NABALOR i mapia ira nga kofun, anna ari laman nga basta mesimmu yatun. Nu mappeligro i pakkofun, anni i makoffun tapenu ari madaral yatun? Aru i magigiammu tam ta indibidual ira nga nakagi ta Biblia nga kurug nga makkofun ngem nappeligro i pakkofudda.

Siguradu nga egga i mapia ira nga kofun ni David nga pastor anna patul. Awayyana nga si Jonatan i tadday ta manonomu. (1 Sam. 18:1) Ngem egga paga i tanakuan nga kofun ni David, gitta ni profeta Natan. Ari kinagi na Biblia nu kanni namegafu i pakkofudda. Ngem, nakkagi si David tu mataga-tagenona kani Natan nga kunna kuammu gapa ta kofummu. Nakkaraga si David nga mamataddag tu balay para kani Jehova. Tinagibalor na patul i opinion ni Natan bilang kofun anna lalaki nga egga sa i espiritu ni Jehova.​—2 Sam. 7:2, 3.

Ngem, egga i nesimmu nga namappeligro ta pakkofudda. Zinallaw ni Patul David si Bat-seba, tapus nipapatena i atawana nga si Uria. (2 Sam. 11:2-21) Aru nga dagun nga matalo si David kani Jehova anna nangirattal yaya tu hustisia. Ngem kingnguana yaw  nga kappasirang nga liwa! Anni i nesimmu tatun nga mapia nga patul? Arianna kari nasingan nu kunnasi kaserioso i konduktana? Nanonona kari nga metaguna yatun ta Dios?

Anni i kuan ni Natan? Ipamavulunna kari nga tanakuan i mangikagi tatun ta patul? Ammu na karuan nu kunnasi nga pinlano ni David nga ipapatay si Uria. Yatutta ngatta makialam si Natan anna pappeligrowanna i nabayag ngana nga pakkofudda? Delikadu paga i inango ni Natan nu kagianna yatun. Nipapatay ni David maski i inosente nga si Uria.

Ngem si Natan i mangibaggi ta Dios. Ammu na profeta nga nu magimammo laman yaya, ari ngana nga gitta na dati i relasionna kani David anna makonsensia yaya. Liminakag si David nga kofunna ta dalan nga nangari ta fabor ni Jehova. Talaga kawagan na patul i uffun tapenu metoli i makasta nga relasionna kani Jehova. Wan, mawag ni David i kurug nga kofun. Si Natan yatun. Nappili yaya tu ilustrasion nga makatukkal ta futu na dati nga pastor meyannung tatun nga isyu. Nikagi ni Natan i mensahe na Dios nga nakoffun kani David nga malippawa i tagarulina ira anna mapaguyu nga magaksion.​—2 Sam. 12:1-14.

Anni i kuammu nu egga i kofummu nga nakaliwa tu serioso onu madammo? Awayyana nga matenta ka nga marrason nga makadaral ta pakkofunnu i pangikagi ta liwana. Onu manonomu nga pattraidor ta pakkofunnu i pangikagi ta kamalina ta elder ira, nga makoffun nakuan sa ta espiritual. Anni i kuammu?

Meraddamman ni Gianni nga nakagi ta gafu: “Nalippawa ku nga egga i nanguli. Ari ngana tu gittana dati nga magiggistoria niakan si Maurizio. Naddisidi ngà nga makiyuvovug sa maski mariga yatun nga kuan ta partè. Nononopakku: ‘Anni i kagiakku sa nga arianna paga ammu? Baka ari tu makasta i reaksionna!’ Ngem turi ta neraddammakku ngamin nga nagigiammumi, nakaleg ngà tu sikan tapenu makiyuvovug sa. Kunnatun gapa i kingngua ni Maurizio turi ta nagawag ngà tu uffun. Manaki ku nga madaral i pakkofummi, ngem kayà ku uffunan yaya megafu ta iddukakku yaya.”

Kunna paga ni Maurizio: “Sinsero si Gianni​—anna fustu yaya. Ammù nga ari tu liwana onu ni Jehova i resulta ira na mali nga pappilì. Yatutta, inakseptà i disiplina tapus nammapia ngà gabbalaman ta espiritual.”

Egga i tanakuan nga kavulu ni David nga matalo nga nattalupaddian sa ta mariga ira nga tiempo. Si Husai i tadday tatun, nga tinukoy na Biblia bilang i “kofun ni David.” (2 Sam. 16:16; 1 Cro. 27:33) Awayyana tu tadday yaya nga ofisial na korte nga personal nga kofun anna kavulu na patul, tadday nga manuppal ta konfidensial ira nga dob.

Turi ta sinafu ni Absalom nga ana ni David i trono, aru nga Israelita i nassuporta kani Absalom, ngem fuera si Husai. Durante nga mattammang si David, minay si Husai sa. Talaga natakitan si David megafu ta pattraidor sa na mismu nga anana anna karuan nga pinattalakkanna. Ngem, nattalupaddian nga matalo si Husai, nga sigga-paran nga matay anna tuppalan i misionna nga manaral ta pattraidor. Arianna kingngua yatun megafu ta obligasionna bilang ofisial na korte. Napakurugna nga matalo yaya nga kofun.​—2 Sam. 15:13-17, 32-37; 16:15–17:16.

Kappagayaya masingan i pattaradday na wawwaragi ta maddaggun nga ari laman nga megafu ta maski anni nga pribilehio onu asayment ta kongregasion. Gukaban na konduktada, gittana kakkagiadda, “Kofunnà, ari megafu ta kawagakku, ngem megafu ta importante ka niakan.”

 Kunnatun i naekspiriensa na brother nga si Federico. Gukaban na uffun na meddu nga kofunna nga si Antonio, narubanna i mariga nga tiempo ta pattolena. Istorian ni Federico: “Turi ta nagali si Antonio ta kongregasiommi, insigida kami nga nabbalin tu kofun. Parehu kami nga ministerial nga aripan, anna magayaya kami nga mattrabahu dua. Pappasa na piga nga tiempo, natunno yaya bilang elder. Ari laman tu kofukku yaya, nu ari, modelò paga yaya ta espiritual.” Tapus nakkaproblema si Federico. Insigida yaya nga nappoffun, ngem ari ngana yaya nga kualipikadu nga payunir onu ministerial nga aripan. Anni i reaksion ni Antonio?

Meraddamman ni Federico: “Matageno ku i taki nga matageno ni Antonio. Kuanna ngamin i mawayyana tapenu uffunannà ta emosion. Talaga ikavurunganna i espiritual nga pammapià anna ariannà vuluvuga pinagurayan. Pinagaramnà nga panolian uli i sikakku ta espiritual anna ariakku magimmang.” Niyesplika ni Antonio: “Mas aru ngana i tiempo nga kavulu ku si Federico. Kayà ku ipatageno sa nga awayyana istorian i maski anni niakan, pati i mataga-tagenona.” Netoli gabbalaman ni Federico i tuyagna ta espiritual anna natunno mangana nga payunir anna ministerial nga aripan. Kunni Antonio: “Maski madduma ngana nga kongregasion i passerbiammi, mas madukko kami ngana.”

Anni i matagenomu nu nilikurannaka na tadday nga madukko nga kofummu turi ta kuruga kawagammu yaya? Talaga mataki yatun. Mapakomam kari yaya? Matuyag lagapa kari i pakkofunnu?

Nonopammu i nesimmu kani Jesus ta ultimo nga aggona ira ta davvun. Aru nga tiempo i inusana ta matalo nga apostolesna, anna egga espesial nga pakkaravuluda. Inagalan paga lagu ira ni Jesus bilang kofunna. (Juan 15:15) Ngem anni i nesimmu turi ta inarestoda yaya? Nakkakarela i apostoles. Kumbinsidu si Pedro nga arianna vuluvuga panawan i Yafu, ngem tatun mismu nga  gabi, niniga ni Pedro nga ammammuna si Jesus!​—Mat. 26:31-33, 56, 69-75.

Ammu ni Jesus nga magitetaddena nga arubangan i pangultimuan nga kapurueba. Egga lagapa i rasonna nga madismaya onu matakitan paga. Ngem ta pakiyuvovugna ta disipulosna piga aggaw kabalinna nga napaginnolay, awan tu maski baddi nga pakasingannan na taki na nono onu pabbabawi. Para kani Jesus, ari ngana mawag nga taggi-taddayanna i kamali na disipulosna, nelavu ngana i kingnguada ta gabi turi ta naaresto yaya.

Binanna-bannayan lallagu ni Jesus da Pedro anna i karuan nga apostoles. Nipasinganna i pattalona nira gukaban na pangiyawa tu instruksion meyannung ta pinaka-importante nga trabahu na panuddu ta historia na tolay. Para kani Jesus, kokkofunna lagapa i apostoles. Dakal i efekto na ayana nira. Kuadda ngana i ngamin nga mawayyada tapenu ariadda madismaya i Yafuda. Siguradu nga natuppalda tu mapia i trabahu nga kinagina ta disipulosna.​—King. 1:8; Col. 1:23.

Manawag paga nga meraddamman na tadday nga sister nga si Elvira turi ta nakkaproblema ira na meddu nga kofunna nga si Giuliana: “Turi ta kinagina nga natakitan yaya megafu ta kingnguà,” kunni Elvira, “nappasirannà. Egga i rasonna tapenu mapporay. Ngem i mas nepatalatto niakan ay megafu ta ikavurunnà anna nu anni i resulta na konduktà. Kanayukku maappresia nga ari yaya naffokus ta mali nga kingnguà sa, nu ari, ta peligro nga kuakku ta baggì. Mappabalo ngà kani Jehova ta egga i kofukku nga mas ikavurunna i pammakapianakku anne ta mismu nga mataga-tagenona.”

Anni nakuan i reaksion na mapia nga kofun nu mappeligro i pakkofun? Sigga-paran nakuan yaya nga masippo nga makiyuvovug ngem prangka nu kawagan. Mabbalin tu kagitta da Natan anna Husai yatun nga kofun, nga nattalupaddian nga matalo ta mariga nga tiempo, anna gitta ni Jesus, nga sigga-paran nga mamakoma. Kunnatukka kari nga klase na kofun?