1-3. (a) Anni i situasion na aripan ni Jehova turi ta namegafu napprofesiya si Zacarias? (b) Ngatta nikiddaw ni Jehova nga ‘manoli sa’ i totolena?

MAKKAKAGAG nga naluku nga pabbibbigan, babay nga netunnu ta tadday nga aggipayyan, anna babbay nga mekakagag ta utun nga egga i payada nga alle-dagua​—yatun ira nga simboliko nga letratu ay mabibbig ta libru na Zacarias. (Zac. 5:1, 7-9) Ngatta niyawa ni Jehova yaw nga kappabbaw ira nga sirmata ta profetana? Anni i situasion na Israelita ira tatun nga tiempo? Kunnasi makafekto nittam danatun nga sirmata nga nitura ni Zacarias?

² Kappagayaya i dagun 537 B.C.E. para ta dedikadu nga totolay ni Jehova. Kabalin na 70 dagun nga nike-aripadda, napalawan ngana ira ta Babilonia. Turi ta kalalawadda, talaga matalikarag ira nga mattrabahu tapenu itoli i kurug nga paddayarayaw ta Jerusalem. Turi ta 536 B.C.E., nepataddag i fundasion na templo. Tatun nga tiempo, “sobra i gallu na pakkukkulle na totolay nga maginna i gunina maski ta ararayyu.” (Ezra 3:10-13) Ngem, egga i limittuag nga pangontra tatun nga proyekto. Megafu ta pakkadismayada ta  aru nga ziga anna problema, nibattang na totolay i pappataddag tu templo tapus inasikasuda i gibbalayan anna gikkomanadda. Kabalin na 16 dagun, interamente nga neyimmang i pappataddag ta templo ni Jehova. Mawag nga iperaddam ta totolay na Dios nga manoli ira kani Jehova anna iyemmadda nga pagolluan i personal ira nga interes. Kayà ni Jehova nga manoli ira sa, itoli i nawawan nga gutuda, anna i interu-futu nga paddayaw sa.

³ Tapenu moffunan i totolena nga daddamman nu ngatta nipaliagna ira ta Babilonia, zinog na Dios si profeta Zacarias turi 520 B.C.E. I kebalinan mismu na ngagan nga Zacarias, “Si Jehova ay Nakeraddam,” ay awayyana nga nangipanono nira ta importante nga kinakurug. Maski nattammadda i pinangipaliag ni Jehova, neraddamman lagapa ni Jehova i totolena. (Bibbigan i Zacarias 1:3, 4.) Meddu nga nipasiguraduna nira nga uffunanna ira nga itoli uli i marenu nga paddayarayaw, ngem serioso gapa nga nitabaranna nga arianna ipamavulun i ari napafutuan nga paddayaw. Innattam gukaban na meka-annam anna mekapitu nga sirmata ni Zacarias nu kunnasi ira pinaguyu ni Jehova. Anni ira gapa nga leksion i magigiammu tam?

4. Anni i nasingan ni Zacarias nga meka-annam nga sirmata, anna anni i importansia na massi-abbagan nga ketura na mensahe? (Innan i letratu 1 ta gafu na artikulo.)

⁴ Namegafu i kapitulo 5 na Zacarias gukaban na nerumu-ruma nga sirmata. (Bibbigan i Zacarias 5:1, 2.) Nasingan ni Zacarias nga makkakagag i naluku nga pabbibbigan nga ma-9 metro i kapadduna anna 4.5 metro i kabana! Agga-vullag yatun, yatutta puede nga mabibbig. Netura ta massi-abbaganna i mensahe na pangukum. (Zac. 5:3) Maruddu nga unag laman i maturakan, ngem megafu ta egga gapa i tura ta lawan, manawag nga madammo anna serioso i mensahe natun.

5, 6. Kunnasi imammatan ni Jehova i maski anni nga klase na pakkoko?

⁵ Bibbigan i Zacarias 5:3, 4. Nu egga i tattabbagan na ngamin nga totolay kani Jehova, yammanno ngana danuri i totolay nga nengagan sa. Nalippawa danuri mangaya ta Dios nga “mepasiranan i ngagan na Dios [da]” nu makkoko ira. (Prov. 30:8, 9) Maski anni paga i motibo na pakkoko onu maski gittana rasonable gapa yatun, pagolluan na minakkoko i makasarili nga pakkaraga anne ta Dios anna mas nabalor sa i material nga pakkukua. Tagibaddikanna i dorob na Dios, arianna irespeto si Jehova anna awan tu pangikakuana ta ngaganna.

⁶ Nasingannu kari ta Zacarias 5:3, 4 nga “i pangimelle . . . tullung noka ta balay na makkoko . . . anna mattalupaddian noka tatun nga unag na balay anna daralan yatun”? Ari nga malisian onu mataguan i nepallo nga pangukum ni Jehova. Makatallung yatun ta pattaguan tapenu palawanan i marake nga annangngua ta nallatanan na totolay na Dios. Maski paga metagu na tadday nga tolay i pakkokona ta autoridad, amo, elder, onu ta maganana ira, arianna metagu yatun ta Dios, nga nangipasiguradu nga ilawanna ngamin nga pakkoko. (Heb. 4:13) Talaga makapabannay nga makikavulu ta totolay nga sigga-nono ta pabbalin tu mapammakatalakkan ta ‘ngamin nga ikalangadda’!​—Heb. 13:18.

7. Kunnasi ittam melisi ta pangimelle onu pangukum ni Jehova?

⁷ Ikalussaw ni Jehova i maski anni nga klase na pakkoko. Imammatattam nakuan nga makedayaw kani Jehova i pattolay segun ta atannang nga moral nga estandartena, nga kanayun nga ari makepasiran ta ngaganna i kondukta tam. Yatutta, melisi ittam ta pangukum ni Jehova kontra turi ta sadya nga ari manuttul ta dorobna.

8-10. (a) Anni i tabba? (b) Anni nga tabba i ari sinuppal ni Patul Zedekias?

⁸ I tumunug nga mensahe na makkagag nga pabbibbigan ay pamappalan turi ta ‘mangitabba tu falso ta ngagan na Dios.’ (Zac. 5:4) I tabba ay katurakan nga mamakurug nga i tadday nga gannug ay kurug onu tadday yatun nga serioso nga promesa nga kuan onu ari kuan na tolay i tadday nga gannug.

⁹ Talaga serioso nga gannug i pangitabba ta ngagan ni Jehova. Nammuattam yatun ta nesimmu kani Zedekias, i ultimo nga patul nga nammaguray ta Jerusalem. Nitabbana kani Jehova nga mattalupaddian yaya nga matalo nga sakup na pammaguray na patul na Babilonia. Ngem, ari sinuppal ni Zedekias yatun nga tabba. Bilang resulta, yaw nga pangukum i nekagi sa ni Jehova: “Adde ta matolay ngà, . . . matay noka [si Zedekias] ta Babilonia, ta lugar nu sitaw maddian i namabbalin tu patul sa, i patul nga arianna sinuppal i nitabbana sa anna zinaralna i pakipakkasinabbanna sa.”​—Eze. 17:16.

¹⁰ Obligadu nga tuppalan ni Patul Zedekias i tabbana kani Jehova nga nipromesana ta ngagan na Dios. (2 Cro. 36:13) Nappoffun lallagu si Zedekias ta Ehipto tapenu makalawan ta pangaripan na Babilonia ngem awan tu makasta nga narresultanna.​—Eze. 17:11-15, 17, 18.

11, 12. (a) Anni i pinaka-importante nga tabba tam? (b) Kunnasi nakuan makafekto i tabba tam ta inaggaw nga pattoletam?

¹¹ Gigginnan gapa ni Jehova i promesa tam ira. Imammatanna nga serioso i tabba tam ira, yatutta tuppalattam nakuan danatun tapenu mala i faborna. (Sal. 76:11) Ta ngamin nga nipromesa tam, pinaka-importante i pinangidedika tam ta baggi tam kani Jehova. I dedikasion ay serioso nga tabba nga passerbian si Jehova maski nu awan tu katalina.

¹² Kunnasi tam tuppalan i tabba tam nga dedikasion? I reaksiottam ta darakal anna baraddi nga kapurueba i mangipasingan nu  kunnasi ittam kaseriosio ta tabba tam nga dayawan si Jehova “kaggaggaw.” (Sal. 61:8) Angngariganna, nu egga i maki-alembong nittam ta trabahu onu ta eskuela, imammatattam kari yaw bilang oportunidad nga ‘makaleg tu pagayaya i mata tam ta dala-dalan [ni Jehova]’ gukaban na pallilli tatun ira? (Prov. 23:26) Nu madduruma i relihion ta baletam, mappoffun kari ittam kani Jehova tapenu mapattalupaddian i Cristiano nga personalidad maski magitetedday tam laman? Inaggaw kari nga makimallo tam ta nelangitan nga Yama tam, nga mappabalo sa ta pribilehio nga mabbalin tu totolena anna pangayana nittam? Inaggaw tam kari nga bibbigan i Biblia? Ari kari nga nipromesa tam nga kuan danatun? Nelagum tatun i pattuppal. Nu kuattam i ngamin nga mawayya tam ta paddayaw, mepasingattam nga ayatattam si Jehova anna talaga dedikadu ittam sa. Istilo na pattolay i paddayarayaw tam, ari nga formalidad laman. Pammakapianattam mismu i pattuppal tatun nga promesa; marresulta tu memammo nga mappange i kinamatalo tam.​—Deut. 10:12, 13.

13. Anni i magigiammu tam ta meka-annam nga sirmata ni Zacarias?

¹³ Uffunan ittam na meka-annam nga sirmata ni Zacarias nga masingan nga danuri mangaya kani Jehova ay ari nakuan makisali ta maski anni nga klase na pakkoko onu falsu nga pangitabba. Nagigiammu tam gapa nga maski egga ira i pakkurangadda, ari lagapa pinagurayan ni Jehova i Israelita ira. Inalippawana i problema ira nga neparubang nira durante nga napalevutan ira na kalaban. Nangipasingan yaya tu ehemplo nittam gukaban na pattuppal ta nipromesana ira, anna uffunanna ittam nga tuppalan gapa i promesa tam. Tadday nga uffunna i pangiyawana nittam tu iddanama nga arannina ngana nga pangultimuan i kinamarake ta interu mundo. Garantiyan yatun na tumunug nga sirmata ni Zacarias.

14, 15. (a) Ta mekapitu nga sirmata ni Zacarias, anni i nasinganna? (Innan i letratu 2 ta gafu na artikulo.) (b) Anni i irepresenta na babay ta unag na aggipayyan, anna ngatta nefuku anna naselyowan yaya?

¹⁴ Kabalin nga nasingan ni Zacarias i makkagag nga pabbibbigan, kinagi na anghel sa: “Innammu.” Anni i nasinganna ta mekapitu nga sirmata? Egga i mallawan tu tadday nga aggipayyan nga magalan tu “efa.” Tukuyan na efa i tadday nga aggipayyan onu basket nga paggukug tu efa. (Bibbigan i Zacarias 5:5-8.) Egga i “lipo nga kallag nga vuli” naw nga aggipayyan. Turi ta nalsa i kallagna, nasingan ni Zacarias i “tadday nga babay nga agga-itubang ta unag.” Niyesplika na anghel nga i babay tatun nga aggipayyan ay i “Kinamarake.” Nonopan i assing ni Zacarias turi ta masinganna nga purueban na babay nga makkarara tapenu mallawan tatun nga aggipayyan. Insigida nga nagguyu i anghel, nga nitolina uli i babay ta unag anna sinelyowanna yatun gukaban na madammo nga kallag. Anni i kayà kagian natun?

¹⁵ Ipasingan naw nga parte na sirmata nga ari ipamavulun ni Jehova i maski anni nga klase na kinamarake ta nallatanan na totolena. Siguraduanna nga selyadu i kinamarake anna insigida mapapanaw. (1 Cor. 5:13) Nipasiguradu nittam yatun na anghel gukaban na pakkallagna uli tatun nga aggipayyan.

16. (a) Anni i nasingan ni Zacarias nga tumunug nga nesimmu ta aggipayyan nga efa? (Innan i letratu 3 ta gafu na artikulo.) (b) Sitaw niyangay na babbay nga egga payada i aggipayyan nga efa?

¹⁶ I tumunug nga eksena ay dua nga babay nga egga i masikan nga payada nga alle-dagua. (Bibbigan i Zacarias 5:9-11.) Talaga neruma yaw nga babbay ta babay nga egga ta aggipayyan! Inusa naw nga babbay i masikan nga payada tapenu ikagagda insigida yatun nga aggipayyan nga keggan na “Kinamarake.” Sitoda yaya nga iyangay? Metabbo yaw “ta davvun na Sinar,” onu Babilonia. Ngatta meyangay yaw nga aggipayyan ta Babilonia?

17, 18. (a) Ngatta ‘mepangngo nga lugar’ para ta “Kinamarake” i Sinar? (b) Anni nakuan i determinasiottam meyannung ta kinamarake?

 ¹⁷ Para ta Israelita ira ta kaggawan ni Zacarias, mepangngo laman nga lugar i Sinar nga ketabbakkan na Kinamarake. Mapakurug da Zacarias anna na kasi-Judiona ira nga lugar na kinamarake i Babilonia ta kaggawadda. Ta pattoleda tatun nga siudad nga nalevutan tu maritta anna idolatroso ira nga annangngua, mawag nga pammanakitadda kadaggaw i espiritu natun nga pagano nga mundo. Talaga nabanna-bannayan ira tatun nga sirmata​—garantiya nga pattalupaddianan ni Jehova nga marenu i paddayaw!

¹⁸ Ngem niperaddam gapa na sirmata ta Judio ira i responsibilidadda nga pattalupaddianan i kinarenu na paddayaw. Ari puede anna ari mepamavulun i kinamarakay nga makatallung anna maddian ta totolay ni Jehova. Megafu ta nakatallung ittam ngana ta proteksion anna meddu nga pangikavurung na organisasion na Dios, egga i responsibilidad tam nga pattalupaddianan yatun. Ari kari nga mapaguyu ittam nga pattalupaddianan nga marenu i “balay” onu organisasion ni Jehova? Awan tu lugar na maski anni nga klase na kinamarake ta espiritual nga paraiso tam.

19. Anni i kebalinan na simboliko ira nga sirmata ni Zacarias para nittam?

¹⁹ I meka-annam anna mekapitu nga sirmata ni Zacarias ay serioso nga pamappalan turi ira ta kanayun nga maddarogas, tadday nga pamakurug nga ari vuluvuga nga pamavulunan ni Jehova i kinamarake. Mawag tu egga i napafutuan nga pangikalussaw ta kinadake ta parte na sinsero ira nga maddayarayaw. Meddu gapa nga pamasiguradu yaw ira nga rekord nga naggafu ta nelangitan nga Yama tam. Nu mappursigi ittam nga mabbalin tu tolay nga faboran anna protektan na Dios, ariattam noka meparubang ta kappatay nga pangimelle. Magayaya lallagu si Jehova nga bendisionan ittam. Sulit ngamin i appursigi tam nga mattalupaddian nga marenu ta mundo nga napannu tu kinamarake. Makasiguradu ittam nga uffunan ittam ni Jehova! Ngem ngatta makasiguradu ittam nga mangaffu i kurug nga paddayarayaw taw nga ari makadios nga mundo? Anni i garantiya tam nga protektan ni Jehova i organisasionna durante nga umaranni ngana i dakal nga ziga? Matabbag yaw ira ta tumunug nga artikulo.