1. Ngatta nakaddag i karuan nittam turi ta ollu nga kinagi tam ta tanakuan i mensahe na Biblia?

MERADDAMMAMMU kari turi ta ollu nga nalegammu i kinakurug? Mananawag nikaw i nagigiammum ira nga tuddu na Biblia. Nanono mu nga magga kayà na totolay nga ginnan danatun nga kuru-kurugammu. Kumbinsidu ka nga makoffun i mensahe na Biblia tapenu mapeggan ira tu makapagayayya nga pattolay sangawe anna kappabbaw nga iddanama ta mappange. (Sal. 119:105) Yatutta kinagim danatun nga kinakurug ta ngamin nga kokkofun anna parientes mu. Ngem anni i nesimmu? Nakaddag ka ta aru ta nira i ari nga interesadu ta kinagim.

2-3. Ta kaggawan ni Jesus, anni i reaksion na magaru nga totolay meyannung nisa?

² Ari ittam nakuan ngana nga makaddag nu manaki na karuan i mensahe nga ilayyagayya tam. Ta kaggawan ni Jesus, magaru i manakida i magginna nisa maski nu masingan ta kingnguana ira nga milagro nga uuffunan yayya na Dios. Tadday nga ebidensia i pinamaginnolay ni Jesus kani Lazaro. Ari vuluvuga mapakurug danuri na kumokkontra nisa nga ari nga nesimmu yatun nga milagro. Ngem ari lagapa nga inaksepta na Judio ira nga lider nga si Jesus i Mesias. Kayàda paga lagu nga patayan si Jesus anna si Lazaro!—Juan 11:47, 48, 53; 12:9-11.

³ Ammu ni Jesus nga aru i ari mangurug nga yayya i Mesias. (Juan 5:39-44) Kinagina ta disipulos ni Juan Bautista: “Magayayya i tolay nga ari nga mesiddukal megafu niakan.” (Mat. 11:2, 3, 6, NW) Ngatta aru i nammanaki kani Jesus?

4. Anni i gigiammuattam taw nga artikulo?

⁴ Taw nga artikulo anna ta tumunug, ammuattam i rason ira nu ngatta aru nga totolay ta ollu nga siglo i ari nga nangurug kani Jesus. Gigiammuattam gapa nu ngatta mesiddukal i aru  nga totolay ta kaggawattam. Tapus ammuattam nu ngatta mawag tu masikan i pangurug tam kani Jesus tapenu ari ittam nga mesiddukal.

5. Ngatta nanono na karuan nga ari tu si Jesus i neprofesiya nga Mesias?

⁵ Aru i nesiddukal megafu ta paddia-paddian ni Jesus. Ammuda nga malalaki nga mestru si Jesus anna nammilagro yayya ngem para nira, ana laman yayya na pobre nga karpinteru. Naggafu gapa si Jesus ta Nazaret, tadday nga siudad nga ari nga prominente. Kunnaw paga lagu i kinagi ni Nataniel nga nabbalin tu disipulo ni Jesus: “Egga kari i vuluvuga mapia nga maggafu ta Nazaret?” (Juan 1:46) Para kani Nataniel, awan tu makasta tatun nga siudad nga naddianan ni Jesus. Puede gapa nga agga-nonona i profesiya ta Mikias 5:2 nga meyana i Mesias ta Betlehem, ari nga ta Nazaret.

6. Anni nakuan i nakoffun ta totolay ta tiempo ni Jesus tapenu makannammuadda nga yayya i Mesias?

⁶ Anni i kagian na Katurakan? Niprofesiya ni Isaias nga ari nga ammuan danuri na kumokkontra kani Jesus i ‘detalye ira na henerasion na Mesias.’ (Isa. 53:8) Neprofesiya i aru tatun nga detalye. Nu kinumfirma laman nakuan na totolay nu fustu danatun nga informasion, magga makannammuadda nga neyana si Jesus ta Betlehem anna ginaka yayya ni Patul David. (Luc. 2:4-7) Natuppal gafu i neprofesiya ta Mikias 5:2 nu sitaw i keyanakan ni Jesus. Ngem anni gafu i problema? Insigida gare nga nakkonklusion i totolay maski nu ariadda ammu i ngamin nga detalye. Megafu tatun, nesiddukal ira.

7. Ngatta aru nga totolay i mammanaki ta Saksi ira ni Jehova?

⁷ Kunnatun kari gapa i problema ta kaggawattam? Wan. Imammatan na aru nga totolay nga i Saksi ira ni Jehova ay “alinno i paddiad-da anna awan tu ginigiammu da.” (King. 4:13) Kakkagian na karuan nga ari nakuan ira nga manuddu meyannung ta Biblia megafu ta ari mabba ira nga naggigiammu ta sikat ira nga relihioso nga eskuela. Kakkagian gapa na karuan nga “relihion na Amerikano” i Saksi ira ni Jehova. Ngem ta kakuruganna, tadday laman ta kada pitu nga Saksi i maddian ta United States. Abbo gapa na karuan nga ari nga mangurug kani Jesus i Saksi ira. Tapus ta nappasa ira nga dagun, inagaladda i Saksi ira nga “Komunista,” “Espiya na Amerikano ira,” anna “extremista.” Megafu ta naginna na karuan i kunnatun ira nga istoria anna ariadda nammuan nu anni i fustu nga informasion, nesiddukal ira.

8. Segun ta Kingngua 17:11, anni i mawag nga kuan na totolay tapenu makannammuadda nu sinni danuri massesserbi ta Dios ta kaggawattam?

⁸ Anni i kuammu tapenu ari ka nga mesiddukal? Ammuan nakuan na totolay i fustu nga informasion. Kunnatun i kingngua na tadday nga nattura ta Evanghelio nga si Lucas. Ginigiammuna tu mapia ngamin i “naka-nakua namegafu ta gafa-gafu na.” Kayàna nga danuri mabbibbig ta turana ay ‘kannammuadda i kurug’ meyannung kani Jesus. (Luc. 1:1-4) Pinarigan na Judio ira ta Berea si Lucas. Ta ollu nga pakaginnada ta mapia nga dumug meyannung kani Jesus, ginigiammuda i Hebreo nga Katurakan tapenu mapakurug nga fustu i nekagi nira. (Bibbigan i Kingngua 17:11.) Kunnatun nakuan gapa i kuan na totolay sangawe. Mawag tu ammuadda nu anni i fustu nga informasion. Pakkumparadda nakuan nu anni i ituttuddu nira na totolay na Dios ta kakkagian na Katurakan. Mawag gapa nga gigiammuadda i nakua na totolay ni Jehova ta tiempo tam. Nu kumfirmadda labbi nu fustu i  informasion meyannung ta tadday nga gannug, ari ira nga melogo na akusasion onu opinion na totolay.

9. Anni i nesimmu turi ta manaki ni Jesus nga mangipasingan tu milagro nga paningannan tu naggafu ta Dios i pakapangnguana?

⁹ Para ta karuan nga totolay ta tiempo ni Jesus, ari nga makalanno i kappabbaw ira nga nitudduna tapenu mapakurug nga yayya i Mesias. Kayàda nga “mangipasingan yaya tu milagro nga paningannan tu naggafu ta Dios i pakapangngua na.” (Mat. 16:1) Awayyana nga kayàda nga kunnatun i kuan ni Jesus megafu ta nabibbigda ta Daniel 7:13, 14. Ngem para kani Jehova, ari paga nga yatun i mepangngo nga tiempo tapenu metuppal i profesiya. Makalanno ngana nakuan i nituddu ni Jesus tapenu makumbinsi ira nga yayya i Mesias. Ngem turi ta nammanaki yayya nga kuan i milagro nga ikiddoda, nesiddukal ira.​—Mat. 16:4.

10. Kunnasi nga sinuppal ni Jesus i niprofesiya ni Isaias meyannung ta Mesias?

¹⁰ Anni i kagian na Katurakan? Niprofesiya ni Isaias meyannung ta Mesias: “Arianna makkulle onu iyassikan i ngaralna, anna arianna nga ipaginna i ngaralna ta kalsada.” (Isa. 42:1, 2) Ari nga nappeddarayaw si Jesus ta ministeriona. Ari yayya nga namadday tu kappabbaw ira nga templo, nangusa tu espesial ira nga sinnun nga iyusu-usa na lider ira na relihion, ni tu nikiddona nga agaladda yayya ta pa-importante ira nga titulo. Ta kabista ni Jesus, arianna nga pinagustuan si Patul Herodes. Ari yayya nga nammilagro maski paga nu mappeligro i inangona. (Luc. 23:8-11) Egga ira i milagro nga kingngua ni Jesus ngem i pangilayyagayya ta mapia nga dumug i pinaka-importante nisa. Kinagina paga ta disipulosna: “Yatun lagu i inangayak-ku.”​—Mar. 1:38.

11. Anni ira i mali nga ideya na karuan ta tiempo tam?

¹¹ Kunnatun kari gapa i problema ta kaggawattam? Wan. Aru i mappabbaw ta darakal nga katedral nga egga i kuruga mangina nga dekorasionna. Mappabbaw gapa ira ta lider  ira na relihion nga kuruga importante ira i tituloda anna ta seremonia ira nga ariadda mabba ammu nu anni i naggafuanna anna i kebalinanna. Ngem egga kari gapa i magigiammu na totolay nga magatende ta kunnatun ira nga paggarammammung meyannung ta Dios anna ta gakkagna ira? Dakal i neruman natun turi ira ta magatende ta study tam ira. Magigiammuda i ikikkiddaw ni Jehova anna nu kunnasida nga makua yatun. Marenu anna presentable i Kingdom Hall tam ira anna awan tu magarbo nga dekorasion tatun. Ari gapa nga mangusa tu espesial nga sinnun danuri mangirollu. Awan gapa tu pangagal ta nira nga gittana sobra i ka-importanteda. Nebase ta Biblia i ituttuddu anna kuru-kurugattam. Ngem maski paga nu kunnatun, aru lagapa i mesiddukal megafu ta sobra kanu i kasimple na paddayaw tam anna tanakuan i ituttuddu tam ta kayàda nga maginna.

12. Segun ta Hebreo 11:1, 6, ta anni nakuan nga nebase i pangurug tam?

¹² Anni i kuattam tapenu ari ittam nga mesiddukal? Kinagi ni apostol Pablo ta Cristiano ira ta Roma: “I angngurug ay vunga na pagginna ta dumug, ay maginna i dumug nu melayya-gayya si Cristo.” (Roma 10:17) Mapasikattam i pangurug tam nu gigiammuattam i Biblia anna ari ittam nga makiparte ta relihioso ira nga seremonia nga ari nga nebase ta Biblia maski paga nu gittana makakkasta danatun. Paladdattam nakuan i pangurug tam gukaban na fustu nga pakannammu megafu ta “nu awan tu angngurug na tolay, arian na nga awayya nga mapagayaya i Dios.” (Bibbigan i Hebreo 11:1, 6.) Ariattam ngana gafu kawagan i milagro maggafu ta langi. Makalanno ngana nga gigiammuattam tu mapia i tuttuddu ira na Biblia nga mamasikan ta pangurug tam. Yatun i mangumbinsi nittam nga egga nittam i kinakurug anna yatun i mangalsa ta padduda tam.

13. Ngatta aru i nanguestion kani Jesus?

¹³ Mattaka i disipulo ira ni Juan Bautista nu ngatta ari nga magayuno i disipulo ira ni Jesus.  Ngem nipakanawag ni Jesus nga ariadda mawag nga magayuno megafu ta matolay paga yayya. (Mat. 9:14-17) Ngem kinuestion lagapa na Fariseo ira anna na karuan nga kumokkontra si Jesus megafu ta arianna nga sinuttul i kostumbre anna tradisiodda ira. Napporay ira turi ta pinammapiana i mataki ira ta Sabbath. (Mar. 3:1-6; Juan 9:16) Kakkagiadda paga nga tuttuttuladda i Sabbath ngem mannegosio mabba ira ta templo. Yayya nga nakaporay ira turi ta kinuestion ira ni Jesus megafu tatun. (Mat. 21:12, 13, 15) Nepallo gapa i lussaw danuri nilayyagayyan ni Jesus ta sinagoga na Nazaret turi ta nikumparana ira ta nesimmu gari ta Israel, gare ipasingan natun nga makasarili ira anna awan tu pangurugda. (Luc. 4:16, 25-30) Aru i nesiddukal kani Jesus megafu ta ariadda inekspekta i kingnguana ira.​—Mat. 11:16-19.

14. Ngatta kinuestion ni Jesus i tradision na totolay nga mekontra ta Biblia?

¹⁴ Anni i kagian na Katurakan? Kinagi ni Jehova gukaban ni profeta Isaias: “Umaranni niakan danaw nga totolay gukaban na simuda anna dayawaddà ta simuda, ngem ararayyu i futuda niakan; anna maganassing ira niakan megafu ta bili-bilin na totolay nga netuddu nira.” (Isa. 29:13) Fustu laman gafu nga kinuestion ni Jesus i tradision ira nga mekontra ta Katurakan. Nu mas importante ta totolay i bili-bilin anna tradision ira nga pinadday laman na tolay anne ta Biblia, nanakitadda ngana si Jehova anna i zinogna nga Mesias.

15. Ngatta aru ta kaggawattam i mallussaw ta Saksi ira ni Jehova?

¹⁵ Kunnatun kari gapa i problema ta kaggawattam? Wan. Aru i madismaya nu ari nga makisali i Saksi ira ni Jehova ta passelebrada tu tradision ira nga ari nga nebase ta Biblia gitta na birthday anna Krismas. Mapporay gapa i karuan ta Saksi ira ni Jehova nu ari ira nga makisali ta nationalistiko ira nga selebrasion onu nu ariadda tuttulan i kostumbre ta patay nga mekontra ta Biblia. Aru i mesiddukal tatun megafu ta abboda nga alawatan na Dios i klase na paddayoda. Ngem ariadda mapagayayya i Dios nu mas nga piliadda i tradision na totolay anne ta kurug nga ituttuddu na Biblia.​—Mar. 7:7-9.

16. Segun ta Salmo 119:97, 113, 163-165, anni nakuan i kuattam anna anni i lillitattam?

¹⁶ Anni i kuattam tapenu ari ittam mesiddukal? Mawag nga kuruga ayatattam i bili-bilin anna prinsipio ira ni Jehova. (Bibbigan i Salmo 119:97, 113, 163-165.) Nu ayatattam si Jehova, lillitattam i maski anni nga tradision nga mamallussaw nisa. Awan nakuan tu maski anni nga gannug i mas importante anne ta pangaya tam kani Jehova.

17. Ngatta aru i nesiddukal ta tiempo ni Jesus?

¹⁷ Kayà na karuan ta tiempo ni Jesus nga manguli i gobiernu. Inekspektada nga i Mesias i mamalubbang nira ta pammaguray na minattazzi nga Romano ira. Ngem turi ta pabbalinadda si Jesus nga patul, nammanaki yayya. (Juan 6:14, 15) Mavurung gapa i papari anna i karuan nga baka ulian ni Jesus i gobiernu. Nu mesimmu yatun, mapporay i Romano ira yatutta alsadda i autoridad nga niyawada ta papari. Danatun i rason nu ngatta aru nga Judio i nesiddukal.

18. Anni ira nga profesiya meyannung ta Mesias i ari nga pinannonopan na Judio ira?

¹⁸ Anni i kagian na Katurakan? Maski nu aru nga profesiya i makkagi nga mangaffu gabbalaman i Mesias, egga gapa ira i tanakuan nga profesiya nga mangipasingan nga mawag labbi tu matay yayya para ta liwi-liwa tam. (Isa. 53:9, 12) Ngatta gafu ta tanakuan i inekspekta na Judio ira nga kuan ni Jesus? Ariadda nga  pinannonopan tu mapia nga egga ira i profesiya nga ari mabba nangipromesa nga insigida nga masolba i problemada.​—Juan 6:26, 27.

19. Ngatta aru i mesiddukal ta tiempo tam?

¹⁹ Kunnatun kari gapa i problema ta kaggawattam? Wan. Aru i mesiddukal megafu ta neutral ittam ta pulitika. Ekspektadda gare nga mabboto ittam ta eleksion. Ngem ammu tam nga para kani Jehova, nu mappili ittam tu tolay nga mabbalin tu lider tam, gittana pinammanakitattam ngana si Jehova. (1 Sam. 8:4-7) Kakkagian gapa na totolay nga mawag tu mamataddag ngana laman ittam tu eskuela anna hospital ira tapus manguffun ittam kanu ta komunidad. Nesiddukal ira megafu ta nakafokus ittam ta pallayyagayya, ari nga tu ta passolba ta problema ira na mundo ta maddaggun.

20. Segun ta kinagi ni Jesus ta Mateo 7:21-23, anni nakuan i fokus tam?

²⁰ Anni i kuattam tapenu ari ittam mesiddukal? (Bibbigan i Mateo 7:21-23.) Mawag tu maffokus ittam ta trabahu nga ipakua ni Jesus nittam. (Mat. 28:19, 20) Ariattam nakuan purueban nga solban i problema ira taw nga mundo. Iddukattam i totolay anna kayà tam ira nga uffunan ta problemada ira. Ngem ammu tam nga i pinakamakasta nga makua tam para nira ay i panuddu nira meyannung ta Pappatulan na Dios anna panguffun nira tapenu mabbalin ira tu kofun ni Jehova.

21. Anni nakuan i determinadu nga kuattam?

²¹ Nagigiammu tam taw nga artikulo i appa nga rason nu ngatta nesiddukal kani Jesus i aru nga totolay ta ollu nga siglo. Nammuattam gapa i rason nu ngatta pammanakitan na karuan ta tiempo tam i tagatuttul ira ni Jesus. Ngem ari laman tu danatun i mawag nga lillitattam. Ta tumunug nga artikulo, ammuattam i appa paga nga kesiddukallan na totolay. Determinadu ittam nakuan nga ari nga mappesiddukal anna pattalupaddianan nga maladda i pangurug tam!