1, 2. (a) Anni i reaksion na karuan nga Cristiano nga magana nu kagian na anada nga mappabawtiso ngana ira? (b) Ngatta meyavu ta kandidato ira ta bawtismo nu naddedika ngana ira kani Jehova? (Innan i letratu ta gafu na artikulo.)

AGGA-TADDAG i abbing nga ngaganattam tu Maria kavulu i karuan nga kandidato ta bawtismo durante nga girawan yayya na Cristiano nga maganana. Sinabbagna tu masikan anna klaro i dua nga pakkiavu na ispiker. Kabalinna, nabawtisowan ngana yayya.

² Talaga magayayya i magana ni Maria ta desisionna nga maddedika kani Jehova anna mappabawtiso. Ngem ari lagapa malsa ta nono na yenana yaw ira nga pakkiavu: ‘Ari kari nga abbabbing pagalaman si Maria tapenu mappabawtiso? Talaga kari nga matindianna i kaserioso na kuanna? Ari kari nga makasta nu maginnag paga tu tiempo nigena mappabawtiso?’ Yaw ira i pakkiavu nga agga-nono na meddu ira nga magana nu ikagi na anada i planoda nga mappabawtiso. (Ecl. 5:5) Mepangngo laman yatun megafu ta i dedikasion anna bawtismo i pinaka-importante ira nga dakkua ta Cristiano nga pattolay.​—Innan i kahon  nga “ Nededikam Ngana Kari i Baggim Kani Jehova?”

3, 4. (a) Kunnasi niyilustra ni Pedro i importansia na bawtismo? (b) Ngatta meyarig i bawtismo ta pamadday tu arka ta kaggawan ni Noe?

³ Meyannung ta bawtismo, kinagi ni apostol Pedro i pamadday ni Noe ta arka: “Yaw i keyarigan na danum na kabawtiso nga mamaliag sangoye nikamu.” (Bibbigan i 1 Pedro 3:20, 21.) Literal nga pataddag i arka nga nangiyawa tu masingan nga ebidensia nga dedikadu si Noe nga kuan i uray na Dios. Matalo nga kingngua ni Noe i annungan nga niyawa sa ni Jehova. Wan, megafu ta masingan i pangurug da Noe anna na familiana ta kingnguada, narresulta yatun tu kapaliagda ta Delubio. Anni i punto na ilustrasion ni Pedro?

⁴ Nu kunnasi nga nabbalin nga ebidensia na pangurug ni Noe i arka, mangiyawa gapa tu masikan nga pamakurug i bawtismo ta arubang na testigu ira. Anni i ipasingan natun? Ipasingan natun nga nidedika ngana na tadday nga Cristiano nga disipulo i baggina kani Jehova megafu ta pangurugna ta napaginnolay nga si Cristo. Kagitta ni Noe, matalo nga tuppalan na dedikadu ira nga disipulo i annungan nga nitalo nira na Dios. Kagitta na nikepaliag ni Noe ta Delubio, mepaliag gapa i matalo nga bawtisadu ira sonu mangultimo i maddaggun nga marake nga sistema. (Mar. 13:10; Nep. 7:9, 10) Yatutta kuruga importante i dedikasion anna bawtismo. Nu italattan na tadday i pappabawtiso, pappeligrowanna i iddanamana nga mattolay tu mannanayun.

5. Anni i ikonsidera tam taw nga artikulo?

⁵ Meyannung ta kinaserioso na bawtismo, egga i tallu nga pakkiavu nga mekonsidera. Anni i kagian na Biblia meyannung ta bawtismo? Anni ira nga dakkua i kuan na tadday nigena nga makibawtiso? Ngatta mawag na Cristiano nga ipatalatto i importansia na  bawtismo ta ginnonopan na anana onu ta estudiantena ta Biblia nu mattuddu yayya?

6, 7. (a) Iyesplika i isimbolo na pamawtiso ni Juan. (b) Anni nga nerumu-ruma nga pamawtiso i kingngua ni Juan?

⁶ Ollu tam nga nabibbig i bawtismo ta Biblia turi ta namawtiso si Juan Bautista. (Mat. 3:1-6) Danuri nappabawtiso kani Juan ay kingnguada yatun tapenu pakurugan i pabbabawida ta liwi-liwada kontra ta Mosaiko nga Dob. Ngem i pinaka-importante nga pamawtiso ni Juan ay awan tu koneksionna ta pabbabawi. Egga i nerumu-ruma nga pribilehio ni Juan nga bawtisowan si Jesus, i perfekto nga Ana na Dios. (Mat. 3:13-17) Awan tu liwa ni Jesus, yatutta arianna kawagan nga mabbabawi. (1 Ped. 2:22) Isimbolo na bawtismona i pangipresenta ta baggina tapenu kuan i uray na Dios.​—Heb. 10:7.

⁷ Ta interu nga ministerio ni Jesus ta davvun, namawtiso gapa i disipulosna. (Juan 3:22; 4:1, 2) Kagitta na kingngua ni Juan, isimbolo danaw nga bawtismo i pabbabawi na indibidual ta liwi-liwana ta Mosaiko nga Dob. Ngem, kabalin na patay anna paginnolay ni Jesus, tanakuan ngana i kebalinan na bawtismo para ta disipulosna.

8. (a) Ta paginnolay ni Jesus, anni nga bilin i niyawana ta disipulosna? (b) Iyesplika i kebalinan na Cristiano nga bawtismo.

⁸ Turi ta 33 C.E., nappasingan i napaginnolay nga si Jesus ta maturu tu 500 nga lallaki anna babbay anna posible pati ta abbarabbing. Awayyana tu tatun gabbalaman nga tiempo i pinakkagina taw: “Umay kamu gafu ta ngamin nga totolay ta ngamin nga lugu-lugar anna pabbalinan nu ira tu disipulò. Bawtisowan nu ira ta ngagan na Yama, na Ana, anna Espiritu Santo. Tudduan nu ira tu parulattad-da ngamin i bili-bilik-ku nikamu.” (Mat. 28:19, 20; 1 Cor. 15:6) Wan, posible nga ginatu ta disipulos ni Jesus i presente turi ta niyawana i annungan nga magangngua tu disipulos. Yatutta kinagi ni Jesus nga kondision i bawtismo turi ira ta mangalawa ta responsibilidad na pabbalin tu Cristiano. (Mat. 11:29, 30) I sinni laman nga maya nga masserbi ta Dios ay kawagan nga rekunnasian anna akseptanna i papel ni Jesus ta ketuppal na gakkag ni Jehova. Kabalinna nga kuan yatun, puede ngana nga mabawtisowan i tadday. Yatun laman i klase na bawtismo ta danum nga faboran na Dios. Mangiyawa i rekord na Biblia tu aru nga ebidensia nga ta ollu siglo, nalippawa na bagu nga disipulos ni Cristo i importansia na bawtismo. Ariadda nga nitalattan yatun.​—King. 2:41; 9:18; 16:14, 15, 32, 33.

9, 10. Anni i magigiammu tam meyannung ta bawtismo na Etiope nga proselita anna kani apostol Pablo?

⁹ Bibbigan i Kingngua 8:35, 36. Ikonsidera i ehemplo na Etiope nga proselita nga palubbe ta diadda kabalinna nga naddayaw ta Jerusalem. Gukaban na anghel ni Jehova, inarannian ni Felipe i Etiope anna ‘nipakanawagna sa i Mapia nga Dumug meyannung kani Jesus.’ Anni i reaksion na Etiope? Pakurugan na tumunug nga kingnguana i napafutuan nga appresasionna ta kinakurug nga nagigiammuna. Nakkaraga yayya nga kuan i mekunnay ta unnug ni Jehova, yatutta insigida yayya nga nappabawtiso.

¹⁰ I mekadua nga ehemplo ay i Judio nga lalaki nga naniga-riga ta Cristiano ira. Neyana yayya ta nasion nga dedikadu ta Dios. Ngem, nawawan na Judio ira i espesial nga relasiodda kani Jehova. Deboto yatun nga lalaki ta tradision na Judaismo, ngem egga i mas makasta nga nagigiammuna. Nappasingan mismu sa i napaginnolay anna naglorian nga si Jesu-Cristo. Anni i reaksion natun nga lalaki? Inalawana i uffun na  Cristiano nga disipulo nga si Ananias. Meyannung tatun nga lalaki kunna Biblia: “Ay limikka yaya anna nabawtisowan.” (King. 9:17, 18; Gal. 1:14) Siguradu nga ammum nga yatun nga Judio nga lalaki ay si apostol Pablo. Ngem daddamman nga turi ta naappresiana i kinakurug meyannung ta papel ni Jesus ta ketuppal na gakkag na Dios, nagguyu si Pablo. Insigida yayya nga nappabawtiso.​—Bibbigan i Kingngua 22:12-16.

11. (a) Anni i mamaguyu ta estudiante ira na Biblia nga mappabawtiso? (b) Anni i matageno tam nu masingattam i bagu ira nga dedikadu nga mappabawtiso?

¹¹ Kunnatun gapa ta estudiante ira na Biblia ta maddaggun, abbing onu manakam. Talaga makkaraga danuri egga i pangurugda anna napafutuan nga appresasiodda ta kinakurug ta Biblia nga maddedika anna mappabawtiso. I palappa para ta nira i tadday ta pinaka-importante nga parte na kada asembli anna kombension. Magayayya i Saksi ira ni Jehova nu akseptan na estudiante na Biblia i kinakurug anna mapprogreso adde ta bawtismo. Ari kari nga magayayya gapa i magana ira nga masingan nga tadday i anada ta bagu ira nga disipulo nga mabawtisowan? Turi ta 2017 dagun serbisio, maturu nga 284,000 nga bagu nga indibidual i nangisimbolo ta dedikasiodda kani Jehova gukaban na pappabawtiso ta danum. (King. 13:48) Manawag nga nalippawada nga kiddaw i bawtismo para ta Cristiano ira. Anni ira i kingnguada nigeda nga nabawtisowan?

12. Anni ira nga dakkua i mawag nga kuan na estudiante nigena mappabawtiso?

¹² Nige mabawtisowan na tadday nga estudiante, mawag nga kultibanna i pangurug nga nebase ta fustu nga pakannammu ta Dios, ta gakkagna, anna ta unnugna para ta kapaliag. (1 Tim. 2:3-6) Mapaguyu na kunnatun nga pangurug i estudiante nga ibita i kondukta ira nga ari makapagayayya ta Dios anna mattolay segun ta matunung nga estandarte ni Jehova. (King. 3:19) Yatutta, ari nga mepangngo nga maddedika i tadday ta Dios nu egga i kukukuanna nga mangifuera sa ta Pappatulan. (1 Cor. 6:9, 10) Ngem ari laman nga pattuttul ta atannang ira nga estandarte ni Jehova i kawagan. I tadday nga mappursigi ta kinatunung ay mawag nga presente gapa ta study ira anna matalikarag ta makepaliag-inango nga pallayyagayya anna pagangngua tu disipulos. Kinagi ni Jesus nga ituppal na kurug nga disipulosna yaw nga trabahu. (King. 1:8) Kabalin laman nga makua ira yaw nga dakkua nga awayya na bagu nga disipulo nga maddedika kani Jehova ta pribadu nga pakimallo anna publiko nga isimbolo i dedikasion gukaban na bawtismo ta arubang na testigu ira.

13. Ngatta mawag nga daddamman na manuddu ira ta Biblia nga kondision para ta Cristiano i bawtismo?

¹³ Durante nga uffunattam i ána tam anna i tanakuan nga estudiante na Biblia nga magangngua tu importante ira nga dakkua, daddammattam nga nelagum i bawtismo ta pabbalin tu kurug nga disipulo. Nu klaro ta nono tam yatun, mas mabbalin tu efektibo i panuddu tam ta estudiante tam ira. Ariattam nga fugaddan nga ituddu ta kada mepangngo nga tiempo i importansia na dedikasion anna bawtismo. Wan, kayà tam nga i ána tam anna i estudiante tam ira ta Biblia nga mapprogreso adde ta bawtismo!

14. Ngatta kattam nakuan fuersan i maski sinni nga mappabawtiso?

¹⁴ Awan nakuan tu maski sinni nga fuersan na magana, manuddu ta Biblia, onu na kongregasion nga mappabawtiso. Ari tu kunnatun i metodo ni Jehova. (1 Juan 4:8) Durante nga tudduattam ira, ipatalatto tam lallagu i importansia na kapeggan tu personal nga relasion ta Dios. I napafutuan  nga appresasion na estudiante ta kinakurug anna i pakkaragana nga mangalawa ta responsibilidad na pabbalin tu Cristiano i mamaguyu sa nga mappabawtiso.​—2 Cor. 5:14, 15.

15, 16. (a) Egga kari i nekagi nga partikular nga edad tapenu mappabawtiso i tadday? Ipakanawag. (b) Ngatta mawag nga mappabawtiso i estudiante na Biblia ta Saksi ira ni Jehova maski nu dati ngana nga nabawtisowan ta tanakuan nga relihion?

¹⁵ Awan tu nekagi nga edad nu kanni nga kawagan nga makibawtiso i tadday. Madduruma i papprogreso anna pammanakam na kada estudiante. Aru i nabawtisowan maski abbing paga, anna nabbalin lagapa ira nga matalo kani Jehova. Masingan na tanakuan nga estudiante i importansia na pappabawtiso kabalidda nga nagigiammu i kinakurug ta Biblia maski manakam ngana​—maturu tu 100 paga lagu i dagun na karuan!

¹⁶ Niyavu na tadday nga manakam nga estudiante na Biblia ta sister nga manuddu sa nu mepangngo paga nga mappabawtiso uli, megafu ta nabawtisowan ngana yayya ta nadduruma nga relihion ta nappasa nga daga-ragun. Nirepasoda dua na manuddu sa i teksto ira na Biblia nga konektadu tatun. Nalippawa ngana na estudiante i kiddaw ira ta Biblia anna ari nabbayag ay nappabawtiso. Maski nu maturu ngana nga 70 yayya, arianna natageno nga ari kawagan para sa i pappabawtiso. Wan, i mepangngo nga bawtismo ay nebase ta fustu nga pakannammu ta uray ni Jehova. Yatutta, mawag nga mabawtisowan maski danuri bagu nga disipulos maski nu dati nga nabawtisowan ira ta tanakuan nga relihion.​—Bibbigan i Kingngua 19:3-5.

17. Anni i mepangngo nga pannonopan ta aggaw na bawtismo na tadday?

¹⁷ Talaga makapagayayya ta tadday i aggaw na bawtismona. Tiempo gapa yaw tapenu serioso nga mannono. Mawag i appursigi tapenu matuppal i dedikasion. Yatutta nikumpara ni Jesus i pabbalin tu Cristiano ta takkilu. Danuri disipulos ni Jesus ay “ari ngana nga mattolay para ta baggi da laggapa, nu ari megafu laman kani Cristo nga natay anna naginnolay megafu nira.”—2 Cor. 5:15; Mat. 16:24.

18. Anni ira nga pakkiavu i ikonsidera tam ta tumunug nga artikulo?

¹⁸ Kunnatun i agga-nono na yena ni Maria turi ta niyavuna i pakkiavu ira ta gafu. Nu magana ka, baka neyavu mu ngana: ‘Talaga kari nga puede ngana mabawtisowan i ana ku? Makalanno ngana kari i pakannammuna tapenu makapaddedika? Anni ira i goal-na meyannung ta edukasion anna trabahu? Kunnasi nu nabawtisowan i ana ku tapus nakangngua yayya tu madammo nga liwa?’ Ta tumunug nga artikulo, ikonsidera tam yatun ira nga gannug anna gigiammuattam nu kunnasi mapattalupaddian na Cristiano ira nga magana i balanse nga pagimamma ta bawtismo.