TA BADDI nga ili na Gujarat, India, nabawtisowan i yama ni John bilang Saksi ni Jehova ta ultimo na dekada 1950. Deboto nga Romano Katoliko si John, kunne na gapa i lima nga wawwaragina anna i yenana, yatutta kontradda i pangurug na yamada.

Tadday aggaw, nikiddaw na yama ni John nga itulugna i tadday nga sobre ta kofunna ta kongregasion. Ngem tatun nga umma, nabigaran tu grabe i kuramay onu tamuruna durante nga vukatanna i dakal nga lata. Ngem megafu ta kayàna tuppalan i kinagi na yamana, binabbagganna tu gami i maddaga nga tamuruna tapus niyangena ngana i sobre.

Ta paddattal ni John ta adres, inalawa na atawa na kofun na yamana nga tadday gapa nga Saksi ni Jehova i sobre. Napansinna i nabigaran nga tamuru ni John tapus kinagina nga uruanna yatun. Inana i first-aid kit, pinakarenuanna i bigag tu agua oxigenada, anna binabbagganna i tamuruna. Tapus pinattemplana si John tu mapapatu nga tsa, durante nga kikkistorianna yaya meyannung ta Biblia.

Megafu tatun, sesenu ngana nga mari i pangikalussaw ni John ta Saksi ira, yatutta niyavuna sa i meyannung ta dua nga topiko nga kurugan na yamana ngem arianna kurugan—nu si Jesus i Dios anna nu mepangngo kari nga makimallo kani Maria i Cristiano ira. Megafu ta nagigiammuna i makiyuvovug ta lengguahe ni John nga Gujarati, sinabbag na Saksi i pakkiavuna gukaban na Biblia anna niyawana i buklet nga “This Good News of the Kingdom.”

Turi kua, durante nga bibbigan ni John yatun nga buklet, natagenona nga kinakurug i bibbibbiganna. Minay yaya ta parida anna niyavuna yatun nga dua nga pakkiavu. Nappata-patu i pari anna nibaragna sa i Biblia, tapus nikullena: “Nabbalikka ngana tu Satanas! Ipasingammu niakan nu sitaw mabibbig ta Biblia nga ari tu Dios si Jesus. Nu sitaw mabibbig nga ari dayawan si Maria. Sige bi vu!” Nakaddag si John ta kondukta na pari yari tu kinagina sa, “Ariakku ngana vuluvuga tullung ta iglesia na Katoliko.” Ari ngana yaya vuluvuga nakimisa!

Nakistudy ngana si John ta Saksi ira, nitaddagganna i kurug nga paddayaw, anna nasserbi kani Jehova. Turi kua, kunnatun gapa i kingngua na karuan nga miembro na familiada. Ta maddaggun, egga lagapa i pila ta ziwanan nga tamuru ni John nga nabigaranna 60 dagun ngana i nappasa. Dakal i ayayana kada meraddammanna i tadday nga kinasippo na Cristiano nga nangiyaranni sa ta marenu nga paddayaw.​—2 Cor. 6:4, 6.