Kuruga madukko si Bebe ta yamana. I nangiyananabig sa ay minangngikavurung nga kofun na familiada, ngem mas natakitan si Bebe imbes nga nabanna-bannayan. “Ari tu kapianan yatun nga patena,” kunna nga itotoli ta baggina. Nappasa i piga ragun, turi ta niyistoriana yatun nga insidente ta tadday nga libru, talaga marraddam paga laman yaya.

Megafu tatun, nalippawa ni Bebe nga mawag i apaddu nga tiempo tapenu malampasan i daddam nga resulta na patay, mas ngana nu meddu yaya nikaw. Ta Biblia, nekagi nga “i patay i urian nga mapatulu.” (1 Corinto 15:26) Duttal nittam ngamin i patay, daralanna i pattoletam, anna awan tu makefugag tatun. Awan vuluvuga nittam tu sanay ngana ta daddam nu matayan. Yari tu ari nga kakkadda-kaddag nga ari tam ammu nu kunnasi malampasan i daddam na matayan anna i efektona ira.

Awayyana nga manonomu: ‘Kunnasi kabayagna nige nga mawawan i daddam? Kunnasi nga maattamman na tadday yatun nga daddam? Kunnasì nga banna-bannayan i tanakuan nga natayan? Egga kari paga iddanama na natay ira nga ideddukattam?’