1, 2. (a) Ngatta mapasikan ittam danuri matalo nga mallayyagayya ta matagga ira nga teritoria? (Innan i letratu ta gafu na artikulo.) (b) Anni i kinagi ni Jesus meyannung ta pallayyagayya ta mismu nga “ili na”? (Innan i footnote.)

PAYUNIR i magatawa nga da Sergio anni Olinda nga maturu ngana tu 80 i dagudda nga taga-United States. Turi kua, marigatan ngana ira nga lumakag megafu ta mataki i takka-takkida. Ngem, piga nga dekada ngana nga umu-umay ira kada alas-siete na umma ta kakaruan na totolay ta ilida. Mappuestu ira aranni ta pagimmangan na bus anna mangipalima ira tu literatura ta mattatalebag. Aru nga totolay i ari nga mamansin nira, ngem ariadda mamanaw ta puestuda anna mangngizzi ira ta totolay nga mallipay nira. Nu tangnganaggaw ngana, magannano ira nga lumakag palabbe. Ta tumunug nga aggaw, ta alas-siete ta umma, mappuestu mangana ira tatun. Talaga okupadu yaw nga matalo nga magatawa nga mangilayyagayya tu mensahe na Pappatulan tatun annam nga umma ta kada ligguan ta interu dagun.

² Kagitta da Sergio anni Olinda, aru ta matalo nga wawwaragi ta  interu mundo i mallayyagayya ta piga dekada ngana ta matagga ira nga teritoria ta mismu nga ilida. Nu kunnatun kariga i situasiommu, makomendakka ta pagatta-attammu. * I dedikasiommu nga masserbi kani Jehova ay mappasikan ta nono na magaru​—maski paga ta ekspiriensadu nga kapangngurug mu. Sifutan yaw nga kinagi na manangngal ira ta sirkito: “Nu makipattrabahu ngà ta kunnatun nga matalo nga wawwaragi ta ministerio, mapasikan ngà na ehemploda.” “Uffunannà na kinamataloda nga magattam anna maggutu ta ministeriò.” “Talaga matukkal i futù ta ehemploda.”

3. Anni i tallu nga pakkiavu nga ikonsidera tam, anna ngatta?

³ Tapenu mas determinadu ittam nga balinan i pallayyagayya nga nipa-annung ni Jesus nittam, ikonsidera tam i tabbag ira ta tallu nga pakkiavu: Ngatta makkafi i nono tam nu mittan? Kunnasi ittam makapavvunga? Anni i makoffun nittam tapenu tulu-tuloy nga magatta-attam durante nga mavvunga?

4. (a) Anni i efekto kani Pablo na negatibo nga reaksion na Judio ira? (b) Ngatta kunnatun i natageno ni Pablo?

⁴ Nu makkafi i nono mu nu mallayyagayya ta matagga ira nga teritoria, makagigiammu ka kani apostol Pablo. Ta ma-30 dagun nga kapaddu na pamministeriona, aru i noffunanna nga mabbalin tu disipulos ni Cristo. (King. 14:21; 2 Cor. 3:2, 3) Ngem, ari yayya navviktoria nga pabbalinan tu Cristiano i magaru nga Judio nga kalugaranna. Kakuruganna, ikala-kalussoda yayya, anna zinara-darum paga yayya na karuan. (King. 14:19; 17:1, 4, 5, 13) Kunnasi nafektan si Pablo tatun nga marake nga reaksion na Judio ira? Inaminna: “Tolay ngà ni Cristo anna ari ngà nga malladda-laddug . . . kuruga nepallo i daddam ku, anna ari nga mari i dammo na gakò.” (Roma 9:1-3) Ngatta kunnatun i natageno ni Pablo? Megafu ta kakayàna i mallayyagayya anna iddedduna i totolay. Nilayyagayyanna i Judio ira megafu ta kuruga pangikavurunna nira. Yari tu matakitan si Pablo nu pammanakitadda i allo na Dios.

5. (a) Ngatta layyagayyattam i totolay? (b) Ngatta ari kakkadda-kaddag nga makkafi i nono tam nu mittan?

⁵ Kagitta ni Pablo, layyagayyattam i totolay megafu ta napafutuan nga pangikavuruttam. (Mat. 22:39; 1 Cor. 11:1) Ngatta? Naekspiriensa tam mismu i aru nga bendision nga maginnag turi ira ta naddisidi nga masserbi kani Jehova. Nu nonopattam i totolay ta teritoria tam, mekagi tam ta baggi tam, ‘Nu puedemi laman nakuan nga ikagi nira nu anni i malonadda!’ Yatutta, pasikannattam i nonoda nga gigiammuan i kinakurug meyannung kani Jehova anna ta gakkagna ta totolay. Gittana kakkagiattam ta layyagayyattam ira: ‘Egga i makakkasta nga regalù para nikaw. Fabor bi akseptammu.’ Nu pammanakitan gafu na totolay nga akseptan i regalu tam, natural laman nga ‘madammo i gakaw tam.’ Ari ipasingan na kunnatun nga panageno nga makafi i pangurug tam, nu ari, kakayà tam i pallayyagayya. Maski gafu makkafi i nono tam nu mittan, magatta-attam ittam. Matageno na aru nittam i kinagi ni Elena nga maturu nga 25 dagun ngana nga payunir: “Marigatan ngà nga mallayyagayya. Ngem, awan ngana tu tanakuan nga trabahu nga kayà ku nga kuan.”

6. Anni nga pakkiavu i ikonsidera tam, anna kunnasi tam makua yatun?

⁶ Ngatta makasiguradu ittam nga maski sitaw i pallayyagayyattam, produktibo lagapa i ministerio tam? Tapenu tabbagan yatun nga importante nga pakkiavu, usitakkattam i dua nga ilustrasion ni Jesus nu sitaw nikonsiderana  i kawagan nga “mavvunga.” (Mat. 13:23) I ollu ay meyannung ta fun na ubas.

7. (a) Sinni i irepresenta na “i manaron,” i “fun na ubas,” anna “i panga-panga”? (b) Anni nga pakkiavu i kayà tam ammuan i tabbagna?

⁷ Bibbigan i Juan 15:1-5, 8. Daddamman nga kinagi ni Jesus ta apostolesna: “Madaya-rayaw i Yamà ta pavvunga nu ta aru, ay yaw i mamakurug tu disipulo takamu.” Dineskriba ni Jesus nga si Jehova “i manaron,” tapus yayya “i kurug nga fun na ubas,” anna i disipulosna gapa “i panga-panga.” * Anni gafu i mawag nga vunga na tumuttul ira kani Cristo? Taw nga ilustrasion, ari direkta nga kinagi ni Jesus nu anni i vunga, ngem nangikagi yayya tu importante nga detalye nga makoffun nittam tapenu mammuan i tabbag.

8. (a) Taw nga ilustrasion, ngatta ari tumukoy ta bagu nga disipulos i vunga? (b) Anni i makagi tam ta ngamin nga kiddaw ira ni Jehova nittam?

⁸ Meyannung ta Yama ni Jesus, kinagina: “Gappattan na ngamin i panga-panga nga ari mavvunga.” Kebalinanna, imammatan ittam laman ni Jehova nga aripanna nu mavvunga ittam. (Mat. 13:23; 21:43) Yari tu taw nga ilustrasion, i mawag nga vunga na kada Cristiano ay ari tu bagu nga disipulos nga pribilehio tam nga kuan. (Mat. 28:19) Nu kunnatun, danuri nakuan gafu matalo nga Saksi nga awan tu napabbalidda nga disipulos megafu ta pallayyagayya ta matagga nga teritoria ay megitta ta ilustrasion ni Jesus nga panga-panga nga ari mavvunga. Ngem imposible nga konklusion i kunnatun! Ngatta? Megafu ta kattam mefuersa ta totolay nga mabbalin tu disipulos. Kontra yatun ta meddu nga dala-dalan ni Jehova nga idiskualipika i aripanna ira megafu ta ariadda magawa i gannug nga ipakuana. Posible nga magawa i maski anni nga ikiddaw ni Jehova nittam.​—Deut. 30:11-14.

9. (a) Mavvunga ittam gukaban na pakipartisipa ta anni nga aktibidad? (b) Anni nga ilustrasion i ikonsidera tam, anna ngatta?

⁹ Anni gafu i mawag nga vunga tam? Manawag nga i tukuyanna nga vunga ay aktibidad nga mawayya nga kuan na kada tadday nittam. Anni gafu nga aktibidad i makua tapenu “mavvunga”? I pangilayyagayya ta mapia nga dumug na Pappatulan na Dios. * (Mat. 24:14) Pakurugan na ilustrasion ni Jesus ta mabbini yaw nga konklusion. Ikonsidera tam i mekadua nga ilustrasion.

10. (a) Taw nga ilustrasion, anni i irepresenta na vullung anna na davvun? (b) Anni i vunga na maddawa nga trigu?

¹⁰ Bibbigan i Lucas 8:5-8, 11-15. Ta ilustrasion na mabbini, i vullung onu vukal ay i “uvovug na Dios,” onu i mensahe na Pappatulan. Irepresenta na davvun i figuratibo nga futu na tolay. I vullung nga nekanna ta mapia nga davvun ay naggamu, nattalovu, anna ziminakal, nga gittana tadday nga naddawa nga trigu. Tapus, “navvunga tu taggi-magatu i kada fun.” Ngem anni i klase na vunga na naddawa nga trigu? Egga kari uli i baraddi nga dawana? Ari, mangilawan yatun tu bagu nga vullung, nga sonu kua ay mabbalin mangana tu dawa. Taw nga ilustrasion, navvunga i tadday nga aggà na vullung tu magatu nga vullung. Kunnasi meyaplika yatun nga aspeto na ilustrasion ta ministerio tam?

11. (a) Kunnasi meyaplika ta ministerio tam i ilustrasion na mabbini? (b) Kunnasi ittam makapavvunga tu bagu nga vullung na Pappatulan?

¹¹ Tapenu meyilustra, kagiattam nga piga dagun ngana i nappasa, nimula na tanakuan nga Saksi onu na Saksi nga magana tam i mensahe na Pappatulan nittam. Magayayya ira megafu ta nasingadda nga inalawa na futu tam i alle-vullung nga mensahe na Pappatulan. Kagitta na mapia nga davvun ta ilustrasion  ni Jesus nga nattalovuan na vullung, inalawa tam i mensahe anna ariattam inibbattan. Megafu tatun, kagitta na naggamu i alle-vullung nga mensahe na Pappatulan anna nattalovu nga kunna naddawa nga trigu, tapus duttal sangaw i tiempo nga mavvunga ngana. Kagitta na naddawa nga trigu nga ari mavvunga tu bagu nga dawa, nu ari, bagu nga vullung, mavvunga ittam gapa, ari tu bagu nga disipulos, nu ari bagu nga vullung na Pappatulan. * Kunnasi ittam makapavvunga tu bagu nga vullung na Pappatulan? Kada ilayyagayya tam i mensahe na Pappatulan, makagi nga pakaruattam anna iwara-wara tam i vullung nga nemula ta futu tam. (Luc. 6:45; 8:1) Yatun ta, tudduan ittam naw nga ilustrasion nga durante nga kuattam i adde na mawayya tam nga ilayyagayya i mensahe na Pappatulan, magatta-attam ittam durante nga ‘mavvunga.’

12. (a) Anni nga leksion i mala tam ta ilustrasion ni Jesus meyannung ta fun na ubas anna ta mabbini? (b) Anni i efekto nikaw natun nga leksion?

¹² Anni nga leksion i mala tam ta ilustrasion ni Jesus meyannung ta fun na ubas anna ta mabbini? Nepalippawa nittam nga i pakawayya tam nga mavvunga ay ari nakadepende ta reaksion na totolay ta teritoria tam. Lallagu, nakadepende yatun ta mismu nga kinamatalo tam. Kinagi gapa ni Pablo yatun nga kinakurug: ‘Bala-balattan noka na Dios [i kataggi-tadday] segun ta kingnguana.’ (1 Cor. 3:8) Nebase i bala-balo ta kingngua, ari tu ta resulta ira natun nga kingngua. Kunni Matilda nga 20 dagun ngana nga payunir: “Talaga egga i rasokku nga magayayya megafu ta ammù nga bebbendisionan ni Jehova i kukukuakku.”

13, 14. Segun ta Roma 10:1, 2, ngatta ari nagimmang nga nallayyagayya si Pablo turi ira ta negatibo i reaksiodda ta mensahe na Pappatulan?

¹³ Anni i makoffun nittam nga magatta-attam durante nga mavvunga? Kagitta na nagigiammu tam, nakkafi i nono ni Pablo ta negatibo nga reaksion na Judio ira ta mensahe na Pappatulan. Maski kunnatun, ari yayya nagimmang. Innan nu anni paga i kinagina ta turana ta Cristiano ira ta Roma meyannung ta natagenona tatun ira nga Judio: “Kuruga napasikkal i pakkaraga ku anna napafutu i  pangipakimallo ku ta Dios tu mapaliag nakuan i kagittà ira nga Judio! Awayyà nga pakurugan tu matalikarag ira nga masserbi ta Dios. Ngem i katalikarag da ay ari nga negamu ta kurug nga pakannammu.” (Roma 10:1, 2) Anni nga rason i nipatalatto ni Pablo nu ngatta ari yayya magimmang ta ministeriona?

¹⁴ Ollu, kinagi ni Pablo nu ngatta kanayunna layyagayyan i Judio ira. Napaguyu yayya na ‘napasikkal nga pakkaraga na.’ Talaga karagatanna ta futuna nga mapaliag nakuan i karuan nga Judio. (Roma 11:13, 14) Mekadua, kinagi ni Pablo nga ‘napafutu i pangipakimallo na ta Dios’ para nira. Nakimemallo yayya ta Dios nga uffunan i kada tadday nga Judio nga akseptan i mensahe na Pappatulan. Mekatallu, kunna paga ni Pablo: “Matalikarag ira nga masserbi ta Dios.” Nasinganna i potensial na totolay nga manguli. Ammuna nga danuri matalikarag nga Judio ay posible gapa nga mabbalin tu matalikarag nga disipulo ni Cristo, gittana mismu.

15. Kunnasi tam maparigan si Pablo? Mangiyawa tu angngarigan.

¹⁵ Kunnasi tam maparigan si Pablo? Ollu, ariattam vuluvuga alsan i napafutuan nga pakkaraga tam nga alegan i maski sinni nga “dana nga natullo nga meddan ta mannanayun nga pattolay.” Mekadua, makimemallo ittam kani Jehova tapenu tuluanna i ginnonopadda. (King. 13:48; 16:14) Kunni Silvana nga ma-30 dagun ngana nga payunir, “Nige ku angayan i tadday nga balay, makimallo ngà kani Jehova nga iddannà tu positibo nga pagimamma.” Makimallo ittam gapa ta Dios nga igiya ittam nakuan na angheles tapenu malegan danuri mapia-giffutuadda. (Mat. 10:11-13; Nep. 14:6) Kunna gapa ni Robert nga maturu 30 dagun ngana nga payunir, “Talaga kappagayayya i pakipattrabahu ta angheles nga makannammu ta paddia-paddian na makabbalay.” Mekatallu, imammatattam nga puede paga manguli i totolay. Kinagi gapa ni Carl nga elder nga Saksi ta maturu 50 dagun, “Magaleg ngà tu maski baddi nga seniales na sinseridad na tolay, puede tu i ngizzina, i kinasippona, onu i napafutuan nga pakkiavuna.” Wan, kagitta ni Pablo, magatta-attam ittam durante nga mavvunga.

16, 17. (a) Anni nga leksion i magigiammu tam ta instruksion nga mabibbig ta Eclesiastes 11:6? (b) Iyilustra nu kunnasi makafekto ta totolay nga mangobserba nittam i pabbini tam.

¹⁶ Maski gittana ari makadde ta futu na totolay i ilayyagayya tam nga mensahe na Pappatulan, ariattam nakuan tagibadditan i efekto na pabbini nga trabahu tam. (Bibbigan i Eclesiastes 11:6.) Kurug nga aru nga tolay i ari magginna nittam, ngem magobserba lagapa ira. Masingadda i marenu nga sinnuttam, masippo nga ugali, anna sinsero nga aggalo tam. Sonu kua, makoffun i kondukta tam tapenu metunung i negatibo ira nga pagimammada nittam. Naekspiriensa ni Sergio anni Olinda nga nakagi ta gafu, yatun nga panguli.

¹⁷ Inistoria ni Sergio: “Mittan nattaki kami, yatutta kammi nakangay ta puestumi. Ta panolimi, niyavu na mattatalebag, ‘Anni i nesimmu? Kanappammi kamu.’” Agga-ngizzi nga kunna paga ni Olinda: “Mawwewweg i drayber ira na bus nikami anna ikulle paga lagu na karuan, ‘Magayayya kami nga masingakkamu uli!’ Makkiddaw paga lagu ira tu magazina.” Nakaddag paga i magatawa megafu ta naddagà i tadday nga lalaki ta cart anna niddanna ira tu tanga-patto nga lappaw, anna nappabalo yayya ta trabahu nga kukukuadda.

18. Ngatta determinadu ka nga magatta-attam durante nga mavvunga?

¹⁸ Wan, durante nga ‘ariattam pagibannagan i lima tam’ ta pabbini tu vullung na Pappatulan, egga i nabalor nga billetam “tapenu kannammuan na ngamin nga sinolay” yatun. (Mat. 24:14) I pinaka-importante, monag i pagayayya tam megafu ta ammu tam nga egga i fabor ni Jehova nittam, megafu ta ayatanna danuri “pattalovuad-da ta giffutuad-da [i vullung] adde ta pavvunga da”!