1, 2. (a) Anni i pagimamma na Saksi ira ni Jehova ta Biblia? (b) Anni i paboritom nga parte na Biblia?

TAGIBALORAN na Saksi ira ni Jehova i Biblia. Mangiyawa yaw tu mapattalakkan nga instruksion anna uffun tapenu mabannayan anna mapeggattam tu iddanama. (Roma 15:4) Imammatattam i Biblia nga “uvovug na Dios,” ari tu pinakkirivu nga ideya na totolay.​—1 Tes. 2:13.

² Siguradu nga egga paborito tam nga parte ira na Biblia. Paborito na karuan i Evanghelio, nga makakkasta i pinangiyilustrana ta personalidad ni Jehova nga masingan ta Anana. (Juan 14:9) Kakayà gapa na karuan i parte na Biblia nga egga profesiyana​—kagitta na Nepakannammu, nga mangipasingan ta “ganna-gannug nga mesimmu ta mappange.” (Nep. 1:1) Sinni gapa i ari nga mabanna-bannayan ta Salmo ira onu i ari makala tu praktikal nga leksion ta libru na Proverbio? Talaga nga libru para ta ngamin i Biblia.

3, 4. (a) Anni i pagimamma tam ta publikasiottam ira? (b) Anni ira nga publikasion i malawa tam nga para ta espesipiko nga grupo na totolay?

³ Megafu ta tagibalorattam i Biblia, tagibalorattam gapa i nebase-Biblia ira nga publikasiottam. Angngariganna, appresiattam i espiritual nga makan nga malawà tam gukaban na libru,  brosiur, magazina, anna tanakuan paga ira nga literatura. Ammu tam nga makoffun yaw ira nga probision ni Jehova tapenu mattalupaddiattam nga alerto, nabattug ta nespirituan nga makan, anna “masikan ta angngurug.”​—Tito 2:2.

⁴ Fuera paga ta publikasion ira nga para ta ngamin nga Saksi ni Jehova, makalawà tam paga tu nebase-Biblia ira nga material nga para ta espesipiko ira nga grupo. Nadisenio i karuan nga material para ta kabataan; makoffun gapa ta magana i karuan. Neprepara para ta ari tu Saksi i magaru ta neyimprenta nga publikasiottam anna i egga ta website tam. Yatun nga abundansia nga nespirituan nga makan i mangiperaddam nittam nga tuttuppalan ni Jehova i promesana nga “magangngua para ta ngamin nga totolay tu fiesta nga napakaru i maka-makan.”​—Isa. 25:6.

5. Anni i masiguradu tam nga appresian ni Jehova?

⁵ Siempre aru nittam i kakayàna nga aru nakuan i oras tam nga mabbibbig tu Biblia anna nebase-Biblia ira nga publikasion. Makasiguradu ittam nga appresian ni Jehova i appursigi tam nga usan i tiempo tam nga ‘kuan ngamin i adde na awayya tam’ gukaban na regular nga pabbibbig tu Biblia anna personal nga paggigiammu. (Efe. 5:15, 16) Kakuruganna, ari tam kanayun nga mabibbig i ngamin nga nespirituan nga makan nga nalawà tam. Ngem mawag nga magimmugug tam ta ari mataga-tageno nga peligro. Anni yatun?

6. Anni i posible nga rason nga ariattam mabenefisiowan ta karuan nga probision ira ni Jehova?

⁶ Egga i peligro nga ariattam mabenefisiowan ta karuan nga espiritual nga probision megafu ta pagabbo tam nga ari meyaplika nittam. Angngariganna, kunnasi nu gittana ari nga meyaplika ta situasiottam i tadday nga parte na Biblia? Onu ari nga sittam i primero nga nediseniowan na tadday nga publikasion? Ariattam kari ngana tagibaloran yatun onu baka ariattam ngana paga lagu vuluvuga bibbigan? Nu kunnatun, awayyana tu fugaddattam i baggi tam nga mabenefisiowan ta informasion nga dakal nakuan i meyuffunna nittam. Kunnasi tam nga malillitan yatun nga silu? I pinaka-importante, daddamman nakuan na kada tadday nittam nga i Dios i Paggafuan na espiritual ira nga probisiottam. Kinagina gukaban ni profeta Isaias: “Sakan, si Jehova, i Diosmu, i Tadday nga manuttuddu nikaw tapenu mabenefisiowakka.” (Isa. 48:17) Makoffun nu ikonsidera tam i tallu nga suhestion tapenu mabenefisiowan ta pabbibbig ta ngamin nga parte na Biblia anna ta nadduruma nga klase na espiritual nga makan nga malawà tam.

7. Ngatta mawag tu palawattam i nono tam nu mabbibbig tu Biblia?

⁷ Palawammu i nonomu nu mabbibbig ka. Manawag i kagian na Biblia nga “ngamin i egga ta Masanto nga Tura ay naggafu ta Dios” anna pakabenefisiowattam. (2 Tim. 3:16) Fustu nga nakadirekta ta tadday onu ta grupo na totolay i karuan nga parte na Biblia. Yari tu mawag nga bibbigattam yatun nga alawa i nono tam. Kinagi na tadday nga brother: “Kada bibbigakku i Biblia, nononopakku nga egga ira leksion nga magigiammù ta teksto ira.” Kinagina paga: “Yatun i nakoffun niakan nga ari laman basta mabbibbig, nu ari, ammuan i leksion na kada teksto.” Nige tam nga bibbigan i Biblia, makasta nu ipakimallo tam nga mapeggan tu alawa nga nono anna sirib tapenu malippawa tam i leksion nga kayà ni Jehova nga magigiammu tam.—Ezra 7:10; bibbigan i Santiago 1:5.

8, 9. (a) Anni ira i iyavu tam kada mabbibbig tu Biblia? (b) Anni i ituddu nittam na kualipikasion ira na elder meyannung kani Jehova?

⁸ Makkiavu. Durante nga mabbibbig ka tu Biblia, magimmakka tu manganannuan tapus iyavumu: ‘Anni i itudduna yaw niakan  meyannung kani Jehova? Kunnasì nga iyaplika yaw ta pattolè? Kunnasì meyusa yaw tapenu uffunan i tanakuan?’ Siguradu nga mas aru i magigiammu tam ta pabbibbig tu Biblia nu usattam yatun ira nga pakkiavu. Angngariganna, nonopattam i kualipikasion ira na Cristiano nga elder nga mabibbig ta Biblia. (Bibbigan i 1 Timoteo 3:2-7.) Megafu ta ari nga elder i magaru nittam, awayyana nga manono tam nga baddi laman i keyusanna yaw nga teksto ta pattoletam. Ngem nu ikonsidera tam i karuan ta magaru nga tabbag ta tumunug ira nga pakkiavu, mammuattam nga mabenefisiowattam taw ira nga nelista nga kualipikasion.

⁹ Anni i itudduna yaw niakan meyannung kani Jehova? Gukaban na pangiyawa ni Jehova taw ira nga kualipikasion, ipasinganna nga atannang i estandartena para ta masserbi ira nga elder. Ekspektanna nga mabbalin ira tu makasta nga ehemplo, anna egga tattabbagadda sa ta panangngalda ta kongregasion nga “ginatang na ta daga na Ana na.” (King. 20:28) Kakayà ni Jehova nga matageno tam nga protektadu tam ta panangngal na natunno nga koffun nga papastor. (Isa. 32:1, 2) Yatun ira nga kualipikasion na elder nga egga ta Biblia, iperaddamna nga kuruga ikavurungan ittam ni Jehova.

10, 11. (a) Nu bibbigattam i kualipikasion ira na elder, kunnasi tam meyaplika yatun nga informasion ta pattoletam? (b) Kunnasi tam meyusa yatun nga informasion tapenu moffunan i tanakuan?

¹⁰ Kunnasì nga meyaplika yaw nga informasion ta pattolè? Sinaggi-mittan nakuan nga usitakkan na tadday nga elder i baggina nu mekunnay paga i kukukuanna ta espiritual ira nga kualipikasion, anna innan nu anni paga i awayyana nga pakastan. Mawag tu nonopan tu mapia na tadday nga brother nga makkaraga nga mabbalin tu mangiyorollu yaw ira nga kualipikasion, megafu ta mawag tu kuanna i ngamin tapenu maddena yatun. (1 Tim. 3:1) Kakuruganna, makagigiammu i kada Cristiano tatun ira nga kualipikasion nga mabibbig taw ira nga bersikulo, megafu ta aru tatun i ikikkiddaw ni Jehova ta ngamin nga Cristiano. Angngariganna, mawag tu rasonable anna mapia i appana-panono tam ngamin. (Fil. 4:5; 1 Ped. 4:7) Megafu ta ‘mepangngo nga apparigan’ i elder ira, makagigiammu tam nira anna ‘maparigattam i angngurugda.’​—1 Ped. 5:3; Heb. 13:7.

¹¹ Kunnasì nga meyusa yaw nga informasion tapenu moffunan i tanakuan? Meyusa tam yaw ira nga kualipikasion na elder nga uffunan i  interesadu anna i estudiante ira ta Biblia tapenu masingadda i nadduman na elder na Saksi ira ni Jehova ta klero na Kakristianuan. Nu repasuattam yaw ira nga kualipikasion, manono tam i appursigi na elder ira para nittam. Nu nonopattam i kukukuadda para nittam, umunag i “pammakakua” tam nira. (1 Tes. 5:12) Durante nga mas ipasingattam i napafutuan nga respeto nira, mas nga magayaya ira.​—Heb. 13:17.

12, 13. (a) Gukaban na rimienta ira nga egga nittam, anni i awayya tam nga i-research? (b) Mangiyawa tu angngarigan nu kunnasi makoffun i karuan nga detalye tapenu makannammuan i leksion nga ari insigida masingan.

¹² Mar-research. Gukaban na rimienta ira nga egga nittam, awayya tam ammuan i informasion kagitta na:

• Sinni i nattura taw nga libru na Biblia?

• Sitaw anna kanni nga netura?

• Anni ira i importante nga nesimmu turi ta netura yaw nga libru?

Ari tu insigida nga makannammuan yaw ira nga informasion.

¹³ Angngariganna, mabibbig tam ta Ezekiel 14:13, 14: “Nu makaliwa i tadday nga nasion kontra niakan gukaban na ari nga pammakatalo, sonnatakku i limà kontra sa anna daralakku i na-unnug nga maka-makanna, anna mangirattal ngà tu pabbisin tatun anna patayakku i tolay anna i ayamna. ‘Maski nu yaw nga tallu nga lallaki​—da Noe, Daniel, anna Job​—ay egga tatun, mepaliagda laman i baggida megafu ta kinatunungda,’ kunni Soberano nga Yafu Jehova.” Gukaban na par-research, magigiammu tam nga netura yaw nga parte na libru nga Ezekiel turi ma-612 B.C.E. Tatun nga tiempo, aru nga siglo ngana nga natay si Noe anni Job, ngem egga lagapa ta memoria na Dios i rekord na kinamataloda. Ngem sigga-matolay paga si Daniel. Kakuruganna, ma-20 onu maturu tu 20 anios paga laman yaya turi ta kinagi ni Jehova nga matunung gapa yaya nga kagitta da Noe anna Job. Anni i magigiammu tam taw? Masingan anna tagibaloran ni Jehova i ngamin nga matalo nga maddayarayaw sa, kasali danuri mabbing paga laman.​—Sal. 148:12-14.

14. Kunnasi nga makoffun ta kabataan ira i material ira nga nepublisa para nira, anna kunnasi gapa nga mabenefisiowan tatun i tanakuan? (Innan i letratu ta gafu na artikulo.)

¹⁴ Nu kunnasi nga makabenefisio nittam nga gigiammuan i ngamin nga parte na Biblia, kunnatun gapa ta ngamin nga nespirituan nga makan nga egga nittam. Ikonsidera tam i karuan nga angngarigan. Material para ta kabataan. Ta nappasa nga daga-ragun, nepublisa para ta kabataan i aru ta literatura tam. ^[1] Gakkag na karuan taw nga material nga uffunan ira nga arubangan i influwensia ta eskuela onu i problema ira na kabataan. Kunnasi tam nga mabenefisiowan ngamin ta pabbibbig taw nga material? Nu bibbigattam yatun, meperaddam nittam i ara-arubangan na matalo ira nga kabataan. Nu kunnatun, mas moffunan anna mapagaram tam ira.

15. Ngatta mawag tu interesadu i adulto ira nga Cristiano ta informasion nga para ta kabataan?

¹⁵ Mepa-arubattam gapa ta problema ira nga mabibbig ta material ira nga para ta kabataan. Kawagattam ngamin nga idefensa i pangurug tam, kontrolan i emosiottam, lillitan i makadaral nga influwensia na kakavvulu, anna ari mepangngo nga pakikofun anna dibersion. Nepakanawag yaw ira nga topiko ta publikasion para ta kabataan ira. Kappasiran kari nu bibbigan na adulto ira nga Cristiano i material nga para ta kabataan? Siempre ari! Maski nu nadisenio i material tapenu makapa-interes ta kabataan ira, nebase yatun ta ari maddana nga prinsipio ira na Biblia, anna mabenefisiowattam ngamin taw ira nga espiritual nga probision.

16. Anni paga i meyuffun na publikasiottam ta kabataan ira?

 ¹⁶ Ari laman nga makoffun i publikasiottam ta kabataan tapenu ma-arubang i problema ira. Makoffun paga yatun tapenu mannakam ira ta espiritual anna mabbalin ira tu kofun ni Jehova. (Bibbigan i Eclesiastes 12:1, 13.) Mabenefisiowan gapa tatun maski i adulto ira nga Cristiano. Angngariganna, ta Abril 2009 isyu na Gumising!, egga i artikulona nga “Ang mga Kabataan ay Nagtatanong . . . Paano Ko Gagawing Kawili-wili ang Pagbabasa ng Bibliya?” Nangiyawa yaw nga artikulo tu suhestion ira anna egga i kahon nga awayyana magarasig anna mepay ta Biblia bilang referensia. Nabenefisiowan kari taw i adulto ira? “Kanayunnà nga marigatan ta pabbibbig tu Biblia,” kinagi na 24 anios nga atawa nga babay nga egga anana. “Sinuttul ku tu mapia i suhestion ira taw nga artikulo, anna usu-usakku i nepay nga kahon. Kakayà ku ngana i mabbibbig tu Biblia. Masingi-singakku nu kunnasi nga konektadu i libru ira na Biblia anna makakkasta i nikelaga-lagana. Ari nga kunnaw i ka-excited ku dati nga mabbibbig tu Biblia.”

17, 18. Kunnasi tam nga mebenefisiowan ta pabbibbig tu publikasion nga para ta publiko? Mangiyawa tu angngarigan.

¹⁷ Material para ta publiko. Namegafu ta 2008, magayaya tam nga usan i magigiammu nga edision na Passifusifutan, nga primero nga nadisenio para ta Saksi ira ni Jehova. Kunnasi gapa ta magazina tam ira nga para ta publiko? Mabenefisiowattam kari gapa ta pabbibbig taw? Innattam i tadday nga ilustrasion. Tadday nga aggaw nige na palappa para ta publiko, nasingammu nga minay ta Kingdom Hall i tolay nga inimbitam. Siempre magayaya ka. Durante nga mappalappa i ispiker, siguradu nga agga-nonomu yatun nga bisitam. Gittana gigginnammu i palappa segun ta pakalippawana. Kabalimmu nga naginna i palappa, mas ziminakal i appresasiommu meyannung tatun nga topiko.

¹⁸ Kunnatun gapa i ma-ekspiriensa tam nu bibbigattam i publikasion ira para ta publiko. Angngariganna, ipakpakanawag na publiko nga edision na Passifusifutan i topiko ira ta Biblia ta termino nga malippawa na ari tu Saksi. Kunnatun gapa ta aru ira nga artikulo nga nepublisa ta jw.org, kagitta na seksion ira nga “Sagot sa mga Tanong sa Bibliya” anna i “Karaniwang mga Tanong.” Kada bibbigattam yaw ira nga informasion, maponag tam i appresasiottam ta familiar ira nga kinakurug. Makagigiammu tam paga tu bagu ira nga estratehiya ta pangiyesplika ta pangurug tam nu makiparte tam ta ministerio. Kunnatun gapa ta Gumising! nga regular nga mamatuyag ta kombiksiottam nga kurug tu egga Dios, anna uffunanna ittam nu kunnasi medefensa i pangurug tam.​—Bibbigan i 1 Pedro 3:15.

19. Kunnasi tam nga mepasingan i appabalo tam kani Jehova ta probisionna ira?

¹⁹ Manawag nga nangiyawa si Jehova nittam tu abundansia nga probision tapenu masustini i espiritual nga kawagattam. (Mat. 5:3) Paray nakuan ta itulu-tuloy tam nga usan i ngamin nga espiritual nga probision nga egga nittam. Ipasingan i appabalo tam ta Tadday nga manuttuddu nittam tapenu mabenefisiowattam.​—Isa. 48:17.