I nikeletratu anna nikepinta ni Pablo ta publikasion ira na Saksi ay base ta imahinasion, ari tu base ta arkeolohikal nga ebidensia.

Ngem, egga i karuan nga pakasingannan ta itsura ni Pablo. Angngariganna, egga tadday nga mabibbig ta Zion’s Watch Tower nga Marso 1, 1902: “Nu meyannung ta itsura ni Pablo: . . . Ta ‘Acts of Paul and Thecla,’ . . . nga netura turi ma-150 A. D., egga i deskripsion kani Pablo nga yatun i kapianan, anna base ta kurug nga tradision. Nakagi taw nga yayya ay ‘pando, kalbu, sakang, makasta i bagga-baggina, nga naddafung i kiray onu kimana; atannang i igungna.’”

Kagian na The Oxford Dictionary of the Christian Church (1997 nga edision) meyannung tatun nga netura gari: “Ari tu imposible nga i ‘Acts’ ay mallugan tu elemento ira nga pakurugan na historia.” Ta ollu ira nga siglo, dakal i respeto na totolay ta The Acts of Paul and Thecla, gittana ipasingan na kinakurug nga egga 80 nga Griego nga manuskrito natun, anna bersion ira ta tanakuan nga lengguahe. Yatutta, i pangiletratu anna pangipinta tam ira ay mekunnay ta karuan nga indikasion ta nappasa nu anni i itsura natun nga apostol.

Ngem daddamman nga egga paga i mas importante anne ta itsura ni Pablo. Maski turi ta namministerio si Pablo, kagian na minakkritika ira sa nga “nu makiyarubang nittam ay awan tu makua na, anna awan tu kebalinan na kaga-kagian na!” (2 Cor. 10:10) Ngem ariattam kattaman nga nabbalin yayya nga Cristiano megafu ta milagro nga nappasingan sa si Jesus. Manono tam gapa i netuppal ni Pablo kuenta ‘pinili yaya na Cristo nga masserbi anna mangipakannammu kani Jesus ta . . . Hentil ira.’ (King. 9:3-5, 15; 22:6-8) Ikonsidera tam gapa i benefisio ira nga mala tam ta libru ira nga nipetura ni Jehova kani Pablo.

Ari nga nipara-parayag ni Pablo i netuppalna ira nigena nga nabbalin tu Cristiano, anna arianna gapa nideskriba nu anni i pisikal nga itsurana. (King. 26:4, 5; Fil. 3:4-6) Inaminna: “Sakan i kalinnakkan ta paddia-paddian ta ngamin nga apostol. Ari ngà paga lagu nga mepangngo nga magalan tu apostol.” (1 Cor. 15:9) Niturana paga: “Sakan i kalinnakkan ta paddian ta ngamin nga totolay na Dios, ngem megafu ta inaggallallo na, sakan i natullo nga mangilayya-gayya ta Hentil ira ta ari nga matuku-tukug nga bendision ni Cristo.” (Efe. 3:8) Siguradu nga mas importante yatun nga mensahe anne ta maski anni nga isyu meyannung ta itsura ni Pablo.