NAKKASAL da Daniel anna Miriam turi Setiembre 2000 tapus naddian ira ta siudad na Barcelona, Spain. “Normal i pinattolemi,” kunni Daniel. “Megafu ta trabahumi, makakan kami ta makasta ira nga restaurant, makapabbiahe ta abroad, anna makagatakkami tu mangina ira nga sinnun. Regular kami gapa nga makapallayyagayya.” Ngem egga nanguli.

Ta kombension turi 2006, kuruga napagaram si Daniel ta pakkiavu ta tadday nga palappa: “Kukukuattam kari i ngamin nga mawayya tam tapenu uffunan danuri “meyangay ta pamartian” tapenu makalakag ira ta dalan mappange ta mannanayun nga inango?” (Prov. 24:11) Nepatalatto i responsibilidad nga ipakannammu i makepaliag-inango nga mensahe na Biblia. (King. 20:26, 27) Neraddamman ni Daniel, “Natageno ku nga gittana makikkibbida niakan si Jehova.” Nepalappa paga nga mangirattal ta mas aru nga pagayaya i pamalawa ta ministerio. Ammu yatun ni Daniel. Namegafu turi ta nappayunir si Miriam, naka-ekspiriensa yaya tu makapagayaya ira nga bendision.

Kunni Daniel, “Nanono ku nga mawag tu mangngua ngà tu dakal nga panguloli.” Tinalakkurugna yatun. Pinakariananna i orasna nga mattrabahu, tapus nappayunir, anna napplano yaya nu awayyada ni Miriam nga makapasserbi nu sitaw mas dakal i pakawagan para ta mangilayyagayya ta Pappatulan.

Ta Mayo 2007, pinanawan da Daniel anna Miriam i trabahuda tapus minay ira ta Panama, i nasion nga binisitada ngana ta nappasa. Yaw nga bagu nga teritoriada ay egga aru nga islana ta Bocas del Toro Archipelago ta Caribbean Sea, nga maruddu nga lugar na etniko ira nga Guaymi. Nanono da Daniel anna Miriam nga usan i nonnugda ira nga kuartu tapenu makapaddian ira ta Panama tu walu vulan.

Nalevuda i isla ira gukaban na barangay anna bisikleta. Meraddammadda i ollu nga biaheda nga ma-32 kilometro ta attarannang nga bakulug maski sobra i patu na bilag. Maggi mesibba si Daniel ta bannagna. Ngem ta nadalanadda ira nga balay, meddu i pinangalawa nira na familia ira nga Guaymi, neerulay turi ta nakagigiammu ira tu karuan nga lokal nga lengguahe. Turi kua, mangikondukta ngana ira tu 23 nga paggigiammu tu Biblia.

Turi ta nofu i unnugda, natalianan tu parraddam i pagayaya na magatawa. Kunni Daniel: “Makatangi kami turi manonomi nga manoli ta Spain. Fermi daddammi nga panawan i estudiantemi ira ta Biblia.” Ngem tanga-vulan i nappasa, nakalawa ira tu makapagayaya nga balita. Kunni Miriam: “Nembitakkami nga mabbalin tu espesial payunir. Talaga makapagayaya nga mattalupaddian ta asaymentmi!”

Ta 2015, megafu ta panguloli ira ta organisasion, nabbalin tu regular payunir da Daniel anna Miriam. Anni kuadda? Nattalo ira ta promesa ni Jehova ta Salmo 37:5: “Iyalawa mu i baggim ta YAFU; mammakatalo ka sa ay uffunan naka.” Nakaleg ira tu trabahu nga massuporta ta pappayunirda, anna massesserbi ira ta maddaggun ta tadday nga kongregasion ta probinsia na Veraguas, Panama.

Istorian ni Daniel: “Nigemi nga nanaw ta Spain, ariammi siguradu nu makapattolay kami tu simple. Ngem kunnatukkami ta maddaggun, anna awan tu importante nga pakawagan nga makkurakkami.” Anni i kadakallan nga pagayayada? Kudda, “Awan tu kagittana i pagayaya nga manguffun ta mapakalinno nga totolay nga makannammuan si Jehova!”