na Dios nga imagurayan i totolay ngem kinuestion yatun ni Satanas anna na ‘gakana.’ (Gen. 3:1-5, 15) Ilayyagayya tam nga i Pappatulan laman na Dios i makasolba ta problema na tolay anna aranni ngana nga daralan natun ngamin danuri kumokkontra tatun. (Dan. 2:44; Nep. 19:19-21) Makasta nga  dumug yatun para turi ira ta masippo ngem marake nga dumug yatun para ta marake nga totolay.​—Sal. 37:10, 11.

³ Mekalussaw ittam gapa megafu ta tuttulattam i dorob na Dios. Dakal i nadduman natun ta alalinno nga moralidad na mundo. Angngariganna, alawatan ngana na aru nga totolay sangawe i kappasirang anna imoral nga annangngua. Ngem danatun mismu nga annangngua i rason nu ngatta zinaral na Dios i Sodoma anna i Gomora! (Jud. 7) Megafu ta tuttulattam i dorob na Biblia meyannung tatun ira nga annangngua, uyawan ittam na aru nga totolay anna kakkagiadda nga sobra i ka-istrikto tam.​—1 Ped. 4:3, 4.

4. Anni ira nga kualidad i mamasikan nittam nu mekalussaw ittam?

⁴ Anni i makoffun nittam tapenu maattammattam i pangikalussaw anna panginsulto na totolay? Masikan nakuan i pangurug tam nga uffunan ittam ni Jehova. Megitta i pangurug tam ta kalatag nga ‘pangaddo tam ta ngamin nga umafa-afi nga pana na Demonio.’ (Efe. 6:16) Ngem ari nga makalanno i pangurug. Kawagattam gapa i aya, ta “ari tu pallullussaw” yatun. Megafu tatun, maattammattam anna mapasensiattam i ngamin nga makataki nga gannug. (1 Cor. 13:4-7, 13) Gigiammuattam ngana nu kunnasi tam maattamman i pangikalussaw megafu ta aya tam kani Jehova, ta wawwaragi, anna ta kumokkontra nittam.

5. Anni i nakua ni Jesus megafu ta ayana ta Yamana?

⁵ Kunnaw i kinagi ni Jesus ta matalo ira nga tagatuttulna ta gabi nige yayya nga patayan na kalabanna ira: ‘Kuakku ngamin i ipakua na Yama ta ayatakku yayya.’ (Juan 14:31) Megafu ta pangaya ni Jesus kani Jehova, naattammanna i grabe ira nga kapurueba. Makua tam gapa yatun megafu ta pangaya tam kani Jehova.

6. Segun ta Roma 5:3-5, anni i matageno na aripan ira ni Jehova ta pagattattam ta pangikalussaw na mundo?

⁶ Kanayun nga nakoffun ta aripan ira ni Jehova i pangayada ta nisa tapenu maattamman i kadara-darum. Angngariganna, turi ta nipeyemmang na makapangngua nga korte suprema na Judio i pallayyagayya na apostoles, napaguyu ira na ayada ta Dios nga ‘kurugan i Dios anne ta tolay.’ (King. 5:29; 1 Juan 5:3) Makoffun gapa ta wawwaragi tam i maladda nga pangaya ta Dios tapenu makapattalupaddian ira nga matalo maski nu persigian ira na vayolente anna makapangngua ira nga gobiernu. Imbes tu makkafi i nono tam, magayayya ittam lallagu nga attamman i pangikalussaw na mundo.​—King. 5:41; bibbigan i Roma 5:3-5.

7. Anni nakuan i reaksiottam nu kokkontran ittam na kafamilia tam?

⁷ I pangokkontra na kafamilia i tadday ta pinakamariga nga attamman. Nu mamegafu ngana ittam nga maginteres ta kinakurug, baka nonopan na karuan nga kafamilia tam nga nelogo ittam. Nonopan gapa na karuan nga mammaguyung ngana ittam. (Ikumpara i Marcos 3:21.) Baka vayolente paga lagu ira nu kokkontradda ittam. Ngem ari ittam ngana nga makaddag tatun. Kinagi ni Jesus: “I kontra noka na tadday nga tolay, ay danuri i kabbalay na gabbalaman.” (Mat. 10:36) Maski anni gafu i pattratu nittam na paparientes tam, ari ittam nga mallussaw nira. Mas lallagu nga ayatattam i totolay durante nga mas dumakal i aya tam kani Jehova. (Mat. 22:37-39) Ngem ariattam vuluvuga ikompromiso i prinsipio anna i dorob na Biblia tapenu laman mapagayayya tam i tanakuan nga totolay.

8-9. Anni i nakoffun ta tadday nga sister nga attamman i grabe nga pangokkontra?

⁸ Nakapagattam si Georgina nga nakagi ta  gafu maski nu grabe i pangokkontra nisa na kafamiliana. Kunnaw i istorianna: “Naki-Bible study kami na yenà ta Saksi ira. Ngem nappasa i annam nga vulan turi ta kayà ku ngana i magatende ta study, gavva nga kontrannà ngana na yenà. Nammuakku nga egga ira i ka-uvovugna nga apostata anna usu-usanna i falsu ira nga akusasiodda nu kibbidannà. Insultowannà gapa, pungutannà, paddallannà, anna itabbona i literaturà ira. Turi ta 15 ngana i dagukku, nappabawtiso ngà. Kayà na yenà nga pagimmangan ngà nga masserbi kani Jehova. Yayya nga pinaddiannà ta tadday nga balay nu sitaw mepay i rebelyoso ira nga tinedyer. Maddrugs anna mangngua tu krimen i karuan nira. Talaga kitazziga nga arubangan i kunnatun ira nga pangokkontra mas ngana ta naggafu yatun ta tolay nga mangiddu anna mangikavurung nakuan nikaw.”

⁹ Anni i nakoffun kani Georgina tapenu makapagattam? Kunna: “Ta aggaw nga kinontranà na yenà, kababalikku laman nga bibbigan i interu nga Biblia. Kumbinsidu ngà ngana sangawe nga nalegakku i kinakurug anna matageno ku nga kuruga madukko ngà kani Jehova. Kanayun ngà nga makimallo nisa anna gigginnannà. Turi ta paddiakku ta balay nga kavulu ku i problemadu ira nga tinedyer, inimbitanà na tadday nga sister ta baleda anna makkavulu nga ginigiammu mi i Biblia. Pinasikannà gapa na wawwaragi. Pinabbaliddà nga parte na giffamiliada. Manawag niakan nga mas masikan si Jehova anne ta kumokkontra ira nittam, maski sinni paga ira.”

10. Anni i kanayun nga kuan ni Jehova para nittam?

¹⁰ Nitura ni apostol Pablo nga “awan vuluvuga tu makawayya nga mangigungay nittam ta aya na Dios nga neyawa nittam gafu kani Cristo Jesus nga Yafu tam.” (Roma 8:38, 39) Maski nu egga i tiempo nga mazziga-riga ittam, ari ittam vuluvuga panawan ni Jehova. Kanayunna ittam nga banna-bannayan anna pasikannan. Masingattam ta ekspiriensa ni Georgina nga uffunan gapa ittam ni Jehova gukaban na wawwaragi tam ta kongregasion.

11. Kunnasi nga makoffun ta disipulos ni Jesus i aya nga kinagina ta Juan 15:12, 13? Mangiyawa tu angngarigan.

¹¹ Ta gabi nige nga natay si Jesus, niperaddamna ta disipulosna nga makka-aya-aya ira. (Bibbigan i Juan 15:12, 13.) Ammuna nga makoffun nira i minassakrifisio nga aya tapenu ari ira nga massirina anna tapenu maattammadda i pangikalussaw na mundo. Ikonsidera i ehemplo na kongregasion ta Tesalonica. Namegafu turi ta nabuu yatun  nga kongregasion, napeppersigi ngana i wawwaragi. Ngem makasta i nepasingadda nga ehemplo na matalo nga pagattattam anna aya. (1 Tes. 1:3, 6, 7) Pinagaram ira ni Pablo nga itulu-tuloy nga ipasingan i aya anna ‘mas ammungan paga i pangayada.’ (1 Tes. 4:9, 10) Megafu paga ta aya, mapasikadda danuri nakkafi i nonoda anna moffunadda danuri makafi. (1 Tes. 5:14) Sinuttulda i kinagi ni Pablo. Ngatta makagi tam yatun? Megafu ta nappasa i tanga-ragun, ta mekadua nga tura ni Pablo, kinagina nira: ‘Dumaka-dakal i ayanu ta kataggi-tadday.’ (2 Tes. 1:3-5) Megafu tatun nga aya, naattammadda i ziga-riga anna kapeppersigi.

12. Kunnasi nga nipasingan na wawwaragi ta tadday nga nasion i pakka-aya-aya ta tiempo na gerra?

¹² Ikonsidera i ekspiriensa ni Danylo nga nakagi ta gafu anna i atawana. Turi ta egga i gerra ta diadda, nitulu-tuloyda lagapa i makistudy, kingnguada lagapa i adde na mawayyada tapenu mallayyagayya, anna nibilleda gapa ta tanakuan nga wawwaragi i makan nga egga nira. Tapus tadday nga aggaw, minay i karuan nga suddalu nga konsu palattug ta balay da Danylo. “Finuersadà nga likurakku i pangurug ku,” kunni Danylo. “Ngem turi ta manaki ku, binubbugdà anna appe nga palattugaddà, ngem pinaputukda yatun ta utun na ulù. Tapus nige ira nga nanaw, inananassiddà nga manoli kanu ira tapenu i-rape i atawà. Ngem insigida nga pinatakay kami na wawwaragi ta tren. Kakku vuluvuga makattaman i aya nga nipasingan natun nga meddu nga wawwaragi. Tapus turi ta nakadde kami ngana ta tanakuan nga ili, nangiyawa i wawwaragi tatun tu makan nikami anna inuffunaddà nga magaleg tu trabahu anna balay. Megafu tatun, egga ngana gapa i paddianan na karuan nga Saksi nga mattattammang ta gerra.” Ipasingan na kunnatun ira nga ekspiriensa nga makoffun i aya tam ta kataggi-tadday tapenu maattammattam i pangikalussaw.

13. Kunnasi nga makoffun i masanto nga espiritu tapenu maattammattam i pangikalussaw?

¹³ Kinagi ni Jesus ta tagatuttulna ira nga ayatadda danuri kumokkontra nira. (Mat. 5:44, 45) Malogon kari yatun? Siempre ari! Ngem makua tam yatun ta uffun na masanto nga espiritu na Dios. Nelagum ta vunga na espiritu na Dios i aya kunne na gapa i pappasensia, kinasippo, kinalumamo, anna pangifugag ta baggi. (Gal. 5:22, 23, NW) Makoffun nittam danatun nga kualidad tapenu maattammattam i pangikalussaw. Nallapo i futu na aru nga  mangontra nittam megafu ta makadios ira nga kualidad nga nipasingan na Saksi nga atawa nga lalaki, atawa nga babay, ana, onu karrubada. Aru gapa ta kumokkontra nittam i nabbalin paga lagu tu kapangngurug tam. Yayya nga nu marigatakka nga ayatan danuri mangikalussaw nikaw megafu ta passerbim kani Jehova, ipakimallo mu i masanto nga espiritu. (Luc. 11:13) Buu nakuan i pattalo mu nga kanayun nga kapianan i panuttul ta dalan na Dios.​—Prov. 3:5-7.

14-15. Kunnasi nga nakoffun i Roma 12:17-21 kani Yasmeen tapenu ayatanna lagapa i atawana maski nu kokkontranna yayya?

¹⁴ Ikonsidera i ekspiriensa ni Yasmeen nga taga-Middle East. Tagga ta nabbalin yayya tu Saksi ni Jehova, abbo na atawana nga nelogo yayya. Yatutta pinuruebanna nga pagimmangan yayya ta passerbina ta Dios. Ininsulto gapa yayya na atawana anna kinumbinsina i paparientes kunne na gapa i tadday nga lider na relihion anna tadday nga albulariu nga ananassingadda si Yasmeen nga egga i marake nga kuadda nisa. Inakusadda paga lagu yayya nga passirinanna i familiana. Mittan, kinukkulletan paga lagu na atawana i wawwaragi durante na study! Kanayun nga tumatangi si Yasmeen megafu ta marake i nikatratuna.

¹⁵ Ngem nu egga si Yasmeen ta Kingdom Hall, banna-bannayan anna pasikannan yayya na espiritual nga familiana. Pinagaram gapa yayya na elder ira nga iyaplika i Roma 12:17-21, NW. (Bibbigan.) “Mariga yatun,” kunni Yasmeen. “Ngem nikiddò kani Jehova nga uffunannà. Kingnguà gapa i adde na mawayyà nga iyaplika i kakkagian na Biblia. Yayya nga nu sadya nga dapingan na atawà i kusina mi, pakarenuakku yatun. Nu insultowannà, tubbag ngà tu malumamo. Nu mattaki gapa yayya, tangngallakku yayya.”

16-17. Anni i magigiammum ta ehemplo ni Yasmeen?

¹⁶ Nabala-balakkan si Yasmeen megafu ta pangipasingan tu aya ta atawana. Kunna: “Mas nattalo nio i atawà ta ammuna nga kanayun ngà nga makkagi tu kurug. Marespeto ngana gapa nga ginnannà nu paguvovugammi i meyannung ta relihion anna minanugu yayya nga ariammi ngana maddama. Sangawe, kakkagianna nio nga umay ngà nga makistudy. Mas nakkasta ngana gapa i relasiommi nga magatawa anna memammo ta balemi. Iddanamakku nga alawatan gapa noka na atawà i kinakurug anna makavulu ku yayya ta passerbi kani Jehova.”

¹⁷ Masingan ta ekspiriensa ni Yasmeen nga i aya ay “pasa-pasensianna i ngamin nga  gannug, . . . iddanamanna i ngamin nga gannug, attammanna i ngamin nga gannug.” (1 Cor. 13:4, 7, NW) Mafuersa anna makapataki i pangikalussaw, ngem mas mafuersa i aya. Nu ipasingattam i aya ta tanakuan, moli natun i mataga-tagenoda nittam anna kani Jehova. Mapagayayya tam paga si Jehova. Ngem nu ikalussaw lagapa ittam danuri na kumokkontra nittam, magayayya ittam lagapa. Ngatta?

18. Ngatta magayayya lagapa ittam maski nu mekalussaw?

¹⁸ Kinagi ni Jesus: “Mapalag (onu “magayayya,” NW) kamu nu ikalussaw dakamu.” (Luc. 6:22) Ariattam kayà nga mekalussaw ittam ngem ari ittam gapa nga martir. Ngatta gafu ta magayayya ittam maski nu mekalussaw ittam? Egga i tallu nga rason. Ollu, nu magattam ittam, mala tam i fabor na Dios. (1 Ped. 4:13, 14) Mekadua, mattuyag anna mas massikan i pangurug tam. (1 Ped. 1:7) Mekatallu, malawa tam noka i mannanayun nga inango.​—Roma 2:6, 7.

19. Ngatta magayayya i apostoles kabalidda nga nalatigo?

¹⁹ Ari nabbayag kabalin na nipaginnolay ni Jesus, naekspiriensa na apostoles i pagayayya nga kinagina. Maski nu nalatigo i apostoles anna napagimmang i pallayyagayyada, nagayayya ira. Ngatta? Megafu ta “nekwenta ira tu mekunnay nga magattam ta kepasa-pasiran megafu kani Jesus.” (King. 5:40-42) Mas masikan i pangayada ta Yafuda anne ta anassidda ta kumokkontra nira. Nipasingadda yatun nga ayada turi ta ‘ariadda inimmangan’ nga ilayyagayya i mapia nga dumug. Aru ta wawwaragi tam sangawe i matalo nga massesserbi maski nu mapurueban ira. Ammuda nga ari vuluvuga kattaman ni Jehova i kukukuadda anna i pangayada ta ngaganna.​—Heb. 6:10.

20. Anni i gigiammuattam ta tumunug nga artikulo?

²⁰ Adde ta ari paga nga nangultimu yaw nga mundo, ikalussoda ittam. (Juan 15:19) Ngem ari ittam nga maganassing. Magigiammu tam ta tumunug nga artikulo nga si Jehova i ‘mamasikan anna mamaliag’ turi ira ta matalo nisa. (2 Tes. 3:3) Yayya nga itulu-tuloy tam nga ayatan si Jehova, i wawwaragi, anna maski danuri kumokkontra nittam. Nu tuttulattam yatun nga tabarang, mapeggan ittam tu pattaradday, massikan i pangurug tam, medayaw tam si Jehova, anna mapakurug tam nga ararayyu nga mas mafuersa i aya anne ta lussaw.