1. Ngatta mepangngo nga mekakua i karuan nga tolay, anna anni i gigiammuattam?

NU IKAKUAM i tadday nga tolay, kayàna kagian nga iddammu yaya tu espesial nga atension anna pangirespeto. Natural laman nga ekspektattam nga i kunnatun nga tolay nga mepangngo ta atension anna respeto ay nakangngua tu gannug nga mepangngo ta kekakua onu espesial i posisionna. Yatutta meyavu tam, Sinni i mawag tu ikakua tam, anna ngatta mepangngo i kunnatun nga pangikakua?

2, 3. (a) Ngatta mepangngo nga mekakua si Jehova? (Innan i letratu ta gafu na artikulo.) (b) Segun ta Nepakannammu 5:13, sinni i Kordero, anna ngatta mepangngo yaya ta pangikakua?

² Kagitta na ipasingan na Nepakannammu 5:13, siguradu nga mepangngo nga mekakua “yuri i agga-itubang ta trono, tuange gapa turi ta Kordero.” Nasingattam ta kapitulo 4 na yatun nga libru nu ngatta mepangngo si Jehova nga mekakua. Niyassikan na nelangitan ira nga pinaratu i ngaralda nga dayawan si Jehova, “i matolay nga awan tu adde na.” Ideklarada: “Yafu anna Dios mi! Mekunnay nikaw i kekakua, dayaw anna pakapangngua!  Ta pinaro mu ngamin i adde na; megafu ta paka-urem laggapa, pinaro mu anna sinolem ira.”​—Nep. 4:9-11.

³ Si Jesu-Cristo i Kordero, “i Kordero na Dios nga mamakoma ta katagarulian na mundo.” (Juan 1:29) Kagian na Biblia nga mas atannang yaya anne ta ngamin nga lallaki nga nabbalin onu maddaggun nga mappatul. Neyesplika: “[Yaya i] Patul na ngamin nga patul, anna Yafu na ngamin nga yafu. Yaya laman i ari nga matay anna maddian ta nawag nga awan tu makaranni sa. Awan vuluvuga tu tolay nga nakasingan sa anna awan vuluvuga tu makawayya nga maningan sa.” (1 Tim. 6:14-16) Kakuruganna, sinni paga kari i patul nga sigga-paran nga natay bilang tavvu para ta liwi-liwa tam? Ari ka kari nga napaguyu nga melavu ta napakaru nga pinaratu ta langi ta pakkagi: “I Kordero nga pinapatay da ay mekunnay sa i pakapangngua, kariku, ka-uto, sikan, karaya-rayaw anna kekakua!”​—Nep. 5:12.

4. Ngatta obligadu ittam nga ikakua si Jehova anna si Cristo?

⁴ Obligadu ittam nga ikakua si Jehova anna si Cristo. Nakadepende tatun i mannanayun nga inango tam. Makoffun i uvovug ni Jesus ta Juan 5:22, 23 tapenu malippawa tam yaw: “Ari nga mamanunnu i Yama ta maski sinni nga tolay, gafu ta niyawa na ngana ta Ana ngamin i pakawayya nga mamanunnu tapenu ngamin i totolay ay ikakua da i Ana tu kagitta na pangikakua da ta Yama. I sinni laman nga ari nga mangikakua ta Ana ay arian na gapa nga ikakua i Yama nga naddog sa.”​—Bibbigan i Salmo 2:11, 12.

5. Ngatta ikakua anna irespeto tam nakuan i totolay?

⁵ Naparatu i totolay ta “imahe na Dios.” (Gen. 1:27) Yatutta, aru nira i makepasingan tu nadiosan ira nga kualidad, maski nu nadduruma ira. Egga i pakawayya na totolay nga mangipasingan tu aya, kinasippo, anna pagallo ta kataggi-tadday. Megafu ta naparatu tam nga egga i konsensiana, egga i normal nga panageno tam​—maski nu mittan mali onu maffaliu—​nga magalerto nittam nu anni i fustu onu mali, kurug onu ari kurug, mepangngo onu ari mepangngo. (Roma 2:14, 15) Mas magustuan na totolay i ganna-gannug nga marenu anna makasta. Mas kayà na magaru i mattolay tu memammo kavulu i tanakuan. Maski nu malippawada yatun onu ari, maparigadda i gloria ni Jehova maski ta baddi nga gannug, anna megafu tatun, mepangngo ira ta kekakua anna respeto.​—Sal. 8:5.

6, 7. Meyannung ta pangikakua ta totolay, kunnasi naperuma i Saksi ira ni Jehova ta magaru?

⁶ Kawagan i kinabalanse ta pangammu nu anni nga klase na pangikakua i meyawa ta tanakuan anna nu anni i addena. Nainfluwensian na espiritu na mundo ni Satanas i aru ta imperfekto nga totolay. Yatutta egga tendensia na totolay nga pabbalinan tu idolo i karuan nga lallaki onu babbay imbes tu ikakua anna irespeto laman nakuan ira. Sobra i pangikakuada ta lider ira na relihion anna pulitika, sikat ira ta isports, artista ira, anna ta karuan paga nga prominente nga totolay. Nabbalin ira tu modelo ta abbarabbing anna maski adulto ira, nga paparigadda i agguyuguyu, assissinnun, onu konduktada.

⁷ Lillitan na kurug nga Cristiano i kunnatun nga falso nga pagimamma ta pangikakua ta totolay. Si Cristo laman i nattolay nga mekonsidera tam nga perfekto nga modelo. (1 Ped. 2:21) Ari magayaya i Dios nu sobra i pangikakua tam ta totolay. Daddammattam: ‘Ta ngamin i totolay ay  nattagaruli anna makkurang ta kekakua na Dios.’ (Roma 3:23, NW) Siguradu nga awan tu tolay nga mepangngo ta sobra nga pangikakua nga mabbalin ngana tu idolatria.

8, 9. (a) Kunnasi imammatan na Saksi ira ni Jehova i ofisiales na gobierno? (b) Sitaw i adde na mepangngo nga passuporta ta ofisiales na gobierno?

⁸ Ta sekular, masserbi i karuan nga indibidual ta nadduruma nga posision. Maekspekta taw ira nga ofisial na gobierno nga tuppaladda i dorob anna unnug anna mangiyawa tu kawagan ira nga serbisio para ta totolay. Mabenefisiowan i ngamin taw. Nitabarang gapa ni apostol Pablo nga imammatan na Cristiano ira i ofisiales na gobierno bilang “mammaguray ira” nga pakimorayadda. Nibilinna nira: “Pagan nu gafu i mepangngo nga pagan nu ta ngamin nga mammaguray. Pagan nu i mepangngo tu kapagan nga sedula anna vugi . . . ikakua nu ira ngamin nga mammaguray.”​—Roma 13:1, 7.

⁹ Yatutta sigga-paran i Saksi ira ni Jehova nga ikakua danatun nga masserbi ta publiko, maski nu talaga mekiddaw yatun onu kostumbre yatun ta lugar. Makikoopera ittam nira durante nga kuadda i trabahuda. Siempre egga i limitasion na pangikakua anna passuporta tam base ta kagian na Biblia. Ariattam magadde ta punto nga ari ittam mattuppal ta Dios onu ikompromiso i Cristiano nga neutralidad tam.​—Bibbigan i 1 Pedro 2:13-17.

10. Kunnasi nangipasingan i aripan gari ni Jehova tu ehemplo ta pakilalladda ta gobierno anna ofisial ira?

¹⁰ Nangiyawa i aripan ni Jehova gari tu ehemplo nga pakilalladda ta gobierno anna ofisial ira. Turi nekiddaw na Imperio na Roma nga mapparehistro ta gobierno i sakupna ira, nattuppal da Jose anna Maria. Minay ira ta Betlehem maski aranni ngana yaya magana ta ollu nga anana. (Luc. 2:1-5) Turi ta naakusa si Pablo nga nakaliwa, marespeto nga nidefensana i baggina anna nangipasingan tu mepangngo nga pangikakua kani Patul Herodes Agripa anna kani Festo, nga gobernador na probinsia na Roma ta Judea.​—King. 25:1-12; 26:1-3.

11, 12. (a) Ngatta tanakuan i pakilallattam ta ofisiales na gobierno anna lider ira na relihion? (b) Anni i makasta nga resulta turi ta nikakua na Saksi nga taga-Austria i tadday nga pulitiko?

¹¹ Ngem, ibita na Saksi ira ni Jehova nga tratuan i lider ira na relihion nga mepangngo ta sobra nga pangikakua maski paga ekspektadda yatun. Mali i pangirepresenta na falso nga relihion ta Dios anna ulu-uliadda i tuttuddu ta Uvovugna. Yatutta, tratuattam i relihioso ira nga lider nga kasittoletam, nga ariattam mangipasingan nira tu espesial nga pangikakua. Meraddammattam nga inagalan ni Jesus danatun nga minaggappa-appe anna vuling nga mangipollu. (Mat. 23:23, 24) Ta kakuruganna, egga ira i positibo anna nu mittan ari maekspekta nga resulta na pangipasingan tu respeto anna pangikakua ta ofisiales na gobierno.

¹² Matalikarag nga Saksi ta Austria si Leopold Engleitner nga inaresto na Nazi ira tapus netakay ta tren tapenu mefuku ta kampu ta Buchenwald. Netakay gapa si Dr. Heinrich Gleissner (PhD) ta parehu nga tren. Tadday yaya nga pulitiko ta Austria. Ngem ari nga faborable i taddagna ta Nazi ira. Ta biaheda mappange ta kampu, marespeto nga nipakanawag ni Brother Engleitner i kuruganna ira kani Gleissner, nga nagginna tu mapia. Kabalin na World War II, namippiga nga inusa ni Gleissner i influwensiana tapenu moffunan i Saksi ira ta Austria. Meraddammammu i mapia ira nga ehemplo na Saksi ira turi nipasingadda i pangirespeto ta ofisiales, nga  mepangngo nga nikakua ira na Cristiano segun ta kagian na Biblia.

13. Sinni ira i mepangngo ta pangirespeto anna pangikakua, anna ngatta?

¹³ Siguradu nga mepangngo ta pangikakua anna respeto i kapangngurug tam, netallugaring ta elder ira nga mangiyorollu. (Bibbigan i 1 Timoteo 5:17, NW) Ikakua tam yaw ira nga brother maski anni i nasionalidadda, edukasion, klase na pattolay, onu estado ta finansial. Tukuyan ira na Biblia nga ‘regalu ta totolay ira,’ anna importante i papelda ta unnug na Dios ta panangngal ta pakawagan na totolena. (Efe. 4:8) Nonopan ira i elder ta kongregasion, manangngal ira ta sirkito, miembro ira na Branch Committee, anna Manangngal nga Baggi. Dakal i pangirespeto na wawwaragi tam turi ollu-siglo ta natunno ira nga mangiyorollu, anna kunnatun tam gapa ta maddaggun. Ariattam pabbalinan tu idolo i prominente ira nga representante na Cristiano nga kongregasion onu ibilang ira nga gittana anghel. Siempre irespeto anna ikakua tam danatun nga brother ta malappo nga pattrabahu anna kinapakalinnoda.​—Bibbigan i 2 Corinto 1:24; Nepakannammu 19:10.

14, 15. Padduman i kurug ira nga Cristiano nga pastor ta mangibilang ta baggida nga kunnatun ira.

¹⁴ Makagi nga minappakalinno nga espiritual nga pastor i kunnatun ira nga elder. Manakida nga matratu tu prominente nga ebidensia na kinapakalinnoda. Yatutta neruma ira ta moderno-aggaw anna ta ollu-siglo ira nga lider na relihion nga kinagi ni Jesus: “Ta langa-langan anna ta unag na sinagoga, kuruga karagatad-da i magitubang ta aggitubangngan na mammekakua ira nga totolay. Ikaya da tu mekakua ira ta pagara-aruan na totolay.”​—Mat. 23:6, 7.

¹⁵ Sigga-pakalinno nga tuttulan na kurug ira nga Cristiano i uvovug ni Jesus: “Ari mepangngo tu magalak-kamu tu ‘Mestru’ ta mawwaragi kamu ngamin anna tattadday laman i Mestru nu. Anna arian nu agalan tu ‘Ama’ i sinni laman toye ta utun na davvun, ta tattadday laman i Yama nu nga egga ta langi. Ari gapa mepangngo tu magalan kamu tu ‘Yafu’ ta tattadday laman i Yafu nu, nga yaya i Cristo. I mekwenta tu katannangan ta paddian, ay mawag tu yaya i doroban nu. I sinni laman nga mappakatannang ay meyalinno, anna i mappakalinno ay yaya i meyatannang.” (Mat. 23:8-12) Yatutta malippawa tam nu ngatta ayatan, irespeto, anna ikakua na Saksi ira i elder ira ta kongregasion ta interu mundo.

16. Ngatta kawagan tu tulu-tuloy nga alippawatan anna iyaplika i kagian na Biblia meyannung ta pangikakua?

 ¹⁶ Ta kakuruganna, kawagan i tiempo nu meyannung ta balanse nga pagimamma nu kunnasi anna nu sinni i mekakua. Kurug gapa yatun ta ollu ira nga Cristiano. (King. 10:22-26; 3 Juan 9, 10) Ngem siguradu nga kapianan nu kuattam i kagian na Biblia meyannung ta pangikakua. Marresulta tu aru nga benefisio i balanse nga pangikakua.

17. Anni ira i benefisio na pangikakua ta egga ira i autoridadda?

¹⁷ Durante nga irespeto anna ikakua tam danuri egga ira ta sekular nga autoridad, awayyana tu defensadda i kepangngattattam nga mallayyagayya. Maruddu nga positibo i resulta na aktibidad tam. Piga ragun i nappasa, nagatende i payunir nga si Birgit ta graduation na anana nga babay. Kinagi na memestra kani Birgit nga magayaya ira nga egga i estudianteda nga ana na Saksi. Kinagida nga kakenga gapa nu awan tu Saksi ta eskuelada. Neyesplika ni Birgit, “Natudduan i ánami nga tuttulan i estandarte ira na Dios ta kondukta, anna nelagum taw i pangirespeto anna pangikakua ta memestru anna memestra.” Kinagi na tadday nga mestra, “Nu kagitta na abbimmu ngamin i abbing, gittana paraiso i eskuela.” Kabalin na piga ligguan, tadday nga mestra i nagatende ta kombension ta Leipzig.

18, 19. Ngatta immugurattam i sobra nga pangikakua ta elder ira?

¹⁸ Siempre metonos ta perfekto anna masirib nga prinsipio ira nga mabibbig ta Uvovug na Dios i mepangngo nga pangikakua ta elder ira ta kongregasion. (Bibbigan i Hebreo 13:7, 17.) Komendattam nakuan ira ta malappo nga trabahuda anna mappursigi nga makikoopera ta direksion nga iyawada. Nu kuattam yatun, moffunattam ira nga sigga-pagayaya nga tuppalan i trabahuda. Ngem ari nga kebalinanna yaw nga kopiattam i assissinnun anna itsura, pappalappa, onu istilo na paguvovug na “prominente” nga elder. Makeyawa tu negatibo nga efekto nu kuattam yatun. Ariattam kattamman nga imperfekto nga tolay gapa ira. Si Jesus i modelo nga tuttulan anna parigan.

¹⁹ Gukaban na pangipasingan tu mepangngo nga kekakua anna respeto ta elder ira, nga ariattam ira tratuan nga prominente, moffunattam ira. Mebitada i mabiktima na pappakatannang anna pakatageno nga mas atannang onu mas matunung ira.

20. Kunnasi makoffun nittam i pangikakua tam ta tanakuan?

²⁰ Nu ta sarili tam, mebita tam gapa i mabbalin tu makasarili nu iyawa tam i pangikakua ta egga i kepangngattanna. Uffunanna ittam nga melilli ta atannang nga paningan ta baggi nu mekakua ittam. Mebilang ittam gapa ta organisasion ni Jehova, nga ibitada i mangiyawa ta totolay​—Saksi onu ari Saksi—​tu sobra onu ari mepangngo nga pangikakua. Siempre, kinasirib yatun, nga makoffun nittam tapenu melilli tam i mesiddukal nu egga i tanakuan nga ikakua tam nga makadismaya nittam.

21. Anni i pinaka-importante nga benefisio na pangikakua ta egga i kepangngattanna?

²¹ I pinaka-importante nga benefisio na pangikakua ta egga kepangngattanna ay mapagayaya tam i Dios. Magguyu ittam segun ta kayàna nga mapattalupaddiattam i integridad tam sa. Makoffun yatun ta panabbag tam ta maski sinni nga mamurueba nga manutturia sa. (Prov. 27:11) Napannu i mundo tu totolay nga mali i pagimammada ta pangikakua. Mappabalo ittam nga ammu tam nu kunnasi mangikakua segun ta pagimamma ni Jehova.