1-2. Anni ira i problema na aru ta wawwaragi tam?

PINAGARAM ni apostol Pablo si Timoteo nga ituppalna tu mapia i ministeriona. (2 Tim. 4:5) Tuttulattam nakuan gapa i tabarang ni Pablo anna kuattam i adde na mawayya tam ta passerbi. Ngem mariga nga kuan yatun nu mittan. Mawag nga maggutu i aru ta wawwaragi tam tapenu makapallayyagayya ira. (2 Tim. 4:2) Angngariganna, aru ta wawwaragi tam i maddian ta lugar nu sitaw egga i restriksion onu megamma i trabahu tam. Ngem mallayyagayya lagapa ira maski nu puede ira nga mefuku!

² Aru nga problema i awayyana tu mamakkafi ta nono na totolay ni Jehova. Angngariganna, aru i mawag nga mattrabahu tu aru nga oras tapenu laman meyawa i pakawagan na familia. Kayàda nakuan nga mas aru paga i makuada ta ministerio ngem nababbannag ngana ira nu weekend. Limitadu gapa i makua na karuan megafu ta grabe nga takida onu bako onu lakay ngana ira. Baka ariadda paga ngana lagu makali ta baleda. Kanayun gapa nga matageno na karuan nga awan tu sesserbida. Kunnaw i kagian ni Mary * nga taga-Middle East: “Marigi-rigatan ngà nga labanan i negatibo nga panageno ku yatutta madaddammakkan ngà. Tapus makonsensia ngà ta ufutan natun i tiempo anna sikakku nga para nakuan ta ministeriò.”

3. Anni i gigiammuattam taw nga artikulo?

³ Maski nu anni paga i situasiottam, mapasikan ittam ni Jehova tapenu marubattam i problema tam ira anna meyawa tam lagapa i kapianattam ta passerbi tam nisa. Nige tam nga  gigiammuan nu kunnasi ittam nga uffunan ni Jehova, ammuattam labbi nu kunnasina nga pinasikan si Pablo anni Timoteo tapenu metuppalda i ministerioda maski nu aru i problemada.

4. Anni ira i inarubang ni Pablo?

⁴ Napakaru nga problema i inarubang ni Pablo. Mas nga kawaganna i sikan turi ta nabubbubbug, nabara-barag, anna nefuku yayya. (2 Cor. 11:23-25) Aminadu si Pablo nga nu mittan, laba-labananna i negatibo ira nga emosion. (Roma 7:18, 19, 24) Inattammanna gapa i tadday nga “sì ta pattag” nga kakayàna nga alsan ngana nakuan na Dios.​—2 Cor. 12:7, 8, NW.

5. Anni ira i netuppal ni Pablo maski nu aru i problemana?

⁵ Maski nu napakaru i problema ni Pablo, pinasikan yayya ni Jehova tapenu metuppalna i ministeriona. Ikonsidera i netuppalna ira. Angngariganna, turi ta agga-fuku yayya ta tadday nga balay ta Roma, nidefensana i mapia nga dumug ta darakal na Judio anna awayyana tu maski ta ofisiales na gobiernu. (King. 28:17; Fil. 4:21,22) Aru nga guardia ta palasio i nilayyagayyanna anna maski danuri mabbisita nisa. (King. 28:30, 31; Fil. 1:13) Tatun gabbalaman nga tiempo, pinadday ni Pablo i tura ira nga makoffun ta kurug ira nga Cristiano adde sangawe. Megafu gapa ta ehemplona, napasikan i wawwaragi ta kongregasion na Roma yayya nga “mas magutu ira nga mangilayya-gayya ta uvovug na Dios anna awan vuluvuga tu ikassing da.” (Fil. 1:14) Maski nu egga ira i tiempo nga limitadu laman i makua ni Pablo, kingnguana lagapa i adde na mawayyana. ‘Kurug tu nakoffun yatun ta nipawwara na evanghelio.’—Fil. 1:12.

6. Segun ta 2 Corinto 12:9, 10, anni i nakoffun kani Pablo tapenu metuppalna i ministeriona?

⁶ Ammu ni Pablo nga netuppalna i ngamin ta pinasserbina kani Jehova megafu ta sikan na Dios, ari nga ta sikanna. Kinagina nga ‘mas nga matageno i pakapangngua na Dios nu makafi yayya.’ (Bibbigan i 2 Corinto 12:9, 10.) Ta uffun na masanto nga espiritu ni Jehova, neddan si Pablo tu sikan tapenu metuppalna tu mapia i ministeriona, maski paga nu napeppersigi anna nefuku yayya anna egga paga i karuan nga problemana.

7. Anni ira i problema nga inarubang ni Timoteo tapenu metuppalna i ministeriona?

 ⁷ Kawagan gapa ni Timoteo nga maddepende ta sikan nga iyawa na Dios tapenu metuppalna i ministeriona. Vinuluna si Pablo ta apaddu anna mabayag ira nga pinabbiahena bilang misionero. Zinog gapa yayya ni Pablo tapenu bisitan anna pagaramman i kongregasion ira. (1 Cor. 4:17) Awayyana tu natageno ni Timoteo nga arianna nga metuppal yatun. Yayya nga kunnaw i nitabarang ni Pablo nisa: “Ariam-mu nga ipamavulun tu egga i mangimelle nikaw megafu ta abbing ka paga.” (1 Tim. 4:12) Egga gapa i ‘maruddu nga takitan’ ni Timoteo tatun nga tiempo nga kunna sì ta pattagna. (1 Tim. 5:23) Ngem ammu ni Timoteo nga pasikannan yayya na makapangngua nga masanto nga espiritu ni Jehova tapenu melayyagayyana i mapia nga dumug anna mapasserbianna i wawwaragina.​—2 Tim. 1:7.

8. Kunnasi nga pasikannan ni Jehova i totolena ta tiempo tam?

⁸ Ta tiempo tam, iddan ni Jehova i totolena tu “ari nga maguku-gukug nga pakapangngua” tapenu metulu-tuloyda i matalo nga passerbida nisa. (2 Cor. 4:7) Gigiammuattam ngana gafu i appa nga probision ni Jehova tapenu massikan ittam anna moffunan ittam nga mattalupaddian nga matalo: i pakimallo, i Biblia, i wawwaragi, anna i ministerio.

9. Kunnasi makoffun nittam i pakimallo?

⁹ Pinasikan na pakimallo. Ta Efeso 6:18, pagaramman ittam ni Pablo nga makimallo ta Dios “ta maski anni nga tiempo.” Pasikannan ittam na Dios nu kunnatun i kuattam. Naekspiriensa yatun na taga-Bolivia nga si Jonnie turi ta naggiriddang i problemana. Nattaki tu grabe i atawana, i yenana, anna i yamana. Narigatan si Jonnie nga iyawa i pakawagadda nga tallu. Tapus natay i yenana anna nabayag nige nga nammapia i atawana anna i yamana. Kunnaw i kagian ni Jonnie tatun ira nga naekspiriensana: “Turi ta nakkonsimision ngà, kanayun nga nakoffun niakan i pabbalikku tu espesipiko ta pakimallo ku ira.” Pinasikan ni Jehova si Jonnie tapenu makapagattam yayya. Nakannammuan gapa na elder ta Bolivia nga si Ronald nga egga i cancer na yenana. Tapus nappasa i tanga-vulan, natay i yenana. Anni i nakoffun nisa tapenu makapagattam? Kunna: “Gafu ta pappakimallo ku kani Jehova, mevuvvu ku i mayan na futù anna i ngamin nga mataga-tageno ku. Ammù tu matindiannà anne ta maski sinni anna mas paga ta pakantindì ta baggì.” Awayyana tu egga ira i tiempo nga ariattam ammu i kuattam onu ariattam ngana ammu nu anni i ipakimallo tam. Ngem kayà ni Jehova nga makimallo ittam nisa maski nu marigatan ittam nga ikagi nu anni i nononopan anna mataga-tageno tam.​—Roma 8:26, 27.

10. Segun ta Hebreo 4:12, ngatta importante nga bibbigattam i Biblia anna pannonopan yatun tu mapia?

¹⁰ Pinasikan na Biblia. Naddepende si Pablo ta Katurakan para ta sikan anna banna-bannay. Kunnatun nakuan gapa i kuattam. (Roma 15:4) Nu bibbigattam i Biblia anna pannonopattam yatun tu mapia, usan ni Jehova i espirituna tapenu mas nga malippawa tam nu kunnasi tam nga mosa i teksto ira ta situasiottam. (Bibbigan i Hebreo 4:12.) Kunnaw i kagian ni Ronald nga nakagi ta nappasa nga parapo: “Mapia ngana laman ta bibbibbigakku i Biblia kada gabi. Kanayukku nga pannonopan i kualidad ira ni Jehova anna i meddu nga pangikavurunna ta totolena. Nassikan ngà megafu tatun.”

11. Kunnasi nga pinasikan na Biblia i maraddam nga sister?

 ¹¹ Mapeggan ittam tu fustu nga appana-panono meyannung ta problema tam ira nu pannonopattam tu mapia i Biblia. Ikonsidera nu kunnasi nga nakoffun i Biblia ta tadday nga maraddam nga sister nga nabalu. Kinagi na elder nisa nga makoffun nisa nu bibbiganna i libru na Job. Ta pabbibbigna tatun, insigidana nga kinritika si Job megafu ta mali nga appana-panonona. Ta imahinasionna, kunnaw i kinagina nisa: “Job! Sobra gapa i kanegatibom!” Ngem nanono gabbalaman natun nga sister nga kaparehuna tu appana-panono si Job. Nakoffun yatun nisa tapenu molina i appana-panonona anna maattammanna i daddam gafu ta patay na atawana.

12. Kunnasi ittam nga pasikannan ni Jehova gukaban na kapangngurug tam?

¹² Pinasikan na wawwaragi. Pasikannan ni Jehova i Cristiano ira gukaban na kapangngurugda. Nitura ni Pablo nga kuruga ikakayana nga “makkapasa-pasikan” ira na kapangngurugna. (Roma 1:11, 12) Kakayà gapa ni Mary nga nakagi ta gafu i kunnatun. Kunna: “Niyusa ni Jehova i wawwaragi nga awan tu ammuda ta problemà ira. Egga i kinagida niakan nga makapagaram anna nangiyawa ira tu card. Yatun mismu i kawagakku. Makoffun gapa nu makistoria ittam ta tanakuan nga sister nga kaparehu tam tu problema anna makagigiammu ittam ta ekspiriensada ira. Kanayun gapa nga ipatageno niakan na elder ira nga nabalor i papel ku ta kongregasion.”

13. Kunnasi ittam nga makkapasa-pasikan ta study tam ira?

¹³ I tiempo na study i tadday ta pinakamakasta nga chansa tapenu makkapaga-pagaram ittam. Nu egga ka ta study, ngatta ariammu pasikannan i tanakuan gukaban na pakkagi nira nga iddeddu mu ira anna appresiammu ira? Angngariganna, nige na study, kinagi na elder nga si Peter ta sister nga ari Saksi i atawana: “Mapaga-pagaram kami ta kegganu. Kanayummu nga ivulu i annam nga ána mu tapus nakaprepara paga i komentoda ira.” Nakalua yatun nga yena ta sobra nga appappabalona. Kunna: “Ammum kari nga yatun i pinakakawagakku nga maginna sangawe nga aggaw?”

14. Kunnasi makoffun nittam i ministerio tam?

¹⁴ Pinasikan na ministerio. Nu layyagayyattam i tanakuan, mabanna-bannayan anna mapasikan ittam magginna man ira onu ari. (Prov. 11:25) Napakurug ni Sister Stacy nga talaga makapasikan i ministerio. Turi ta nadisfellow i kafamiliana, maraddam yayya anna kanayunna nga iyavu ta baggina, ‘Egga kari paga nakuan i kingnguà tapenu noffunakku i kafamilià?’ Yatun laman i agga-nono ni Stacy. Anni i nakoffun nisa tapenu maattammanna yatun nga makaparaddam nga situasion? I ministerio! Nu mallayyagayya yayya, mas nga makapaffokus yayya ta totolay ta teritoriada nga magawag tu uffun. Kunna: “Tatun nga tiempo, niddannà ni Jehova tu Bible study nga alistu i papprogresona. Talaga napagaram ngà tatun. I ministerio i pinakanakoffun ta pattolè.”

15. Anni i magigiammum ta kinagi ira ni Mary?

¹⁵ Megafu ta situasion na karuan nga wawwaragi tam, matagenoda nga limitadu laman i makuada ta ministerio. Nu kunnatukka, daddammammu nakuan nga magayayya lagapa si Jehova nu kuammu i adde na mawayyam. Kunnatun i naekspiriensa ni Mary. Natagenona nga limitadu laman i makuana turi ta nagali yayya ta lugar nga tanakuan i lengguaheda. Kunna: “Turi ta nagali ngà, baddi laman i mekagì ta ministerio, mabbibbig ngà laman tu teksto, onu mangiyawa ngà laman tu tract.”  Natagenona nga awan kuruga tu makuana nu mekumpara ta malalaki ira nga maguvovug tatun nga lengguahe. Ngem inulina i appana-panonona. Nalippawana gabbalaman nga meyusa yayya ni Jehova maski nu arianna paga kuruga ammu i lengguahe. Kunna: “Makakkasta anna simple i kinakurug ira ta Biblia anna moli danatun i pattolay na tadday.”

16. Anni i mamasikan turi ira ta ari ngana makali ta baleda?

¹⁶ Maski nu ari ittam ngana nga makali ta baletam, masingi-singan anna appresian lagapa ni Jehova i pakkaraga tam nga mallayyagayya. Iddanna ittam tu chansa tapenu layyagayyan danuri manangngal nittam, doktor, onu nars ira. Nu ikumpara tam i makua tam ta maddaggun ta netuppal tam ira ta nappasa, makkafi laman i nono tam. Ngem nu maffokus ittam ta panguffun ni Jehova nittam ta maddaggun, massikan ittam anna magayayya ittam lagapa nga attamman i problema tam ira.

17. Segun ta Eclesiastes 11:6, ngatta ari ittam nakuan magimmang ta pallayyagayya tam maski nu awan tu insigida nga maginteres?

¹⁷ Ariattam ammu nu anni ta vukal ira na kinakurug nga nimula tam i mattalovu. (Bibbigan i Eclesiastes 11:6.) Angngariganna, kanayun nga mat-telephone anna mal-letter witnessing i maturu tu 80-anios nga si Sister Barbara. Ta tadday nga tura nga pinaddena, nitangi-kappilna i Marso 1, 2014 nga isyu na Ang Bantayan nga kunnaw i temana: “Ang Ginawa ng Diyos Para sa Iyo.” Arianna vuluvuga ammu nga nepatulug yatun nga turana ta magatawa nga dati nga Saksi ni Jehova. Namippiga nga binibbig na magatawa yatun nga magazina. Natageno na lalaki nga gittana kikkibbidan yayya mismu ni Jehova yatutta nakistudy uli i magatawa. Nanoli i magatawa ta pakka-Saksida kabalin na maturu tu 27 nga dagun. Kuruga napagaram anna napasikan si Sister Barbara ta makasta nga resulta na turana!

18. Anni i kuattam tapenu mapasikan ittam na Dios?

¹⁸ Napakaru i niyawa ni Jehova tapenu mapasikan ittam. Nu usattam i probisionna ira gitta na pakimallo, Biblia, wawwaragi tam, anna ministerio, mepasingattam nga mattalo ittam nga uffunanna ittam anna kayàna nga kuan yatun. Kanayun ittam nakuan nga mattalo ta nelangitan nga Yama tam nga kakayàna nga “ipasingan i sikanna para ta buu i futuda nga masserbi sa.”​—2 Cro. 16:9.