Natagenomu kari ngana nga awan tu meyuffummu ta marraddam ta patay na ideddukanna? Nu mittan, ari tam ammu nu anni i awayya tam kagian onu kuan​—yari tu awan ngana laman tu kuattam onu kagian. Ngem egga ira praktikal nga ganna-gannug nga awayya tam kuan.

Maruddu nga makoffun i presensia tam anna i simple nga pakkagi nira tu “condolence.” Ta aru nga kultura, efektibo nga pangipasingan tu pangikavurung i paggakko onu i paki-alamanu ta natayan. Nu kayà na natayan i maki-istoria, magginna anna makisimpatia ka. I pinakamakasta paga, uffunan i natayan, awayyana tu gukaban na pagangngua ta trabahu ta balay kagitta na pallutu, pabbantay ta ánana, onu panguffun ta unnug ta tarag nu ikiddona yatun. Mas makoffun yatun anne ta maski anni nga makasta nga uvovug.

Sonu kua, awayyam istorian i makasta nga kualidad onu makapagayaya nga ekspiriensam turi kavulumu i natay. Baka mabannayan paga i natayan nga ginnan ira yatun. Angngariganna, kinagi ni Pam, nga annam nga ragun ngana i nappasa turi ta natay i atawana nga si Ian: “Egga ira istorian na tanakuan meyannung kani Ian nga ariakku ammu dati, nga yatun i mamagayaya ta futù.”

Segun ta report na researcher ira, magaru ta natayan i nakalawà tu uffun turi ta gafu laman ngem napagurayan ngana ira ta pappasa na tiempo megafu ta okupadu ngana ta pattoleda i kokkofudda. Yatutta kanayun nakuan nga kumustammu i natayan nga kofummu. * Appresian na magaru ta natayan i kunnatun nga appursigi tapenu mabanna-bannayan ira ta nabayag nga mawawan nga daddam.

Ikonsidera i nesimmu kani Kaori, Japanese nga mabbing nga grabe nga nafektan ta patay na yenana tapus tumunug nga natay i manangna 15 vulan laman i nappasa. Mabbala-balo yaya ta kanayun nga panguffun na matalo nga kokkofunna. Si Ritsuko i tadday tatun, nga dakal i nakkakanna kani Kaori, anna nappursigi nga mabbalin tu madukko nga kofunna. “Ta kakuruganna,” kinagi ni Kaori, “Ari ngà masaya tatun. Manaki ku nga egga manali kani yenà, anna awan gamma tu makakua tatun. Ngem megafu ta pattratu ni Mama Ritsuko niakan, naddukko ngà sa. Makkavulu kami nga mallayyagayya anna maki-study kada ligguan. Kanayunnà nga imbitan nga makkafe, kuman, anna kanayun nga turakkannà anna ipamaddenà tu card ira. Makasta i influwensia niakan na positibo nga ugali ni Mama Ritsuko.”

Dose ragun ngana i nappasa turi natay i yena ni Kaori, anna ta maddaggun, masserbi ngana yaya tuange ta atawana bilang ngamin-tiempo nga ebanghelisador. “Ikavurungannà lagapa ni Mama Ritsuko,” kunni Kaori. Kada lubbe ngà, kanayukku yaya pasiaran anna kakayà ku i makilallang sa.”

I tadday paga nga nabenefisiowan ta tulu-tuloy nga passuporta ay si Poli, Saksi ni Jehova ta Cyprus. Masippo i atawa ni Poli, si Sozos, nga makasta i ehemplona nga Cristiano nga pastor megafu ta kanayun nga imbitanna ta baleda nga kuman i ulila anna balu ira. (Santiago 1:27) Kaddaraddam ta natay si Sozos ta edad 53 megafu ta tumor ta utò. “Napawanannà tu matalo nga atawa nga nakavulu ku ta unag na 33 dagun,” kinagi ni Poli.

Kabalin na tanam, nagali si Poli ta Canada kavulu i 15 anios nga uriang nga anàna nga si Daniel. Namegafu nga nakikavulu ira tatun ta kongregasion na Saksi ira ni Jehova. “Awan tu ammu na kokkofukku ta bagu nga kongregasiommi nu anni i nesimmu anna i ziga-riga nga nappasammi,” kinagi ni Poli. “Ngem ariadda lagapa nagimmang nga arannian anna banna-bannayan kami gukaban  na makonsiderasion nga uvovug anna praktikal nga uffun. Talaga nabalor yatun nga uffun, netallugaring tatun nga tiempo nga talaga magawag tu yama i anaku! Kuruga dakal nga uffun kani Daniel i pangipasingan tu personal nga interes danuri mangiyorollu ta kongregasion. Kagitta na nu egga gathering da onu mabbasketbol ira, siguraduadda nga kasali si Daniel.” Parehu nga makasta i paddia-paddian na mattena ta maddaggun.

Siguradu nga aru i praktikal nga makua tam tapenu moffunan anna mabanna-bannayan i maraddam. Banna-bannayan ittam gapa na Biblia gukaban na makapagayaya nga iddanama ta mappange.