ZIMINAKAL ngà ta Graz, Austria. Pitu laman i dagukku tagga ta nagiskuela ngà tapenu mabbalin tu madre. Ta eskuelami, nemammatakku i kakkadda-kaddag nga seksual nga imoralidad ta nallatanan na papari anna mamadre. Yatutta awan paga tu tanga-ragun, minanugu i yenà nga magali ngà tu eskuela.

Turi kua, nagali ngà ta boarding school. Tadday nga gabi, inangngayannà na Yamà tatun tapenu iyali ta tanakuan nga lugar megafu ta sobra i pabbombada ta Graz. Nattagu kami ta ili na Schladming. Turi ta kadadattalmi anna nakakantay ta tetay, pinasabugda yatun. Egga mittan nga pinuntiria kami na kako ku na eroplano ira nga alinno i kagagda ta likug na balemi. Kabalin na gerra, pinagurayakkami ngana na gobiernu anna na iglesia.

Turi ta 1950, tadday nga Saksi ni Jehova i nangikagi tu mensahe na Biblia ta yenà. Maggigginna ngà ta paguvovugadda anna mevulu-vulu ngà gapa kani Mama ta karuan nga study na kongregasion. Megafu ta nakumbinsi yayya nga egga ta Saksi ni Jehova ira i kinakurug, nappabawtiso yayya turi ta 1952.

Tatun nga tiempo, i lokal nga kongregasion para niakan ay gittana asosasion para ta babbakarako. Ngem turi kua, egga binisitami nga kongregasion nga napakaru i kabataanna​—ari tu asosasion na babbakarako! Ta panolì ta Graz, nagatende ngà ngana ta ngamin nga study, tapus ari nabbayag nakumbinsi ngà nga kinakurug i giggigiammuakku. Nalippawa ku gapa nga ari pagurayan ni Jehova nga Dios i aripanna ira. Suportanna ittam maski nu matageno tam nga gittana magitetadday tam nga mangarubang ta mariga ira nga sirkumstansia.​—Sal. 3:5, 6.

Ikayà ku nga ibillay i kinakurug ta tanakuan. Pinegafuanakku yatun ta wawwaragì. Nanaw ngana ta balemi i appa nga kakà nga babay  tapenu mattrabahu bilang mestra ta eskuela. Ngem bisi-bisitakku ira ta nadduruma nga bario tapenu pagaramman ira nga maggigiammu tu Biblia. Turi kua, naggigiammu gabbalaman i ngamin nga wawwaragì anna nabbalin ira tu Saksi ni Jehova.

Durante ta mekadua nga ligguan na pabbala-balay, egga nasimmuakku nga babay nga ma-30 anios nga sinudduakku tu Biblia. Napprogreso yayya adde ta bawtismo, anna kabalinna, maski gapa i atawana pati i dua nga lalaki nga ánana. Daka-dakal i efekto natun nga study ta espiritualidad ku. Ngatta? Bueno, awan vuluvuga tu formal nga nanuddu niakan tu Biblia. Mawag ku i mapprepara tu mapia ta kada leksion. I ollu nga rason nu ngatta kingnguà yatun ay tapenu tudduakku i baggì, anna i mekadua ay metuddu gapa yatun ta estudiantè! Talaga naponag natun i pakalippawa ku ta kinakurug. Turi ta Abril 1954, nisimbolò i dedikasiokku kani Jehova gukaban na bawtismo ta danum.

Tagga ta 1955, nagatende ngà tu internasional ira nga kombension ta Germany, France, anna England. Ta keggà ta London, nakilalà si Brother Albert Schroeder. Tadday yayya nga instruktor ta Bible School of Gilead, anna turi kua nasserbi bilang miembro na Manangngal nga Baggi. Ta tadday nga tour ta British Museum, nipasingan ni Brother Schroeder nikami i karuan nga manuskrito na Biblia. Malegan tatun i ngagan na Dios ta Hebreo ira nga letra, anna niyesplikana i importansia danatun nga manuskrito. Megafu tatun, mas iniddu ku si Jehova anna i kinakurug, yatutta mas naddeterminadu ngà nga ilayyagayya i kinakurug na Uvovug na Dios.

Nappayunir ngà turi Enero 1, 1956. Nappasa i appa nga vulan, nagalannà nga masserbi tu espesial payunir ta Austria. Tatun nga tiempo, awan tu Saksi ta Mistelbach, i ili nga teritorià. Ngem egga i espesipiko nga kapuruebà. Madduma kami na partner ku nga payunir. Ma-19 i dagukku anna ziminakal ta siudad; yayya gapa ay 25 anna probinsiana. Mabayag ngà nga malukag kada umma; gaggammia gapa yayya nga malukag. Ta gabi, mabayag ngà makkatrug; makkatrug gapa yayya insigida. Ngem niyaplikami i tabarang na Biblia, pinabbidammi i ariammi pakkarantindian yatutta navviktoria i pappartnermi bilang payunir.

Kakuruganna, egga paga tanakuan ira nga kapuruebami. Nadara-darum kami, ngem ‘ari kami pinagurayan na Dios.’ (2 Cor. 4:7-9) Mittan ta pallayyagayyami ta bario, pinalawan na totolay i kituda ira. Pinalevutakkami na partner ku tu darakal nga kitu nga uvu-uvugan onu mattaul ira tapus palawanadda i ngipadda. Nakkemmi kami, anna naddasal nga kummi, “Jehova, fabor bi, nu kagataddakami, matay kami nakuan insigida!” Turi ta tanga-siku ngana laman i distansia nikami na kitu ira, nagimmang ira, nikingkiwagda i ifuda, tapus nanaw ngana ira. Natagenomi nga niyegu nakami ni Jehova. Kabalin natun, nilayyagayyammi i interu bario. Nagayayya kami megafu ta fermi nga inalawa kami na totolay. Baka nakaddag ira nga ari kami kinaga na kitu ira anna ari kami nagimmang kabalin natun nga kappaganassing nga nesimmu. Nabbalin tu Saksi i karuan nira.

Egga paga tadday nga kananassing nga ekspiriensami. Mittan milubbe i makabbalay ta paddianammi  nga nellaw, tapus nikullena nga kayàna kami patayan megafu ta istorbo kami kanu ta bario. Pinurueban na atawana nga babay nga pakalman yayya ngem akkanna mawayya. Magigginnami ngamin yatun ta kuartomi ta utun. Insigida nga niharangmi ta puerta i itubang ira anna nagempake kami. Turi ta vinukatammi i puerta, agga-taddag ta addang i lalaki nga nellaw, nga agga-tammi tu dakal nga palataw. Yatutta nakkarela kami ta puerta ta likug anna nakkazza kami ta laguerta. Nivulumi i ngamin nga gamitmi, anna ariammi vuluvuga ngana nanoli.

Minay kami ta tadday nga hotel anna narrenta tu tadday nga kuarto. Naddiakkami tatun tu maggi tanga-ragun, nga nakoffun ta ministeriomi. Kunnasi? Egga ta sentro na ili i hotel, anna ikayà na karuan ta Bible study-mi nga maggigiammu tatun. Ari nabbayag, pinegafuanammi i paggigiammu tu libru anna i linigguan nga Watchtower Study ta kuartomi ta hotel, nga egga 15 nga magatende.

Naddiakkami ta Mistelbach tu maturu tanga-ragun. Kabalinna, neyali ngà ta Feldbach, nga southeast na Graz. Egga bagu nga partner ku nga payunir, ngem awan mangana tu kongregasion tari. Naddiakkami ta baddi nga kuarto ta utun na dos-grados nga balay nga napadday ta kayu. Mattallung i paddag ta espasio ta nallatanan na kayu ira yatutta pinuruebammi nga takkabban tu diariu i lattù ira. Mattagag kami gapa tu danum ta poso. Ngem sulit yatun. Piga laman nga vulan i nappasa, egga nepataddag nga grupo. Turi kua, ma-30 nga miembro na tadday nga familia nga sinudduammi i nangalawa ta kinakurug!

Pinasikan na kuddanatun nga ekspiriensa i appabalo ku ta mannanayun nga suporta ni Jehova turi ira ta mangipoppollu ta interes na Pappatulan. Maski nu egga i tiempo nga awan tu meyuffun na totolay nikami, kanayun nga kavulumi si Jehova.​—Sal. 121:1-3.

Tagga ta 1958, egga i internasional nga kombension ta New York City, ta Yankee Stadium anna Polo Grounds. Nagaplay ngà tapenu maka-atende, anna niyavu na panga ta Austria nu interesadu ngà nga magatende ta meka-32 nga klase na Gilead School. Ngatta gapa pammanakitakku i kunnatun nga pribilehio? Insigida nga nitabbag ku, “Wan!”

Ta klasemi ta Gilead, kabiko ku si Martin Poetzinger. Nalampasanna i kananassing ira nga  ekspiriensa ta kampu ira na Nazi. Nasserbi gapa yayya nga miembro na Manangngal nga Baggi. Ta klasemi, mittan niyananibig ni Martin niakan, “Erika, anni i kayà kagian natun ta German?”

Turi ta maggaddua ngana i klase, niyanunsio ni Nathan Knorr i asaymentmi ira. Nedog ngà ta Paraguay. Megafu ta abbing ngà pagalaman, mawag ku i permiso na yamà tapenu makangay tatun nga nasion. Kabalikku nalà yatun, zimittal ngà ta Paraguay turi Marso 1959. Neyasayn ngà ta tadday nga balay na misionero ira ta Asunción, anna egga bagu nga partner ku.

Ari nabbayag, nammammù si Walter Bright, tadday nga misionero nga naggradua ta meka-30 nga klase. Turi kua, nakkasal kami anna makkavvulumi nga inarubang i kapurueba ira na pattolay. Kada egga mariga nga kapurueba nikami, bibbigammi i promesa ni Jehova ta Isaias 41:10: “Ari ka nga maganassing, ta egga ngà nikaw. Ari ka nga mavurung, ta sakan i Dios mu. Patuyaggattaka.” Napasikakkami natun nga nu kukukuammi i adde na mawayyami nga mammakatalo ta Dios anna pagolluan i Pappatulanna, arianna kami vuluvuga pagurayan.

Turi kua, neyasayn kami aranni ta border na Brazil. Tatun, sinulsulan na papari i abbarabbing nga baraggadda i missionary home, nga ari ngana makasta i kondisionna. Tapus pinegafuanan ni Walter nga tudduan tu Biblia i hepe na pulis. Siniguraduna nga egga ira pulis nga magguardia aranni ta balemi ta tanga-ligguan, yatutta ari kami ngana vuluvuga ginulu na mameppersigi ira. Ari nabbayag, neyali kami ta mas makasta nga paddianan ta abbag na border na Brazil. Nakoffun yatun megafu ta makapangorganisa kami tu study ira ta Paraguay anna ta Brazil. Nigemi nga nanaw tatun nga asaymentmi, egga ngana dua nga baddi nga kongregasion.

Kinagi na doktor ku ira nga ariakku mawayya i mavussi, yatutta nakaddag kami turi ta nammuakku ta 1962 nga mavussi ngà! Turi kua, naddiakkami ta Hollywood, Florida, aranni ta familia ni Walter. Piga ragun nga awan kami ta posision nga mappayunir ni Walter. Mawag tu tangngawammi i familiami. Ngem, tulu-tuloy lagapa nga prayoridadmi i interes ira na Pappatulan.—Mat. 6:33.

Ta paddattalmi ta Florida turi Nobiembre 1962, nakaddagakkami megafu ta manaki na lokal ira nga residente nga makkavulu nga maggarammammung anna mallayyagayya ta tadday nga lugar i ngisi anna i furaw nga totolay. Ngem ari mangireruma tu lahi si Jehova, anna ari nabbayag mattaradday ngana i nadduruma nga lahi ta kongregasion ira. Masingan i lima ni Jehova taw nga unnug, megafu ta dose-dosena ngana i kongregasion tatun nga lugar.

Kaddaraddam, natay si Walter megafu ta brain cancer turi 2015. Kitessippo yayya nga atawa ta 55 dagun, ayatanna si Jehova anna aru nga wagi i noffunanna. Iddanamakku i tiempo sonu masingakku mangana yayya nga makasta ngana i gawa-gawayyanna sonu mapaginnolay.​—King. 24:15.

Mappabalo ngà nga nakapasserbi ngà ta ngamin tiempo tu maturu 40 dagun, anna naekspiriensà i napakaru nga ayayya anna bala-balo. Angngariganna, nemammatammi ni Walter i bawtismo na 136 nga Bible study-mi ira. Siempre, egga i ziga-riga. Ngem ariammi ininnan danatun nga mangifugag ta passerbimi ta matalo nga Dios tam. Naddukko kami lallagu sa, nga mattalo nga remediowanna i ganna-gannug ta tiempona anna ta metodona. Kunnatun i kingnguana!​—2 Tim. 4:16, 17.

Talaga kakanappakku si Walter, ngem nakoffun niakan nga magattam i pappayunir. Dakal i neyuffun niakan na panuddu ta tanakuan, neerulay i pangikagi nira ta iddanama na paginnolay. Kakuruganna, aru beses anne ta meraddammakku, ariannà pinagurayan ni Jehova. Sinuppalna i promesana nga uffunannà, patuyaggannà, anna sinamminà ta ‘ziwanan nga lima na kinatununna.’​—Isa. 41:10.