Meraddammammu si Gail ta gafu na artikulo, nga duda nu mapappasana paga i daddam ta patay na atawana nga si Rob. Ngem iddanamanna nga masinganna yaya ta nepromesa na Dios nga napabagu nga mundo. “Nepakannammu 21:3, 4 i paboritò nga teksto,” kunni Gail. Kunnaw i kagianna: “[I Dios] ngana i kavulu da, . . . Funatan na ngamin i lulua da nga manuru, anna awan ngana noka tu matay, onu maraddam, onu tumangi-tangi onu magattam ta taki. Ta napawan ngana ngamin i dana nga ganna-gannug.”

Kagian ni Gail: “Talaga nga makapabannay yaw nga promesa. Ikallo ku danuri natayan ngem ariadda ammu i iddanama nga masingadda paga i natay nga ideddukadda.” Nipasingan ni Gail i pangurugna gukaban na pabboluntariona bilang ngamin-tiempo nga ebanghelisador, nga mangipakannammu ta tanakuan ta promesa na Dios ta mappange nga “awan ngana noka tu matay.”

‘Imposible!’ kummu siguru. Ngem ikonsideram i ehemplo ni Job. Grabe i takina. (Job 2:7) Maski nu nikiddona nga matay ngana laman yaya, kuruganna lagapa nga egga pakapangngua na Dios nga paginnolayan yaya ta davvun. Egga komfiansana nga nakkagi: “O nu ta Patay nakuan ay itagu mà . . . Magagal ka, ay tu tumabbag ngà nikaw. Kanappammu i kingngua ira na limi-limam.” (Job 14:13, 15) Nakkomfiansa si Job nga kanappan anna kakayà na Diosna nga paginnolayan yaya.

Aranni ngana nga kuan na Dios yatun​—kani Job anna ta ari mabilang paga nga totolay​—sonu mabbalin tu paraiso yaw nga davvun. (Lucas 23:42, 43) Pakurugan na Kingngua 24:15: “Ngamin i totolay ay . . . maginnolay noka.” Nipasiguradu ni Jesus nittam nga “arian nu nga pappabbawan yaw ta duttal noka i aggaw nga ngamin i natay ira ay maginna da i ngaral [ku] anna mallalawan ira ta livud-da.” (Juan 5:28, 29) Masingan ni Job i ketuppalna yatun. Egga tiansa nga metoli i “sikanna nga kagitta na mabbing,” anna i patta-pattagna ay mabbala-balayun nga “mas masikan paga anne ta mabbing.” (Job 33:24, 25) Kunnatun gapa i mesimmu ta ngamin nga mangappresia ta minaggallallo nga probision na Dios nga paginnolay ta davvun.

Nu natayakka, ari lagapa nga interamente nga mapawan na nagigiammu tam taw nga artikulo i daddam nga matagenomu. Ngem gukaban na pannonono tu mapia ta promesa na Dios ta Biblia, makaleg ka tu kurug nga iddanama anna sikan nga mattulu-tuloy.​—1 Tesalonica 4:13.

Kayàmu kari paga i informasion meyannung nu kunnasi maattamman i daddam? Onu egga kari pakkiavumu nga kagitta na “Ngatta ipamavulun na Dios i kinamarake anna i ziga-riga?” Innan i website-mi nga jw.org/ibg, tapenu mannammuammu i makapabannay anna praktikal nga tabbag na Biblia.▪