1-2. Anni i kinagi na tadday nga gumattura, anna anni i gigiammuattam taw nga artikulo?

MINILLION sangawe i makkakkagi nga mangurug ira kani Jesus, ngem ariadda alawatan i nitudduna ira. (2 Tim. 4:3, 4) Kunnaw paga lagu i kagian na tadday nga gumattura: “Nu egga uli i Jesus ta tiempo tam nga makkagi tu ganna-gannug nga kagitta na kinagi na orihinal nga Jesus gari . . . , panakitattam kari yayya sangawe gittana kingngua tam dua rivu dagun ngana i nappasa? . . . Kunnaw i tabbag na magaru: Wan, panakitattam yatun nga tolay.”

² Ta ollu siglo, aru i nakaginna ta pinanuddu ni Jesus anna nasingadda i milagro ira nga kingnguana. Ngem manakida i mangurug nisa. Ngatta? Ta nappasa nga artikulo, ginigiammu tam i appa nga rason nu ngatta nesiddukal i totolay ta kinakkagi anna kikkingngua ni Jesus. Ammuattam gapa sangawe i appa paga nga rason. Innattam gapa nu ngatta panakitan na totolay sangawe i tagatuttul ira ni Jesus anna nu kunnasi tam malillitan i mesiddukal.

3. Ngatta nesiddukal i karuan kani Jesus?

³ Ta pinattolay ni Jesus ta davvun, nakikavulu yayya ta ngamin nga klase na totolay. Nakipakkan yayya ta mariku anna ta egga ira autoridadna. Ngem aru gapa i tiempona nga makikavulu ta pobre anna awan tu awa-awayyada. Nikallona gapa danuri agalan na totolay nga “minattagaruli.” Nesiddukal i karuan nga minappakatannang nga totolay tatun nga kingngua ni Jesus. Niyavuda ta disipulosna: “Ngatta ta makiyarubang kamu nga  kuman ta gumattuki ira ta vugi anna marakay nga totolay?” Kunnaw i nitabbag ni Jesus nira: “Ari nga magawag tu manguru danuri i mapia i gawa-gawayyad-da, nu ari danuri makkataki laman. I inangayak-ku, ay ari tu magagal ta matunung ira nga totolay, nu ari ta minattagaruli tapenu mabbabawi ira.”​—Luc. 5:29-32.

4. Segun kani profeta Isaias, anni nakuan i ekspektan na Judio ira nga mesimmu ta Mesias?

⁴ Anni i kagian na Katurakan? Nabayag nga tiempo nige nga limittuag i Mesias, dati ngana nga kinagi ni profeta Isaias nga ari nga alawatan na totolay i Mesias. Kagian na profesiya: “Nauyu-uyaw yayya anna nilillitan na totolay . . . Kagitta na nakatagu i mukana nittam. Nauyu-uyaw yayya, anna nikwenta tam nga awan tu sesserbina.” (Isa. 53:3) Neprofesiya nga lillitan na “totolay” i Mesias. Yayya nga ekspektan ngana nakuan na ollu-siglo ira nga Judio nga panakitan na totolay si Jesus.

5. Kunnasi nga imammatan sangawe na totolay i tagatuttul ira ni Jesus?

⁵ Kunnatun kari gapa i problema ta kaggawattam? Wan. Kakayà na relihioso nga lider ira sangawe nu egga i makimiembro ta relihiodda nga prominente, mariku, anna danuri imammatan na mundo nga ma-uto. Alawatadda danatun nga totolay maski nu kuestionable i moralidad anna i istilo na pattoleda. Ngem alalinno i paningan danatun nga relihioso nga lider ta Saksi ira ni Jehova, maski nu matalikarag anna marenu i moralidadda. Ari gare ira nga prominente segun ta pagimamma na totolay. Gitta na kinagi ni Pablo, pilian na Dios “danuri i moyoyaw.” (1 Cor. 1:26-29) Ngem para kani Jehova, iddeddukanna i ngamin nga matalo nga aripanna.

6. Anni i kinagi ni Jesus ta Mateo 11:25, 26, anna kunnasi tam yayya nga maparigan?

⁶ Anni i kuattam tapenu ari ittam nga mesiddukal? (Bibbigan i Mateo 11:25, 26.) Ari ka nga mappa-influwensia ta pagimamma na totolay ta Saksi ira ni Jehova. Ammuammu nakuan nga danuri laman mapakalinno i usan ni Jehova tapenu kuan i urena. (Sal. 138:6) Pannonopammu gapa i napakaru nga metuttuppalna gukaban na pangusana turi ira ta ari imammatan na mundo nga ma-uto onu malalaki.

7. Ngatta inagalan ni Jesus nga minaggappappe i Fariseo ira, anna anni i reaksiodda?

⁷ Magutu nga kinuestion ni Jesus i minaggappappe ira nga relihioso nga annangngua ta tiempona. Angngariganna, inagalanna i Fariseo ira nga minaggappappe megafu ta mas ikavurungadda nu kunnasi i pamaggoda ta limada anne ta nu kunnasida tangngallan i maganada ira. (Mat. 15:1-11) Posible nga nakaddagan i disipulos ni Jesus tatun nga kinagina. Yayya nga niyavuda sa: “Ariam-mu kari ammu tu natakitan i Fariseo ira megafu ta kinagim?” Simibbag si Jesus: “Ngamin nga mula nga ari nemula na Yamà ta langi ay mabaddul noka. Pagurayan nu laman ira! Vuling ira nga mangipollu ta totolay nga kagitta da nga vuling. Nu ipollu na tolay nga vuling i kagitta na nga vuling, ira ngana nga dua i mataga ta avvu.” (Mat. 15:12-14) Ari nga nappefugag si Jesus ta pakkagi tu kinakurug megafu laman ta napporay ira.

8. Kunnasi nga nipasingan ni Jesus nga ari tu makapagayayya ta Dios i ngamin nga kuru-kurugan na totolay?

⁸ Kinuestion gapa ni Jesus i falsu ira nga tuddu na relihion. Arianna nga kinagi nga makapagayayya ta Dios i ngamin nga kuru-kurugan na totolay. Kakuruganna, niyesplikana nga aru danuri egga ta alawa nga dalan nga mappange ta kadaral. Ngem pilippiga laman i egga ta asilo nga dalan nga mappange ta inango. (Mat. 7:13, 14, NW) Nipakanawagna nga egga danuri gittana massesserbi ta Dios, ngem ta kakuruganna, ari mabba. Niyabisona: “Magimmugug  kamu ta appe-profeta ira. Appe-masippo ira nga kagitta na karneru nga umay nikamu. Ngem ta kakurugan na kagitta da i maporay nga kitu. Kannammuan nu ira megafu ta kukukuad-da.”​—Mat. 7:15-20.

9. Anni i karuan nga falsu nga tuddu na relihion i kinuestion ni Jesus?

⁹ Anni i kagian na Katurakan? Neprofesiya ta Biblia nga i pangikavurung na Mesias para ta balay ni Jehova ay kunna afi nga mangufu nisa. (Sal. 69:9; Juan 2:14-17) Megafu tatun nga pangikavurung ni Jesus, kinuestionna i falsu ira nga kuru-kurugan anna annangngua na totolay. Angngariganna, mangurug i Fariseo ira nga imortal i kararua. Ngem nituddu ni Jesus nga makkakkatrug laman i natay ira. (Juan 11:11) Kakkagian na Saduceo ira nga ari tu kurug i paginnolay. Ngem pinaginnolay ni Jesus i kofunna nga si Lazaro. (Juan 11:43, 44; King. 23:8) Kurugan na Fariseo ira nga dati ngana nga pinlano na Dios i ngamin nga gannug anna i mesissimmu ira. Ngem nituddu ni Jesus nga awayya lagapa nga pilian na totolay nu masserbi ira ta Dios, onu ari.​—Mat. 11:28.

10. Ngatta aru i mesiddukal ta tuddu tam ira?

¹⁰ Kunnatun kari gapa i problema ta kaggawattam? Wan. Aru i mesiddukal megafu ta usu-usattam i Biblia tapenu ipasingan ta totolay i falsu ira nga tuddu na relihion. Ituttuddu na relihioso ira nga lider ta miembroda nga kastigowan na Dios ta infiernu danuri marake. Usadda yatun nga falsu nga tuddu tapenu makontrolda i totolay. Aripan ittam ni Jehova yayya nga uuffunattam i totolay nga malippawa nga ari tu fustu yatun nga tuddu megafu ta ammu tam nga Dios yayya na aya. Ituttuddu gapa na lider ira na relihion nga imortal i kararua. Nu kurug yatun, ari ngana nakuan nga mawag tu mapaginnolay i maski sinni. Usu-usattam i Biblia tapenu ipasingan nga ari tu kurug yatun nga tuddu. Aru gapa nga relihion i mangituddu nga dati ngana nga pinlano na Dios onu na ari masingan nga pakapangngua i ngamin nga kukukuattam. Ngem ituttuddu tam nga egga i lallaguray na tolay nga mappili, anna awayyana lagapa nga pilian nga passerbian i Dios. Anni i reaksion tatun ira na relihioso nga lider? Maruddu nga mapporay ira nittam!

11. Segun ta kinagi ni Jesus ta Juan 8:45-47, anni i ikikkiddaw na Dios ta totolena?

 ¹¹ Anni i kuattam tapenu ari ittam nga mesiddukal? Nu ayatattam i kinakurug, mawag tu kurugan anna tuttulattam i uvovug ira na Dios. (Bibbigan i Juan 8:45-47.) Ariattam parigan si Satanas nga Diablo nga pinammanakitanna i kinakurug. Ariattam gapa vuluvuga ikompromiso i pangurug tam ira. (Juan 8:44) Ikikkiddaw na Dios ta totolena nga ‘pallikuradda i marakay’ anna ‘ipafutuda i mapia,’ gitta na kingngua ni Jesus.​—Roma 12:9; Heb. 1:9.

12. Ngatta aru nga Judio i nesiddukal megafu ta nikapatay ni Jesus?

¹² Anni i tadday paga nga nikesiddukallan na Judio ira ta tiempo ni Jesus? Kinagi ni Pablo: “Ilayya-gayya mi si Cristo nga nepato ta estaka. Yaw nga ilayya-gayya mi ay kesiddukallan na Judio ira.” (1 Cor. 1:23, NW) Ngatta aru i nesiddukal ta kapatay ni Jesus? Para nira, ipasingan na kebesing ni Jesus ta estaka nga tadday yayya nga kriminal anna minattagaruli, yatutta ariadda kurugan nga yayya i Mesias.​—Deut. 21:22, 23.

13. Anni i ari nga nasingan danuri na nesiddukal kani Jesus?

¹³ Ari nga nasingan na Judio ira nga inosente si Jesus. Falsu i akusasiodda ira nisa anna ari tu patas i nikatratuna. Megafu tatun, nesiddukal ira. Danuri gapa nabbista kani Jesus ay awan tu paki-alamda ta hustisia. Gavva-gavva laman nga naggarammammung i hues ira nga miembro na korte suprema na Judio ira, tapus ariadda sinuttul i reglamento ira na pabbista. (Luc. 22:54; Juan 18:24) Imbes nakuan tu patas nga ginnadda i akusasion anna ebidensia ira nga kontra kani Jesus, “nagala-aleg ira tu mattestigu tu laddug nga mekontra kani Jesus tapenu sentensiad-da yaya tu mapapatay.” Turi ta ari lagapa nga nesimmu i kayàda, ginakkag na atannang nga pari nga pakkiavutan si Jesus tapenu egga makagina nga mali nga gannug nga yatun i pamaliwatadda nisa. Mekontra yatun ta dob. (Mat. 26:59; Mar. 14:55-64) Turi ta napaginnolay si Jesus, pinagan danatun nga marake i hues i suddalu ira nga  Romano nga magguardia ta netanamman ni Jesus tu “aru nga kuartu” tapenu iwara i ugal nga dumug nu ngatta awan tu naddian na attanamman.​—Mat. 28:11-15.

14. Anni i niprofesiya na Katurakan meyannung ta patay na Mesias?

¹⁴ Anni i kagian na Katurakan? Ari nga inekspekta na aru nga Judio ta tiempo ni Jesus nga matay i Mesias. Ngem kunnaw i neprofesiya ta Katurakan: “Nivuvvuna i inangona adde ta patay anna nekwenta yayya nga minattagaruli; kinattuna i liwa na aru nga totolay, anna yayya i nangipakimemallo para ta minattagaruli ira.” (Isa. 53:12) Awan nakuan gafu tu rason nga mesiddukal i Judio ira ta kapapatay ni Jesus nga kunna tadday nga minattagaruli.

15. Anni ira nga akusasion mekontra ta Saksi ira ni Jehova i nakesiddukal ta karuan?

¹⁵ Kunnatun kari gapa i problema ta kaggawattam? Ari tu patas nga naakusan anna nasentensian si Jesus. Kunnatun gapa i ari tu patas nga katratu sangawe na Saksi ira ni Jehova. Ikonsidera i karuan nga angngarigan. Ta United States ta nallatanan na 1930 anna 1950, namippiga nga kinuestion na hues ira ta korte i lallaguretam nga dayawan i Dios. Egga i panigan na karuan nga hues anna kokkontradda ittam. Ta Quebec, Canada, nakka-uffun i Romano Katoliko anna i Gobiernu ta pangokkontra ta trabahu tam. Aru nga publisher i nefuku megafu laman ta ipakiyuvovugda ta kasittoleda i Pappatulan na Dios. Ta Germany, pinatay na gobiernu na Nazi i aru nga matalo nga kabataan nga brother. Tapus ta nappasa laman ira nga dagun, aru nga wawwaragi ta Russia i nasentensian anna nefuku megafu ta ilayyagayyada i mensahe na Biblia anna kakkagiadda nga “extremista nga aktibidad” yatun. Negamma maski paga lagu i New World Translation of the Holy Scriptures ta lengguahe na Russia anna nideklarada yatun bilang “extremista nga informasion” megafu ta usan natun i ngagan nga Jehova.

16. Segun ta 1 Juan 4:1, ngatta ari ittam nakuan mappelogo ta falsu ira nga istoria meyannung ta Saksi ira ni Jehova?

¹⁶ Anni i kuattam tapenu ari ittam nga mesiddukal? Ammuattam i kinakurug. Ta Sermon ni Jesus ta Vukig, inabisowanna danuri maggigginna nisa nga egga noka i ‘mamara-parake’ nira. (Mat. 5:11) Si Satanas i naggafuan natun nga pamara-parake. Iinfluwensianna danuri mangokkontra nittam nga mangiwara tu makadaral ira nga kinaladdug turi ira ta mangaya ta kinakurug. (Nep. 12:9, 10) Panakitattam nakuan danatun nga kinaladdug nga kakkagiadda. Ariattam vuluvuga nga ipamavulun nga maganassing ittam onu makkafi i pangurug tam megafu tatun ira nga kinaladdug.​—Bibbigan i 1 Juan 4:1.

17. Ngatta nesiddukal i karuan kani Jesus megafu ta nesimmu ira nige na patena?

¹⁷ Nige na patay ni Jesus, trinaydor yayya na tadday ta 12 nga apostolesna. Namillu paga nga nilimag na tadday nga apostol nga ammammuna si Jesus. Tapus pinanawan yayya na ngamin nga apostoles ta gabi nige na patena. (Mat. 26:14-16, 47, 56, 75) Ari ngana nga nakaddagan tatun si Jesus. Dati ngana gare nga kinagina nga mesimmu danatun. (Juan 6:64; 13:21, 26, 38; 16:32) Turi ta nesimmu danatun, nesiddukal i karuan. Awayyana tu nanonoda, ‘Nu kunnatun i kondukta na apostoles ni Jesus, ariakku kayà i mabbalin tu tadday ta nira!’

18. Anni ira nga profesiya i natuppal nige nga natay si Jesus?

¹⁸ Anni i kagian na Katurakan? Ginatu nga dagun nige nga minay si Jesus ta davvun, nipetura ni Jehova nga matraydor noka i Mesias katali na 30 pirasu na kuartu nga plata. (Zac. 11:12, 13) Tadday ta madukko nga kofun  ni Jesus i mattraydor nisa. (Sal. 41:9) Nitura gapa ni profeta Zacarias: “Papatayammu i pastor, anna pagurayammu nga mawwawara i karneru ira.” (Zac. 13:7) Ngem imbes tu mesiddukal danuri mapia i giffutuadda tatun ira nga nesimmu, nassikan nakuan i pangurugda megafu ta nasingadda nga natuppal kani Jesus danatun nga profesiya.

19. Anni i ammu danuri na mapia i giffutuadda?

¹⁹ Kunnatun kari gapa i problema ta kaggawattam? Wan. Pinanawan na karuan nga prominente ira nga Saksi i kinakurug tapus nagapostata ira anna kayàda gapa nga iyarayyu ta kinakurug i tanakuan. Nangiwara ira tu negatibo ira nga report, makelogo ira nga istoria, kunne na gapa i kinaladdug ira meyannung ta Saksi ira ni Jehova. Kuadda yatun gukaban na diariu, radio, TV, onu Internet. Ngem ari tu mappesiddukal danuri mapia i giffutuadda. Ammuda gare nga niprofesiya na Biblia nga mesimmu danatun.​—Mat. 24:24; 2 Ped. 2:18-22.

20. Anni i kuattam tapenu ari ittam nga mesiddukal danuri na pinanawadda i kinakurug? (2 Timoteo 4:4, 5)

²⁰ Anni i kuattam tapenu ari ittam nga mesiddukal? Pattalupaddianattam nakuan nga masikan i pangurug tam gukaban na regular nga paggigiammu, kanayun nga pakimallo, anna okupadu ta trabahu nga nipakua ni Jehova nittam. (Bibbigan i 2 Timoteo 4:4, 5.) Nu egga i pangurug tam, ari ittam nga mavurungan nu makaginna ittam tu negatibo ira nga report. (Isa. 28:16) Makoffun nittam i aya tam kani Jehova, ta Uvovugna, anna ta wawwaragi tam tapenu ari ittam nga mesiddukal danuri na pinanawadda i kinakurug.

21. Maski nu panakitan na magaru sangawe i mensahe tam, ta anni ittam nga makasiguradu?

²¹ Ta ollu siglo, aru i nesiddukal anna nanakitadda si Jesus. Ngem aru gapa i nangalawa ta nisa. Kasali tatun i tadday nga miembro na Sanhedrin na Judio anna i ‘napakaru nga papari.’ (King. 6:7; Mat. 27:57-60; Mar. 15:43) Kunnatun gapa ta kaggawattam. Minillion i ari nga nappesiddukal. Ngatta? Megafu ta ammuda anna ayatadda i kinakurug ira ta Katurakan. Kagian na Uvovug na Dios: “I mangaya ta dorob mu ay memammo i attolay da, anna awan tu kesiddukallad-da vuluvuga.”​—Sal. 119:165.