1. Anni i ehemplo nga nipasingan ni Jesus ta disipulona ira anna anni i kingnguada? (Innan i letratu ta vungun.)

TA KEGGA ni Jesus taw ta davvun, positibo i pagimammana ta ministeriona, anna kayàna nga kunnatun gapa i pagimamma na disipulosna. (Juan 4:35, 36) Matalikarag nga nallayyagayya si Jesus kavulu i disipulosna. (Luc. 10:1, 5-11, 17) Ngem turi ta naaresto anna natay si Jesus, temporario nga nawawan i ganas na disipulona ira ta pallayyagayya. (Juan 16:32) Tapus turi ta nappalangi yayya, matalikarag ira nga nallayyagayya yatutta narreklamo i kumokkontra ira. Kudda: “Innan nu i kingngua nu! Nawwara lallagu ta interu Jerusalem i nituddu nu ira.”​—King. 5:28.

2. Kunnasi nga binendisionan ni Jehova i pallayyagayya?

² Nigiya ni Jesus i ollu-siglo Cristiano ira ta pallayyagayya anna binendisionan ira ni Jehova yatutta aru nga totolay i nagginna ta mensaheda. Angngariganna, ta Pentecostes 33 C.E., ma-3,000 i nabawtisowan. (King. 2:41) Tapus tulu-tuloy paga nga nakkaru i disipulo ira. (King. 6:7) Ngem maski nu kunna, kinagi ni Jesus nga mas aru paga nga totolay i magginna ta makasta nga dumug ta pangurianan ira nga aggaggaw.​—Juan 14:12; King. 1:8.

3-4. Ngatta mariga i mallayyagayya ta karuan nga lugar, anna anni i gigiammuattam taw nga artikulo?

³ Kayà tam ngamin nga mattalupaddian i positibo nga pagimamma tam ta ministerio. Ta karuan nga lugar, mabi laman nga kuan yatun. Ngatta? Megafu ta aru i interesadu nga maggigiammu tu Biblia, maginnag lagu paga i karuan adde ta egga  i Saksi nga puede mangistudy nira! Ngem ta karuan nga parte na mundo, mariga para ta wawwaragi i mallayyagayya megafu ta ariadda madanganan i totolay ta babaleda anna ari gapa kuruga interesadu ta Biblia danuri madanganadda.

⁴ Nu maddiakka ta lugar nga mariga i mallayyagayya, makoffun nikaw yaw nga artikulo. Ikonsidera tam nu anni i kingngua na karuan tapenu mas aru i malayyagayyadda. Gigiammuattam gapa nu ngatta makapattalupaddiattam nga positibo, magginna man i totolay onu ari ta mensahe tam.

5. Kunnasi i teritoria na karuan nga wawwaragi?

⁵ Aru nga wawwaragi i kuruga marigatan nga kibbidan i totolay ta baleda. Maddian i karuan nira ta teritoria nu sitaw aru i guardiadu nga apartment anna subdivision. Ari nga mamatallung i guardia nu awan tu permiso na tadday nga tolay nga maddian tatun. Mabi laman gapa nga mamala-balay i karuan nga wawwaragi ngem baddi laman i madanganadda ta babalay. Mallayyagayya gapa i karuan nga wawwaragi ta babario onu lugar nga pilippiga laman nga tolay i maddian. Awayyana nga mabbiahe tu aru nga oras i wawwaragi tapenu makibbida i tadday nga householder, nga nu mittan awan ta balena! Maski nu kunnaw i klase na teritoria tam, mawag nga ari ittam magimmang nga mallayyagayya. Anni gafu i kuattam tapenu aru lagapa i makibbida tam?

6. Kunnasi nga negitta ta gumaggimmanango danuri mallayyagayya?

⁶ Nikumpara ni Jesus i pallayyagayya ta pagimmanango. (Mar. 1:17) Awan tu makanna na karuan maski nu piga nga aggaw ngana ira nga magimmanango. Ngem ari ira nga magimmang; makibagay ira. Uliadda i oras, i lugar, onu i usadda ta pagimmanangoda. Awayya tam gapa parigan yatun ta ministerio tam. Ikonsidera tam i karuan nga suhestion.

7. Anni i resultana nu mallayyagayya ittam ta nadduruma nga oras?

⁷ Purueban nga layyagayyan i totolay ta tanakuan nga oras. Mas aru i makibbida tam nu simmuattam i totolay ta oras nga egga ira ta babaleda. Posible kari yatun? Wan, ta magga lubbe mabba ira ta babaleda! Aru nga wawwaragi i mallayyagayya nu fugag onu gabi megafu ta mas aru nga totolay i madanganadda. Kunne na gapa, mas relaks anna mas kayà na totolay i makibbida ta kunnatun nga oras. Awayyam gapa purueban i gitta na kingngua na tadday nga elder nga si David. Kinagina nga kabalidda nga nallayyagayya ta teritoriada, nanoli ira na partner-na ta babalay nga awan tu nadanganadda. Kunna: “Nakaddag ngà ta aru i nakibbida mi turi ta nanoli kami.” *

8. Kunnasi tam meyaplika i Eclesiastes 11:6 ta ministerio tam?

⁸ Mawag nga itulu-tuloy tam nga alegan i totolay ta babaleda. Yatun i ipagaram nittam na tema nga teksto tam. (Bibbigan i Eclesiastes 11:6.) Kunnatun i kingngua ni David nga nakagi ta nappasa nga parapo. Ta tadday nga balay, nadangananna gabbalaman i makabbalay kabalinna nga nanotoli. Interesadu nga makibbida i lalaki meyannung ta Biblia. Kunna: “Walu ragun ngà ngana nga maddian taw, ngem awan paga vuluvuga tu nakibbidà nga Saksi ni Jehova.” Kunnaw i kinagi ni David: “Nasingakku nga oras tu nadanganammu i  totolay ta baleda, maruddu nga magginna ira ta ilayyagayya tam.”

9. Anni i kingngua na karuan nga wawwaragi tapenu malayyagayyan danuri mariga nga madanganan ta baleda?

⁹ Purueban i nadduruma nga lugar. Tapenu makibbida i totolay nga mariga madanganan ta gibbalayadda, inuli na karuan nga wawwaragi i lugar nu sitaw ira mallayyagayya. Angngariganna, efektibo i street witnessing anna cart witnessing tapenu malayyagayyan danuri totolay nga maddian ta darakal nga apartment nu sitaw megamma i pamala-balay. Megafu taw, makibbida mismu na Saksi ira i totolay nga maddian tatun ira nga building. Naobserba gapa na aru nga wawwaragi nga mas kayà na totolay nga makibbida onu alawatan i literatura tam ira ta pampubliko nga parke, palengke, anna lugar na negosio. Kunnaw i kinagi ni Floiran, tadday nga manangngal ta sirkito ta Bolivia: “Umay kami ta palengke anna lugar na negosio ta ala-una adde ta alas-tres na fugag nu kanni ari kuruga busy i mallaku ira. Maruddu nga makasta i pakiyuvovug mi anna makegafu kami lagu paga tu Bible study ira.”

10. Anni paga i makuam tapenu malayyagayyan i totolay?

¹⁰ Purueban i tanakuan nga metodo na pallayyagayya. Ngem kunnasi nu namikkarum ngana nga inangayan i tadday nga tolay ta nadduruma nga oras ngem ariammu lagapa yayya nadanganan ta balena? Egga kari paga i makuam tapenu makibbida i kunnatun nga tolay? Kunnaw i kinagi ni Katarína: “Patulugakku tu tura yuri ira ariakku madanganan ta baleda. Itura ku i ikagì nakuan nira nu makibbidà ira ta personal.” Anni i magigiammu tam  tatun? Puruebammu i nadduruma nga metodo tapenu malayyagayyammu i ngamin nga egga ta teritoriam.

11. Ngatta ari nga interesadu i karuan ta mensahe tam?

¹¹ Ari nga interesadu i karuan nga totolay ta mensahe tam. Nonopadda nga ariadda kawagan i Dios onu i Biblia. Ari ira mangurug ta Dios megafu ta masingi-singadda i pazziga-riga taw ta mundo. Ari ira interesadu ta Biblia megafu ta masingi-singadda i lider ira na relihion nga mangikakkagi nga tuttuladda i Biblia ngem aru mabba i kukukuadda nga marake. Agga-nono gapa na karuan i trabahuda, familia, onu personal nga problemada yatutta ariadda manono nga makoffun nira i Biblia. Kunnasi tam mapattalupaddian i pagayayya nu ari nga masingan danuri layyagayyattam i balor na mensahe tam?

12. Kunnasi nga makoffun ta ministerio tam i pangiyaplika ta Filipos 2:4?

¹² Mangipasingan tu personal nga interes. Aru nga totolay i ari nga interesadu ta gafu ngem nagginna gabbalaman ira ta makasta nga dumug turi ta nasingadda i kurug nga pangikavuruttam nira. (Bibbigan i Filipos 2:4.) Angngariganna, kunni David nga nakagi ta gafu: “Nu ikagi na tadday nga tolay nga ari yayya interesadu, ariammi labbi usan i Biblia mi onu i literatura mi. Tapus kagiammi: ‘Awayya mi kari mammuan nu ngatta kunna i matageno nu?’” Matageno na totolay nu ikavurungattam ira. Awayyana nga makattamadda i kinagi tam, ngem magga manonoda i pangikavuruttam nira. Maski nu ari ira interesadu ta kakkagiattam, mepasingattam ta ugali anna ekspresion na muka tam nga ikavurungattam ira.

13. Kunnasi tam ibagay i mensahe tam tapenu moffunan i householder?

¹³ Mepasingattam i personal nga interes nu ibagay tam i mensahe tam ta pakawagan anna pakavurungan na householder. Angngariganna, base ta obserbasiottam, egga kari i ána na makabbalay? Awayyana nga interesadu i magana ta tabarang na Biblia nu kunnasi i pamadakal ta ána onu ta praktikal nga suhestion natun nu kunnasi mabbalin tu mas magayayya i familia. Aru kari i kandadu na baleda? Awayya tam ipakibbida i meyannung ta mesissimmu ira nga krimen anna nu ngatta maganassing tatun i aru nga totolay. Magayayya i makabbalay nu mammuanna nga mapawan noka i krimen ira. Kada makaleg ka tu tolay nga maya magginna, ipalippawa mu nga makoffun nisa i tabarang na Biblia. Kunni Katarína nga nakagi ta gafu: “Nononopakku nu kunnasi nakkasta i pattolè megafu  ta kinakurug.” Megafu tatun, komfiansa si Katarína ta ilayyagayyana anna matageno yatun na totolay nga kibbidanna.

14. Segun ta Proverbio 27:17 kunnasi makka-uffun i mappartner ta ministerio?

¹⁴ Mappoffukka. Ta ollu siglo, nituddu ni Pablo kani Timoteo nu kunnasi yayya mallayyagayya anna manuddu anna pinagaramna si Timoteo nga uffunanna gapa i tanakuan. (1 Cor. 4:17) Gitta ni Timoteo, makagigiammu ittam gapa ta ekspiriensadu ira ta kongregasiottam. (Bibbigan i Proverbio 27:17.) Ikonsidera i ekspiriensa ni Brother Shawn. Nappayunir yayya ta tadday nga probinsia nu sitaw kontentu i magaru nga totolay ta relihiodda. Kunnasina napattalupaddian i pagayayyana? Kunna: “Nu posible, egga i partner ku nga mallayyagayya. Kada magali kami ta tadday nga balay, paguvovugammi nu kunnasi mi mapakasta i abilidad mi ta panuddu. Angngariganna, pagistoriammi nu kunnasi i pinakiyuvovug mi ta makabbalay. Tapus pabbidammi nu anni i kagiammi sonu tumunug nga meparubakkami ta kunnatun gabbalaman nga situasion.”

15. Ngatta importante i pakimallo nu mallayyagayya tam?

¹⁵ Makimallo kani Jehova. Mappoffun kani Jehova kada mallayyagayya ka. Nu awan tu uffun na masanto nga espirituna, awan tu mebalittam. (Sal. 127:1; Luc. 11:13) Espesipiko nakuan i pakimallo mu. Angngariganna, kiddawammu nisa nga igiya naka ta tolay nga maya mangammu nisa anna maya nga magginna. Tapus mawag nga kuammu i adde na mawayyam nga layyagayyan i ngamin nga masimmuammu.

16. Ngatta mawag tam i mappersonal study?

¹⁶ Iddammu tu tiempo i pappersonal study. Kagian na Biblia: “Kannammuan nu i uray na Dios—nu anni i mapia, i makapagayaya sa, anna i awan tu pakkurangan na.” (Roma 12:2) Nu kumbinsidu ittam nga ammu tam i kinakurug meyannung ta Dios, mas komfiansa ittam nga ipakiyuvovug yatun. Kunni Katarína nga nakagi ta gafu: “Nalippawa ku nga mawag ku paladdan i pangurug ku meyannung ta primeru nga tuttuddu na Biblia. Yatutta ginigiammù tu mapia i ebidensia nga egga i Namaratu, nga uvovug na Dios i Biblia, anna egga i organisasionna nga mangirepresenta nisa ta kaggawattam.” Kinagi ni Katarína nga megafu ta pappersonal study-na, napatuyag i pangurugna anna mas nagayayya yayya ta ministerio.

17. Ngatta nattalupaddian nga positibo si Jesus ta ministeriona?

¹⁷ Nattalupaddian nga positibo anna ari nagimmang si Jesus nga mallayyagayya maski nu ari nga interesadu i karuan ta mensahena. Ngatta? Ammuna gare nga mawag nga mammuan na totolay i kinakurug anna kayàna nga mas aru paga nakuan i magginna ta mensahe na Pappatulan. Ammuna gapa nga ari interesadu i karuan ta gafu ngem magginna gabbalaman ira noka. Kunnatun i nesimmu ta kafamiliana. Ta tallu-ragun-gaddua nga ministerio ni Jesus, awan tu maski tadday ta wagina i nabbalin tu disipulona. (Juan 7:5) Ngem kabalin na paginnolena, nabbalin ira tu Cristiano.​—King. 1:14.

18. Ngatta ari ittam magimmang nga mallayyagayya?

¹⁸ Ariattam ammu nu sinni ira noka i mabbalin tu Saksi ni Jehova. Mas mabayag nga maginteres i karuan nga totolay ta mensahe tam. Awayyana gapa nga maski danuri ari magginna nittam ta gafu ay awayyana nga “dayawad-da noka i Dios” nu masingadda  i makasta nga kondukta anna ugali tam.​—1 Ped. 2:12.

19. Segun ta 1 Corinto 3:6, 7, anni i mawag nga daddammattam?

¹⁹ Maski nu sittam i mammula anna mabbaya, mawag nga daddammattam nga i Dios i mamadakal tatun. (Bibbigan i 1 Corinto 3:6, 7.) Kunni Brother Getahun nga massesserbi ta Ethiopia, “Ta maturu 20 ragun, tattaddè nga Saksi ta lugar mi nga ari kuruga malayyagayyan. Ngem sangawe, egga ngana i 14 nga publisher. Trese nira i nabawtisowan, kavulu tatun i atawà anna tallu nga ána ku. Magadde ta 32 nga totolay i magata-atende ta study mi ira.” Magayayya si Getahun ta ari yayya nagimmang nga mallayyagayya durante nga mapasensia nga ininnagganna si Jehova tapenu iyaranni danuri mapia i giffutuadda nga totolay ta organisasionna!—Juan 6:44.

20. Ngatta megitta ittam ta mar-rescue ira?

²⁰ Nabalor i pagimamma ni Jehova ta ngamin nga totolay. Iniddanna ittam tu pribilehio nga makipattrabahu ta Anana nga mangammung ta totolay ta ngamin nga nasion nige nga mangultimu yaw nga sistema. (Hag. 2:7) Negitta i trabahu tam nga pallayyagayya ta par-rescue. Gitta tam gapa i miembro na tadday nga rescue team nga nedog tapenu uffunan i natavvunan nga totolay ta tadday nga pamminan. Maski nu awayyana nga pilippiga ngana laman i malegan nga matolay nga minero, nabalor i kukukuan na ngamin nga mar-rescue. Kunnatun gapa ta pallayyagayya tam. Ariattam ammu nu piga paga i mapaliag taw ta sistema ni Satanas. Ngem puede nga usan ni Jehova i maski sinni nittam tapenu uffunan ira. Kunnaw i kinagi ni Andreas nga taga-Bolivia: “Imammatakku nga resulta na pakkara-uffu-uffun i kada tolay nga maya mangammu ta kinakurug anna mappabawtiso.” Pattalupaddianattam nakuan yatun nga positibo nga pagimamma ta ministerio tam. Nu kunnatun i kuattam, bendisionan ittam ni Jehova anna kurug nga mamagayayya nittam i ministerio.