MAGIGIAMMU NGA ARTIKULO 10
Malaffu Nu i “Dana nga Kata-katolay Nu”
‘Arian nu ngana i dana nga kata-katolay nu tuange ta negagangay nga pangnga-pangngua nu.’—COL. 3:9.
KANSION 29 Pamumuhay Ayon sa Aming Pangalan
SUMARIO *
1. Kunnasi i pattolem nige mu nga naki-Bible study?
KUNNASI i pattolem nige mu nga naki-Bible study ta Saksi ira ni Jehova? Baka aru ta nittam i manaki na ngana nga nonopan yatun. Posible gare nga i pagimamma anna i kata-katoletam dati ay nainfluwensian na estandarte naw nga mundo ta fustu anna mali. ‘Awan gafu gari tu iddanama tam anna awan tu Dios tam.’ (Efe. 2:12) Ngem nanguli ngamin yatun turi ta nab-Bible study ittam!
2. Anni i nakannammuammu ta pab-Bible studym?
2 Ta pab-Bible studym, nakannammuammu nga egga i Yamam ta langi nga fermi nga mangiddu ta nikaw. Nalippawa mu gapa nga nu kayà mu mapagayayya si Jehova anna mabbalin tu parte na familia na nga maddayaw ta nisa, dakal i mawag nga uliammu ta pattolem, ta pagimamma mu, anna ta appana-panono mu. Mawag tu itonos mu ngana i pattolem ta atannang ira nga estandarte na.—Efe. 5:3-5.
3. Segun ta Colosas 3:9, 10, anni i ikiddaw ni Jehova ta nittam, anna anni gigiammuattam taw nga artikulo?
3 Si Jehova i Namaratu ta nittam anna Yama tam ta langi. Egga i kepangngattan na nga ikagi nu kunnasi nakuan i kondukta na miembro ira na familia na. Ikiddona gapa nga nige tam nga mappabawtiso, ikagumattam nakuan nga ‘arian i dana nga kata-katolay tam tuange ta negagangay nga pangnga-pangngua tam.’ * (Bibbigan i Colosas 3:9, 10.) Uffunan naw nga artikulo danuri maya nga mappabawtiso tapenu matabbag yaw nga tallu nga pakkiavu: (1) Anni i “dana nga kata-katolay”? (2) Ngatta kayà ni Jehova nga laffutattam yatun? (3) Kunnasi tam nga makua yatun? Nu bawtisadu ittam ngana, moffunan ittam naw nga artikulo tapenu ari ngana nga manoli i ugu-ugali anna annangngua nga parte na dana nga kata-katolay.
ANNI I “DANA NGA KATA-KATOLAY”?
4. Anni i mangipasingan nga egga paga ta tadday nga tolay i “dana nga kata-katolay”?
4 Minakkaliwa i appana-panono anna annangngua na tolay nga egga paga nisa i “dana nga kata-katolay.” Posible nga makasarili yayya, mabi nga mapporay, ari nga minappabalo, anna parayag. Baka kakayà na gapa i maggiraw tu pornograpia anna imoral onu vayolente ira nga pagiraw. Magga egga gapa ira i makasta nga ugali na anna baka makokkonsensia yayya nu makekagi onu makakua yayya tu marake. Ngem kurang i pakkaraga na nga ulian i appana-panono anna annangngua na.—Gal. 5:19-21; 2 Tim. 3:2-5.
Nu laffutattam i ‘dana nga kata-katoletam,’ ari ittam ngana nga kontroladu na minakkaliwa nga ugu-ugali anna annangngua (Innan i parapo 5) *
5. Posible kari nga malsa tam i ngamin nga marake nga appana-panono anna pakkaraga? (Kingngua 3:19)
5 Imperfekto ittam ngamin yayya nga ari tam nga malsa i ngamin nga marake nga appana-panono anna pakkaraga ta futu anna ta nono tam. Yari tu nu mittan, makekagi onu makakua ittam tu gannug ira nga pabbabawyattam. (Jer. 17:9; Sant. 3:2) Ngem nu laffutattam i dana nga kata-katoletam, ari ittam ngana nga kontroladu na minakkaliwa nga ugu-ugali onu annangngua. Nanguli ngana i kata-katoletam.—Isa. 55:7; bibbigan i Kingngua 3:19.
6. Ngatta kayà ni Jehova nga alsattam i marake nga appana-panono anna annangngua?
6 Kayà ni Jehova nga alsattam i marake nga appana-panono anna annangngua tam megafu ta fermi i pangiddu na ta nittam anna kayà na nga magayayya ittam. (Isa. 48:17, 18) Ammu na nga danuri mappa-influwensia ta marake nga pakkaraga ay matakitadda i baggi da anna i tanakuan. Matakitan yayya nu masingan na nga takitattam i baggi tam anna i tanakuan.
7. Segun ta Roma 12:1, 2, anni i dua nga pappiliattam?
7 Nu mittan baka uyawan ittam na kokkofun anna kafamilia tam megafu ta ikagumattam nga ulian i kata-katoletam. (1 Ped. 4:3, 4) Baka kagiadda nga egga mabba i kepangngattattam nga kuan i maski anni nga ikaya tam anna ariattam nakuan ipamavulun nga diktan ittam na tanakuan. Ngem kakurugan na, danuri mammanaki ta estandarte ira ni Jehova ay mainfluwensian na mundo nga immagurayan ni Satanas. (Bibbigan i Roma 12:1, 2.) Dua laman gafu i pappiliattam: Puede nga pattalupaddianattam i dana nga kata-katoletam nga nainfluwensian na liwa anna mundo ni Satanas onu ipamavuluttam nga ulian ittam ni Jehova tapenu mapakasta tam i kata-katoletam sangawe.—Isa. 64:8.
KUNNASIM LAFFUTAN I DANA NGA KATA-KATOLAY?
8. Anni i makoffun tapenu mebita tam i marake nga appana-panono anna annangngua?
8 Ammu ni Jehova nga kawagan i tiempo anna appursigi tapenu mebita tam i marake nga appana-panono anna annangngua. (Sal. 103:13, 14) Pabbalinan ittam ni Jehova tu masirib gukaban na Uvovug na, pasikannan na ittam gukaban na espiritu na, anna uffunan na ittam gukaban na organisasion na tapenu moli i kata-katoletam. Magga egga ngana i neyuffun na nikaw. Ikonsidera tam ngana gafu i makuam ira tapenu mas paga nga malaffu mu i dana nga kata-katolay anna makualipika ka ta bawtismo.
9. Kunnasi naka nga moffunan na Uvovug na Dios?
9 Usammu i Biblia tapenu masingammu tu mapia i kata-katolem. Gitta na ispehu i Uvovug na Dios. Moffunan naka tapenu masingammu nu mepangngo kari i appana-panono, i pabbibidam, anna i kukukuammu. (Sant. 1:22-25) Moffunan naka na mab-Bible study ta nikaw anna tanakuan paga ira nga manakam ta espiritual nga Cristiano. Angngarigan na, awayya daka nga uffunan tapenu makannammuammu i makasta ira nga ugalim anna i pakkafiammu ira gukaban na Biblia. Matudduaddaka gapa nga magaleg tu praktikal ira nga tabarang nga nebase ta Biblia tapenu meyemmammu i marake ira nga annangngua. Sigga-paran si Jehova nga manguffun ta nikaw. Yayya i kapianan nga makoffun ta nikaw megafu ta mabibbig na i mayan na futum. (Prov. 14:10; 15:11) Yari tu kanayukka nakuan nga makimallo ta nisa anna gigiammuammu i Uvovug na kadaggaw.
10. Anni i magigiammum ta nesimmu kani Elie?
10 Kumbinsidu ka nakuan nga i estandarte ira ni Jehova i kapianan. Pammakapianattam i ngamin nga ipakua ni Jehova ta nittam. Mapeggan tu respeto ta baggi danuri mattolay segun ta estandarte na ira. Egga gapa i gakkag da ta pattolay anna kurug tu magayayya ira. (Sal. 19:7-11) Ngem marake i pattuppalan danuri neravvunan i kata-katoleda megafu ta pammanakitadda i estandarte ira ni Jehova. Kunnatun i nesimmu kani Elie. Saksi i magana na. Ngem nebarkada yayya ta katinedyer na. Yari tu nabbalin yayya tu drug addict, imoral, anna minakkoko. Kinagi ni Elie nga nabbalin yayya tu mas minappata-patu anna vayolente. Inamin na, “Kingnguà i ngamin nga netuddu ta nio nga ari nga mepangngo para ta tadday nga Cristiano.” Ngem ari nga nakattaman ni Elie i netuddu ta nisa ta kabbinna. Yayya nga nappa-Bible study uli yayya. Nikaguman na nga iyemmang i marake ira nga annangngua na yari tu na-baptize yayya turi ta 2000. Kunnasi nga nammakapia si Elie ta panuttul na ta estandarte ira ni Jehova? Kinagi na: “Memammo ngana i nono ku anna marenu ngana i konsensià.” * Pakurugan naw nga ekspiriensa nga marake i pattuppalan danuri mammanaki ta estandarte ira ni Jehova. Ngem maski paga kunnatun, sigga-paran si Jehova nga uffunan ira nga manguli.
11. Anni ira i ikalussaw ni Jehova?
11 Gigiammuan nga ikalussaw i ikalussaw ni Jehova. (Sal. 97:10) Mabibbig tam ta Biblia nga ikalussaw ni Jehova i “minappakatannang ira nga mata, i minalladdug nga zila, anna i limi-lima nga mangivuvvu ta inosente nga daga.” (Prov. 6:16, 17) Ikalussaw na gapa danuri “kitapporay anna minannabag.” (Sal. 5:6) Talaga ikalussaw ni Jehova i kunnatun nga ugu-ugali anna annangngua. Yari tu ta tiempo ni Noe, zinaral na i ngamin nga marake megafu ta pinappannu da i davvun tu kinavayolente. (Gen. 6:13) Yaw paga i tadday nga angngarigan. Gukaban ni profeta Malakias, kinagi ni Jehova nga ikalussaw na danuri mapplano tapenu idiborsio i atawa da maski nu awan mabba tu liwa da. Ari nga alawatan na Dios i paddayoda anna panabbagan na ira ta kukukuadda.—Mal. 2:13-16; Heb. 13:4.
Sippaguta ittam nu kanattam i nadaral ira nga kanan. Kunnatun nakuan gapa i matageno tam ta pagangngua tu gannug nga kagian ni Jehova tu marake (Innan i parapo 11-12)
12. Anni i kayà kagian na ‘pallikurattam i marake’?
12 Kayà ni Jehova nga ‘pallikurattam i marake.’ (Roma 12:9) I orihinal nga Griego nga uvovug nga ne-translate tu “pallikuran” ay masikan nga emosion. Kayà natun kagian nga ikala-kalussaw i tadday tu gannug onu imammatan yatun tu kannama-nama. Angngarigan na, kunnasi nu pakanaddaka tu nabadiu onu nabanno? Nu manono mu pagalaman yatun, baka sippaguta ka ngana. Kunnatun nakuan gapa i matageno tam nu manono tam pagalaman nga kuan i tadday nga gannug nga kinagi ni Jehova nga marake.
13. Ngatta mawag tu ibita tam i marake nga appana-panono?
13 Ibita i marake nga appana-panono. Influwensian na nononopattam i kukukuattam. Yari tu nituddu ni Jesus nga ibita tam i appana-panono nga manginfluwensia ta nittam nga magangngua tu madammo nga liwa. (Mat. 5:21, 22, 28, 29) Magga kayà tam nga mapagayayya i Yama tam ta langi. Mawag gafu nga ibita tam insigida i maski anni nga marake nga gannug nga tullung ta nono tam!
14. Anni i ipasingan na pabbibida tam, anna anni ira nga pakkiavu i pannonopattam?
14 Kontrolammu i pabbidam. Kinagi ni Jesus: “I mallawan ta simu, ay maggafu ta futu.” (Mat. 15:18) Masingan ta pabbibida tam i kata-katoletam. Yayya nga iyavu mu yaw ta baggim: ‘Manaki ku kari i malladdug maski nu maperwisiu ngà nu ikagì i kurug? Nu egga ngana i atawà, masingan kari ta pabbidà nga ari ngà makipaf-flirt onu magalembong ta ari ku atawa? Lillitakku kari i mabbida tu bastus nga kunna pallilli ku ta makeyali ira tu taki? Nu mataki i kinagi da nio, kalmadu ngà kari lagapa nga tubbag?’ Makoffun nu pannonopammu danatun nga pakkiavu. Mabuu i tadday nga sinnun nu idage mu i pirasu ira na tela. Megitta i dana nga kata-katolay tatun nga sinnun tapus megitta gapa i marake nga pabbibida ta dage natun ira nga sinnun. Tapenu madaral mu gafu i dana nga kata-katolay, mawag tu tastasammu labbi i marake ira nga pabbida. Nelagum ngana tatun i abusadu, minappateteko, anna bastus nga paguvovug.
15. Anni i kayà kagian na ipato tam i dana nga kata-katoletam ta kayu?
15 Desididu ittam nakuan nga manguli. Nangusa tu angngarigan si apostol Pablo tapenu ipasigo nga desididu ittam nakuan nga ulian i kata-katoletam. Nitura na nga mawag tu ipato tam i dana nga kata-katoletam ta kayu. (Roma 6:6) Desididu si Jesus nga mepato ta kayu tapenu mapagayayya si Jehova. Kunnatun ittam nakuan gapa kadesididu nga laffutan i ugu-ugali anna annangngua nga ikalussaw ni Jehova tapenu mapagayayya tam yayya. Mawag tu kuattam yatun tapenu mapeggan ittam tu marenu nga konsensia anna iddanama nga mattolay tu mannanayun. (Juan 17:3; 1 Ped. 3:21) Daddammattam nga ari tu si Jehova i magadjust tu estandarte na ira para ta nittam. Sittam i mawag nga manguli tapenu matuttul tam i estandarte na ira.—Isa. 1:16-18; 55:9.
16. Ngatta ari ka nakuan magimmang nga labanan i marake ira nga pakkaraga?
16 Kammu magimmang nga labanan i marake nga pakkaraga. Maski nu bawtisadu ka ngana, mawag lagapa tu labanammu i marake ira nga pakkaraga. Ikonsidera i ekspiriensa ni Maurício. Ta kabbinna, homoseksual i pattolena. Ngem nakilala na i Saksi ira ni Jehova tapus nappa-Bible study yayya. Aru i inuli na ta pattolena adde ta nabawtisowan yayya ta 2002. Ngem maski nu piga ragun ngana nga masserbi kani Jehova si Maurício, kunnaw lagapa i kinagi na: “Aminakku nga nu mittan, laba-labanakku lagapa i marake ira nga pakkaraga.” Ngem arian na nga nipamavulun nga makkafi i nono na megafu tatun. Kunnaw lallagu i kinagi na: “Masikan i nono ku megafu ta ammù nga nu desididu ngà nga labanan danatun nga pakkaraga, mapagayayya ku si Jehova.” *
17. Sitaw ka napagaram ta ekspiriensa ni Nabiha?
17 Ipakimallo i uffun ni Jehova anna mattalo ta espiritu na, ari tu ta sikammu. (Gal. 5:22; Fil. 4:6) Desididu ittam nakuan nga laffutan i dana nga kata-katoletam anna ari ngana nga ibaruasi yatun uli. Ikonsidera i ekspiriensa ni Nabiha. Annam laman i dagun na turi ta pinanawan yayya na yama na. Kinagi na: “Kuruga natakitan ngà ta nesimmu.” Durante nga dumakal si Nabiha, kanayun yayya nga mapporay anna mabi mappatu i ulu na. Nallaku gapa yayya tu drugs tapus naaresto yayya anna nefuku tu piga nga ragun. Egga ira i Saksi nga nallayyagayya ta affukutan tapus ni-Bible study da yayya. Namegafu nga nanguli si Nabiha. Kinagi na: “Mabi laman para ta nio nga iyemmang i karuan ira nga bisiù. Ngem talaga narigatan ngà nga iyemmang i passigariliu.” Maturu tu tanga-ragun nga nilabanan ni Nabiha yatun nga bisiu adde ta neyemmanna lagapa yatun. Kunnasi? Kinagi na: “I kanayun nga paddasal ku kani Jehova i pinakanakoffun ta nio tapenu meyemmakku yatun.” Kunnaw ngana i kakkagian na ta tanakuan: “Nu makayà i manguli tapenu mapagayayya ku si Jehova, siguradu ngà gapa nga makua na maski sinni yatun!” *
AWAYYAM NGA MAKUALIPIKA TA BAWTISMO!
18. Segun ta 1 Corinto 6:9-11, anni i nakua na aru ta aripan na Dios?
18 Dati nga marake i kata-katolay na karuan nga lallaki anna babbay nga pinili ni Jehova ta ollu siglo tapenu makipammaguray kani Cristo. Angngarigan na, dati ira nga minannallaw onu minakkidallaw, homoseksual, anna akkoko. Ngem nawayya da nga ulian i kata-katoleda ta uffun na masanto nga espiritu na Dios. (Bibbigan i 1 Corinto 6:9-11.) Minillion ngana gapa sangawe i noffunan na Biblia nga ulian i kata-katoleda. * Neyemmadda i marake ira nga annangngua nga mariga nga meyemmang. Pakurugan na ehemplo da nga mawayyam nga ulian i kata-katolem anna iyemmang i marake ira nga annangngua tapenu makualipika ka ta bawtismo.
19. Anni i gigiammuattam ta tumunug nga artikulo?
19 Ari makalanno para tari ira ta maya nga mappabawtiso nga laffutan laman i dana nga kata-katoleda. Mawag gapa nga ikagumadda nga ibaruasi i bagu nga kata-katolay. Ta tumunug nga artikulo, gigiammuattam nu kunnasi tam nga makua yatun anna nu kunnasi ittam nga moffunan na tanakuan.
KANSION 41 Pakinggan Sana ang Aking Dalangin
^ par. 5 Tapenu makualipika ta bawtismo, mawag nga sigga-paran ittam nga ulian i kata-katoletam. Mammuattam taw nga artikulo nu anni i ugu-ugali anna annangngua ira nga parte na dana nga kata-katolay, nu ngatta mawag tu alsattam danatun, anna nu kunnasi tam nga makua yatun. Magigiammu tam gapa ta tumunug nga artikulo nu kunnasi tam tulu-tuloy nga mebaruasi i bagu nga kata-katolay maski nu bawtisadu ittam ngana.
^ par. 3 KEBALINAN NA TERMINO: I kayà kagian na ‘arian i dana nga kata-katolay nu’ ay alsan onu laffutan i ugu-ugali onu pakkaraga nga ikalussaw ni Jehova. Mawag tu mamegafu tam nga kuan yatun nige paga na bawtismo.—Efe. 4:22.
^ par. 10 Nu kayà mu mammuan i buu nga istoria na pattolena, innan i artikulo nga “Binago ng Bibliya ang Kanilang Buhay—‘Dapat Akong Manumbalik kay Jehova’” nga nepublisa ta Abril 1, 2012 nga isyu na Ang Bantayan.
^ par. 16 Nu kayà mu mammuan i buu nga istoria na pattolena, innan i artikulo nga “Binago ng Bibliya ang Kanilang Buhay—‘Napakabait Nila sa Akin’” nga nepublisa ta Mayo 1, 2012 nga isyu na Ang Bantayan.
^ par. 17 Nu kayà mu mammuan i buu nga istoria na pattolena, innan i artikulo nga “Binago ng Bibliya ang Kanilang Buhay—‘Galít Ako sa Mundo’” nga nepublisa ta Oktubre 1, 2012 nga isyu na Ang Bantayan.
^ par. 18 Innan i kahon nga “ Pakastan na Biblia i Pattolay.”
^ par. 64 DESKRIPSION NA LETRATU: I pallaffu ta marake nga ugu-ugali anna annangngua ay kunna pallaffu ta dana nga sinnun.
