Nattaki ka ngana kari? Awayyana nga nammapia ka insigida yari tu ariammu ngana manono nu anni i nesimmu. Ari nga kunnatun i daddam. Kinagi ni Dr. Alan Wolfelt ta libruna nga Healing a Spouse’s Grieving Heart nga “ariammu talaga ‘mapappasa’ i daddam.” Ngem kinagina paga: “Mapakarianan i daddammu megafu ta pappasa na tiempo anna suporta na tanakuan.”

Kunnatun gapa i reaksion ni Abraham turi ta natay i atawana. Kinagi na Biblia nga “namegafu nga narraddam si Abraham anna nattangi ta patay ni Sara.” Kayà kagian na termino nga “namegafu” nga nappasa labbi i tiempo nigena nga nawawan i daddam na natayan. * Maski gapa si Jacob turi ta pagabbona nga pinatay na maporay nga ayam si Jose nga anàna. Narraddam yaya ta “aru nga aggaw,” anna awan tu makawayya ta familiana nga mamannabannay sa. Nappasa i piga ragun, agga-raddam paga laman yaya ta patay ni Jose.​—Genesis 23:2; 37:34, 35; 42:36; 45:28.

Kunnatun gabbalaman ta magaru ta kaggawattam nga natayan tu ideddukadda. Innattam i dua nga angngarigan.

• “Natay si Robert nga atawà turi Hulio 9, 2008. Yatun nga umma na patena ay ordinario lagapa nga aggaw para nikami. Kabalimmi nga naggug, inummakkan anna ginakko ku yaya anna kinagì nga ‘I love you’ kagitta na kanayun nga kukukuammi. Nappasa i annam nga ragun, marraddam ngà paga laman. Ta panageno ku, ariakku ngana siguru mapappasa i daddam ta patay ni Rob.”​—Gail, 60 anios.

• “Maski nu 18 dagun ngana nga natay i ideddukakku nga atawà, kanappakku paga laman yaya anna marraddam ngà ta kawanna. Kada makasingannà tu makakkasta ta pallevuku, meraddammakku yaya anna manono ku nga magayaya nakuan gapa yaya nga innan yaw nga ini-innakku.”​—Etienne, 84 anios nga lalaki.

Ipasinganna laman yatun nga natural i mataka-taki anna mabayag nga parraddam. Ari nga masirib nga ukumattam i reaksion na tanakuan ta tadday nga trahedia megafu ta nadduruma i panageno na kada tadday nittam. Ariattam gapa nga paliwatan i baggi tam nu gittana sumosobra ngana mabba i parraddam tam. Kunnasi tam maattamman i daddam?