1-3. Anni i nelagum ta passerbi kani Jehova tu “buu nga futu”? Iyilustra.

MEGAFU ta kina-imperfekto, kanayun ittam nga mattagaruli. Ngem mappabalo ittam ta ari makilallang si Jehova nittam nga “kunna kepangngattat-tam,” basta mabbabawi ittam anna sigga-pakalinno nga umaranni sa gukaban na pangurug ta sakrifisio nga tavvu ni Jesus. (Sal. 103:10) Kagitta na kinagi ni David kani Solomon, tapenu maaksepta i inaggaw nga paddayaw tam kani Jehova, kawagan nga “masserbi sa gukaban na buu nga futu.” (1 Cro. 28:9) Kunnasi tam makua yatun bilang imperfekto nga totolay?

² Tapenu moffunan ittam tatun nga gannug, awayya tam ikumpara i pattolay ni Patul Asa kani Patul Amazias. Parehu nga kingngua danatun nga patul na Judea i matunung ta mata ni Jehova, ngem buu nga futu nga kingngua ni Asa yatun. (2 Cro. 15:16, 17; 25:1, 2; Prov. 17:3) Parehu ira nga imperfekto anna nakkamali. Ngem ari nga nallisi si Asa ta dala-dalan ni Jehova, megafu ta ‘buu i debosionna’ kani Jehova. (1 Cro. 28:9, ftn.) Ari gapa nga buu i debosion ni Amazias kani Jehova.  Kabalinna nga nangaffu kontra ta kalaban na Dios, nilabbena i sinan-dios ira tapus zinayona ira.​—2 Cro. 25:11-16.

³ Nelagum ta passerbi ta Dios tu “buu nga futu” i interu nga debosion nga ari mangultimo. Ta Biblia, tukuyan na termino nga “futu” i kononaggan nga kata-katolay. Nelagum taw i pakkaraga, appana-panono, disposision, ugu-ugali, abilidad, motibo, anna addetan ira. Ari gafu tu pagappappe i serbisio na tadday nga masserbi kani Jehova ta interu nga futuna. Ari tu rutina laman i paddayona kani Jehova. Kunnasi ittam gapa? Nu tulu-tuloy nga buu i debosiottam ta Dios, maski imperfekto ittam, massesserbi ittam ta Dios tu buu nga futu.​—2 Cro. 19:9.

4. Anni i ikonsidera tam?

⁴ Tapenu maappresia nu anni i kebalinan na masserbi ta Dios nga buu i futu, ikonsidera tam i pattolay ni Asa kunne na gapa ta karuan nga patul na Juda nga napafutuan i debosiodda ta Dios​—Jehosafat, Ezekias, anna Josias. Nattagaruli ira appa, ngem nalada gabbalaman i fabor ni Jehova. Ngatta minammatan ira na Dios nga nasserbi tu buu nga futu? Kunnasi tam ira maparigan?

5. Anni nga importante nga desision i kingngua ni Asa?

⁵ Si Asa i mekatallu nga patul na Juda kabalin nga nesinna i mafulu-tribu nga pappatulan na Israel ta sigiran. Pinakarenuanna i sakupna kontra ta idolatria anna pinapanona i lallaki nga minakkigannug ta templo. Inalsana paga i kakona nga si Maaca ta posision nga “reyna nga yena, megafu ta nangngua yaya tu kannama-nama nga imahen.” (1 Pat. 15:11-13) Pinagaram paga ni Asa i totolena nga “alegadda si Jehova . . . anna tuttuladda i Dob anna i bilin.” Wan, nipagaramna i kurug nga paddayaw.​—2 Cro. 14:4.

6. Anni i reaksion ni Asa turi ta sinakup na Etiope ira i davvun?

⁶ Binendisionan ni Jehova i Juda tu imammo ta ollu nga mafulu-ragun nga pammaguray ni Asa. Tapus, nakillaban i Etiope nga si Zera kontra ta Juda kavulu i 1,000,000 nga lallaki anna 300 nga karuahe. (2 Cro. 14:1, 6, 9, 10) Anni i reaksion ni Asa tatun nga problema? Nikagina i buu nga pakkomfiansana kani Jehova. (Bibbigan i 2 Cronicas 14:11.) Ta pattabbagna ta napafutuan nga pakimallo ni Asa, pinavviktoria yaya na Dios, nga inufuna i armada na Etiope. (2 Cro. 14:12, 13) Maski paga ari matalo i pata-patul sa, awayya ira pangaffutan ni Jehova kontra ta kalabadda para ta mismu nga ngaganna. (1 Pat. 20:13, 26-30) Ngem, nattalo si Asa ta Dios, anna sinabbag ni Jehova i pakimallona. Ngem ta tumunug ira nga situasion, ari nga masirib nga nagguyu si Asa. Angngariganna, nappoffun yaya ta patul na Siria imbes nga kani Jehova. (1 Pat. 15:16-22) Ngem, para ta Dios, “i futu ni Asa ay buu para kani Jehova ta interu nga pattolena.” Kunnasi tam maparigan si Asa ta pangngua tu mapia?​—1 Pat. 15:14.

7, 8. Kunnasim maparigan si Asa ta passerbi kani Jehova?

⁷ Awayyana usitakkan na kataggi-tadday i futuna tapenu mammuan nu buu i debosionna ta Dios. Iyavumu ta baggim, ‘Determinadu ngà kari nga pagayayatan si Jehova, defensan i kurug nga paddayarayaw, anna protektan i totolena ta maski anni nga makadaral nga influwensia?’ Nonopammu nu kunnasi nagunnug si Asa tu sikan na nono tapenu marubanna si Maaca, i “reyna nga yena” ta davvun! Awayyana nga awan tu ammum nga kagittana, ngem  baka egga i situasion nga maparigammu i talikarag ni Asa. Angngariganna, kunnasi nu nakaliwa i miembro na familiam onu kofummu, ari nabbabawi, tapus kawagan nga madisfellowship? Determinadu ka kari nga ibita i pakilallang tatun nga tolay? Anni i kagian na futum nga kuammu?

⁸ Kagitta ni Asa, mepasingammu nga buu i futum nu mattalo ka ta Dios nu meparubang ta pangokkontra nga imposible arubangan i karuan. Awayyana nga igala-galo onu uyawaddaka ta eskuela megafu ta taddagmu bilang tadday nga Saksi ni Jehova. Baka illokuannaka na katrabahum ira megafu ta pabbakasiommu para ta espiritual ira nga aktibidad onu ari ka kanayun nga magovertime. Tatun ira nga situasion, makimallo ta Dios, kunna kingngua ni Asa. Magutu nga mattalo kani Jehova, nga itaddaggammu nu anni i fustu anna masirib. Daddamman nga pinasikan anna inuffunan na Dios si Asa, anna patuyaggannaka gapa.

9. Nu mallayyagayya, kunnasi tam mepasingan nga buu i futu tam?

⁹ I totolay na Dios ay ari laman tu sarilida i nonopadda. Nipagaram ni Asa i kurug nga paddayaw. Uffunattam gapa i tanakuan nga “alegadda si Jehova.” Talaga magayaya si Jehova nu masinganna nga ipakiyuvovug tam ta karruba anna ta tanakuan i meyannung sa, megafu ta fustu nga aya sa anna kuruga interesadu ittam ta mannanayun nga pammakapianan na totolay!

10, 11. Kunnasim maparigan i dala-dalan ni Jehosafat?

¹⁰ Si Jehosafat ay ‘tulu-tuloy nga liminakag segun ta dalan na yamana nga si Asa.’ (2 Cro. 20:31, 32) Kunnasi? Kagitta na yamana, pinagaramna i totolay nga alegan si Jehova. Kingnguana yatun gukaban na pangorganisa tu kampania na pattuddu nga usan “i libru na Dob ni Jehova.” (2 Cro. 17:7-10) Minay paga yaya ta sigiran nga pappatulan na Israel, ta vinukig nga rehion na Efraim, “tapenu metolina ira kani Jehova.” (2 Cro. 19:4) Si Jehosafat ay patul “nga nagaleg kani Jehova ta interu nga futuna.”​—2 Cro. 22:9.

¹¹ Egga i billay tam ngamin ta daka-dakal nga pattuddu nga kukukuan ni Jehova ta maddaggun. Gakkagmu kari nga ituddu i Uvovug na Dios ta tanakuan kada vulan tapenu mapaguyu i futuda nga masserbi ta Dios? Gukaban na pangisakrifisio ta baggim anna bendision na Dios, makegafu ka tu Bible study. Yatun kari i addetan nga ipakimemallomu? Sigga-parakka kari nga akseptan yaw nga trabahu, nga usan i makagi nga bakante nga tiempo? Kagitta na kingngua ni Jehosafat nga minay ta teritoria na Efraim tapenu uffunan i totolay nga manoli ta kurug nga paddayaw, awayya tam gapa nga angngayan danuri nabbalin tu inaktibo. Iyunnug gapa na elder ira nga bisitan anna uffunan danuri nadisfellowship ta teritoria na kongregasion nga nabbabawi ngana ta nappasa nga liwi-liwada.

12, 13. (a) Nu meparubang ta kananassing nga situasion, anni i reaksion ni Jehosafat? (b) Ngatta parigattam nakuan si Jehosafat ta pangaksepta ta pakkafiattam ira?

¹² Kagitta na yamana nga si Asa, napattalupaddian ni Jehosafat i debosionna ta Dios maski nu inananassing yaya na makapangngua nga fuersa na kalaban. (Bibbigan i 2 Cronicas 20:2-4.) Naganassing gapa si Jehosafat! Ngem, “naddeterminadu yaya nga alegan si Jehova.” Sigga-pakalinno nga inakseptana nga i totolena ay ‘awan tu pakawayyada ta arubanna yaw nga dakal nga ammung’ anna ariadda ammu nu anni i kuadda. Buu i pinattalona  kani Jehova, nga kunna: “Agga-singan nikaw i matami.”​—2 Cro. 20:12.

¹³ Egga ira i tiempo nga gitta ni Jehosafat, ariattam ammu nu anni kuattam, anna maganassing ittam paga lagu. (2 Cor. 4:8, 9) Ngem daddamman nga kinagi mismu ni Jehosafat ta pakimallona ta publiko nu kunnasi yaya kakafi anna i totolena. (2 Cro. 20:5) Maparigan na mangiyorollu ira ta familia ta espiritual si Jehosafat gukaban na paddepende kani Jehova ta pangigiya anna sikan tapenu marubang i problemada. Ari ka mappasiran nga maginna na kafamiliam i pakimemallomu ira. Matagenoda i pattalomu kani Jehova. Inuffunan na Dios si Jehosafat, anna uffunannaka gapa.

14, 15. Kunnasi nipasingan ni Ezekias i buu nga pattalona ta Dios?

¹⁴ Ari tu kagitta ni Jehosafat, tapenu makilala bilang patul nga ‘nattalupaddian kani Jehova,’ mawag tu arubangan ni Ezekias i marake nga influwensia na idolatroso nga yamana. Si Ezekias i “nangalsa ta atannang ira nga lugar, minarakkimona i sagrado ira nga arigi, anna kinatta-kattalna i sagrado ira nga poste. Minammona gapa i bronse nga serpiente nga kingngua ni Moises,” nga mali i nikeyusana ta paddayaw ta idolo. Buu i debosionna kani Jehova, ta “tulu-tuloy nga sinuppalna i dobna ira nga nidog ni Jehova kani Moises.”​—2 Pat. 18:1-6.

¹⁵ Maski turi ta sinakup na Asiria, nga makapangngua nga nasion tatun nga tiempo i Juda anna egga i peligro nga matay ngamin i totolay ta Jerusalem, interu futu nga nattalo si Ezekias kani Jehova. Inuyaw ni Patul Senakerib na Asiria si Jehova anna pinuruebanna nga inananassing si Ezekias tapenu sumuku. Ngem nikagi ni Ezekias ta pakimallo i buu nga pattalona ta pakapangngua ni Jehova nga mamaliag. (Bibbigan i Isaias 37:15-20.) Sinabbag na Dios i pakimallona gukaban na paddogna tu anghel tapenu patayan i 185,000 nga Asiriano.​—Isa. 37:36, 37.

16, 17. Kunnasi maparigan si Ezekias durante nga masserbi ka ta Dios?

¹⁶ Turi kua, nattaki si Ezekias adde ta maggi matay yaya. Nakimemallo yaya kani Jehova nga daddamman nu kunnasi nga liminakag yaya ta dala-dalanna. (Bibbigan i 2 Patul 20:1-3.) Ammu tam nga kagian na Katurakan nga awan ittam ngana ta tiempo nga magiddanama tam ta Dios para ta milagro nga panguru onu papidduan i inango tam. Ngem, gittana kingngua ni Ezekias, kada tadday nittam ay awayya tam kagian ta pakimallo kani Jehova: ‘Sigga-makatalo i pinallakag ku ta arubammu anna gukaban na buu nga futu.’ Mangurug ka kari nga mawayya anna sigga-paran nga uffunannaka ni Jehova ta tiempo na taki?​—Sal. 41:3.

¹⁷ Nu monag nga pannonopattam i ehemplo ni Ezekias, masingattam i pakawagan nga alsan i gannug nga makefugag ta relasiottam ta Dios onu mangilisi ta atensiottam ta kurug nga paddayaw. Manawag nga pammanakitattam nga parigan danuri totolay na mundo ta pangusa ta social media anna pattratu ta totolay nga idolo. Siempre, magayaya i karuan nga Cristiano ta pakikomunika ta kafamilia onu madukko nga kofudda gukabanna yatun. Ngem sobra i pangusa na aru nga totolay ta social media, nga i-follow maski i totolay nga ariadda kilala. Aru paga nga tiempo i usadda ta paningan ta letratu onu pabbibbig meyannung tatun ira nga indibidual. Egga i peligro na pangufu tu oras ta kunnatun  ira nga ari importante nga gannug. Awayyana nga mappakatannang i tadday nga Cristiano nu aru i mangi-like ta ni-postna ira, anna massinti gapa nu i-unfollowda yaya. Manono tam kari da apostol Pablo onu Akila anna Priscila nga okupadu kada aggaw nga i-post i letratuda ira onu i-follow i ari nga wagi? Mabibbig tam nga “nipay ni Pablo ngamin i tiempo na ta pallayyagayya” ta tanakuan. Inusa gapa da Priscila anna Akila i tiempoda ta pinangipakanawagda ta “mapia i meyannung ta Dalan na Dios” ta tanakuan. (King. 18:4, 5, 26) Iyavu ta baggi tam, ‘Ibità kari i mangidolo tu totolay onu mangusa tu aru nga tiempo ta ari importante nga ganna-gannug?’​—Bibbigan i Efeso 5:15, 16.

18, 19. Anni ira i kayàmu parigan kani Josias?

¹⁸ Si Patul Josias nga afu ta tug ni Ezekias, ay determinadu gapa nga pinattalupaddianna i dorob ni Jehova “ta interu nga futuna.” (2 Cro. 34:31) Turi ta tinedyer paga laman yaya, “namegafu nga inalegna i Dios ni David,” anna turi 20 anios ngana, pinakarenuanna i Juda ta idolatria. (Bibbigan i 2 Cronicas 34:1-3.) Matalikarag si Josias nga tuppalan nu anni i makapagayaya ta Dios, mas anne paga ta aru nga patul na Juda. Tapus turi egga i nalegan nga orihinal nga tura ira na Mosaiko nga Dorob anna nebibbig kani Josias, napagaram yaya nga mas tuppalan i uray na Dios. Pinagaramna i karuan nga masserbi kani Jehova. I resultana, “ari nga nallikug [i totolay] ta panuttul kani Jehova” ta interu nga pattolay ni Josias.​—2 Cro. 34:27, 33.

¹⁹ Kagitta ni Josias, pegafuanan nakuan na mabbing ira nga aleran si Jehova ta kabbidda. Awayyana nga nituddu na nabbabawi nga si Patul Manases i meyannung ta pagallo na Dios. Mabbing ira, maddukko kamu ta matalo nga mannakam ta familianu anna ta kongregasion anna ammuan nu kunnasi kapia si Jehova nira. Daddamman gapa nga natukkal i futu ni Josias anna napaguyu yaya nga magaksion megafu ta pabbibbig ta Katurakan. Mapaguyu naka na pabbibbigmu ta Uvovug na Dios nga kuan i mas makapagayaya anna mamasikan ta pakikofummu ta Dios anna mapagaram ka nga uffunan i tanakuan nga alegan i Dios. (Bibbigan i 2 Cronicas 34:18, 19.) Makoffun gapa i paggigiammu tu Biblia tapenu masingan i ganna-gannug nga awayyam paga pakastan ta passerbim ta Dios. Nu iyaplikam yatun ta baggim, maparigammu i kingngua ni Josias.

20, 21. (a) Anni i parehu ta appa nga patul nga nikonsidera tam? (b) Anni i gigiammuattam ta tumunug nga artikulo?

²⁰ Nasingammu kari i benefisio ta parrepaso tam ta appa nga patul na Juda nga nikonsidera tam ta pinasserbida kani Jehova tu buu nga futu? Matalikarag ira ta pangngua ta uray na Dios anna buu i debosiodda nga tuppalan yatun. Kanayudda nga kuan i uray na Dios. Kingnguada yatun maski neparubang ira ta masikan nga kalaban. Pinaka-importante, marenu i motiboda ta passerbi kani Jehova.

²¹ Kagitta na magigiammu tam ta tumunug nga artikulo, nattagaruli i appa nga patul nga nikonsidera tam. Ngem, turi ta minammatan ira na Minangngusito ta futu, nasinganna nga buu i futuda sa. Imperfekto tam gapa. Durante nga usitakkan ittam ni Jehova, makagina kari nga masserbi tam sa nga buu i futu tam? Ammuattam yatun nga gannug ta tumunug nga artikulo.