1. Kunnasi tam malawà i sirib, anna anni i benefisio tam?

SI Jehova i Paggafuan na sirib, anna vuka i palagna nga iddan tu siribna i tanakuan. Kagian na Santiago 1:5: “Nu egga nikamu i makkurang ta ka-uto, mawag tu makimallo ta Dios, ay meddan yaya. Ta vuka i palag na Dios anna sigga-allo nga mangiyawa.” Malawà tam i sirib na Dios gukaban na pangaksepta ta disiplinana. Memmuguran ittam gapa natun kontra ta makadaral ta moral anna espiritual. (Prov. 2:10-12) Megafu tatun, ‘ari ittam nga meyarayyu ta aya na Dios’ anna sigga-nono tam ta “ngangangay nga inango.”​—Jud. 21.

2. Kunnasi tam maappresia i panisiplina na Dios?

² Ngem, megafu ta kina-imperfekto tam, nu kunnasi ittam napadakal, anna ta tanakuan paga nga gannug ay marigatattam nga alawatan i disiplina onu imammatan nga mepangngo yatun. Maappresia tam i disiplina nu maekspiriensa tam i benefisiona ira, nga mamakurug ta aya na Dios nittam. “Ana ku, ariammu pammanakitan i disiplina ni Jehova, . . . ta disiplinan ni Jehova i ayatanna ira,” kunna Proverbio 3:11, 12. Wan, kattam nakuan vuluvuga kattaman nga agga-nono ni Jehova i pammakapianattam. (Bibbigan i Hebreo 12:5-11.) Megafu ta ammammu ittam na Dios, kanayun nga mepangngo anna eksakto i panisiplinana.  Ikonsidera tam ngana i appa nga aspeto na disiplina: (1) disiplina ta baggi, (2) disiplina na magana, (3) disiplina ta unag na kongregasion, anna (4) i mas mataki anne ta temporario nga taki na kadisiplina.

3. Kunnasi makultiba na ana i disiplina ta baggi? Iyilustra.

³ Nelagum ta disiplina ta baggi i pangontrol ta baggi tam tapenu mapakasta i kondukta anna appanono tam. Ariattam neyana nga dati ngana nga egga i disiplina ta baggi. Mawag tam magigiammu yatun. Tapenu iyilustra: Matudduan i ana nga mabbisikleta nu maruddu nga taronan labbi na magana i bisikleta. Ngem durante nga ammu ngana na anana nga mabbalanse, sisinu ngana nga ibbattan na magana i panaronna ta bisikleta. Tapus pagurayanna ngana i anana nga mabbalanse. Kunnatun gapa, nu kanayun anna mapasensia nga disiplinan na magana i ánada “ta tuddu anna tabarang nga meyannung ta Yafu,” uuffunadda gapa ira nga kultiban i disiplina ta baggi anna sirib.​—Efe. 6:4.

4, 5. (a) Ngatta importante nga parte na “natalibagu nga kata-katolay” i disiplina ta baggi? (b) Ngatta ari nakuan makkafi i nono tam maski paga makagi nga ‘matomba ittam tu mamippitu’?

⁴ Meyaplika gapa i prinsipio ta ilustrasion na bisikleta turi ta adultoda ngana nga nammuan si Jehova. Fustu, baka egga ngana i disiplinada ta baggida. Ngem, nu meyannung ta espiritual, mamegafu pagalaman nga mammanakam i bagu nga bawtisadu. Awayyada nga tulu-tuloy nga mammanakam ta espiritual nga parte na paggigiammu ta alle-Cristo nga “natalibagu nga kata-katolay.” (Efe. 4:23, 24) Importante nga parte na pammanakam i disiplina ta baggi. Megafu tatun, “pallikurat-tam i attolay nga ari nga mekunnay ta Dios, tuange ta pakkaraga ta neravvunan ira nga ganna-gannug, ay tu mattolay ittam toye ta utun na davvun nga matangngallat-tam i ginnonopat-tam, matunung ittam anna mekunnay ta Dios.”​—Tito 2:12.

⁵ Makaliwa ittam ngamin. (Ecl. 7:20) Ngem nu makaliwa ittam, ari kayà kagian natun nga kurang onu talaga awan tu disiplina tam ta baggi. “Megafu ta i tadday nga matunung ay awayyana nga matomba tu mamippitu, ngem tumaddag lagapa yayya,” kunna Proverbio 24:16. Anni i makoffun sa nga mavviktoria? Ari laman tu basta determinasion, nu ari, espiritu na Dios. (Bibbigan i 2 Corinto 4:7) Nelavu ta vunga na masanto nga espiritu i pangontrol ta baggi, nga egga i koneksionna ta disiplina ta baggi.

6. Kunnasi ittam mabbalin tu mas mapia nga estudiante na Uvovug na Dios? (Innan i letratu ta gafu na artikulo.)

⁶ Importante gapa ta pangultiba ta disiplina ta baggi i napafutuan nga pakimallo, paggigiammu tu Biblia, anna monag nga pannono. Ngem kunnasi nu marigatakka nga gigiammuan i Uvovug na Dios? Onu aminadu ka nga ari ka mahilig maggigiammu. Daddamman, uffunannaka ni Jehova nu mappoffukka. Moffunannaka nga “mapangal” ta Uvovugna. (1 Ped. 2:2) Ollu, makimallo kani Jehova para ta kawagan nga disiplina ta baggi tapenu gigiammuan i Uvovugna. Kabalinna, itrabahum i pakimallo mu, maski ababba laman i gigiammuammu. Sonu kua, malogon anna kappagayayya ngana yatun! Kakuruganna, mas kakayà mu ngana noka i oras ira na paggigiammum nu agga-nono mu i nabalor ira nga panono ni Jehova.​—1 Tim. 4:15.

7. Kunnasi ittam uffunan na disiplina ta baggi nga magawa i espiritual nga addetattam?

⁷ Uffunan ittam na disiplina ta baggi nga gawatan i espiritual ira nga addetattam. Ikonsidera i ekspiriensa na tadday nga yama nga natagenona nga napakarianan i talikaragna. Navvurung yayya, yatutta ginakkagna nga mabbalin tu regular payunir anna  nabbibbig yayya tu artikulo ira meyannung tatun ta magazinas tam ira. Yatun anna i pakimallo i namatuyag sa anna i namasikan ta espiritualidadna. Na-auxiliary payunir gapa yayya kada posible. Anni i resultana? Maski egga ira i problema, naffokus lagapa yayya ta addetanna nga mabbalin tu regular payunir adde ta nagawana gabbalaman yatun.

8-10. Anni i makoffun ta Cristiano ira nga magana nga mavviktoria ta pamadakal ta ánada nga masserbi kani Jehova? Mangiyawa tu angngarigan.

⁸ Egga i nabalor nga pribilehio na Cristiano ira nga magana​—yatun ay i pamadakal ta ánada ta “tuddu anna tabarang nga meyannung ta Yafu.” (Efe. 6:4) Mariga yatun nga annungan, mas ngana ta maddaggun. (2 Tim. 3:1-5) Siempre, ari nga neyana i abbarabbing nga dati nga ammuda i makasta ta marake. Neyana ira nga egga i konsensiada, ngem kawagadda i matudduan, onu madisiplina. (Roma 2:14, 15) Segun ta tadday nga referensia ta Biblia, i Griego nga termino nga netransleyt tu “disiplina” ay puede gapa nga metransleyt nga “pamadakal tu ana.”

⁹ Maruddu nga memammo i panageno na abbarabbing nga meddu nga nadisiplina. Nagigiammuda nga egga i limitasion na lallaguray anna egga i efekto ira na desision anna kondukta​—makasta onu marake. Yatutta talaga importante gafu ta Cristiano nga mappagana nga mappegiya kani Jehova. Ari kattaman nga i ideya anna metodo ira ay nadduruma segun ta kada kultura anna henerasion. Danuri mappagana nga mattiwala ta sirib na Dios ay ari ngana nga mallavvung nu anni i kuadda, anna ari ira maddepende ta ekspiriensada onu ta appanono na tolay.

¹⁰ Makagigiammu ittam ta ehemplo ni Noe. Turi ta kinagi ni Jehova nga mamadday si Noe tu arka, ari yayya makapattalo ta ekspiriensana. Arianna paga vuluvuga nga nakapadday tu arka. Yatutta mawagna nga mattiwala kani Jehova, anna “kunnatun mismu” i kingnguana, gittana nidog sa ni Jehova. (Gen. 6:22) Anni i resultana? Fustu i kingnguana maski ollolluna pagalaman nga magangngua. Wan, mawagna nga kuan yatun! Makasta i nattuppalan ni Noe kwenta yama, anna megafu gapa tatun, nattalo yayya ta sirib na Dios. Natudduanna gafu i ánana anna nangipasingan tu makasta nga ehemplo nira, nga mariga nga kuan ta marake nga tiempo nige na Delubio.​—Gen. 6:5.

11. Ngatta mappursigi nakuan i mappagana nga sanayan i ánada?

¹¹ Bilang magana, kunnasi nga “kunnatun mismu” i kuammu ta arubang na Dios? Magginna kani Jehova. Ipamavulummu nga igiya naka ta pamadakal ta ana mu gukaban na Uvovugna anna giyana nga malawà tam ta organisasionna. Sonu kua, mappabalo noka i ána mu ta pinagangnguam tatun! Nitura na tadday nga brother: “Kuruga dakal i  pappabalo ku ta pinamadakal na magana ku niakan. Kingnguada i adde na mawayyada nga addetan i futù. Ira i rason nu ngatta napprogreso ngà ta espiritual.” Ngem maski anni i appursigi na magana ira, egga lagapa ána nga pinanawadda si Jehova. Ngem siempre danuri magana nga nappursigi nga ipatalatto i kinakurug ta futu na anada ay marenu i konsensiada. Egga noka i tiempo nga “lubbe” kani Jehova i nanaw nga anada.

12, 13. (a) Nu nadisfellow i ana, kunnasi mepasingan na Cristiano nga magana nga tuttuladda i Dios? (b) Kunnasi nabenefisiowan i magana ta pattuppal kani Jehova?

¹² Talaga mapurueban i kinamatalo na magana nu nadisfellow i anada. Ikonsidera i ehemplo na yena nga nadisfellow i anana nga babay tapus nanaw ta baleda. Inaminna: “Magala-aleg ngà tu palusut ta publikasiottam ira tapenu makavulu ku i ana ku nga babay anna i afu ku.” Kunna paga: “Ngem meddu nga inuffunannà na atawà nga ariammi ngana kargo i anami anna mawag tu mammakatalo kami kani Jehova.”

¹³ Ta pappasa na piga dagun, netoli gabbalaman i anada. “Sangawe, maggi kada aggaw yayya nga mattawag anna mattext!” kunna yena. “Talaga irespetonà anna i yamana megafu ta ammuna nga sinuttulmi si Jehova. Makakkasta i relasiommi.” Nu egga i ana mu nga nadisfellow, ‘mattalo ka kari kani Jehova ta interu nga futum, anna ariammu nga mattalo ta mismu nga pakalippawa mu’? (Prov. 3:5, 6) Daddamman, refleksion na sirib anna aya ni Jehova i disiplinana. Ari vuluvuga kattaman nga niyawana i Anana para ta ngamin, nelagum ngana ta ana mu. Manaki na Dios nga egga i madaral. (Bibbigan i 2 Pedro 3:9.) Yatutta, mattalo ta disiplina anna direksion ni Jehova. Kuan yatun maski matakitakkamu nga magana, nga kuan nu anni i kagian ni Jehova. Wan, suportan i disiplina na Dios, ari tu kontran yatun.

14. Kunnasi ka mammakapia ta instruksion ni Jehova gukaban na ‘mekatalo nga doroban’?

¹⁴ Nipromesa ni Jehova nga tangngallan, protektan, anna giyanna i Cristiano nga kongregasion. Nadduruma i metodona nga kuan yatun. Angngariganna, nipatangngalna i kongregasion ta Anana, nga nanunno tu ‘mekatalo nga doroban’ nga mamakan ta fustu nga oras. (Luc. 12:42) Mala yatun nga makan ta nadduruma nga metodo, nga mangiyawa tu nabalor nga instruksion onu disiplina. Iyavu ta baggim, ‘Namippiga ngana nga i tadday nga palappa onu artikulo ta publikasiottam i namaguyu niakan nga ulian i konduktà onu appanono ku?’ Nu positibo i pinangalawa mu, magayayya ka! Nipamavulummu nga moldeyan onu disiplinannaka ni Jehova, para ta pammakapianammu.​—Prov. 2:1-5.

15, 16. (a) Kunnasi ka mabbenefisio ta ‘regalu ta totolay ira’ ta kongregasion? (b) Kunnasi tam mapalappaw i trabahu na elder ira?

¹⁵ Nangiyawa gapa si Cristo tu ‘regalu ta totolay ira’ ta kongregasion​—i elder ira nga mappastor ta karneru na Dios. (Efe. 4:8, 11-13) Kunnasi ittam mabbenefisio tatun nga nabalor nga regalu? Tadday nga makua tam ay parigan i pangurug na elder ira kunne na gapa i makasta nga ehemploda. Tadday paga ay i pagginna ta nebase-Biblia nga tabaradda. (Bibbigan i Hebreo 13:7, 17.) Daddamman, iddukan ittam na elder ira anna kayàda nga mammanakam ittam ta espiritual. Angngariganna, nu masingadda nga awan ittam ta study ira onu mallammin tam ngana, siguradu nga insigida ira manguffun. Ginnan anna uffunadda ittam gukaban na meddu nga pamagaram anna mepangngo nga nebase-Biblia nga tabarang. Ikwentam kari yatun nga uffun nga pangipasingan ni Jehova tu aya nikaw?

¹⁶ Daddamman nga mariga para ta elder  ira nga tabarangngan ittam. Angngariganna, nonopan nu kunnasi kariga para kani profeta Natan nga kiyuvovugan si David turi ta itataguna i madammo nga liwana! (2 Sam. 12:1-14) Kunne na gapa, siguradu nga nagunnug tu sikan na nono si apostol Pablo tapenu korektan si Pedro, tadday ta 12 nga apostoles, turi ta nangipasingan yayya tu faboritismo ta Judio nga wawwaragi. (Gal. 2:11-14) Yatutta kunnasim mapalappaw i responsibilidad na elder ira ta kongregasiommu? Mappakalinno, mabi nga arannian, anna minappabalo ka nakuan. Imammatammu nakuan i uffudda nga pangipasingan tu aya na Dios para nikaw. Ari laman nga pammakapianammu yaw, nu ari, mas makapagayayya ta trabahuda.

17. Kunnasi nabenefisiowan i tadday nga sister ta meddu nga uffun na elder ira ta kongregasion?

¹⁷ Megafu ta nappasa nga ekspiriensa na tadday nga sister, marigatan yayya nga iddukan si Jehova. “Kada matageno ku i taki ta emosion ta agga-nono ku i nappasà anna i karuan nga problemà,” kunna, “ammù tu mawag nga makibbida ngà ta elder ira. Kaddà pinoryan onu kinritika, pinagaram anna pinasikaddà lallagu. Kada kabalin na study, maski paga aru kuadda, magga egga i maski tadday nira nga mangamusta niakan. Megafu ta nappasakku, kakku matageno nga mepangngo ngà ta aya na Dios. Ngem kanayun nga usan ni Jehova i kongregasion anna i elder ira tapenu pakurugan i ayana niakan. Ipakimemallo ku nga ariakku yayya nga panawan.”

18, 19. Anni i mas mataki anne ta madisiplina? Mangiyawa tu angngarigan.

¹⁸ Maski mataki i madisiplina, egga paga i mas mataki tatun​—i peligro nga resulta na pammanaki ta disiplina. (Heb. 12:11) Ikonsidera i dua nga ehemplo​—si Cain anni Patul Zedekias. Turi pinlano patayan ni Cain si Abel megafu ta lussaw, kinagianan yayya na Dios: “Ngatta grabe i porem anna problemadu ka? Nu mangngua ka tu mapia, arianna kari metoli na fabor nikaw? Ngem nu ariammu mangngua tu mapia, maginnennag i liwa ta puerta, anna karagatanna nga dominannaka; ngem malabanammu kari yatun?” (Gen. 4:6, 7) Ari nagginna si Cain. Inaffu yayya na liwa. Anni mabba nga taki anna ziga-riga i nirattal ni Cain ta baggina! (Gen. 4:11, 12) Nu nagginna nakuan si Cain kani Jehova, arianna nakuan naekspiriensa i kunnatun nga daddam.

¹⁹ Nammaguray i makafi anna marake nga si Zedekias turi ta marake i situasion na Jerusalem. Namippiga nga kinagianan ni Jeremias si Zedekias nga ulian i marake nga annangnguana, ngem nammanaki yayya ta disiplina. Kaddaraddam mangana i resultana. (Jer. 52:8-11) Talaga kakayà ni Jehova nga ilisi ittam ta kunnatun nga ari mepappangngo nga paddaddam!​—Bibbigan i Isaias 48:17, 18.

20. Anni i maekspiriensa danuri mangalawa ta disiplina na Dios anna danuri mammanaki tatun?

²⁰ Ta maddaggun, tagilappawan anna pammanakitan na aru nga totolay i disiplina na Dios. Ngem aranni ngana nga maekspiriensa danuri mammanaki ta disiplina na Dios i mataki nga resulta natun. (Prov. 1:24-31) Yatutta ‘magginna ittam ta disiplina anna mammasirib ittam.’ Segun ta Proverbio 4:13, “gumafu ka ta disiplina; ariammu ibbattan yatun. Immugurammu yatun, megafu ta kebalinan natun i inango mu.”