Ipasingan naw nga chart nga egga ira i profesiya nga nesimmu ta parehu nga tiempo. Pakurugan ngamin danaw nga mattolay ittam ngana “ta tiempo na panuppalan.”​—Dan. 12:4.

• Teksto Nep. 11:7; 12:13, 17; 13:1-8, 12

  Profesiya Maturu tu 3,000 nga dagun nga nammaguray ta totolay i “kanninipang nga ayam.” Ta tiempo na panuppalan, nabigaran i mekapitu nga ulu na ayam. Nammapia yatun anna sinuttul yayya na “tanga-ravvunan.” Usu-usan ni Satanas yatun nga ayam tapenu ‘labanan i nabattang nga gaka-gaka.’

  Ketuppalan Kabalin na Delubio, nammaguray i gobiernu ira nga kalaban ni Jehova. Maturu tu 3,000 nga dagun kabalin natun, nawawan na tadday taw ta makapangngua nga gobiernu nga magalan tu Britain i pakapangnguana durante ta World War I. Nassikan uli yatun tagga ta naki-alyansa nisa i United States. Ta tiempo na panuppalan, usu-usan ni Satanas i ngamin nga gobiernu ta davvun tapenu persigian i totolay na Dios.

• Teksto Dan. 11:25-45

  Profesiya Pallaban na patul na sigiran anna na patul na zita.

  Ketuppalan Labanan na Germany i Anglo-America. Ta 1945, nabbalin tu patul na sigiran i Soviet Union anna i kaalyaduna ira. Ta 1991, nassirina i Soviet Union, anna ari nabbayag, i Russia anna i kaalyaduna ira i nabbalin tu patul na sigiran.

• Teksto Isa. 61:1; Mal. 3:1; Luc. 4:18

  Profesiya Zinog ni Jehova i ‘mensaheruna’ tapenu “pakarenuanna i dalan” nige nga mepataddag i Mesianiko nga Pappatulan. Pinegafuanan naw nga grupo i “mangilayyagayya tu mapia nga dumug ta mapakalinno.”

  Ketuppalan Namegafu ta 1870, malallappo nga ginigiammu ni C. T. Russell anna na kakavvuluna i Biblia tapenu ammuan nu anni talaga i ituttuddu natun. Ta 1881, nalippawada nga kuruga importante para ta aripan ira na Dios i mallayyagayya. Nangipublisa ira tu artikulo ira gitta na “Wanted 1,000 Preachers” anna i “Anointed to Preach.”

• Teksto Mat. 13:24-30, 36-43

  Profesiya Nangiwara i tadday nga kalaban tu vullung na kaddo ta koman nga nabinian tu trigu anna napagurayan nga mattalovu i kaddo anna kallabban natun i trigu adde ta tiempo na pagapit; tapus nesina i kaddo ta trigu.

  Ketuppalan Namegafu ta 1870, mas nga nannawag i nadduman na kurug anna na falsu ira nga Cristiano. Ta tiempo na panuppalan, naammung i kurug ira nga Cristiano ta kongregasion anna nesina ira ta falsu ira nga Cristiano.

• Teksto Dan. 2:31-33, 41-43

  Profesiya I balayang anna pila nga takki na tadday nga estatua nga napadday ta nadduruma nga metal.

  Ketuppalan Isimbolo na pila i ordinariu ira nga totolay nga sakup na Anglo-American World Power nga marrebelde ta gobiernuda. Megafu tatun nga totolay, ari nga meyusa na gobiernu i alle-balayang nga sikan na pakapangnguada.

• Teksto Mat. 13:30; 24:14, 45; 28:19, 20

  Profesiya “I trigu” ay nepitto “ta abayaw” anna natunno i “mekatalo anna nannono nga doroban” bilang dakal na “karuan ira nga doroban.” Namegafu nga nadde na kelayyagayya na “Mapia nga Dumug na Pammaguray na Dios” i “tanga-ravvunan.”

  Ketuppalan Ta 1919, natunno i mekatalo nga aripan nga tangngallan i totolay na Dios. Namegafu tatun nga tiempo, mas nga nagaktibo i Estudiante ira na Biblia ta pallayyagayyada. Ta maddaggun, mallayyagayya i Saksi ira ni Jehova ta maturu tu 200 nga nasion anna mangipublisa ira tu literatura ta maturu tu 1,000 nga lengguahe.

• Teksto Dan. 12:11; Nep. 13:11, 14, 15

  Profesiya Irollu na ayam nga dua i taggugna i pamadday ta ‘estatua para ta ollu nga ayam’ anna mangiyawa ‘tu inango ta estatua na ollu nga ayam.’

  Ketuppalan I Anglo-American World Power i nangirollu ta pabbuu tu League of Nations. Yaw nga organisasion ay suportadu na tanakuan ira nga nasion. Namegafu ta 1926 adde ta 1933, nabbalin gapa nga miembro na League of Nations i patul na sigiran. Mangurug i totolay nga makerattal tu imammo ta mundo i League of Nations kunne na gapa i katali natun nga United Nations, gannug nga Pappatulan laman na Dios i makakua.

• Teksto Dan. 8:23, 24

  Profesiya Tadday nga patul nga kitapporay i itchurana i mangirattal tu “grabe nga kadaral.”

  Ketuppalan Napakaru i pinatay na Anglo-American World Power anna daka-dakal i zinaralna. Angngariganna, durante ta World War II, nangidanna tu dua nga bomba atomika i United States ta tadday nga nasion nga kalaban na Anglo-American World Power. Mas dakal i zinaral naw nga armas kumpara ta ngamin nga napadday nga armas nige natun.

• Teksto Dan. 11:31; Nep. 17:3, 7-11

  Profesiya I “uzzin nga ayam” nga mafulu i taggugna ay luttuag ta avvu nga ari nga matuku-tukug i karalamna anna yatun i mekawalu nga patul. Tukuyan na libru na Daniel yaw nga patul bilang “i kannama-nama nga gannug nga manaral.”

  Ketuppalan Nangultimu i League of Nations durante na World War II. Kabalin na gerra, ‘nepuestu’ i UN. Kagitta na League of Nations nga sinaliananna, neddan gapa i UN tu dayaw nga mepangngo ta Pappatulan na Dios. Atakeyan noka na UN i relihion.

• Teksto 1 Tes. 5:3, NW; Nep. 17:16

  Profesiya Iproklama na nasion ira i “imammo anna seguridad,” tapus atakeyan na “mafulu nga taggug” anna na kanninipang nga “ayam” i “babay nga minakkigannug” anna daraladda i babay. Kabalin natun, madaral i nasa-nasion.

  Ketuppalan Awayyana nga ikagi na nasa-nasion nga nerattalda ngana i imammo anna seguridad. Tapus, daralan na nasion ira nga massuporta ta UN i falsu ira nga relihion. Yaw ngana i pamegafuanan na dakal nga ziga. Mangultimu yatun nga ziga sonu daralan ni Jesus i nabattang paga nga parte na mundo ni Satanas ta Armagedon.

• Teksto Eze. 38:11, 14-17; Mat. 24:31

  Profesiya Atakeyan na Gog i davvun na totolay na Dios. Kabalinna, ammungan na anghel ira i ‘totolay nga pinili na Dios.’

  Ketuppalan Atakeyan na patul na sigiran anna na tanakuan paga ira nga gobiernu ta mundo i totolay na Dios. Oras tu namegafu ngana yaw nga pangatake, maammung i nabattang paga ira nga nazelugan mappange ta langi.

• Teksto Eze. 38:18-23; Dan. 2:34, 35, 44, 45; Nep. 6:2; 16:14, 16; 17:14; 19:20

  Profesiya “I nattakay” ta “furaw nga kabayu” ay “mamatulu ta kontra na ira” gukaban na panaral ta Gog anna ta armadana. I kanninipang nga “ayam” ay ‘netabbo ta weg na zumozzozzog nga asufri,’ anna kabalinna ay minammo na batu i daka-dakal nga estatua.

  Ketuppalan Ipaliag noka ni Jesus nga Patul na Pappatulan na Dios, i totolay na Dios. Kavulu i 144,000 anna i anghel ira, daraladda noka i ngamin nga nasion nga mangatake ta totolay na Dios. Yatun noka i ultimu na mundo ni Satanas.