EGGA ira mepangngo nga pangitabba segun ta Mosaiko nga Dob. Ngem, ta kaggawan ni Jesus normal ngana laman i pattabba ta Judio ira nga iyassingadda i ngamin nga kinagida. Kuadda yaw tapenu mas mabbalin tu kurug i kakkagiadda, ngem namiddua ira nga kinondena ni Jesus. Nitudduna lallagu: “‘Wan’ kun-nu nu wan; ‘Ari’ nu ari.”​—Mat. 5:33-37; 23:16-22.

Segun ta Theological Dictionary of the New Testament, uffunan ittam na Talmud tapenu malippawa nu ngatta normal ngana laman para ta Judio ira i mangitabba, onu iyassingadda nga kurug i tabbada. Megafu yaw ta iyaplika na Talmud i ngamin nga detalye nu anni i tabba nga dapat nga tuppalan anna nu anni nga tabba ira i awayyana nga ari kuan.

Ari laman nga si Jesus i nangondena taw ira nga pangabuso. Angngariganna, kinagi na Judio nga historiador nga si Flavius Josephus meyannung ta tadday nga sekta na Judio nga nangibita ta pangiyassing. Kurugan na miembro natun nga mas marake i pangitabba anne ta palladdug. Kagiadda nga nu mawag paga nga iyassing na tadday nga tolay i tabbana tapenu kurugan yaya na tanakuan, laddug yatun nga tolay. Kagian gapa na libru na Judio nga Wisdom of Sirach, onu Ecclesiasticus, (23:11): “I tadday nga tolay nga neyugalianna nga mangiyassing ay grabe i dakena.” Kondenan gafu ni Jesus i ugali nga pattagilappaw ta pangitabba. Nu kanayun ittam nga makkagi tu kurug, ariattam ngana nga kawagan nga iyassing i kakkagiattam tapenu kurugadda ittam.