1-2. Anni i ikonsidera tam taw nga artikulo?

MAS aru ngana i ebidensia tam nga mamakurug nga mattolay ittam ta ultimu na pangurianan ira nga aggaw naw nga sistema na ganna-gannug. Aranni ngana nga daralan ni Jehova anna ni Jesu-Cristo i ngamin nga gobiernu nga kumontra ta Pappatulan. Nige nga mesimmu yatun, tulu-tuloy nga mallaban i patul na sigiran anna patul na zita anna kalabanadda i totolay na Dios.

² Taw nga artikulo, ikonsidera tam i profesiya ta Daniel 11:40–12:1. Ammuattam nu sinni i patul na sigiran ta maddaggun anna gigiammuattam nu ngatta makapattalupaddian ittam nga kalmadu anna makapattalo nga ipaliag ittam ni Jehova maski anni i mesimmu.

3-4. Sinni i patul na sigiran ta maddaggun? Iyesplika.

³ Kabalin nga nangultimu i Soviet Union ta 1991, napeggan i totolay na Dios tatun nga alawa nga teritoria tu “baddi nga uffun”​—tadday nga tiempo na kapalubbang. (Dan. 11:34) Bilang resulta, nakapallayyagayya ira anna ari nabbayag, nabbalin tu ginatu nga rivu i bilang na publisher ta nasion ira nga dati nga parte na Soviet Union. Nappasa i piga nga dagun, nabbalin tu patul na sigiran i Russia anna i kaalyaduna ira. Kagitta na nagigiammu ta nappasa nga artikulo, tapenu mabbalin tu patul na sigiran onu patul na zita i tadday nga gobiernu, mawag nga kuanna i tallu nga gannug: (1) persigianna i totolay na Dios, (2) ipasingan na kukukuanna nga kalaban yayya ni Jehova anna na totolena, anna (3) makikompetensia yayya ta kalabanna nga patul.

 ⁴ Sifutan nu ngatta makagi tam nga i Russia anna i kaalyaduna ira i patul na sigiran ta maddaggun. (1) Nigammada i pallayyagayya anna pinersigida i ginatu nga rivu nga wawwaragi tam nga maddian ta teritoria nga kontroladuda. (2) Ipasingan danatun nga kukukuadda nga ikalussoda si Jehova anna i totolena. (3) Makikkillaban ira ta patul na zita, i Anglo-American World Power. Innattam nu kunnasi nga nabbalin tu patul na sigiran i Russia anna i kaalyaduna ira.

5. Anni nga periodo na tiempo i tukuyan na Daniel 11:40-43, anna anni i mesimmu tatun nga tiempo?

⁵ Bibbigan i Daniel 11:40-43. Tukuyan naw nga parte na profesiya i meyannung ta tiempo na panuppalan. Ipasingan naw nga rekord i pallaban na patul na sigiran anna patul na zita. Gitta na neprofesiya ni Daniel, “makkatubbu-tubba” onu “makkatotoru” i patul na zita anna i patul na sigiran ta tiempo na panuppalan.​—Dan. 11:40; ftn.

6. Anni i ebidensia nga tulu-tuloy nga makkalaba-laban i dua nga patul?

⁶ Mallaban i patul na sigiran anna i patul na zita megafu ta parehu nga kayàda i mabbalin tu pinakamakapangngua nga gobiernu ta mundo. Angngariganna, kabalin na World War II, nigafu na Soviet Union anna na kaalyaduna ira nga kontrolan i dakal nga parte na Europe. Yatutta nakka-anugutan na patul na zita anna na tanakuan ira nga nasion nga pattaddayan i armadada ira kontra ta patul na sigiran. Yaw nga organisasion ay magalan tu NATO (North Atlantic Treaty Organization). Ari magimmang i patul na sigiran anna i patul na zita ta paggasto tu dakal tapenu mapeggan tu pinakamasikan nga armada. Supu-suportan gapa na patul na sigiran i kalaban ira nga nasion na patul na zita ta gerra anna protesta ira ta Africa, Asia, anna Latin America. Kunnatun gapa i kukukuan na patul na zita ta kalaban ira na patul na sigiran. Ta nappasa ira nga dagun, massiki-sikan i pakapangngua ta interu mundo na Russia anna na kaalyaduna ira. Usu-usadda gapa i kompiuter ira ta pakillabadda ta patul na zita. Nakka-akusa i patul na sigiran anna i patul na zita nga mangiyusa i kataggi-tadday tu makadaral nga program ta kompiuter tapenu daralan i ekonomia anna pulitikal nga sistema na kalabadda. Anna segun ta neprofesiya ni Daniel, mattulu-tuloy nga atakeyan na patul na sigiran i totolay na Dios.​—Dan. 11:41.

7. Anni i “davvun na Dekorasion”?

⁷ Kagian na Daniel 11:41 nga tallungan noka na patul na sigiran i “davvun na Dekorasion.” Anni yatun nga davvun? Ta tiempo na Biblia, i literal nga davvun na Israel i mekonsidera nga “kakastan ta interu nga davvun.” (Eze. 20:6) Kuruga espesial yatun nga davvun megafu ta tatun nga dayawan na totolay si Jehova. Ngem namegafu ta Pentecostes 33 C.E., ari ngana tu tattadday nga espesipiko nga lugar yatun ta davvun. Rasonable gapa yatun megafu ta maddian ta nadduruma nga lugar ta interu davvun i totolay ni Jehova. Ta maddaggun, i “davvun na Dekorasion” ay tumukoy ta ngamin nga aktibidad na totolay ni Jehova nga nelavu tatun i paddayoda kani Jehova gukaban na study anna ministerio.

8. Kunnasi nga nattallung i patul na sigiran ta “davvun na Dekorasion”?

⁸ Durante ta pangurianan ira nga aggaw, mamippiga nga sinallung na patul na sigiran i “davvun na Dekorasion.” Angngariganna, turi ta nabbalin tu patul na sigiran i Nazi  Germany, netallugaring turi ta maddaggun i World War II, nattallung yatun nga patul ta “davvun na Dekorasion” gukaban na pameppersigi anna pamatena ta totolay na Dios. Kabalin na World War II, turi ta Soviet Union i nabbalin tu patul na sigiran, nattallung yatun nga patul ta “davvun na Dekorasion” gukaban na pameppersigi ta totolay na Dios anna pangitabbo nira ta tanakuan nga nasion.

9. Ta nappasa ira nga dagun, kunnasi nga nattallung i Russia anna i kaalyaduna ira ta “davvun na Dekorasion”?

⁹ Ta nappasa ira nga dagun, nattallung gapa i Russia anna i kaalyaduna ira ta “davvun na Dekorasion.” Kunnasi? Ta 2017, nigamma naw nga maddaggun nga patul na sigiran i trabahu na totolay ni Jehova anna nipefukuna i karuan ta wawwaragi tam. Nigammana gapa i publikasiottam ira, nelagum tatun i New World Translation. Kinumpiskana gapa i panga nga ofisina ta Russia tuange ta Kingdom Hall anna Assembly Hall ira. Kabalin danatun nga kingnguana, turi ta 2018, kinagi na Manangngal nga Baggi nga i Russia anna i kaalyaduna ira i patul na sigiran. Maski paga nu grabe i kapeppersigi na totolay ni Jehova, manakida nga makipartisipa ta pakillaban ta gobiernu ira onu pakkiddaw tu reforma. Lallagu, tuttuladda i tabarang na Biblia nga ipakimallo i “ngamin nga mammaguray,” netallugaring nu egga ira i desisionadda nga posible nga makafekto ta lallaguray nga maddayaw.​—1 Tim. 2:1, 2.

10. Daralan kari noka na patul na sigiran i patul na zita? Iyesplika.

¹⁰ Nakafokus i profesiya ta Daniel 11:40-45 ta patul na sigiran. Kayà kari kagian natun nga daralanna noka i patul na zita? Ari. “Sigga-matolay” paga noka i patul na zita sonu daralan ni Jehova anna ni Jesus i ngamin nga gobiernu ta gerra na Armagedon. (Nep. 19:20) Ngatta makasiguradu ittam tatun? Ikonsidera i ikagi nittam na profesiya ira ta Daniel anna ta Nepakannammu.

11. Anni i kebalinan na Daniel 2:43-45? (Innan i letratu ta vungun.)

¹¹ Bibbigan i Daniel 2:43-45. Dineskriba ni profeta Daniel i daka-dakal nga estatua nga napadday ta nadduruma nga metal i parte ira na baggina. I kada parte natun ay mangirepresenta ta nadduruma nga gobiernu nga nammaguray ta davvun nu sitaw aru i maddian nga totolay na Dios. Nammaguray danaw nga gobiernu ta nadduruma nga tiempo. I takki na estatua ay balayang nga nakivuan tu pila. Irepresenta natun i ultimu nga gobiernu, i Anglo-American World Power. Kebalinan natun nga profesiya nga mammaguray paga i Anglo-American World Power sonu daralan na Pappatulan na Dios i ngamin nga gobiernu na totolay.

12. Anni i irepresenta na mekapitu nga ulu na kanninipang nga ayam, anna ngatta importante nga ammu tam yatun?

¹² Dineskriba gapa ni apostol Juan i gobiernu ira nga nammaguray ta totolay ni Jehova. Ta profesiya ni Juan, danaw nga gobiernu ay irepresenta na tadday nga kanninipang nga ayam nga pitu i uluna. Irepresenta na mekapitu nga ulu na ayam i Anglo-American World Power. Importante nga ammu tam yaw megafu ta awan ngana noka tu luttuag nga tanakuan nga ulu na ayam. Maddaggun lagapa nga mammaguray i mekapitu nga ulu na ayam sonu daralan ni Cristo tuange ta nelangitan nga armadana yatun kunne na gapa i tanakuan nga parte na ayam. *​—Nep. 13:1, 2; 17:13, 14.

13-14. Sinni i “Gog na davvun na Magog,” anna anni i awayyana nga mamaguyu nisa nga atakeyan i totolay na Dios?

¹³ Mangiyawa nittam tu pakannammu i profesiya nga nerekord ni Ezekiel nu anni i mesimmu durante ta ultimu nga aggaggaw na patul na sigiran anna patul na zita. Nu imammatattam nga para-parehu i tukuyan nga periodo na tiempo anna mesimmu ira ta profesiya na Ezekiel 38:10-23; Daniel 2:43-45; 11:44–12:1; anna Nepakannammu 16:13-16, 21, ekspektattam i tumunug ira nga mesimmu.

¹⁴ Ari mabbayag kabalin na pamegafu na dakal nga ziga, mattaradday noka i “patul ira ta tanga-ravvunan” tapenu mabbuu tu alyansa na nasa-nasion. (Nep. 16:13, 14; 19:19) Tukuyan na Biblia yaw nga alyansa na nasa-nasion bilang i “Gog na davvun na Magog.” (Eze. 38:2) Atakeyan natun nga alyansa na nasa-nasion i ngamin nga totolay na Dios anna gakkagna nga daralan ngamin ira. Anni i mamaguyu nira nga mangatake? Mekunnay taw nga tiempo, nasingan ni apostol Juan i daddarakal nga allalagu nga nattampo ta kalaban ira na Dios. Posible nga irepresenta danatun nga allalagu i madammo nga mensahe na pamanunnu nga iproklama noka na totolay ni Jehova. Awayyana nga yatun nga mensahe i mamaguyu ta Gog na Magog nga atakeyan i totolay na Dios tapenu daralan ngamin ira.​—Nep. 16:21.

15-16. (a) Anni ira i mesimmu segun ta Daniel 11:44, 45? (b) Anni noka i mesimmu ta patul na sigiran anna ta ngamin nga nasion nga parte na Gog na Magog?

¹⁵ Awayyana nga yaw nga madammo nga mensahe anna ultimu nga pangatake na kalaban ira na Dios ay parehu ta tukuyan na Daniel 11:44, 45. (Bibbigan.) Tatun, kinagi ni Daniel i “dumug maggafu ta zigattu anna maggafu ta sigiran” nga mamavvurung ta patul na sigiran yatutta mallawan yayya nga “grabe i porena.” Gakkag na patul na sigiran nga “napakaru i patayanna.” Awayyana nga tumukoy i “napakaru” ta totolay ni Jehova. * Posible nga ideskriba ni Daniel taw i ultimu nga pangatake ta ngamin nga totolay na Dios.

 ¹⁶ Oras tu atakeyan na patul na sigiran anna karuan paga nga gobiernu i totolay na Dios, yatun noka i kuruga mamapporay ta Makapangngua-sa-ngamin nga Dios tapus mamegafu ngana i Armagedon. (Nep. 16:14, 16) Tatun nga tiempo, madaral noka i patul na sigiran anna i ngamin nga nasion nga parte na Gog na Magog, anna “awan noka tu manguffun nisa.”​—Dan. 11:45.

17. Sinni “i katannangan nga prinsipe” nga si Miguel nga nakagi ta Daniel 12:1? Anni i kukukuanna, anna anni i kuanna ta mappange?

¹⁷ Mangiyawa paga tu aru nga informasion i tumunug nga versikulo ta rekord ni Daniel nu kunnasi nga madaral i patul na sigiran anna i kaalyaduna ira anna nu kunnasi ittam nga mepaliag. (Bibbigan i Daniel 12:1.) Anni i kayà kagian naw nga versikulo? Miguel i tanakuan nga ngagan na mammaguray nga Patul tam, si Cristo Jesus. Yayya i “mangitaddag” ta totolay na Dios namegafu paga ta 1914 turi ta nepataddag i Pappatulanna ta langi. Ta aranni ngana nga tiempo, “manaddag” noka yayya onu daralanna danuri kalabanna ta gerra na Armagedon. Yatun nga gerra i ultimu nga mesimmu ta kinagi ni Daniel nga pinakagrabe nga “tiempo na ziga-riga” ta historia. Tukuyan na profesiya ni Juan ta Nepakannammu nga “nepallo nga kadara-darum” onu dakal nga ziga i tiempo nige anna durante na Armagedon.​—Nep. 6:2; 7:14.

18. Ngatta makapattalupaddian ittam nga kalmadu maski anni i mesimmu ta mappange?

¹⁸ Kinagi parehu ni Daniel anni Juan nga ipaliag noka ni Jehova anna ni Jesus ta dakal nga ziga danuri masserbi nira. Yatutta makapattalupaddian ittam nga kalmadu maski anni i mesimmu. Kinagi ni Daniel nga mepaliag noka danuri totolay nga ‘netura i ngagadda ta libru.’ (Dan. 12:1) Anni i kuattam tapenu metura i ngagattam tatun nga libru? Mawag tu pakurugattam nga egga i pangurug tam kani Jesus, i Kordero na Dios. (Juan 1:29) Mawag tu idedika tam i baggi tam ta Dios anna mappabawtiso. (1 Ped. 3:21) Anna mawag nga ipasingattam i suporta tam ta Pappatulan na Dios gukaban na panguffuttam ta tanakuan nga mammuan i meyannung kani Jehova.

19. Anni i mawag nga kuattam sangawe, anna ngatta?

¹⁹ Sangawe ngana i tiempo nga pasikannattam i pattalo kani Jehova anna ta organisasionna. Sangawe ngana i tiempo tapenu suportan i Pappatulan na Dios. Nu kuattam danatun, mepaliag ittam noka sonu daralan na Pappatulan na Dios i patul na sigiran anna i patul na zita.