NEYANA ngà turi 1923 ta Hemsworth, ili na Yorkshire, England. Egga i manung ku, si Bob. Turi ta mannuebe anios ngà, kellussaw na yamà i pagappappe na relihion, yari tu nangà yaya tu libru nga mamalattuag ta falso ira nga relihion. Talaga kakayàna i bibbibbiganna. Kabalin na piga ragun, nilayyagayyan kami ni Bob Atkinson ta balemi anna pinatugtugna i rekord na tadday nga palappa ni Brother Rutherford gukaban na ponograpo. Nammuammi nga naggafu yaw ta grupo nga nangipublisa tatun ira nga libru! Nikiddaw na magana ku nga makipamugag kada gabi si Brother Atkinson nikami anna tabbagan i napakaru nga pakkiavumi ta Biblia. Nembita kami nga magatende tu study ira ta balay na wagi nga piga kilometro i karayyuna. Insigida kami nga minay, anna naforma i baddi nga kongregasion ta Hemsworth. Ari nabbayag, mamisita kami ngana tu zone servant ira (manangngal ta sirkito ta maddaggun) anna mangimbita tu papayunir ta aranni ira nga kongregasion. Talaga makasta i efekto niakan na pakikavulu nira.

Kapepegafumi nga nappataddag tu negosio, ngem kinagi ni Yamà kani manung ku nga si Bob, “Nu kayà mu mappayunir, ibattattam ngana yaw.” Minanugu yaya, anna nappayunir yaya ta edad nga 21. Kabalin na dua ragun, nappayunir ngà turi ta 16 anios ngà. Fuera ta weekend ira, magitetadday ngà nga mallayyagayya, nga maruddu nga testimony card anna ponograpo i usu-usakku. Ngem, binendisionannà ni Jehova tu estudiante ta Biblia nga talaga napprogreso. Aru ta familia natun nga estudiante i nangalawa gabbalaman ta kinakurug. Ta tumunug nga dagun, natunno ngà bilang espesial payunir, kavulu si Mary Henshall. Nadog kami ta lugar nga awan tu makatteritoria ta rehion na Cheshire.

Maddaggun ngana i World War II, anna nekiddaw nga manguffun i babbay ta gerra. Bilang ngamin-tiempo nga ministro, sikami nga espesial payunir ay magekspekta nga ariammi melagum tatun kagitta na tanakuan ira nga ministro na relihion. Ngem ari minanugu i korte, yari tu nasentensiannà tu 31 aggaw ta affukutan. Turi ta 19 anios ngà, namiddua ngà nga minarubang ta korte  megafu ta ari kaya na konsensià nga makipartisipa ta gerra. Ngem namiddua gapa nga neyatras i kaso niakan. Taw ngamin nga nesimmu niakan, ammù nga uuffunannà na masanto nga espiritu anna tammi ni Jehova i limà, nga patuyaggan anna pasikannannà.​—Isa. 41:10, 13.

Nakkasimmu kami ni Arthur Matthews turi 1946. Kababalinna nga mefuku tu tallu vulan megafu ta manakina makisali ta gerra, nevulu yaya kani wagina nga si Dennis, espesial nga payunir, ta Hemsworth. Sinudduan ira na yamada meyannung kani Jehova mamegafu ta kabbidda anna nabawtisowan turi tinedyer ira. Ari nabbayag, neyasayn si Dennis ta Ireland, anna nabattang nga magitetadday si Arthur. Inimbita na magana ku yaw nga bagitolay nga maddian ta baleda megafu ta nagustuadda i talikaragna bilang payunir. Turi ta nabbisita ngà, mappresenta kami ni Arthur nga mamaggaw tu piggang kabalin kuman. Tapus, namegafu kami nga makkatutura. Ta 1948, nasentensian mangana si Arthur nga mefuku tu tallu vulan. Nakkasal kami turi Enero 1949 nga gakkagmi nga mattalupaddian ta ngamin-tiempo adde ta posible. Megafu ta bendision ni Jehova anna memmugug nga papplano, makitaddakkami nga maffusi tu prutas kada bakasiommi tapenu masuportan i pappayunirmi.

Kabalin na tanga-ragun, nekiddaw nga magali kami ta Northern Ireland, ollu ta Armargh tapus ta Newry, parehu nga Katoliko nga ili. Tensionadu tatun nga lugar, anna mawag nga memmugug anna mataktika kami ta pakiyuvovug ta totolay. Makua i study ira ta balay na magatawa nga Saksi nga 16 kilometro i karayyuna ta paddianammi. Mawwalu i nagatende. Nu membita kami ta gabi, ta suelo kami makkatrug anna magayaya kami ta masustansia nga pagguban ta kinommananna. Talaga magayaya kami nga mammuan nga aru ngana i Saksi tatun nga lugar.

Massesserbi ngana nga espesial payunir i manung ku anna i atawana nga si Lottie ta Northern Ireland, tapus turi ta 1952 nagatende kami nga appa ta distrito nga kombension ta Belfast. Tadday nga masippo nga wagi i namadulo nikami nga appa kavulu si Pryce Hughes, i branch servant na Britain tatun nga tiempo. Tadday nga gabi naguruvovugammi i libru nga God’s Way Is Love, nga espesipiko nga napadday para ta Ireland. Inistoria ni Brother Hughes i ziga na pallayyagayya ta Katoliko ira nga taga-Irish Republic. Papanawadda i wawwaragi ira ta paddianadda anna arubangadda i vayolente ira nga grupo nga inorganisa na papari. “Mawagmi i magatawa ira nga egga takeda,” kunni Pryce, “tapenu makipartisipa ta espesial nga kampania na pangitaneg tu buklet ta interu nasion.” * Insigida kami simibbag, “Sikami ngana laman!” Yatun i nekagi ta gafu naw nga istoria.

Tadday nga lugar nga kanayun nga paddianan  na papayunir ta Dublin ay i balay ni Ma Rutland, nabayag nga matalo nga sister. Kabalimmi nagali tari anna nelaku i karuan nga gamitmi, nattakay kami appa ta tricycle ni Bob anna minay kami nagaleg tu takay. Nakaleg kami tu disente nga segunda-mano nga takay anna nikiddomi ta nallaku nga ideliverna yatun megafu ta awan tu makannammu nga mammaneho nikami. Tanga-gabi nga pappraktisan ni Arthur ta nonona nu kunnasi i makkambio. Ta kinommananna, naddalan i misionero nga si Mildred Willett (nabbalin nga atawa ni John Barr) durante nga purueban ni Arthur nga ilawan ta garahe i takay. Ammuna i mammaneho! Sinudduan nakami nga mammaneho anna makapammaneho kami ngana!

Tumunug, mawagmi i paddianan. Nekagi nikami nga ibita i maddian ta trailer megafu ta baka tuggian yatun na minakkontra ira, yatutta magaleg kami tu balay ngem awan tu nalegmi. Tatun nga gabi, nakkatrug kami appa ta takay. Ta tumunug nga aggaw, baddi nga homemade trailer nga egga i dua nga katrina i nalegammi. Yatun i nabbalin tu balemi. Kakkasta yatun megafu ta awan tu problemami nga mangigarahe ta trailer ta koman na masippo ira nga kusetcheru. Ma-16 adde ta 24 kilometro i karayyu na teritoriami. Kabalimmi ta bagu nga lugar, toliammi anna layyagayyan danuri ira naggaraheyammi.

Nangayammi i ngamin nga babalay ta southeast Irish Republic nga awan tu problema, anna naketaneg kami tu 20,000 nga buklet ira tapus nipasami ta panga nga ofisina ta Britain i ngagan danuri interesadu. Talaga bendision nga ginatu ngana i Saksi tatun nga lugar ta maddaggun!

Turi kua, neyasayn kami ta south London. Piga ligguan laman, nakalawa tu tawag si Arthur ta panga nga ofisina na Britain, nga nangikagi sa nga masserbi yaya bilang manangngal nga sirkito ta tumunug nga aggaw! Kabalin na tanga-ligguan nga passanay, minay kami ta sirkito nga asaymentmi ta Scotland. Awan ngana tu tiempo ni Arthur nga mapprepara tu palappana, ngem talaga napagaram ngà megafu ta sigga-paran nga arubanganna i kapurueba ira ta passerbi kani Jehova. Talaga na-enjoymi i passerbi ta sirkito. Piga dagun nga massesserbi kami ta teritoria nga ari neyasayn nikami, ngem dakal nga bendision nga kavulumi ngana ta maddaggun i aru nga brother anna sister.

Turi ta nembita si Arthur nga magatende ta mafulu-vulan nga Gilead School turi 1962, mawagmi i maddesision. Nadisidimi nga maski mabattang ngà, okay laman nga akseptan ni Arthur yatun nga pribilehio. Megafu ta awan tu partner ku, nedog ngà uli ta Hemsworth bilang espesial payunir. Ta panoli ni Arthur kabalin na tanga-ragun, neyasayn kami nga masserbi ta distrito anna teritoriami i Scotland, northern England, anna Northern Ireland.

Turi ta 1964, nakalawa tu bagu nga asayment si Arthur bilang branch servant ta Irish Republic. Talaga na-enjoymi i trabahu ta sirkito anna ta  distrito, yatutta gittana mannerbios ngà ta gafu ta panguli. Nu nonopakku i nappasa, mappabalo ngà nga neddannà tu pribilehio nga masserbi ta Bethel. Mangurug ngà nga nu akseptammu i tadday nga trabahu maski gittana ariammu kayà yatun, kanayunnaka nga bendisionan ni Jehova. Kanayun nga maddian ngà ta ofisina, mangikarton tu literatura, mallutu, anna mappakarenu. Nu mittan, mabbisita kami tu distrito anna egga tiansami nga makilala i wawwaragi ta interu nasion. Nakoffun yatun kunne na gapa i pakasingan ta papprogreso na estudiantemi ira ta Biblia tapenu mapeggakkami tu meggo nga relasion ta espiritual nga familiami ta Ireland. Anni mabba nga bendision!

Nakua i ollu nga internasional nga kombension ta Ireland ta Dublin turi ta 1965. * Maski ta grabe nga pangokkontra, navviktoria yatun nga kombension. Egga i 3,948 nga nagatende anna 65 i nabawtisowan. Ngamin nga namadulo ta 3,500 nga delegadu ay nakalawa tu tura na pangappresia. Zinayaw gapa na namadulo ira i kondukta na delegadu ira. Talaga importante yatun nga nesimmu ta historia na Saksi ira ta Ireland.

Ta 1966, nattadday i north anna south Ireland ta panangngal na panga nga ofisina ta Dublin—talaga tanakuan ta passirinna na pulitikal anna relihioso nga grupo tatun nga isla. Magayaya kami mammuan nga aru nga Katoliko i nangalawa ta kinakurug anna masserbi kavulu i wawwaragi nga dati nga Protestante.

Talaga dakal i pinanguli na pattolemi turi 2011 turi ta napattadday i panga nga ofisina na Britain anna Ireland tapus neyasayn kami ta London Bethel. Nammuammi yatun nga balita turi ta mavuru-vurung ngà ngana ta gawa-gawayyan ni Arthur. Egga i Parkinson’s disease-na. Turi Mayo 20, 2015, natay si Arthur nga atawà, i kavulu ku ta 66 dagun.

Ta dagun ira nga nappasa, madammo i futù, nadepres, anna naddaddam ngà. Dati, kanayun nga egga si Arthur para niakan. Talaga kanappakku yaya! Ngem nu meparubakka ta kunnaw ira nga situasion, mas maddukko ka kani Jehova. Fermi gapa ayaya ku mammuan nga aru i mangiddu kani Arthur. Nakalawa ngà tu tura ira ta kokkofummi ta Ireland, Britain, anna maski ta United States. Ariakku mekagi nu kunnasi kadakal i neyuffun danaw nga tura, kunne na gapa i pamagaram na wagina nga si Dennis anna na atawana nga si Mavis, anna na kanakakku nga da Ruth anni Judy.

Talaga napagaram ngà ta Isaias 30:18. Kunna: “Ngem mapasensia nga maginnag si Jehova tapenu faborannaka, anna tumaddag yaya tapenu ikallo naka. Megafu ta si Jehova ay Dios na hustisia. Magayaya danuri tulu-tuloy nga maginnag sa.” Talaga mabanna-bannayannà megafu ta ammù nga mapasensia nga maginnag si Jehova tapenu ayusanna i ganna-gannug anna mangiyawa tu kakkasta ira nga asayment nittam ta napabagu nga mundo.

Nu nononopakku i nesimmu ta pattolemi, nasingakku nu kunnasi nga nigiya anna binendisionan ni Jehova i trabahu ta Ireland! Dakal i pribilehiò nga nakibillay maski baddi tatun nga espiritual nga papprogreso. Kuru-kurug nga kanayun nga mangirattal tu bendision i pattuppal ta kiddaw ira ni Jehova nittam.