Naggutu Gabbalaman si Jose nga taga-Arimatea
SI JOSE NGA TAGA-ARIMATEA ay arianna ammu nu kunnasina nga magutu nga angayan i gobernador na Roma. Kilala si Poncio Pilato nga kuanna laman i urena. Ngem tapenu formal nga metanam si Jesus, egga nakuan i tadday nga makkiddaw ta baggina kani Pilato. Ngem, ari gamma nga mariga yatun nga pakiyuvovug gittana egga ta nono ni Jose. Turi ta nasiguradu ni Pilato ta ofisial nga natay ngana si Jesus, minanugu yaya tatun. Yatutta maski paga nga marraddam si Jose, nappabibibi yaya nga minay ta lugar na pabbitayan.—Mar. 15:42-45.
-
Sinni si Jose nga taga-Arimatea?
-
Anni i koneksionna kani Jesus?
-
Ngatta maginteres ittam ta istoriana?
TADDAY NGA MIEMBRO NA SANHEDRIN
Tinukoy na nainspiran nga Evanghelio ni Marcos si Jose nga “mekakua nga miembro na Sanhedrin.” i atannang nga korte na Judio anna egga i pakapangnguana ta komunidad, gobiernu, anna ta relihion. (Mar. 15:1, 43) Yatutta tadday si Jose ta lider na totolena, nga mangiyesplika nu ngatta posible nga makimiting yaya ta gobernador na Roma. Ari gapa nga kakkadda-kaddag nga mariku si Jose.—Mat. 27:57.
Magutu ka kari nga kagian nga Cristiano ka?
Kokkontra na interu Sanhedrin si Jesus. Nakkara-annugutan na kada miembro nga ipapatay yaya. Ngem natukoy si Jose nga “mapia anna matunung.” (Luc. 23:50) Ari tu kagitta na kavuluna ta Sanhedrin, mapammakatalakkan anna marenu ta moral i pattolena anna kingnguana i adde na mawayya nga tuttulan i dorob na Dios. ‘Magiddeddanama yaya ta dattal na Pammaguray na Dios,’ yari tu nabbalin yaya tu disipulo ni Jesus. (Mar. 15:43; Mat. 27:57) Siguradu nga nagustuanna i mensahe ni Jesus megafu ta sinsero nga pakkaragana ta kinakurug anna hustisia.
SEKRETO NGA DISIPULO
Mabibbig ta Juan 19:38 nga “tadday si Jose ta mangurug ira kani Jesus, ngem arian na nga nipaka-pakannammu, ta maganassing ta Judio ira.” Anni i paganassinganna? Ammuna i pangikalussaw na Judio ira kani Jesus anna i determinasiodda nga papanawan ta sinagoga i sinni laman nga mangikagi tu pangurug sa. (Juan 7:45-49; 9:22) Nu mapapanaw i tadday ta sinagoga, uyawan, lisian, anna ifuera yaya na kasi-Judiona. Yari tu madduda yaya nga kagian ta publiko i pangurugna kani Jesus. Awayyana malsa ta posisionna anna ta kinaprominentena.
Ari laman nga kani Jose nesimmu yatun. Segun ta Juan 12:42: “Aru nga mammaguray nga Judio i nangurug kani Jesus. Ngem megafu ta Fariseo ira, ariad-da nga nilammuyag i angngurug da ta maganassing ira marake nu ariad-da ira nga patallungan ta sinagoga.” Si Nicodemo paga i tadday nga neparubang tatun nga situasion, miembro gapa na Sanhedrin.—Juan 3:1-10; 7:50-52.
Maski nu disipulo si Jose, arianna mekagi yatun ta publiko. Serioso yatun nga problema, mas ngana ta pakkagi ni Jesus: “I sinni laman nga mangilammuyag nga tolè yaya ta pagara-arubangan na magaru, kunnatun gapa i kuak-ku sa ta arubang na Yamà ta langi. Ngem i sinni laman nga mangilimag tu tolè yaya, kunnatun gapa i pangilimag ku sa ta Yamà ta langi.” (Mat. 10:32, 33) Ari gapa nga direkta nga nilimag ni Jose si Jesus, ngem awan gapa tu sikan na nonona nga kagian nga disipulo yaya ni Jesus. Kunnasi ka gapa?
Egga gapa makasta nga kingngua ni Jose. Mabibbig ta Biblia nga arianna sinuportan Luc. 23:51) Kagitta na kagian na karuan, awan si Jose turi ta bista ni Jesus. Maski anni paga i situasion, awayyana tu kuruga maddaddam si Jose tatun nga pakkillu ta hustisia—ngem awan tu makuana tapenu pagimmangan yatun!
i plano kontra kani Jesus. (NAGGUTU GABBALAMAN
Turi ta natay ngana si Jesus, manawag nga naggutu ngana si Jose anna naddisidi yaya nga suportan i disipulos ni Jesus. Mabibbig yatun ta rekord na Marcos 15:43: “Yatun tu nigutu ni Jose i minay kani Pilato anna kiniddaw na i baggi ni Jesus.”
Nallawan nga presente si Jose turi ta patay ni Jesus. Siguradu nga ammuna nga natay ngana si Jesus nige paga mammuan ni Pilato. Yatutta, turi ta kiddawan ni Jose i baggi Jesus, nononopan ni Pilato nu talaga natay ngana si Jesus. (Mar. 15:44) Nu nemammatan ni Jose i ziga ni Jesus ta pakarigatan nga estaka, nakonsensia kari yaya ta nasinganna anna naddesision gabbalaman nga itaddaggan i kinakurug? Posible yatun. Maski anni i nesimmu, napaguyu gabbalaman si Jose. Ari ngana yaya nga sekreto nga disipulo.
NITANAM NI JOSE SI JESUS
Ikiddaw na dob na Judio nga metanam nige na pallammag na bilag danuri nasentensian nga matay. (Deut. 21:22, 23) Ngem para ta Romano ira, mapagurayan nga mavunno i baggi na natay nga kriminal ta estaka onu metabbo ta gagangay nga attanamman. Ngem ari tu yatun i plano ni Jose. Aranni ta pinanentensian kani Jesus, egga i livun nga dana nakokkog ta dadda nga kukua ni Jose. Megafu ta ari paga vuluvuga nga neyusa yatun, makagi nga bagu ali paga laman si Jose ta Jerusalem naggafu ta Arimatea * anna pinlanona nga usan yaw nga lugar nga pattanamman na familiada. (Luc. 23:53; Juan 19:41) Kinasippo ta parte ni Jose nga itanam si Jesus ta mismu nga ketanammanna anna natuppal i profesiya nga metanam i Mesias “kavulu i mariku.”—Isa. 53:5, 8, 9.
Egga kari i maski anni nga mas importante nittam anne ta relasiottam kani Jehova?
Nirekord na appa nga evanghelio nga turi ta nekazza i baggi ni Jesus ta estaka, vinungunan ni Jose tu bagu nga ulo nga lino tapus nitanamna mismu ta livunna. (Mat. 27:59-61; Mar. 15:46, 47; Luc. 23:53, 55; Juan 19:38-40) Si Nicodemo laman i espesipiko nga nakagi nga nanguffun kani Jose, nga nangivulu tu bangug ira para ta natay. Megafu ta prominente ira dua, siguradu nga egga i kaduffudda nga nangiyakka ta baggi ni Jesus. Awayyana nga naddog ira tu aripadda nga mangiyakka anna mangitanam tatun. Ngem, ari nga alappaw i kingnguada dua. Maski sinni nga nakasiggeg tu natay ay mebilang nga madaping ta pitu nga aggaw, nga mamaddaping ta ngamin nga matammida. (Num. 19:11; Hag. 2:13) Nu kunnatun, mekiddaw nira nga umarayyu ta totolay ira ta ligguan na Paskua anna ari makiparte anna makiselebra tatun. (Num. 9:6) Megafu ta pinangitanamda kani Jesus, nappeligro si Jose nga uyawan na kakavuluna. Ngem tatun nga punto, sigga-paran ngana yaya nga akseptan i resulta na pangitanam kani Jesus anna ta pangikagi ta publiko nga disipulo yaya na Cristo.
ULTIMO NA ISTORIA NI JOSE
Fuera ta rekord na Evanghelio ta tanam ni Jesus, awan ngana tu rekord meyannung kani Jose nga taga-Arimatea, nga nappalattuag ta pakkiavu: Anni i nesimmu sa? Ta kakuruganna, ariattam ammu. Ngem, segun ta nagigiammu tam taw nga artikulo, makagi nga nilammuyagna ta publiko nga tadday yaya nga Cristiano. Kakuruganna, turi ta kapurueba anna krisis, ziminakal i pangurug anna kinagutuna imbes nga mapawan. Makasta nga seniales yatun.
Palattuagan naw nga istoria i pakkiavu ira nga pannonopattam nakuan tu mapia: Egga kari i maski anni—posision, karera, pakkukua, pangiddu ta familia, onu maski i mismu nga lallaguretam—nga mas importante nittam anne ta relasiottam kani Jehova?
^ par. 18 Awayyana nga i Arimatea ay matukoy gapa nga Rama, Rentis (Rantis) ta moderno nga aggaw. Taw nga neyana si profeta Samuel, nga ma-35 kilometro ta nallatanan na sigiran anna taggappan na Jerusalem.—1 Sam. 1:19, 20.