UMAZZUG ngana i patuna turi ta naggarammammung i 8,000 nga tolay ta tadday nga auditorium tadday nga umma na Biernes turi ta Setiembre 1922. Niyanunsio na tserman nga taw nga importante nga sesion, awayya nga mallawan na maski sinni, ngem ari mepamavulun nga tullung uli.

Vinukatadda tu kansion i “Paddayaw nga Serbisio,” (“Praise Service”) tapus kabalinna, siminaddag ngana si Joseph F. Rutherford ta plataporma na ispiker. Aru nga maggigginna i magayaya nga agga-itubang. Egga gapa ira i ari mapakali nga lumalakag megafu ta patu. Kinagi na ispiker nga magitubang ngana ira anna magginna. Durante nga mappalappa ngana yaya, egga kari makasingan ta dakal nga telon nga makakkasta i nikerolyona ta utun?

Nivuru-vura ni Brother Rutherford i tema nga “Aranni ngana i pappatulan na langi.” (“The kingdom of heaven is at hand.”) Tangoras-gaddua nga magigginna i magaggallu nga bosesna ta auditorium durante nga ipalappana nu kunnasi nga awan tu anassinna nga niyanunsio na profeta ira gari i duttal nga Pappatulan. Turi mangultimo ngana yaya, niyavuna ta maggigginna ira: “Mangurug kamu kari nga namegafu ngana mammaguray i Patul na gloria?” Simibbag ira tu kitessikan: “Wan!”

“Manoli kamu gafu ta tana, sikamu ngamin nga ána na katannangan nga Dios!” nikulle ni Brother Rutherford. “Inannu, mammaguray ngana i Patul! Sikamu i ahentena ira ta publiko. Yatutta, iyanunsio, iyanunsio, iyanunsio.”

Tatun nga oras, kakkasta i nikevullag na nakarolyo nga telon, nga nangipasita taw nga islogan: “Iyanunsio i Patul anna i Pappatulan.”

“Fermi ayaya na maggigginna ira,” neraddamman ni Ray Bopp. Niyistoria ni Anna Gardner nu kunnasi nga “naggugguyag i biga ira megafu ta sikan ta appoppo.” “Maggiriddang nga siminiddag nga nappoppo i ngamin nga maggigginna,” kunni Fred Twarosh. Kunna gapa ni Evangelos Scouffas, “Gittana egga masikan nga pakapangngua nga nanguggung nikami ngamin ta itubammi, tapus siminaddag kami anna tumatangi kami.”

Aru ta kombension i mangilayyagayya ngana ta mapia nga dumug na Pappatulan. Ngem napeggan ira tu bagu nga gakkag. Istorian ni Ethel Bennecoff nga nallawan i Estudiante ira na Biblia tatun nga “mas ziminakal i talikarag anna aya ta futu [da] anne ta gafuna.” Nallawan i 18 anios nga si Odessa Tuck ta pakkombensionan nga determinadu nga manuppal ta agal nga “Sinni i umay?” Kunna: “Ariakku ammu nu sitaw onu kunnasi onu anni. I ammu laman ay kayà ku i mabbalin tu kagitta ni Isaias, nga nakkagi: ‘Egga Ngà taw! Dobannà!’” (Isa. 6:8) “Yatun nga espesial nga aggaw,” kunni Ralph Leffler, “i kurug nga gafu na kampania na pangiyanunsio ta Pappatulan nga yaw i mepakannammu ta interu davvun.”

Awan tu padduda nga yaw nga kombension turi  1922 ta Cedar Point, Ohio ay mebilang nga tadday nga pinaka-importante nga nesimmu ta organisasion! Kagian ni George Gangas, “Yatun nga kombension ay nakafekto ta pakkaraga ku nga ariakku pappasan i maski tadday nga kombension.” Neraddammanna nga awan vuluvuga tu napalampasna nga kombension. Nitura ni Julia Wilcox: “Ariakku meletratu i pagayaya nga matageno ku kada mabibbig ku i Cedar Point 1922 ta literatura tam. Kanayukku nga kagian, ‘Mabbalo, Jehova, ta pangipamavulummu nga egga ngà tatun.’”

Siguradu nga aru nittam gapa i egga arianna ira makattamman ta tadday nga kombension nga fermi nga namagayaya ta futu tam anna namannu nittam tu talikarag anna aya ta kadakallan nga Dios tam anna ta Patulna. Durante nga nononopattam yatun ira, mapaguyu tam gapa nga makkagi, “Mabbalo, Jehova, ta nipamavulummu nga egga ngà tatun.”