1. Anni i katannangan nga klase na aya, anna ngatta makagi nga kunnatun? (Innan i letratu ta gafu na artikulo.)

I AYA nga nebase ta matunung ira nga prinsipio (a·gaʹpe) ay regalu nga naggafu kani Jehova. Yaya i Naggafuan natun. (1 Juan 4:7) Yaw i katannangan nga klase na aya. Nelagum taw i pangiddu anna kinasippo, anna masingan yaw ta ari-makasarili nga pagguyu para ta pammakapian na tanakuan. Segun ta tadday nga referensia, i a·gaʹpe ay “masingan laman segun ta pagguyu natun.” Kada mangipasingan anna makalawa ittam tu ari-makasarili nga aya, makkasta i pattoletam, anna mapannu tu pagayaya anna gakkag.

2, 3. Kunnasi nangipasingan tu ari makasarili nga aya si Jehova ta totolay?

² Nipasingan ni Jehova i ayana ta totolay nigena paga pinaro da Adan anni Eva. Pinaddena i davvun tapenu mannanayun nga paddianan na totolay, lugar ari laman tapenu matolay ira, nu ari talaga makapagayaya ira ta pattolay. Kingngua ni Jehova yaw para mabenefisiowattam mismu, ari tu pammakapianna. Nipasingan na paga i ari makasarili nga ayana gukaban na pangiyawa ta ánana tu tiansa nga mattolay tu mannanayun ta Paraiso nga davvun nga nipreparana para nira.

 ³ Kabalin marrebelde da Adan anni Eva, kingngua ni Jehova i kadakallan nga pangipasingan tu ari makasarili nga aya. Niyunnugna nga ipaliag i mappange nga gaka-gaka danatun nga rebelde, anna siguradu yaya nga egga karuan nira nga mangalawa ta ayana. (Gen. 3:15; 1 Juan 4:10) Ta kakuruganna, ta pangipromesa pagalaman ni Jehova ta mappange nga Mangipaliag, minammatanna nga nesimmu ngana yatun. Tapus, kabalin na ma-4,000 dagun, nisakrifisiona i itatana nga Anana para ta totolay. (Juan 3:16) Talaga dakal i pappabalo tam ta ari makasarili nga aya ni Jehova!

4. Ngatta makepasingan tu ari makasarili nga aya i imperfekto nga totolay?

⁴ Makepasingattam gapa tu ari makasarili nga aya megafu ta pinaro ittam na Dios segun ta imahena. I narensia tam nga liwa i mamarriga nittam nga mangipasingan tu aya, ngem ari nilaffu natun i abilidad tam nga kuan yatun. Nangipasingan tu aya si Abel ta Dios gukaban na pangisakrifisio ta kapianan nga egga sa. (Gen. 4:3, 4) Nangipasingan gapa tu ari makasarili nga aya si Noe ta kasittolena gukaban na pangilayyagayya ta mensahe na Dios tu piga dekada maski awan tu maggigginna sa. (2 Ped. 2:5) Mas pinagollu ni Abraham i ayana ta Dios anne ta panagenona ira turi ta nedog sa nga isakrifisio i anana nga si Isaac. (Sant. 2:21) Kagitta danuri matalo nga lallaki, kayà tam mangipasingan tu aya, maski meparubang ittam ta problema ira.

5. Anni ira i kuattam tapenu mepasingan i napafutu nga aya?

⁵ Kagian na Biblia nga i sinsero nga aya ay “ari nakuan tu egga ta uvovug onu simu laman; mawag tu i pangaya ay mapakurug anna mepasingan ta pangnga-pangngua.” (1 Juan 3:18) Kayà kari kagian naw nga ariattam awayya ipasingan i aya tam gukaban na paguvovug? Ari vuluvuga! (1 Tes. 4:18) Kayàna kagian nga ari makalanno i basta pangikagi tu “Iddu taka.” Mawag tu ipasingattam yatun ta pagguyu. Angngariganna, nu magawag tu sinnun anna makan ta kagaggaw i kapangngurug tam, ari makalanno i basta pakkagi tu makasta nga uvovug. (Sant. 2:15, 16) Kunnatun gapa, megafu ta aya tam kani Jehova anna ta kasittoletam, ariattam laman nga basta ipakimallo nga “maddog ta maggatab” i Yafu, nu ari, mallallappo tam mismu nakuan ta ministerio.​—Mat. 9:38.

6, 7. (a) Anni i aya nga “napafutu”? (b) Anni ira i angngarigan na appappe nga aya?

⁶ Nitura ni apostol Pablo nga i aya tam nakuan ay “mapakurug anna mepasingan.” Yatutta, i aya tam gafu nakuan ay “napafutu,” onu “napasikkal,” ari nga magappa-appe. (Roma 12:9; 2 Cor. 6:6) Kebalinan naw nga ariattam mepasingan i napafutu nga aya nu itagu tam i kurug nga kata-katoletam, nga alle-nakamaskara ittam. Baka manono tam, ‘Makagi kari gapa nga aya nu napamavulunan tu pagappa-appe?’ Ari. Ari vuluvuga makagi nga aya yatun anna awan tu serbina.

⁷ Ikonsidera tam i angngarigan ira na appappe nga aya. Ta hardin na Eden, nagappappe si Satanas nga ikavurunganna si Eva, ngem kakuruganna, masingan ta kingnguana ira nga makasarili anna minannabag yaya. (Gen. 3:4, 5) Ta kaggawan ni David, nipasingan ni Ahitopel i appappe nga pakikofunna ta patul. Nabbalin yaya tu traidor turi ta nasinganna nga mabbentaha yaya. (2 Sam. 15:31) Kunnatun gapa ta maddaggun, mangiyusa danuri apostata anna tanakuan paga nga mamaggurungay ta kongregasion tu “mapia anna mammi nga paguvovug” tapenu palawanadda nga minangngiddu ira, ngem makasarili i kurug nga motiboda.​—Roma 16:17, 18.

8. Anni i iyavu tam ta baggi tam?

 ⁸ Kappasirang i appappe nga aya megafu ta kontran naw i makadios nga kualidad nga minassakrifisio nga aya. Melogo natun i totolay, ngem ari tu si Jehova. Ta kakuruganna, kinagi ni Jesus nga ‘katta-kattabbanna noka’ danuri magappappe ira. (Mat. 24:51) Siempre, ari vuluvuga nga mangipasingan tu appappe nga aya i aripan ira ni Jehova. Ngem iyavu ta baggi tam, ‘Kanayun kari nga napafutuan i aya ku, onu nakivuan tu makasarili onu pangilogo?’ Ikonsidera tam i siam nga gannug tapenu makepasingattam tu aya nga “napasikkal” onu ari appappe.

9. Kunnasi tam mepasingan i napafutu nga aya?

⁹ Magayaya nga sumuporta maski awan tu makasingan. Sigga-paran tam nakuan nga mangipasingan tu aya ta wawwaragi “ta sekreto,” onu ari meyanunsio, nu posible. (Bibbigan i Mateo 6:1-4.) Ari natuppal yatun da Ananias anni Safira. Ariadda kontento nga ilimag i pinaddonada, yatutta sinosobradda i kinagida ta publiko nga niyawada yatutta nakastigo ira ta pagappa-appeda. (King. 5:1-10) Ngem, paguyuan ittam na napafutu nga aya nga magayaya nga passerbian i wawwaragi maski ari meyanunsio onu medayaw. Angngariganna, danuri brother nga massuporta ta Manangngal nga Baggi tapenu mangiprepara tu espiritual nga makan ay ari mepakannammu, nga ariadda idayaw i baggida onu kagian i material ira nga nipreparada.

10. Kunnasi tam mangirollu ta pangikakua ta tanakuan?

¹⁰ Magollu ta pangikakua ta tanakuan. (Bibbigan i Roma 12:10.) Nangngua si Jesus tu apparigan ta pangikakua ta tanakuan gukaban na pangngua ta alinno ira nga trabahu. (Juan 13:3-5, 12-15) Makua tam yatun nu egga i kinapakalinno tam nga mangikakua ta tanakuan. Ari malippawa maski na apostoles i kikkingngua ni Jesus turi ta ariadda paga nalawà i masanto nga espiritu. (Juan 13:7) Mepasingattam i pangikakua ta tanakuan nu ari atannang i paningattam ta baggi tam megafu ta nabalittam, material nga pakkukua, onu pribilehio ira ta passerbi kani Jehova. (Roma 12:3) Imbes nga passilan danuri nakalawa tu dayaw, makipagayaya tam nakuan maski nu matageno tam nga mekunnay tam nakuan gapa ta parehu nga dayaw onu appresasion tatun.

11. Ngatta sinsero nakuan i komendasiottam?

¹¹ Sinsero nga komendan i wawwaragim. Magaleg tam nakuan tu tiansa tapenu komendan i kataggi-tadday megafu ta ‘mapia anna mepangngo’ i kunnatun ira. (Efe. 4:29) Ngem, sinsero tam nakuan. Ta nu ari, baka sobra ngana i pamadayaw tam tatun nga tolay onu lillillitattam i responsibilidad nga tabarangngan yaya. (Prov. 29:5) Nu komendattam i tadday nga tolay durante nga agga-arubang ngem paraketattam mabba yaya nu agga-likug, pagappappe yatun. Nibita ni apostol Pablo yatun nga silu anna nangipasingan tu makakkasta nga ehemplo na napafutu nga aya gukaban na pakkomenda ta tanakuan. Angngariganna, sinsero nga kinomendanna i Cristiano ira ta Corinto meyannung ta karuan nga aspeto na konduktada. (1 Cor. 11:2) Ngem turi ta ari mepangngo ta komendasion i kingnguada, masippo anna manawag nga niyesplikana i rason nu ngatta.​—1 Cor. 11:20-22.

12. Kunnasi tam makepasingan tu napafutu nga aya nu mamadulo ittam?

¹² Mabbalin tu minammadulo. Nidob ni Jehova nga mabbalin tam nakuan tu minangngiyawa ta wawwaragi tam. (Bibbigan i 1 Juan 3:17.) Ngem kuattam yatun megafu ta makasta i motibo tam, awan tu kivuna nga pakka-makasarili. Iyavu tam ta baggi tam: ‘Mamadulo ngà kari ta madukko laman ira nga kofukku, prominente ira, onu turi ta  makeyawa gapa tu fabor niakan? Onu magaleg ngà lallagu tu tiansa tapenu manguffun ta wawwaragi nga ariakku talaga kilala onu danuri awan tu mebaloda niakan?’ (Luc. 14:12-14) Kunnasi nu gavva nga magawag i tadday nga wagi megafu ta nakkamali yaya ta desisionna? Onu kunnasi nu ari nappabalo i tadday nga inimbitam ta balenu? Ta kunnatun ira nga situasion, iyaplika tam nakuan i tabarang: “Ari kamu nga marreklamo nga mamadulo ta kakavvulu nu ira ta angngurug.” (1 Ped. 4:9) Nu tuttulammu yatun nga tabarang, mas magayaya ka nga mangiyawa megafu ta marenu i motibom.​—King. 20:35.

13. (a) Ngatta kawagattam i pappasensia nu suportan i makafi? (b) Anni ira i praktikal nga makua tapenu masuportan danuri makafi?

¹³ Suportan danuri makafi. Mapurueban i kinakurug na aya tam depende ta pattuppal tam ta bilin na Biblia nga “uffunan nu i makafi anna pasa-pasensian nu ira ngamin.” (1 Tes. 5:14) Maski aru turi ta makafi i nassikan gabbalaman i pangurugda, kawagan na tanakuan i pappasensia tam onu tulu-tuloy nga suporta. Nelagum tatun i pangistoria tu makapagaram meyannung ta Biblia, pangimbita nira nga makavulu ta ministerio, onu maski pagginna laman nira. Imbes nga nonopan nga “masikan” onu “makafi” i tadday nga brother onu sister, ammuattam nakuan nga sittam ngamin ay egga i kasikannan anna pakkafianna. Maski si apostol Pablo, inaminna nga egga i pakkafianna ira. (2 Cor. 12:9, 10) Yatutta, mabenefisiowattam ngamin ta suporta na kasi-Cristiano tam ira.

14. Anni ira nakuan i kuattam tapenu mapattalupaddian i imammo ta wawwaragi tam?

¹⁴ Makippakoma. Kuattam i adde na mawayya tam tapenu mapattalupaddian i imammo ta wawwaragi tam, maski matageno tam nga ariadda ittam malippawa onu ari patas i pattratuda. (Bibbigan i Roma 12:17, 18.) Makalsa tu taki na nono i pakkiddaw tu pamakoma, ngem mawag nga sinsero yatun. Angngariganna, imbes nga kagian, “Pasensia ka ngana nu kunnatun i natageno mu,” awayyam aminan i liwa mu gukaban na pakkagi, “Pasensia ka ngana, natakitakka ta kinagì.” Importante gapa i imammo netallugaring ta pagatawa. Ari nakuan nga magappappe i magatawa nga iddukadda i kataggi-tadday ta publiko ngem ari makkatattannug, mataki ira nga maguvovug, onu pisikal nga takitadda i kataggi-tadday ta pribado.

15. Kunnasi tam mepasingan nga napafutu i pamakoma tam?

¹⁵ Napafutuan nga mamakoma. Mamakoma ittam gukaban na pakkattam ta kingngua na nakataki nittam anna ari pangipappan tu taki na nono. Nu ‘makkapasa-pasensia ta kataggi-tadday, anna kuattam ngamin i adde na awayya tam nga mamannanayun ta pia na pattaradday nga iyawa na Espiritu Santo gafu ta imammo nga mamakatadday,’ mas mapakoma tam danuri ariadda ammu nga natakitadda ittam. (Efe. 4:2, 3) Tapenu napafutuan i pamakoma, kontrolattam nakuan i appana-panono tam nga ari ‘mangipappan tu taki na nono.’ (1 Cor. 13:4, 5) Nu mangipappattam tu taki na nono, mamappeligro  yatun ta relasiottam ta wawwaragi anna kani Jehova. (Mat. 6:14, 15) Mepasingattam gapa i napafutu nga pamakoma tam nu ipakimallo tam danuri nakaliwa nittam.​—Luc. 6:27, 28.

16. Kunnasi tam nakuan imammatan i pribilehio ira nga passerbi kani Jehova?

¹⁶ Isakrifisio i personal ira nga pammakapianan. Nu makalawa tam tu pribilehio ira ta passerbi kani Jehova, imammatattam danaw nga tiansa nga mangipasingan ta kinakurug na aya tam nu ‘ari tu i pammakapian na baggi tam laman i nonopan tam, nu ari i pammakapian na ikattolay tam.’ (1 Cor. 10:24) Angngariganna, ta asembli tam ira anna kombension, naka-duty ngana i atendant ira ta pagitubangngan nige paga duttal na magatende ira. Imbes nga imammatadda nga tiansa yatun tapenu marreserba ira tu kakastan nga puestu para ta baggida anna ta familiada, pinili na aru nira nga magitubang ta ari kuruga nga makasta nga puestu aranni ta asaymentda. Gukaban na passakrifisio ta personal nga pammakapianadda taw nga gannug, makepasingan ira tu aya nga ari makasarili. Kunnasim maparigan yatun?

17. Nu napafutuan i aya na tadday, anni nakuan i kuanna nu makaliwa yaya tu madammo?

¹⁷ Ikagi anna panawan i sekreto ira nga tagaruli. Egga i Cristiano ira nga nakaliwa tu madammo tapus ilimagda yatun tapenu ari mepasiranan onu madismaya i tanakuan. (Prov. 28:13) Ngem ari makemmemmi yatun, megafu ta makadaral yatun ari laman ta nakaliwa nu ari maski ta tanakuan. Mafugaddan natun i pagguyu na masanto nga espiritu na Dios anna mamappeligro ta imammo na interu kongregasion. (Efe. 4:30) Mapaguyu na napafutu nga aya danuri Cristiano nga nakaliwa tu madammo nga makiyuvovug ta elder ira tapenu meyawa nira i kawagan nga uffun.​—Sant. 5:14, 15.

18. Kunnasi ka-importante i napafutu nga aya?

¹⁸ Aya i kadakallan ta ngamin nga kualidad. (1 Cor. 13:13) Panakkilalattam yatun bilang disipulos ni Jesus anna bilang pamarig kani Jehova, i Naggafuan na aya. (Efe. 5:1, 2) “Nu awan niakan i aya,” kunni Pablo, “awan tu kwentà.” (1 Cor. 13:2) Itulu-tuloy tam nakuan gafu i mangipasingan tu aya ari laman nga ta “uvovug” nu ari “mapakurug anna mepasingan ta pangnga-pangngua.”