MEGAFU ta mattolay ittam ta magulu nga mundo, mawag tu mappursigi ittam tapenu mapeggan tu imammo. Ngem, maski nu memammo ittam nu mittan, ari tu kanayun nga kunnatun. Anni i kagian na Uvovug na Dios nga makoffun nittam tapenu malegan i kurug anna mannanayun nga imammo? Kunnasi tam moffunan i tanakuan nga mapeggan gapa tu kunnatun?

Tapenu maekspiriensa i kurug nga imammo, mawag tu matageno tam nga ariattam mappeligro anna talaga kalmadu i emosiottam. Mawag tam gapa mapeggan tu meggo nga pakikkofun ta tanakuan. Pinaka-importante, tapenu malegan i mannanayun nga imammo, mawag tam kultiban i madukko nga relasion ta Dios. Kunnasi tam makua yatun?

Nu tuttulattam i matunung nga dorob anna prinsipio ni Jehova, mepasingattam nga mattalo tam sa anna kakayà tam nga memammo i relasiottam sa. (Jer. 17:7, 8; Sant. 2:22, 23) Nu kunnatun, maddukko gapa yayya nittam anna bendisionanna ittam tu memammo nga panageno. Mabibbig ta Isaias 32:17: “I resulta na kurug nga kinatunung ay imammo, anna i vunga na kurug nga kinatunung ay mannanayun nga pakkalma anna seguridad.” Malegattam i monag nga imammo nu napafutuan i panuttul tam kani Jehova.​—Isa. 48:18, 19.

Moffunan ittam gapa nga mapeggan tu mannanayun nga imammo gukaban na kappabbaw nga regalu na nelangitan nga Yama tam​—i masanto nga espirituna.​—King. 9:31.

Nilista ni apostol Pablo nga mekatallu nga aspeto na “vunga na espiritu” i imammo. (Gal. 5:22, 23) Megafu ta i kurug nga imammo ay aspeto na espiritu na Dios, mawag tam gafu nga mappasakup ta influwensia na masanto nga espiritu tapenu mapeggan tu kurug nga imammo. Ikonsidera tam i dua nga gannug nu kunnasi ittam uffunan na espiritu na Dios nga malegan i imammo.

 Ollu, mapeggan ittam tu imammo gukaban na regular nga pabbibbig ta nainspiran nga Uvovug na Dios. (Sal. 1:2, 3) Durante nga monag nga pannonopan i mensahe na Biblia, uffunan ittam na espiritu na Dios tapenu malippawa i appanono ni Jehova ta aru nga gannug. Angngariganna, mammuattam nu kunnasi nga nattalupaddian yayya nga memammo anna nu ngatta fermi i ka-importante na imammo nisa. Nu iyaplika tam i kunnatun ira nga leksion nga naggafu ta Uvovug na Dios, maekspiriensa tam i mas memammo nga pattolay.​—Prov. 3:1, 2.

Mekadua, mawag tu ipakimallo tam i masanto nga espiritu na Dios. (Luc. 11:13) Nipromesa ni Jehova nga nu mappoffun ittam sa, ‘iyawa na nittam i imammo na nga ari malippawa na tolay. Yaw i manangngal ta nono anna giffutuattam ta ketadday tam kani Cristo Jesus.’ (Fil. 4:6, 7) Nu regular tam nga ipakimallo anna ikiddaw i espiritu ni Jehova, pannuan ittam na Dios tu memammo nga panageno nga mala laman danuri meggo i pakikkofudda sa.​—Roma 15:13.

Kunnasi niyaplika na tanakuan yaw nga nebase-Biblia nga tabarang anna anni i inulida tapenu mapeggan tu mannanayun nga imammo​—kani Jehova, ta baggida, anna ta kasittoleda?

I karuan nga miembro na Cristiano nga kongregasion ta maddaggun ay dati nga “kanayun nga mapporay” ngem sangawe mas minangngikavurung, masippo, mapasensia, anna memammo ngana i pakilalladda ta tanakuan. * (Prov. 29:22) Innan nu kunnasi yaw napakurug na dua nga wagi nga noffunan nga nalabanan i poreda anna nakultiba i imammo ta tanakuan.

Nafektan na marake nga ugali ni David i paguvovugna. Nigena nammuan i kinakurug, minangngivuya yayya ta tanakuan anna marake i pakiyuvovugna ta familiana. Turi kua, natageno ni David nga mawagna manguli anna mas nga memammo. Kunnasina nakua yatun? Kunna, “Nigafù nga iyaplika i prinsipio ira na Biblia ta pattolè, yatutta megafu tatun, mas ngana nga irespetò i familià anna mas irespetodà gapa.”

Nainfluwensian na pallevu ni Rachel i ugalina. Inaminna, “Adde sangawe, marigatan ngà kontrolan i pappata-patù megafu ta ziminakal ngà ta familia  nga normal i papporay.” Anni i nakoffun sa tapenu mabbalin tu memammo? Kinagina, “Regular ngà makimallo kani Jehova anna makkiddaw tu uffun sa.”

Dua laman da David anni Rachel ta ehemplo nga mangipasingan nga nu iyaplika tam i prinsipio ira na Biblia anna makkiddaw tu espiritu na Dios tapenu uffunan ittam, mapeggan ittam tu imammo. Manawag nga maski nu napalevutan ittam tu totolay nga minapporay, mapeggan tam lagapa tu monag nga imammo nga makoffun ta pattaradday na familia tam anna na kapangngurug tam. Ngem, pagaramman ittam ni Jehova nga “makillivu-livu ta memammo ta ngamin nga totolay.” (Roma 12:18) Talaga kari nga posible yatun, anna anni ira i benefisio ta pappursigi tam nga mabbalin tu memammo?

Ta pamministerio tam, imbitattam i totolay nga mabenefisiowan ta memammo nga mensahe meyannung ta Pappatulan na Dios. (Isa. 9:6, 7; Mat. 24:14) Makapagayayya megafu ta aru i magginna. Megafu tatun, ari ngana ira nga marigatan ta pakatageno tu pakkadismaya onu poray ta masingi-singadda ta pallevuda. Lallagu, egga ngana i kurug nga iddanamada ta mappange anna napaguyu ira nga ‘karagatan i imammo.’​—Sal. 34:14.

Ngem ari tu kanayun nga makasta ta gafu i pangalawa na totolay ta mensahe tam. (Juan 3:19) Maski kunnatun, igiya ittam na espiritu na Dios tapenu ilayyagayya nira i mapia nga dumug tu memammo anna marespeto. Nu kuattam yatun, matuttul tam i instruksion ni Jesus ta ministerio nga nerekord ta Mateo 10:11-13, nga nitabaranna: “Nikamu nga tullung ta balay, kagian-nu, ‘Imammo i egga nikamu.’ Nu padulattad-dakamu, maddian ta makabbalay i imammo. Ngem nu ariad-dakamu padulattan, manoli laggapa nikamu i kinagi nu nga imammo.” Nu tuttulattam i tabarang ni Jesus, memammo ittam nga manaw anna egga i posibilidad nga magginna ira ta mappange.

Makoffun ittam gapa ta imammo nu marespeto tam nga arubangan i ofisiales na gobiernu​—nelagum ngana danuri mangokkontra ta trabahu tam. Angngariganna, nipamavulun na gobiernu na tadday nga nasion ta Africa i pangireruma tapenu ari maappruba i pamataddag tu Kingdom Hall ira. Tapenu memammo nga masolba yatun, natunno i tadday nga brother nga dati nga neyasayn nga misionero tatun nga nasion ta Africa, tapenu kibbidan i embahador natun nga nasion ta London, England. Kagianna tatun nga ofisial i meyannung ta memammo nga trabahu na Saksi ira ni Jehova ta nasionna ta Africa. Anni i resulta na pabbisitana?

“Ta paddattal ku ta reception desk,” kunna, “ammù nga i receptionist ay naggafu ta tribu na lengguahe nga nagigiammù megafu ta assissinnunna. Yatutta naddios ngà sa ta mismu nga lengguahena. Nakaddag yayya, yatutta niyavuna niakan, ‘Anni i rason na pabbisitam?’ Masippo ku nga kinagi sa nga kayà ku kibbidan i embahador. Inagalanna ta telefono i ofisial, yatutta nallawan anna naddios niakan ta lengguahe na tribuda. Kabalin natun, nagginna yayya tu mapia durante nga niyesplikà sa i memammo nga aktibidad na Saksi ira.”

I mali nga pakalippawa anna pangireruma na embahador ta trabahu tam ay nalsa megafu ta marespeto nga pinangiyesplika na brother. Ari nabbayag, inalsa na gobiernu tatun nga nasion na Africa i pangigamma ta pangipataddag ira. Anni mabba i ayayya na wawwaragi megafu tatun nga memammo nga resultana! Talaga i marespeto nga pattratu ta tanakuan ay makabenefisio​—nelagum i imammo.

Ta maddaggun, magayayya i totolay ni Jehova ta espiritual nga paraiso nga napannu tu imammo. Makoffukka tatun nga imammo durante nga itrabahum nga mapeggan tu kunnaw nga aspeto na vunga na masanto nga espiritu ta pattolem. Pinaka-importante, mala mu i fabor ni Jehova anna mapeggan tu abundansia anna mannanayun nga imammo ta napabagu nga mundo na Dios.​—2 Ped. 3:13, 14.