1. Anni ira i karuan nga dorob ta Biblia, anna kunnasi tam nga mabenefisiowan ta pattuppal taw?

NANGIYAWA si Jehova nittam tu espesipiko ira nga bilin gukaban na Uvovugna. Angngariganna, igammana i seksual nga immoralidad, idolatriya, pakkoko, anna pagillellaw. (1 Cor. 6:9, 10) Nangiyawa paga i Ana na Dios nga si Jesu-Cristo tu mariga ngem makapa-interes nga bilin ta disipulosna: “Umay kamu . . . ta ngamin nga totolay ta ngamin nga lugu-lugar anna pabbalinan nu ira tu disipulò. Bawtisowan nu ira ta ngagan na Yama, na Ana, anna Espiritu Santo. Tudduan nu ira tu parulattad-da ngamin i bili-bilik-ku nikamu. Ay takkilalan nu: kanayun ngà makitappaddian nikamu adde ta panuppalan na mundo.” (Mat. 28:19, 20) Kurug tu proteksion i dorob anna bili-bilin na Dios! Makoffun i panuttul taw tapenu mas dumakal i respeto ta baggi, makasta nga gawa-gawayyan, anna magayaya nga familia. Ngem i mas importante, makeyawa nittam tu fabor anna bendision ni Jehova i matalo nga pattuppal tam ta bili-bilinna kasali ngana i bilinna nga mallayyagayya.

2, 3. (a) Ngatta ari tu mangiyawa i Biblia tu bili-bilin ta kada situasion ta pattolay? (b) Anni ira nga pakkiavu i matabbag taw nga artikulo? (Innan i letratu ta gafu na artikulo.)

² Ngem aru i situasion nga awan tu espesipiko nga bilin na Biblia. Angngariganna, awan tu detalyadu nga bilin na Biblia meyannung  ta mepangngo nga assinnun ira na Cristiano. Kunnasi nga masingan taw i sirib ni Jehova? Megafu ta nadduruma nga nasion anna ta pappasa na dekada, nadduruma i estilo anna kostumbre ta assinnun. Nu nangiyawa i Biblia tu lista na mepangngo nga estilo na assinnun, baka ari ngana nga meyaplika yatun ta kaggawattam. Yatun i rason nu ngatta ari nangiyawa i Biblia tu detalyadu nga bili-bilin meyannung ta pappili na Cristiano tu trabahu, pakiyoru, anna dibersion. Egga gafu lallaguray na kada tadday anna ulu na familia nga maddesision meyannung taw nga ganna-gannug.

³ Kayana kari kagian nga ari importante kani Jehova nu anni i piliattam nu maddesisiottam, nga i karuan ay awayyana nga daka-dakal i efektona ta pattoletam? Apruban kari na nelangitan nga Yama tam i anni laman nga desisiottam basta ari mekontra ta dorob na Biblia? Nu awan tu espesipiko nga dorob, kunnasi tam mammuan nu anni i makapagayaya kani Jehova?

4, 5. Kunnasi maka-afekto nittam anna ta tanakuan i personal ira nga desisiottam?

⁴ Kagian na karuan nga ari importante nu anni i desisiottam. Ngem tapenu makapaddesisiottam nga makapagayaya kani Jehova, mawag nga ikonsidera tam i dorob anna prinsipio nga egga ta Biblia anna tuttulan yatun. Angngariganna, tapenu malawà tam i fabor ni Jehova, kawagattam nga maddesision mekunnay ta dobna ta daga. (Gen. 9:4; King. 15:28, 29) Makoffun i pakimallo tapenu makapaddesisiottam mekunnay ta prinsipio anna dorob na Biblia.

⁵ Egga talaga efekto na madammo ira nga personal nga desision ta espiritualidad tam. Egga i efektona ta relasiottam kani Jehova i kada piliattam​—mapia onu marake. Nu mapia i desisiottam, mapaladda i relasiottam ta Dios, ngem madaral yatun nu ari fustu i desisiottam. Awayyana nga mappeligro ta espiritual i tanakuan megafu ta mali nga desisiottam onu baka madaral paga lagu i pattaradday na kongregasion. Yari tu importante i personal ira nga desisiottam.​—Bibbigan i Roma 14:19; Galacia 6:7.

6. Anni nakuan i mangigiya ta desisiottam ira?

⁶ Anni i mawag nga kuattam nu awan tu direkta nga bilin na Biblia? Ta kunnatun nga situasion, responsibilidad tam nga usitakkan i detalye ira anna maddesision nu anni i apruban anna bendisionan ni Jehova, ari nga nu anni laman i kayà tam.​—Bibbigan i Salmo 37:5.

7. Nu awan tu direkta nga bilin ta Biblia, kunnasi tam mammuan nu anni i kayà ni Jehova nga kuattam ta partikular nga situasion?

⁷ Baka manonomu, ‘Kunnasi tam mammuan i kayà ni Jehova nu awan tu espesipiko nga bilin ta Biblia meyannung ta tadday nga gannug?’ Kagian na Efeso 5:17: “Aleran nu i ikaya na Yafu nga ipakua nikamu.” Nu awan tu direkta nga bilin ta Biblia, kunnasi tam nga malippawa i uray na Dios? Gukaban na pakimallo anna pangalawà ta pangigiya na masanto nga espiritu.

8. Kunnasi nga nalippawa ni Jesus i kayà ni Jehova nga kuanna? Mangiyawa tu angngarigan.

⁸ Ikonsidera nu kunnasi nalippawa ni Jesus i kayà na Yamana nga kuanna. Ta dua nga situasion, nakimallo labbi si Jesus nige nga milagro nga pinakanna i dakal nga grupo. (Mat. 14:17-20; 15:34-37) Ngem pinammanakitanna nga pabbalinan tu tinapay i batu turi ta mabisin yaya anna sinenta na Diablo ta tana. (Bibbigan i Mateo 4:2-4.) Megafu ta kabisaduna i appana-panono na Yamana, ammu ni Jesus nga ari tu fustu  nga pabbalinanna i batu tu tinapay. Wan, ammuna nga ari nga uray na Dios nga usan yatun nga pakawayya para ta personal nga pammakapiananna. Yatun i mangipasingan nga nammakatalo yaya ta giya anna uffun ni Jehova.

9, 10. Anni i makoffun nittam nga masirib nga makapaddesision? Iyilustra.

⁹ Tapenu makapaddesisiottam tu masirib kagitta ni Jesus, mawag nga mattalo tam ta giya ni Jehova. Mawag tu maddesisiottam mekunnay taw nga masirib nga uvovug: “Mattalo ka kani Jehova ta interu nga futum, anna ariammu nga mattalo ta mismu nga pakalippawamu. Ta ngamin nga laka-lakagmu ikonsideram yaya, tapenu tununganna i dala-dalammu.” (Prov. 3:5-7) Makoffun i pangammu ta appana-panono ni Jehova gukaban na paggigiammu tu Biblia tapenu malippawa tam nu anni i kayàna nga kuattam ta partikular nga situasion. Nu mas familiar tam ta appana-panono ni Jehova, mabbalin tu mas sensitibo i futu tam ta giyana ira.​—Eze. 11:19, ftn.

¹⁰ Tapenu meyilustra: Panonotammu i atawa nga babay nga mash-shopping. Egga nakorsonadanna nga sapatus, ngem sobra nginana. Nanonona, ‘Anni pano sangaw i makagi na atawà nu maggasto ngà tu kunnatun kadakalna?’ Awayyana tu ammuna ngana i tabbag maski nu arianna kavulu i atawana. Ngatta? Megafu ta kapaddu na tiempo na pakkavuluda nga magatawa, kabisaduna ngana i appana-panono na atawana meyannung ta limitado nga badyetda. Megafu tatun, ammuna ngana nu umanugu tamma i atawana nu gatanganna yatun nga sapatus. Kunnatun gapa i nekegittanna kani Jehova, durante nga sesenu tu mabbalittam tu familiar ta appana-panono anna dala-dalanna, mas malippawa tam nu anni i kayàna nga kuattam ta nadduruma nga situasion.

11. Anni ira nga pakkiavu i pannonopattam kada mabbibbig onu maggigiammu tam tu Biblia? (Innan i kahon nga “ Kada Gigiammuan i Biblia, Nonopammu.”)

¹¹ Tapenu mammuattam i appana-panono ni Jehova, mawag tu prayoridad tam i personal nga paggigiammu. Kada bibbigan onu gigiammuattam i Biblia, nonopattam, ‘Anni i ilammuyagna yaw meyannung kani Jehova, ta matunung nga dala-dalanna, anna ta appana-panonona?’ Mawag tu parigattam si salmista David, nga nangikansion: “Ituddum niakan i annangnguam ira, AFU; em-mu ira niakan nga ipakannammu. Ta panuttul ta kakurug mu em-mà nga tudduan, ta sikaw laman i Dios ku nga manavvu niakan; sikaw i kanayun nga ek-ku pammakatalakkan.” (Sal. 25:4, 5) Durante nga monag nga pana-panonotammu i teksto ta Biblia, ikonsideram yaw ira nga pakkiavu: ‘Kunnasì nga meyaplika yaw nga informasion ta familià? Sitaw ku nga puede iyaplika yatun? Ta balay? Ta trabahu? Ta eskuela? Ta ministerio?’ Nu ammu tam nu sitaw nga meyaplika i material, mas malogon nga malippawa tam nu kunnasi meyusa yatun.

12. Kunnasi makoffun nittam i publikasion anna i study ira tapenu mas mammuattam i appana-panono ni Jehova meyannung ta nadduruma nga ganna-gannug?

¹² I panuttul ta nebase-Biblia nga giya ta organisasion ni Jehova, i tadday paga nga makoffun tapenu mas mabbalin tu familiar ta appana-panonona. Angngariganna, nakua i Watch Tower Publications Index anna i Tulong sa Pag-aaral ng mga Saksi ni Jehova tapenu moffunattam nga magigiammu i appana-panono ni Jehova ta nadduruma nga situasion nga mawag tu sittam i maddesision. Mabenefisiowattam paga gukaban na pagginna tu mapia ta study anna ta pakkomento  tatun. Makoffun i monag nga pannonono ta nagigiammu tam tapenu mas malippawa anna maparigattam i appana-panono ni Jehova. Gukaban na malappo nga pangusa ta probision ni Jehova ta espiritual nga pappakan, sesenu nga mas mabbalittam tu familiar ta dala-dalanna. Megafu tatun, mas makakua tam tu personal nga desision nga bendisionan na Dios.

MAPPEGIYA TA APPANA-PANONO NI JEHOVA NU MADDESISION

13. Kunnasi makoffun i pakannammu ta appana-panono ni Jehova tapenu makapaddesision tu masirib?

¹³ Gigiammuattam i tadday nga angngarigan nu kunnasi makoffun i pakannammu ta appana-panono ni Jehova tapenu makapaddesision tu masirib. Bilang evanghelisador na Pappatulan, baka kayà tam i mabbalin tu regular payunir. Tapenu posible yatun, igafu tam nga pasimpleyan i pattoletam. Ngem kavurungattam gapa nu talaga kari mabbalittam nga magayaya maski nu baddi laman i material tam. Siempre awan tu nebilin ta Biblia nga mappayunir ittam; awayya tam masserbi kani Jehova bilang matalo nga publisher. Ngem nipasiguradu ni Jesus nittam nga makalawà tu abundansia nga bendision danuri massakrifisio para ta Pappatulan. (Bibbigan i Lucas 18:29, 30.) Ipasingan paga na Biblia nga makapagayaya kani Jehova i boluntario ira nga sakrifisio nga dayaw tam anna i pangiyawa segun ta madisidi tam para ta interes na kurug nga paddayarayaw. (Sal. 119:108; 2 Cor. 9:7) Base taw ira nga punto nga napavulunan tu pakimallo ta pangigiya, ariattam kari malippawa i appana-panono ni Jehova? Makoffun i monag nga appana-panono taw ira tapenu makapaddesisiottam nu anni i praktikal nittam anna malawa tam i bendision na nelangitan nga Yama tam.

14. Kunnasim mannammuan nu makapagayaya kani Jehova i tadday nga estilo na assinnun?

¹⁴ Gigiammuattam paga i tanakuan nga angngarigan: Baka kakayàmu i tadday nga estilo na assinnun nga posible nga ari nga makasta ta paningan na karuan ta kongregasion. Ngem ammum nga awan tu espesipiko nga bilin ta Biblia nga mangigamma tatun. Anni i pagimamma ni Jehova tatun nga gannug? Kunnaw i tabarang ni apostol Pablo: “Karagatak-ku gapa tu mabbisti i babbay ta mepangngo anna umangay laman. I hustu nga abbisti ay ari tu ma-arte nga katagetay na vu, onu mangina nga alahas, onu mangina nga bistida; ngem i bisti na ay i mapia nga pangnga-pangngua nga mekunnay ta babbay nga makkagi  tu nespirituan i attolay da.” (1  Tim. 2:9, 10) Meyaplika gapa yaw nga prinsipio ta Cristiano ira nga lallaki. Bilang dedikado nga masserbi kani Jehova, ari tam laman nga pakavurungan i personal nga kayà tam ngem maski gapa i efektona ta tanakuan na assinnun anna itsura tam. I aya anna i pakannammu ta limitasiottam i mamaguyu nittam nga ikonsidera gapa i opinion na wawwaragi tapenu malisiattam nga mesiddukal ira. (1 Cor. 10:23, 24; Fil. 3:17) Makoffun i pangitalatto ta nono tam ta kagian na Biblia tapenu malippawa tam i appana-panono ni Jehova taw nga gannug anna igiyana ittam nga makakua tu desision nga makapagayaya sa.

15, 16. (a) Anni i matageno ni Jehova nu ariattam immangan nga nonopan i immoral nga ganna-gannug? (b) Nu mappili tam tu dibersion, kunnasi tam mammuan nu anni i makapagayaya kani Jehova? (c) Kunnasi tam nakuan magangngua tu madammo ira nga desision?

¹⁵ Mabibbig ta Biblia nga marraddam si Jehova nu marake i kukukuan na totolay anna nu ‘kanayun nga marake ngana laman i egga ta nonoda.’ (Bibbigan i Genesis 6:5, 6.) Malippawa tam taw nga ari tu fustu i seksual nga paffantasia megafu ta mappange yatun ta serioso nga liwa nga igamma na Biblia anna ari tu mekunnay ta appana-panono ni Jehova. Nitura ni apostol Santiago: “I ka-uto nga maggafu ta langi ay marenu. Memammo, masippo, minakkikkofun, minaggallallo, anna mavvunga ta mapia nga annangngua; ari tu mamadduma-ruma anna minaggappa-appe.” (Sant. 3:17) Megafu ta ammu tam yaw, mawag nga lisiattam i dibersion nga manikkag ta madaping nga appana-panono anna pakkaraga. Ari tu mawag nga makkiavu i makalippawa nga Cristiano nu mepangngo kari i tadday nga libru, pelikula, onu gayam nga ikalussaw ni Jehova. Egga ta Uvovugna i manawag nga pagimammana ta kunnatun nga ganna-gannug.

¹⁶ Awayyana nga madesisionan i aru nga ganna-gannug gukaban na nadduruma nga metodo, ngem makapagayaya lagapa kani Jehova. Ta madammo ira nga desision, makasta nu karuan i makitabarang ta elder ira onu ta manakam ira nga Cristiano. (Tito 2:3-5; Sant. 5:13-15) Ngem ari mepangngo nga ikiddaw nga ira i maddesision para nittam. Mawag tu penaman na kada Cristiano i pakawayyana nga maningan ta nadduman na mapia anna marake. (Heb. 5:14) Kawagattam ngamin i maddesision mekunnay ta kinagi ni Pablo: “Mawag tu akkatan na kataggi-tadday i karga na laggapa,” onu i responsibilidadna.​—Gal. 6:5.

17. Kunnasi tam mabenefisiowan nu makapagayaya kani Jehova i desisiottam ira?

¹⁷ Maddukko tam kani Jehova nu ibase tam i desisiottam ta appana-panonona. (Sant. 4:8) Malawà tam i fabor anna bendisionna. Patuyagganna yatun i pangurug tam ta nelangitan nga Yama tam. Yari tu mappegiya ittam ta bilin anna prinsipio ira ta Biblia megafu ta ipalippawana yatun ira i appana-panono ni Jehova ta ganna-gannug. Siempre, aru paga i awayya tam magigiammu meyannung kani Jehova. (Job 26:14) Gukaban na appursigi, mala tam ngana i sirib, pakannammu, anna pakalippawa tapenu makapaddesision tu masirib. (Prov. 2:1-5) Mappasa i ideya anna plano na imperfekto nga totolay, ngem kinagi na salmista meyannung kani Jehova: “I plano na ay mannanayun adde noka, anna masserbi ta ngamin nga ginaka.” (Sal. 33:11) Wan, makakua tam tu kapianan nga personal ira nga desision nu mekunnay i appana-panono anna kukukuattam ta appana-panono na kuruga masirib nga Dios tam, si Jehova.