1-2. Sinni i makoffun ta Bible study ira nga mapprogreso adde ta bawtismo?

“MAGUGGUSTUAKKU i magiggigiammù ta Biblia,” kunni Amy nga taga-Fiji. “Ammù nga yatun i kinakurug. Ngem turi ta nakikavulu ngà ngana ta wawwaragi, tatun ngà pagalaman nga nanguli anna napprogreso adde ta bawtismo.” Ituddu na ekspiriensa ni Amy yaw nga importante nga kinakurug: Tulu-tuloy nga mapprogreso i Bible study adde ta bawtismo nu makalawa yayya tu uffun nga maggafu ta kongregasion.

² Makoffun i kada publisher ta Bible study ira tapenu mabbalin ira tu parte na kongregasion. (Efe. 4:16) Kunnaw i kagian na payunir ta Vanuatu nga si Leilani: “Kurugan na karuan nga madduruffun i interu nga bario ta pamadakal ta tadday nga abbing. Kunnatun gapa ta pangngua tu disipulos. Madduruffun i interu kongregasion tapenu alawatan na tadday i kinakurug.” Makoffun i miembro ira na familia, kokkofun, anna memestru tapenu mabbalin tu adulto i tadday nga abbing. Makuada yatun nu komendan anna tudduadda ira tu importante ira nga leksion. Makoffun gapa i publisher ira tapenu mapprogreso i Bible study ira adde ta bawtismo. Puededa ira nga tabarangngan anna pagaramman. Mangipasingan gapa ira tu makasta nga ehemplo ta nira.​—Prov. 15:22.

3. Anni i magigiammum ta kinagi da Ana, Dorin, anna Leilani?

³ Ngatta magayayya nakuan i mangikondukta ta Bible study nu uffunan na karuan nga publisher i Bible study-na? Kunnaw i kagian ni Ana nga espesial payunir ta Moldova: “Talaga mariga ta tadday nga tolay nga iyawa i ngamin nga pakawagan  na Bible study-na nu mamegafu ngana yayya nga mapprogreso.” Naobserba gapa ni Brother Dorin, tadday nga espesial payunir tatun gabbalaman nga nasion: “Maruddu nga egga i mekagi na karuan nga publisher nga makatukkal ta futu na Bible study. Nu sakan laman, kakku vuluvuga manono yatun.” Yaw paga i tadday nga rason segun kani Leilani: “Makoffun i aya anna pangikavurung nga ipasingan na wawwaragi ta Bible study tapenu mammuanna nga sittam i totolay ni Jehova.”​—Juan 13:35.

4. Anni ira i ikonsidera tam taw nga artikulo?

⁴ Ngem baka manono mu, ‘Kunnasì gapa moffunan i Bible study nga mapprogreso nu ari mabba tu sakan i makab-Bible study nisa?’ Ikonsidera nu anni i makua tam nu mevulu ittam ta pab-Bible study anna nu anni i makua tam nu makistudy ngana yayya. Innattam gapa nu kunnasi moffunan na elder ira i Bible study ira tapenu mapprogreso adde ta bawtismo.

5. Anni i nonopammu nu nagalakka nga mevulu ta pab-Bible study?

⁵ Ta pab-Bible study, i maka-study i primeru nga makarresponsibilidad ta panguffun ta Bible study-na tapenu malippawa i Uvovug na Dios. Nu agalan naka na maka-study nga vulunammu yayya, nonopammu nga partner naka yatutta uffunammu yayya. (Ecl. 4:9, 10) Kunnasim makua yatun?

6. Kunnasim meyaplika i prinsipio ta Proverbio 20:18 nu mevulu ka ta pab-Bible study?

⁶ Mapprepara ka para ta pab-Bible study. Iyavu mu labbi ta maka-study i meyannung ta estudiantena. (Bibbigan i Proverbio 20:18.) Puedem iyavu danaw: “Kumusta gapa i Bible studym? Anni saw i gigiammuannu? Anni i kayà mu nga magigiammuna taw nga leksion? Egga kari i mawag nga kuakku onu ibità nga kuan durante ta pab-Bible study? Onu egga kari i awayyà nga kagian onu ibità nga kagian? Kunnasì nga mapagaram i estudiantem nga mapprogreso?” Siempre ari nga kagian nikaw na maka-study i konfidensial nga informasion meyannung ta estudiantena. Ngem makoffun nikaw i ikagina. Danatun i ipakiyuvovug na misionera nga si Joy turi ira ta mevulu nisa ta pab-Bible study. Kunna: “Megafu ta naggiristoriammi ngana yatun, mas interesadu ngana i kavulu ku ta estudiantè anna ammuna ngana i kagianna sonu mab-Bible study kami.”

7. Ngatta mapprepara ka nakuan nu mevulu ka ta pab-Bible study?

⁷ Nu mevulu ka ta pab-Bible study, makasta nu ipreparam gapa i leksion nga gigiammuannu. (Ezra 7:10) Kunnaw paga i kagian ni Brother Dorin: “Appresiakku nu napprepara gapa i kavulu ku para ta paggigiammu. Makekagi nu kua gare yayya tu makoffun  ira nga komento.” Magga maobserba gapa na estudiante nu parefu kamu nga nakaprepara. Makasta gapa nga ehemplo yatun para nisa. Maski gapa nu ariammu kuruga neprepara i gigiammuannu, egga nakuan i tiempom tapenu ammuan i pinakapunto ira na leksion.

8. Anni i kuammu tapenu mabbalin tu espesipiko i pakimallo mu ta pab-Bible study?

⁸ Importante nga parte na paggigiammu i pakimallo. Yayya nga datim ngana nakuan nga nonopan i ikagim nu mekiddaw nikaw nga sikaw i makimallo. Nu kuammu yatun, mabbalin tu mas espesipiko i pakimallo mu. (Sal. 141:2) Meraddamman paga ni Hanae nga taga-Japan i pakimallo na tadday nga sister nga nevulu ta mangistudy nisa. Istorianna: “Natageno ku nga madukko i pakikkofunna kani Jehova anna kayà ku nga parigan yayya. Turi ta kinagina i ngagakku ta pakimallona, natageno ku nga meddeddu ngà.”

9. Segun ta Santiago 1:19, anni i kuammu tapenu makoffukka nu mevulu ka ta pab-Bible study?

⁹ Uffunan i mangistudy durante ta paggigiammu. “Tapenu makoffun i kavulu mu, mawag tu magginna yayya tu mapia durante ta Bible study,” kagian ni Omamuyovbi nga espesial payunir ta Nigeria. “Mangiyawa gapa yayya tu makasta ira nga komento ngem ari nakuan tu yayya i maka-aru megafu ta malippawana nga responsibilidad na makab-Bible study i mangikondukta.” Kanni ka gafu nga mabbida anna anni nakuan i kagiammu? (Prov. 25:11) Magginna ka tu mapia durante nga maguvovug i mangistudy anna i estudiantena. (Bibbigan i Santiago 1:19.) Nu kuammu yatun, mas ammum nu kanni ka nga manguffun. Siempre, mannono ka labbi nige ka nga maguvovug. Angngariganna, ari nakuan tu napakaru i kagiammu. Kammu nakuan sumalamba durante nga mangiyesplika i mangistudy anna kammu gapa nga ulian i topiko. Mas mannawag i punto nu ababba laman i komentom, ilustrasion, onu pakkiavu mu. Nu mittan gapa, baka awan ngana tu meyammummu. Ngem nu komendammu i estudiante anna mangipasingakka tu personal nga interes nisa, dakal i meyuffun natun tapenu mapprogreso yayya.

10. Kunnasi nga makoffun ta Bible study i ekspiriensam?

¹⁰ Iyistoria i ekspiriensam. Nu mepangngo, iyistoria tu manganannuan ta estudiante nu kunnasim nakannammuan i kinakurug, nu kunnasim narubang i tadday nga problema, onu nu kunnasi naka nga inuffunan ni Jehova. (Sal. 78:4, 7) Baka i ekspiriensam i kawagan na estudiante nga maginna. Paladdan natun i pangurugna onu pagaramman yayya natun tapenu tulu-tuloy nga mapprogreso adde ta bawtismo. Ipasingan paga natun nisa nu kunnasi malampasan i tadday nga kapurueba nga meparubang nisa. (1 Ped. 5:9) Meraddamman ni Gabriel nga taga-Brazil nga payunir ngana sangawe nu anni i nakoffun nisa tagga ta  Bible study pagalaman yayya. Kunna: “Tagga ta naginnà i ekspiriensa ira na wawwaragi, nagigiammù nga ammu ni Jehova i problema tam ira anna nu nalampasadda danatun, makuà gapa yatun.”

11-12. Ngatta meddu tam nakuan nga alawatan i tadday nga Bible study nga minay ta Kingdom Hall?

¹¹ Tapenu mapprogreso i tadday nga Bible study adde ta bawtismo, mawag tu regular yayya nga makistudy. Mabenefisiowan yayya tatun. (Heb. 10:24, 25) Magga imbitan yayya na mangistudy nisa ta ollu nga pagatendena ta study. Sonu egga ngana yayya ta Kingdom Hall, pagarammattam yayya nga itulu-tuloyna i pakistudy. Kunnasi tam makua yatun?

¹² Meddu nga alawatan i Bible study. (Roma 15:7) Nu matagenona nga malawa yayya ta study ira, magga itulu-tuloyna i umay ta Kingdom Hall. Kumustammu yayya tapus ipakilalam yayya ta tanakuan ngem arianna nakuan matageno nga mepasiranan yayya. Kibbidammu yayya megafu ta baka ari paga nakadattal i mangistudy nisa onu baka busy i mangistudy nisa ta annunganna ira ta Kingdom Hall. Ginnammu tu mapia i kagian na Bible study anna mangipasingakka nisa tu personal nga interes. Anni i efekto na meddu nga pangalawa mu ta Bible study? Piga dagun pagalaman nga bawtisadu si Dmitrii ngem ministerial nga aripan ngana yayya sangawe. Egga i magigiammu tam ta ekspiriensana turi ta ollu yayya nga nakistudy. Istorianna: “Nasingannà na tadday nga brother nga maggudu-gudu nga maginnag ta lawan na Kingdom Hall yayya nga vinulunà nga mattallung. Aru i minaranni nio tapenu makilaladà. Nakaddag ngà tatun. Talaga nagustuakku yatun. Nu puede laman nakuan nga kagaggaw nga egga i study. Tatukku laman nga naekspiriensa yatun.”

13. Anni i efekto na konduktam ta tadday nga Bible study?

¹³ Mangipasingan tu makasta nga ehemplo. Makoffun i konduktam tapenu makumbinsi i Bible study nga naleganna ngana i kinakurug. (Mat. 5:16) Kunnaw i kagian ni Vitalii nga payunir ta Moldova: “Naobserbà i pattolay anna ugali na wawwaragi ta kongregasion. Yatun i nangumbinsi niakan nga i Saksi ni Jehova i kurug nga relihion.”

14. Kunnasi nga makoffun i ehemplom ta tadday nga Bible study tapenu tulu-tuloy yayya nga mapprogreso?

¹⁴ Nige nga mabawtisowan i tadday nga Bible study, mawag labbi nga iyaplikana i magiggigiammuna. Ngem ari tu mabi yatun. Nu maobserba na Bible study nga mabbenefisio ka ta pangiyaplikam ta prinsipio ira na Biblia, mapaguyu yayya nga parigakka. (1 Cor. 11:1) Kunnatun i naekspiriensa ni Hanae nga nakagi ta gafu. Istorianna: “Dati ngana nga kukukuan na wawwaragi i giggigiammuakku  pagalaman nga kuan. Nagigiammù nira nu kunnasi i mabbalin tu makapagaram, minammakoma, anna nu kunnasì mepasingan i aya. Kanayun nga makasta i kagiadda meyannung ta tanakuan. Kayà ku ira nga parigan.”

15. Segun ta Proverbio 27:17, ngatta kofunattam nakuan i tadday nga Bible study nga tulu-tuloy ngana nga makistudy?

¹⁵ Kofunammu i Bible study. Nu kanayun ngana yayya nga makistudy, itulu-tuloy mu nakuan nga mangipasingan tu personal nga interes nisa. (Fil. 2:4) Ngatta ariammu makistoria nisa? Puedem yayya komendan ta makasta ngana ira nga inulina anna kumustammu gapa i pab-Bible study-na, i familiana, anna i trabahuna. Ngem ari ka nakuan makkiavu tu personal ira nga gannug. Danatun i mamaddukko nikamu. Nu kofunammu i Bible study, moffunammu yayya nga mapprogreso adde ta bawtismo. (Bibbigan i Proverbio 27:17.) Regular payunir ngana sangawe si Hanae. Matandaananna paga turi ta ollu yayya nga nakistudy: “Turi ta umaru ngana i kokkofukku ta kongregasion, mas kayà ku ngana i makistudy anna umay ngà lagapa maski nu nabbabbannag ngà. Enjoy ku nu kavulu ku i bagu nga kokkofukku anna nakoffun yatun nio tapenu iyemmakku i pakikkofun turi ira ta ari nga maddayaw kani Jehova. Kayà ku nga mas maddukko kani Jehova anna ta wawwaragi yayya nga nappabawtiso ngà.”

16. Anni paga i makuam tapenu matageno na Bible study nga malawa yayya ta kongregasion?

¹⁶ Nu tulu-tuloy nga mapprogreso anna manguli i Bible study, uffunammu yayya nga matageno nga parte yayya na kongregasion. Makuam yatun nu minammadulo ka. (Heb. 13:2) Kunnaw i matandaan ni Dennis nga taga-Moldova turi ta Bible study pagalaman yayya: “Namippiga nga inimbita dakami na atawà tapenu makisalu-salu ta wawwaragi. Niyistoriada nikami nu kunnasi ira nga inuffunan ni Jehova. Danatun i namasikan nikami. Nakumbinsi kami gapa nga kayà mi i masserbi kani Jehova, anna mabbalin tu makakkasta i pattolemi nu kuammi yatun.” Sonu makualipika ngana nga publisher i Bible study, awayyam gapa yayya nga ivulu ta pamministeriom. Kunnaw i kagian ni Diego nga tadday nga publisher ta Brazil: “Aru nga wawwaragi i nagagal nio nga mevulu ta ministerioda. Yatun i kakastan nga chansa tapenu mas makilalà ira. Durante nga mas makilalà ira, aru gapa i nagigiammù anna mas naddukko ngà kani Jehova anna kani Jesus.”

17. Kunnasi makoffun i elder ira ta Bible study?

¹⁷ Mangiyawa ka tu tiempo ta Bible study ira. Sikamu nga elder, moffunannu i Bible study ira nga mapprogreso adde ta bawtismo nu ipasingannu i aya anna i pangikavurung ta nira.  Awayyana kari nga regularnu ira nga kibbidan ta study ira? Masingadda i interesnu nira nu meraddammannu i ngagadda, mas ngana nu makkomento ngana ira. Awayyana kari nga iyiskediulnu i pakikavulu ta publisher nu mangikondukta yayya tu Bible study? Daka-dakal i meyuffunnu ta Bible study. Kunnaw i kinagi ni Jackie nga payunir ta Nigeria: “Aru nga Bible study ira i makaddag nu mammuadda nga elder balo i namulu nio ta pab-Bible study mi. Kinagi na tadday nga Bible study: ‘Ari vuluvuga kuan yatun na pastor mi. Bisitanna laman i mariku ira anna nu pagadda yayya!’” Makikkistudy ngana yatun nga estudiante.

18. Kunnasi nga meyaplika na elder ira i Kingngua 20:28?

¹⁸ Sanayan anna pagaramman danuri mangistudy. Sikamu nga elder, importante i responsibilidadnu nga uffunan i publisher ira tapenu mabbalin tu efektibo ta ministerioda, nelagum ngana i pab-Bible study. (Bibbigan i Kingngua 20:28) Nu mappasiran i tadday nga wagi nga mangikondukta ta pab-Bible study nu egga ka, awayyam iyofer nga sikaw ngana i mangikondukta. Segun kani Jackie nga nakagi ganuri: “Regular nga kumustan na elder ira i estudiantè ira ta Biblia. Nu marigatan ngà ta pab-Bible study, mangiyawa ira tu makoffun nga tabarang.” Aru i makua na elder ira tapenu pasikannan i nono na mangistudy ira. (1 Tes. 5:11) Niyammung paga ni Jackie: “Kakayà ku nu pagarammannà na elder ira anna nu appresiadda i pappursigì. Makapabannay i kunnatun ira nga uvovug nga kunna paginum tu tanga-basu nga malammin nga danum ta mapatu nga aggaw. Megafu ta komendasiodda, matageno ku nga makasta i kukukuakku anna mas magayayya ngà ta pab-Bible study.”​—Prov. 25:25.

19. Anni i mamagayayya nittam ngamin?

¹⁹ Maski nu awan tu Bible study tam ta maddaggun, awayya tam lagapa makoffun ta tadday nga Bible study nga mapprogreso adde ta bawtismo. Makoffun ittam ta mangistudy nu nakaprepara tu mapia i komento tam anna nu ari tu sittam i maka-aru durante ta pab-Bible study. Kikkofunattam i Bible study ira nu umay ira ta Kingdom Hall anna ipasingattam i makasta nga ehemplo nira. Mapagaram na elder ira i Bible study gukaban na pangiyawa nira tu tiempo anna mapasikadda gapa i nono na mangistudy gukaban na passanay anna pakkomenda nira. Talaga magayayya ittam nu egga i makua tam maski nu baddi laman tapenu uffunan i Bible study nga ayatan anna passerbian si Jehova.