1, 2. (a) Sinni i tukuyan ni Jesus ta kinagina ta Mateo 24:12? (b) Kunnasi nipasingan na libru na Kingngua nga aru ta ollu-siglo ira nga Cristiano i kanayun ira nga mangipasingan tu aya? (Innan i letratu ta gafu na artikulo.)

I TADDAY nga aspeto na senial nga niyawa ni Jesus meyannung ta “panuppalan na mundo” ay “mallummin noka i aya na aru nga totolay.” (Mat. 24:3, 12) Turi ollu-siglo, nipamavulun danuri Judio ira nga makkagi nga totolay ira na Dios nga mallummin i ayada.

² Ngem aru nga Cristiano tatun nga tiempo i talaga okupadu nga “mallayya-gayya ta Mapia nga Dumug nga meyannung kani Jesus nga Cristo,” anna ipasa-pasingadda i ayada ta Dios, ta kapangngurug, anna ta ari ira nga kapangngurug. (King. 2:44-47; 5:42) Maski kunnatun, egga karuan ta disipulos ni Jesus ta ollu-siglo nga nipamavuludda nga mallummin i ayada.

3. Anni i rason nu ngatta nallummin i aya na karuan nga Cristiano?

³ Ta pakiyuvovug na napaginnolay nga si Jesus ta ollu-siglo ira nga Cristiano ta Efeso, kinagina: “Yaw i ariak-ku ikaya nikamu: i pangaya nu niakan sangoye ay ari ngana tu kagitta na gari ta  gafu na.” (Nep. 2:4) Anni pano i tadday nga rason tatun? Awayyana nga nainfluwensian yaw nga ollu-siglo nga disipulos ni Cristo ta makamundo ira nga appanono na totolay gari. (Efe. 2:2, 3) Kagitta gapa na aru ta siudad ta maddaggun, napannu tu bisiu i ollu-siglo nga Efeso. Talaga makasta anna mariku yaw nga siudad nga mangipay tu importansia ta kinariku, pappaga-pagayaya, anna komportable nga pattolay. Manawag nga sinalianan na makasarili nga pakkaraga i minassakrifisio nga aya. Napakaru gapa i kappasiran ira nga kondukta anna grabe nga imoralidad.

4. (a) Anni ira nga situasion nga nallummin i aya ta maddaggun? (b) Ta anni nga tallu nga aspeto awayyana nga mapurueban i aya tam?

⁴ Nagadde ta maddaggun i profesiya ni Jesus meyannung ta pallummin na aya. Taw nga tiempo, aru nga tolay i mapakarianan i pangayada ta Dios. Minillion i nallikug sa anna nattalo ta organisasion na totolay tapenu solban i problemada. Yatutta, ta nallatanan na totolay nga ari maddayaw kani Jehova nga Dios, tulu-tuloy nga mallummin i ayada. Kagitta na situasion ta ollu-siglo nga kongregasion ta Efeso, awayya gapa na kurug ira nga Cristiano ta maddaggun nga mabbalin tu kampante anna pagurayadda nga mawawan i ayada. Innattam i tallu nga aspeto nu sitaw awayya mapurueban i aya tam: (1) Pangaya kani Jehova, (2) pangaya ta kinakurug ta Biblia, (3) anna pangaya ta wawwaragi tam.

5. Ngatta mawag nga egga pangaya tam ta Dios?

⁵ Ta gafu gapa natun nga aggaw ta pinangiyawa ni Jesus tu pamappalan meyannung ta pallummin na aya, nipagaramna i pinaka-importante nga klase na aya. Kinagina: “‘Ayatam-mu i Yafu nga Dios mu ta interu nga futum, interu nga ikararuam anna ta interu nga nono mu.’ Yaw i ollu anna kuruga importante ta ngamin nga dorob.” (Mat. 22:37, 38) Wan, makoffun i monag nga pangaya ta Dios tapenu matuttul i bilin ira ni Jehova, makapagattam, anna mekalussaw i marake. (Bibbigan i Salmo 97:10.) Ngem, mappursigi si Satanas anna i mundona tapenu pakkafian i pangaya tam ta Dios.

6. Anni i resulta na pallummin na aya ta Dios?

⁶ Killu i pagimamma ta aya na totolay ta pallevu tam. Imbes nga ayatan i Dios, “ayatan na totolay i baggi da laman.” (2 Tim. 3:2) Ipagaram naw nga mundo nga pammagurayan ni Satanas i “karagatan na baggi, ganna-gannug ira nga makatenta ta mata, anna ngamin nga pappara-parayag na tolay.” (1 Juan 2:16) Sinabarangngan ni apostol Pablo i kasi-Cristianona kontra ta nepattaggan nga pakkaraga, nga kunna: “I pakimoray ta kata-katolay nga neravvunan ay mattuppal ta patay . . . I tolay nga makimoray ta kata-katolay na nga neravvunan, ay kontran na i Dios.” (Roma 8:6, 7) Kakuruganna, nadismaya anna sobra nga natakitan danuri mangiyusa ta pattoleda ta pagunnug tu material ira onu mappalagustu ta seksual ira nga pakkaragada.​—1 Cor. 6:18; 1 Tim. 6:9, 10.

7. Anni ira nga peligro i meparubang ta disipulos ni Jesus ta maddaggun?

⁷ Ta karuan nga nasion, ipagaram danuri aminadu nga ateista, agnostiko, anna ebolusionista i ideya ira nga makadaral ari laman ta aya ta Dios, nu ari, i pangurug paga sa. Aru i nakumbinsida nga i tolay nga mangurug ta Namaratu ay inosente onu awan tu ammuna. Medayaw gapa i sientista ira nga mangiyarayyu ta atension na totolay ta Namaratu nittam. (Roma 1:25) Nu ginnattam i kunnatun ira nga tuttuddu, meyarayyu ittam kani Jehova anna mallummin i aya tam.​—Heb. 3:12.

8. (a) Anni ira nga situasion i mamakkafi ta nono na totolay ni Jehova? (b) Anni nga pamasiguradu i mabibbig tam ta Salmo 136?

⁸ Nu mappaffu megafu ta pakkadismaya,  makkafi i pangurug tam anna mallummin i aya tam ta Dios. Taw nga marake nga sistema nga kontroladu ni Satanas, meparubang ittam ngamin ta situasion ira nga mamakkafi ta nono. (1 Juan 5:19) Awayyana nga maddaggun ittam nga meparubang ta problema megafu ta pabbako onu pallakay, taki, onu problema ta ekonomia. Onu awayyana tu laba-labanattam i pakatageno tu kawan tu kuenta, ari natuppal ira nga iddanama, onu personal ira nga pakkadismaya. Ngem, ariattam nakuan ipamavulun i kunnatun ira nga situasion onu panageno nga nonopan nga pinanawan ittam ngana ni Jehova. Monag nga pannonopattam lallagu i makapabannay ira nga uvovug meyannung ta mannanayun nga aya ni Jehova. Mabibbig tam yatun ta Salmo 136:23, nga kunna: “Turi ta nikaffu onu nadismaya tam ay arian na ittam nga nattaman; i aya na ay mannanayun adde noka.” Talaga tulu-tuloy i matalo nga aya ni Jehova ta aripanna ira. Makasiguradu tam gafu nga ginnanna i “pakimemallo” tam anna uffunanna ittam.​—Sal. 116:1; 136:24-26.

9. Anni i nangiyawa tu sikan kani Pablo tapenu mapattalupaddianna i aya ta Dios?

⁹ Kagitta na salmista, nakaleg tu sikan si Pablo ta pannonona tu mapia ta kanayun nga passuporta ni Jehova sa. Nitura ni Pablo: “I Yafu i manguffun niakan, awan tu ek-ku nga paganassingan. Anni i makua na tolay niakan?” (Heb. 13:6) Nakoffun yatun nga pakkomfiansa kani Jehova tapenu marubanna i problemana ira. Arianna nappa-afekto ta negatibo ira nga situasion tapenu madammakkan yaya. Ta kakuruganna, durante nga presu si Pablo, namadday yaya tu aru nga makapagaram nga tura. (Efe. 4:1; Fil. 1:7; Flm. 1) Wan, maski turi ta sobra i nikapuruebana, nattalupaddian lagapa i aya ni Pablo ta Dios. Anni i nangiyawa sa tu sikan tapenu makua yatun? Kanayun yaya mappoffun ta “minaggallallo nga Yama anna Dios nga paggafuan na ngamin nga uffun!” (2 Cor. 1:3, 4) Kunnasi tam maparigan i ehemplo ni Pablo anna mapattalupaddian tu matuyag i aya tam kani Jehova?

10. Kunnasi tam mapattalupaddian nga matuyag i aya tam kani Jehova?

¹⁰ Kinagi mismu ni Pablo i tadday nga importante nga gannug tapenu mapattalupaddian i aya kani Jehova. Niturana ta kapangngurugna: “Maddasal kamu ta maski anni nga tiempo.” (Roma 12:12; 1 Tes. 5:17) Fundasion na meggo nga relasion ta Dios i pakikomunika gukaban na pakimallo. (Sal. 86:3) Nu aru i tiempo tam nga ivuvvu kani Jehova i kononaggan nga appana-panono anna mataga-tageno tam, siguradu nga maddukko ittam ta nelangitan nga Yama tam, i “Minagginna tu pakimallo.” (Sal. 65:2, NW) Mas malippawa tam nga si Jehova ay ‘aranni ta ngamin nga magagal sa.’ (Sal. 145:18) Makoffun nittam yatun nga pakkomfiansa ta meddu nga suporta ni Jehova tapenu maattamman i karuan paga nga kapurueba ta pangurug tam.

11, 12. Kunnasi ittam mapeggan tu monag nga pangaya ta kinakurug ta Biblia?

¹¹ Bilang Cristiano, tagibaloran anna akseptattam i kinakurug. I Uvovug na Dios i primeru nga paggafuan na kinakurug. Ta pakimallo ni Jesus ta Yamana, kinagina: “I uvovug mu ay kakurug.” (Juan 17:17) Yatutta, mamegafu i pangaya ta kinakurug gukaban na pangà tu fustu nga pakannammu ta Uvovug na Dios. (Col. 1:10) Ngem, mas paga i kawagan anne ta basta pangà laman tu informasion. Innan nu kunnasi ittam uffunan na nattura ta Salmo 119 tapenu malippawa i kebalinan na pangaya ta kinakurug ta Biblia. (Bibbigan i Salmo 119:97-100.) Egga kari i tiempo tam ta interu aggaw nga nonopan tu mapia i nabibbig tam ta Biblia? Dumakal i pangappresia tam ta kinakurug ta Biblia nu  usitakkattam nu kunnasi ittam mabenefisiowan ta pangiyaplika tatun ta pattoletam.

¹² Kinagi paga na salmista: “Kuruga mammi i bili-bilim-mu ira, mas mammi anne ta issi na pisokan paga.” (Sal. 119:103) Masissimattam gapa i masingngo nga nebase-Biblia nga espiritual nga makan nga malawà tam ta organisasion na Dios. Awayya tam nga ipamavulun nga maddian i lasana yatun ta figuratibo nga panamtam tam tapenu meraddammattam i “makapagustu ira nga uvovug” na kinakurug anna usattam yatun nga uffunan i tanakuan.​—Ecl. 12:10.

13. Anni i nakoffun kani Jeremias tapenu ayatan i kinakurug ta Biblia, anna anni i efektona yatun sa?

¹³ Inaya ni profeta Jeremias i kinakurug ta Biblia. Innan i efekto na uvovug ira na Dios ta futuna. “Nalegan i uvovugmu ira, anna kinnakku yatun; anna i uvovugmu ay nabbalin niakan tu kedayaw anna i pagayaya na futù, megafu ta i ngagammu ay neyagal niakan, O Jehova na armada ira.” (Jer. 15:16) Simboliko nga nginangngo anna kinnan ni Jeremias i nabalor nga uvovug na Dios gukaban na pannonono tatun. Megafu tatun, napeggan yaya tu napafutuan nga pangappresia ta pribilehio nga meyagal sa i ngagan na Dios. Napagaram kari ittam na pangaya ta kinakurug ta Biblia nga appresian i makapabbaw nga pribilehio tam nga itaddaggan i ngagan na Dios, anna ilammuyag i Pappatulanna taw nga tiempo na panuppalan?

14. Kunnasi nga mas ayatattam i kinakurug ta Biblia?

¹⁴ Fuera paga ta pabbibbig tu Biblia anna ta nebase-Biblia ira nga publikasiottam, kunnasi ittam paga mapeggan tu monag nga pangaya ta kinakurug ta Biblia? Mapadakal tam i aya tam ta kinakurug ta Biblia gukaban na regular nga pagatende ta study ira ta kongregasion. I linigguan nga paggigiammu tu Biblia gukaban na Passifusifutan i primeru nga meyusa tapenu matudduan ittam. Tapenu mabenefisiowan ta topiko nga magigiammu, kawagattam nga mapprepara tu mapia ta kada Paggigiammu tu Passifusifutan. Awayya tam gapa innan ta Biblia i teksto ira nga neyusa. Ta maddaggun, medownload i Passifusifutan ta website nga jw.org/ibg onu mabibbig ta JW Library app ta aru nga lengguahe. Egga i electronic ira nga format nga awayya tam insigida mabibbig i neyusa ira nga teksto ta kada artikulo. Ngem, maski anni nga metodo i usattam, mas maponag i pangaya  tam ta kinakurug ta Biblia nu bibbigattam yatun ira nga teksto anna pannonopan tu mapia.​—Bibbigan i Salmo 1:2.

15, 16. (a) Segun ta Juan 13:34, 35, anni i obligasiottam? (b) Anni i koneksion na pangaya ta wawwaragi tam ta pangaya ta Dios anna ta Biblia?

¹⁵ Turi ta ultimo nga gabi ni Jesus taw ta davvun, kinagina ta disipulosna: “Iyawa ku nikamu i bagu nga dob: makka-aya-aya kamu. Nu kunnasi na pangaya ku nikamu, mawag tu kunnatun gapa i pakka-aya-aya nu. Nu egga nikamu i pakka-aya-aya, kannammuan ngamin na totolay tu disipulo takamu.”​—Juan 13:34, 35.

¹⁶ Egga i koneksion na pangaya tam kani Jehova ta pangaya ta wawwaragi tam. Ta kakuruganna, nu ariattam ayatan i Dios ariattam mawayya nga ayatan i wawwaragi tam. Nitura ni apostol Juan: “Ta nu arian na nga ayatan i wagi na nga masingan na, kunnasi gafu na pangaya na ta Dios nga arian na nga masingan?” (1 Juan 4:20) Egga gapa i koneksion na pangaya tam kani Jehova anna ta wawwaragi tam ta pangaya tam ta Biblia. Kunnasi? Megafu ta i pangaya ta kinakurug ta Biblia i mamaguyu nittam nga napafutuan nga tuttulan i bilin ira na Katurakan nga ayatan i Dios anna i wawwaragi tam.​—1 Ped. 1:22; 1 Juan 4:21.

17. Anni ira i makua tam tapenu mepasingan i aya tam?

¹⁷ Bibbigan i 1 Tesalonica 4:9, 10. Anni i karuan ta praktikal nga makua tapenu mepasingattam i pangaya ta kongregasiottam? Awayyana nga mawag na wagi tam nga bako onu lakay i pattakayan ta study ira. Baka kawagan na wagi nga balu nga pakappian i nadaral ta balena. (Sant. 1:27) Maski abbing onu manakam, kawagan danuri brother onu sister nga nakkafi i nonoda onu nadepres onu neparubang ta tanakuan paga nga problema i atensiottam, pamagaram, anna pamanna-bannay. (Prov. 12:25; Col. 4:11) Mapakurug tam nga talaga ayatattam i wawwaragi nu ipasingattam gukaban na uvovug anna kukukuattam nga egga kurug nga pangikavuruttam ta “wawwagi tam ira ta angngurug.”—Gal. 6:10.

18. Anni i makoffun nittam tapenu solban i baraddi nga ari pakkarantindian ta kapangngurug tam?

¹⁸ Niprofesiya na Biblia nga i “pangurianan ira nga aggaw” naw nga sistema na ganna-gannug ay mangipasingan tu espiritu na pabbalin tu makasarili anna minakkakkam. (2 Tim. 3:1, 2) Bilang Cristiano, kuattam gafu i adde na mawayya tam tapenu dumakal i pangaya tam ta Dios, ta kinakurug ta Biblia, anna ta kataggi-tadday. Nu mittan, kurug nga egga i baraddi nga ari pakkarantindian ta kapangngurug tam. Ngem, talaga bendision para ta ngamin nga kongregasion nu paguyuan ittam na aya nga meddu nga solban i anni laman nga ari pakkarantindian! (Efe. 4:32; Col. 3:14) Ariattam nakuan vuluvuga nga ipamavulun nga mallummin i aya tam! Ibala-balayuttam lallagu nga monag nga ayatan si Jehova, i Uvovugna, anna i wawwaragi tam.