1, 2. (a) Ngatta mangaffa-affu i kabataan ira ta pakillabadda kontra ta marake ira nga espiritu? (Innan i letratu ta gafu na artikulo.) (b) Anni i gigiammuattam?

NEYARIG ni apostol Pablo i pattoletam nga Cristiano ta suddalu ira nga makillaban tu manu-mano. Siempre ari tu literal, megafu ta espiritual i pakillabattam. Maski kunna, kuru-kurug i kalabattam ira. Si Satanas anna i demoniona ira ay eksperto nga minakkigerra anna ekspiriensadu. Nu innattam, gittana awan tu tiansa tam nga mangaffu. Mas ngana nga gittana awan tu laban na Cristiano nga kabataan ira. Kunnasi ira nga mangaffu kontra ta mas kuruga masikan anne ta tolay nga marake ira nga espiritu? Kakuruganna, mawayya na kabataan ira i mangaffu, anna kunnatun i mesissimmu! Ngatta? Megafu ta ‘massikan ira gafu ta ketaddeda ta Yafu.’ Ngem ari laman ira manga-manga tu pakapangngua ta Dios. Konsu armas ira nga makiggerra. Kagittada i nasanay ira nga suddalu, nga ‘nangiyusa ta ngamin [“kumpleto,” NW] nga armas nga niyawa na Dios nira.’​—Bibbigan i Efeso 6:10-12.

² Awayyana nga egga ta nono ni Pablo i armas ira nga iyusa na Romano ira nga suddalu turi ta kinagina yatun nga ilustrasion. (King. 28:16) Gigiammuattam nu ngatta mepangngo yatun nga ilustrasion. Durante nga kuattam yatun, innan nu anni i makagi  na karuan nga kabataan meyannung ta kapurueba anna benefisio ira na pangiyusa ta kada parte na espiritual nga armas.

3, 4. Kunnasi meyarig i kinakurug nga malegan ta Biblia ta sinturon na Romano nga suddalu?

³ Bibbigan i Efeso 6:14. Egga i metal na sinturon na Romano nga suddalu nga mapprotekta ta awàna. Nadisenio yatun tapenu ari nga makkazza i madammo nga panakkag ta gakona. I karuan nga sinturon ay egga gapa i maladda ira nga kawina nga pagipayyanan tu espada anna duchal. Nu meggo nga nakagalu i sinturon na suddalu, makapakkomfiansa yayya nga metaddagganna i labanan.

⁴ Mapprotekta gapa nittam i kinakurug ira nga magigiammu ta Uvovug na Dios kontra ta espiritual nga peligro megafu ta falsu ira nga tuddu. (Juan 8:31, 32; 1 Juan 4:1) Nu mas ayatattam i kinakurug nga naggafu ta Dios, mas mabi para nittam nga akkatan i ‘takkag ta gakaw,’ tam, nga kayàna kagian, mattoletam segun ta matunung ira nga estandarte na Dios. (Sal. 111:7, 8; 1 Juan 5:3) Kunne na paga, nu manawag i pakalippawa tam ta kinakurug ira ta Biblia, mas makkomfiansa tam nga itaddaggan anna idefensa danatun ta mangokkontra.​—1 Ped. 3:15.

5. Ngatta makkagi ittam nakuan tu kurug?

⁵ Nu gittana nesintron tu mapia nittam i kinakurug na Biblia, mapaguyu ittam nga mattolay segun tatun anna makkagi tu kurug ta ngamin nga tiempo. Ngatta ari tam malladda-laddug? Megafu ta i kinaladdug onu pappateteko i tadday ta pinaka-efektibo nga armas ni Satanas. Daralan na palladdug i makkagi tu laddug anna i mangurug tatun. (Juan 8:44) Yatutta maski imperfekto ittam, ibita tam nakuan adde ta mawayya tam i malladdug onu massiri. (Efe. 4:25) Ngem ari nga malogon yatun. Kunna 18-anios nga si Abigail: “Gittana awan tu kwenta na pakkagi tu kurug nu mittan, mas nu egga ka ta mariga nga situasion anna palladdug laman i awayya nga solusion.” Ngatta gafu kanayun lagapa yayya makkagi tu kurug? “Nu makkagi ngà tu kurug,” kunna, “marenu i konsensià ta arubang ni Jehova. Tapus makapattiwala niakan i magana ku anna i kokkofukku.” Si Victoria nga 23 anios, kunna gapa: “Nu kagiammu i kurug anna itaddaggammu i pangurug mu, uyu-uyawadda ka. Ngem maruddu nga makakkasta i benefisiona ira: Mapeggakka tu komfiansa, maddukko ka kani Jehova, anna mala mu i respeto danuri mangiddu nikaw.” Siguradu nga sulit nga pattalupaddianan nga ‘nakepay i sinturon na kakurug.’

6, 7. Ngatta neyarig i kinatunung ta panakkag ta gakaw?

⁶ I tadday nga panakkag ta gakaw nga usan na suddalu nga Romano ta ollu-siglo ay egga i naddirikke nga paabbag nga pirasu ira na balayanna. Napakka-pakku danaw nga pirasu na balayang anna nekakka ta figura na gakaw tapus meyiggo gukaban na tabbi nga galu nga nekabit ta balayang nga kawina. Natakkabban paga i abaga na suddalu tu pirasu ira na balayang nga nekabit gukaban na tabbi. Ari kuruga makaguyu i suddalu gafu ta kunnaw nga panakkag, yatutta mawag nga regular nga innanna nu nakapuestu yatun tu mapia. Ngem yatun nga armasna ta baggi i mangifugag ta taram na espada onu ta siggug na pika nga mattaffu ta futu onu ta tanakuan nga importante nga parte na baggina.

⁷ Talaga mepangngo nga simbolo yatun nu kunnasi protektan na matunung nga estandarte ni Jehova i figuratibo nga futu tam! (Prov. 4:23) Nu kunnasi nga ari itali na suddalu i de-kalidad nga panakkagna ta gakaw ta ari nga de-kalidad nga metal, ariattam gapa kayà nga itali i estandarte ira ni Jehova ta mas alinno nga estandarte tam lagapa. Ari tu kanayun nga masirib i desisiottam tapenu iyawa i proteksion nga kawagattam. (Prov. 3:5, 6) Regular lallagu nakuan nga  innattam nga i ‘panakkag ta gakaw’ nga niyawa ni Jehova nittam ay nepuestu tu mapia tapenu protektan i futu tam.

8. Ngatta sulit i pangitaddag ta estandarte ira ni Jehova?

⁸ Matageno mu kari nu mittan nga i matunung nga estandarte ni Jehova ay mamakadammo onu fugaddanna i lallagurem? Kinagi ni Daniel nga 21 anios: “I-illokuannà na mestrù anna mestrà kunne na gapa na kaklasè ira megafu ta mattolay ngà segun ta estandarte na Biblia. Yatutta nawawwan i komfiansà ta baggì anna nadepres ngà.” Kunnasina nalabanan yatun? Inistoriana: “Nasingakku gabbalaman i benefisio ira na panuttul ta estandarte ira ni Jehova. Naddroga i ‘kokkofukku’; nagimmang gapa nagiskuela i karuan. Kaddaraddam i nesimmu ta pattoleda. Talaga protektan ittam ni Jehova.” Kunni Madison nga 15 anios: “Mariga para niakan nga itaddaggan i estandarte ira ni Jehova anna ari mevulu ta nonopan na kakavvulu ku nga masaya onu kaddibersion.” Kunnasina inarubang yatun? “Agga-nono ku nga irepresentà i ngagan ni Jehova anna i tentasion ay armas ni Satanas nga panganna niakan. Nu metaddaggakku i kapurueba, mas makasta i panageno ku ta baggì.”

9-11. (a) Anni nga simboliko nga sapatus i iyellung na Cristiano ira? (b) Anni i makoffun nittam tapenu mas komportable nu mangilayyagayya tu mapia nga dumug?

⁹ Bibbigan i Efeso 6:15. Ari puede makiggerra i tadday nga Romano nga suddalu nu awan tu sapatusna. I alle-sapatus nga botasna ay napadday ta tallu-patung nga napaddirikke tu tabbi nga mangiyawa sa tu makakkasta nga balanse. Nadisenio yatun tu maladda anna komportable.

¹⁰ Nu i literal nga sapatus nga usan na Romano nga suddalu ira ay makoffun nira ta gerra, makoffun gapa i simboliko nga sapatus na Cristiano ira tapenu mangiyadde tu mensahe na imammo. (Isa. 52:7; Roma 10:15) Maski kunna, mawag i gutu nga maguvovug nu egga i luttuag nga oportunidad. “Maganassing ngà mallayyagayya ta kaklasè ira,” kunna 20-anios nga si Bo. “Mappasirang ngà. Ngem nu nonopakku, ari ngà nakuan tu kunnatun. Magayayya ngà ngana nga layyagayyan i kakavvulu ku.”

¹¹ Nammuan na aru nga kabataan nga nu talaga preparadu ira nga mangilayyagayya tu mapia nga dumug, mas komportable ira nga kuan yatun. Kunnasi ka mapprepara? “Agga-vulu ngà kanayun tu literatura ta bag ku,” kunni Julia nga 16 anios, “anna gigginnakku i opinion anna kuru-kurugan na kaklasè ira. Tapus makanono ngà nu anni i makoffun nira. Nu nakaprepara ngà, maka-istorià ira ta gannug nga espesipiko nga makabenefisio nira.” Kunna gapa na 23-anios nga si Makenzie: “Nu masippo ka anna ammum i magginna, makala ka tu ideya nu anni i problema ira na kakavvulu mu. Siguraduakku nga nabibbig ku i ngamin nga material nga nepublisa para ta kabataan ira. Nu kunnatun, medirektà i kakavvulu ku ta kakkagian na Biblia onu ta jw.org nga makoffun nira.” Gittana ipasingan natun ira nga komento, nu mas preparadu ka nga mallayyagayya, mas nakayellung tu mapia ta takkim i “sapatus” mu.

12, 13. Anni i karuan ta “umafa-afi nga pana” ni Satanas?

¹² Bibbigan i Efeso 6:16. I dakal nga “kalatag” nga agga-tammi na Romano nga suddalu ay rectanggulo anna kallabbanna i abaga adde ta tugna. Masserbi yatun tu proteksion sa kontra ta espada, pika anna pana ira.

¹³ Anni ira i “umafa-afi nga pana” nga ikanna nikaw ni Satanas? Awayya naka atakeyan tu kinaladdug ira meyannung kani Jehova. Kayà ni Satanas nga ipatageno nga awan tu pangikavurung anna pangiddu ni Jehova  nikaw. Marigi-rigatan i 19-anios nga si Ida ta pakatageno tu kawan tu serbi. Kunna, “Kanayukku matageno nga arayyu niakan si Jehova anna kanna kayà nga mabbalin tu Kofukku.” Kunnasina narubang yatun nga pangatake? “Talaga napasikan i pangurug ku megafu ta study ira,” kunni Ida. “Dati magitubang ngà laman tari anna kakku makkomento, nga nonopakku nga awan tu mayà magginna ta kagiakku. Ngem sangawe, mapprepara ngà ngana para ta study ira anna mattabbag ngà tu mamiddua onu mamittallu. Mariga yatun, ngem mas makasta i panageno ku nu kuakku yatun. Talaga makapagaram i wawwaragi. Kada lubbe ngà kabalin na study, nepatageno niakan nga iddukannà ni Jehova.”

14. Anni nga kinakurug i ipasingan na ekspiriensa ni Ida?

¹⁴ Ipasingan na ekspiriensa ni Ida i importante nga kinakurug: Egga i eksakto nga gukug na literal nga kalatag na suddalu, ngem i gukug na kalatag na pangurug tam ay awayyana nga bumaddi onu dumakal. Nakadepende yatun nittam. (Mat. 14:31; 2 Tes. 1:3) Kuruga importante gafu nga padakallan anna pasikannattam i pangurug tam!

15, 16. Kunnasi nga kagitta na helmet i iddanama?

¹⁵ Bibbigan i Efeso 6:17. Nadisenio i helmet onu panakkag ta ulu na Romano ira nga suddalu tapenu mattalsi i maski anni nga mekanna ta ulu, karalong, onu muka. Egga i pattammikan na karuan nga helmet tapenu puede tammikan na suddalu ta limana.

¹⁶ Nu kunnasi nga protektan na helmet i uto na suddalu, protektan gapa na “pagiddanama ta kapaliag” i uto tam, i abilidad tam nga mannono. (1 Tes. 5:8; Prov. 3:21) Pattalupaddianan  na iddanama nga nakafokus ittam ta promesa ira na Dios anna uffunan ittam nga mapeggan tu mepangngo nga pagimamma ta problema ira. (Sal. 27:1, 14; King. 24:15) Ngem nu kayà tam nga mabbalin tu efektibo i “panakkag ta ulu” tam, mawag nga iyelluttam ta ulu tam yatun, ari nga agga-tammi tam.

17, 18. (a) Kunnasi ittam itubba ni Satanas nga alsan i helmet tam? (b) Kunnasi tam mepasingan nga ari ittam nelogo na pangilloko ni Satanas?

¹⁷ Kunnasi ittam itubba ni Satanas nga alsan i helmet tam? Innan nu kunnasina kingngua yatun kani Jesus. Siguradu nga ammu ni Satanas nga mammaguray noka si Jesus ta totolay. Ngem mawag ni Jesus nga maginnag adde ta natunno nga tiempo ni Jehova. Nige natun, mawagna labbi mazziga anna matay. Yatutta niddan yayya ni Satanas tu tiansa tapenu mesimmu insigida yatun nga iddanamanna. Palawanan ni Satanas nga nu maddayaw laman tu mittan si Jesus nisa, malana ngamin yatun anna ora mismu. (Luc. 4:5-7) Kunnatun gapa, ammu ni Satanas nga iddan ittam ni Jehova tu material ira nga benefisio ta bagu nga sistema. Ngem mawag tam maginnag, anna baka mawag tam mazziga labbi. Yatutta tentan ittam gapa ni Satanas nga magayayya ta kunnatun nga pattolay ta maddaggun. Kayàna nga pagolluattam nga alegan i material ira nga benefisio—yuri i mala tam ngamin, tapus sangawe ngana. Pagaramman ittam ni Satanas nga mekasegunda laman i Pappatulan.​—Mat. 6:31-33.

¹⁸ Kagitta na aru nga kabataan nga Cristiano, ari nga nelogo taw nga pangilloko i 20-anios nga si Kiana. “Ammù nga Pappatulan na Dios laman i massolba ta ngamin nga problema,” kunna. Anni i efekto na matuyag nga iddanama ta appana-panono anna ta pattolena? “Uffunannà na iddanama ta Paraiso nga ilugar i sekular ira nga addetan,” kunna. “Ariakku itotodo nga usan i talentò ira onu iddanaman nga matannang i puestù ta trabahu. Mas aru lallagu nga tiempo anna sikan i usakku para ta espiritual ira nga addetan.”

19, 20. Kunnasi tam mabbalin tu malalaki ta pangiyusa ta Uvovug na Dios?

¹⁹ I espada nga usan na Romano ira nga suddalu ta tiempo turi ta nattura si Pablo ay ma-20 pulgada i kapadduna anna nadisenio para ta manu-mano nga pakillaban. I tadday nga rason nu ngatta kuruga efektibo i Romano ira nga suddalu ay megafu ta ensayyuadda kada aggaw i pangusa tu armasda.

²⁰ Nigitta ni Pablo i Uvovug na Dios ta espada nga niyawa ni Jehova nittam. Ngem mawag nga gigiammuattam nga usan yatun tu malalaki kada idefensa tam i pangurug tam ira​—onu tapenu ulian i appana-panono tam. (2 Cor. 10:4, 5; 2 Tim. 2:15) Kunnasi ka mabbalin tu malalaki? Kunna 21-anios nga si Sebastian: “Itutura ku i tadday nga bersikulo ta kada kapitulo na bibbigakku ta Biblia. Maguggunnug ngà tu lista na guggustù ira nga teksto. Megafu tatun, matageno ku nga mas gitta ni Jehova i appanono ku.” Kinagi gapa ni Daniel nga nakagi ta gafu: “Durante nga mabbibbig ngà tu Biblia, mappili ngà tu teksto ira nga makoffun ta totolay nga masimmuakku ta ministerio. Nammuakku nga mas magginna i totolay nu matagenoda nga kuru-kurug nikaw i Biblia anna kuammu i adde na mawayyam tapenu uffunan ira.”

21. Ngatta awan tu rason tapenu maganassing ittam kani Satanas anna ta demoniona ira?

²¹ Kagitta na ipasingan na kinagi na kabataan ira taw nga artikulo, awan tu rason tapenu maganassing kani Satanas anna ta demoniona ira. Masiki-sikan ira, ngem arianna kayà kagian nga ari ira maffu. Mortal ira. Sonu Tanga-rivu Dagun nga Pammaguray ni Cristo, metabbo ira ta avvu tapenu awan ngana vuluvuga tu makuada, tapus madaral ngana ira noka. (Nep. 20:1-3, 7-10) Ammu tam i kalabattam, i taktikana ira, anna i intensionna ira. Gukaban na uffun ni Jehova, marubattam yayya tu mapia!