1. Anni nga situasion i neparubang ta ollu-siglo ira nga Cristiano?

TA NALLATANAN na daga-ragun nga 62 anna 64 C.E., sinurakkan ni apostol Pedro danuri “pinili na Dios nga totolay na, nga newara-wara ta kunna dayu ta probinsia na Ponto, Galacia, Capadocia, Asia, anna Bitinia.” (1 Ped. 1:1) Kawagan naw nga kongregasion ira ta Asia Minor nga nadduruma i kulturada i pamagaram anna giya. Meparubang ira ta pangokkontra anna ta makapataki nga paguvovug. Maekspiriensada i “nepallo nga pazziga-riga.” Mattolay ngana gapa ira ta delikadu nga tiempo. “Aranni ngana i panuppalan na ngamin nga ganna-gannug,” nitura ni Pedro. Wan, ta unag na tanga-dekada, duttal i vayolente nga pangultimo na Judio nga sistema na ganna-gannug. Anni i makoffun ta Cristiano ira ta maski sitaw nga marubang yatun nga problemadu nga tiempo?​—1 Ped. 4:4, 7, 12.

2, 3. Ngatta nipagaram ni Pedro ta kapangngurugna nga mangipasingan tu pamadulo? (Innan i letratu ta gafu na artikulo.)

² Fuera paga ta tanakuan nga gannug, pinagaram ni Pedro i wawwaragina: “Mamadulo ta kakavvulu nu ira ta angngurug.” (1 Ped. 4:9) Ta Griego, i literal nga kebalinan na termino nga “pamadulo” ay “pakkagustu onu kinasippo ta dayu ira.” Ngem daddamman  nga pinagaram ni Pedro i Cristiano nga wawwaragina nga mamadulo ‘ta kakavvuluda ira ta angngurug,’ turi ta dati nga kilala anna kavvuluda. Kunnasi makoffun nira i pamadulo?

³ Mas maddukko ira. Ikonsideram i mismu nga ekspiriensam. Egga ngana kari i tiansam nga nembita ta balay na tanakuan? Meraddammammu kari i makasta ira nga nesimmu? Turi ta namisita ka ta kakongregasiommu, ari kari nga mas naddukko i pakkorofunnu? Nu mamadulo ittam, mas personal nga makilala tam i wawwaragi tam anne ta tanakuan paga nga okasion. Kawagan na Cristiano ta kaggawan ni Pedro nga mas maddukko durante nga maggrabe i situasion. Kunnatun gapa ta Cristiano ira taw nga “pangurianan ira nga aggaw.”​—2 Tim. 3:1.

4. Anni ira nga pakkiavu i ikonsidera tam taw nga artikulo?

⁴ Anni ira i oportunidad tam ta pamadulo ‘ta kakavvulu tam ira ta angngurug’? Kunnasi tam marubang i makefugag ira ta pamadulo? Anni i makoffun nittam nga mabbalin tu makasta nga bisita?

5. Kunnasi ittam mamadulo ta study ira?

⁵ Ta study ira: Alawatattam i ngamin nga magatende ta study nga ikwenta tam ira nga kaparehas nga bisita ta espiritual nga akkakan. Si Jehova anna i organisasionna i namisita. (Roma 15:7) Nu magatende i bagu ira, alle-sittam gapa i mamisita. Ngatta ariammu nga planowan nga padulattan i babbaragu, maski paga anni i assissinnun onu itsurada? (Sant. 2:1-4) Nu awan paga tu nangasikasu ta bisita, awayyam kari nga agalan tapenu magitubang ta biko mu? Baka appresianna i uffun tapenu tuttulan i programa anna malegan i teksto ira nga mebibbig. Tadday yaw nga makua tapenu “padulattan nu i dayu ira.”​—Roma 12:13.

6. Sinni nakuan i primeru ira nga bisita ta babaletam?

⁶ Ta pammerienda onu pakkakan: Ta tiempo na Biblia, gagangay nga nelagum ta pamadulo i pangimbita ta tadday nga kuman ta balay. (Gen. 18:1-8; Uk. 13:15; Luc. 24:28-30) Mangivuka tu pakikkofun anna ta imammo i pangimbita ta pakkakan. Sinni gafu i ikwenta tam nga primeru ira nga bisita tam? Danuri regular nga parte na pattoletam, i wawwaragi ta kongregasiottam. Nu tiempo na problema, ari kari nga makkara-uffu-uffun ittam? Mawag tam i matalo nga pakkorofun anna imammo ta nira ngamin. Turi 2011, sinalianan na Manangngal nga Baggi i oras na Watchtower Study ta familia na United States Bethel ta 6:45 na gabi tu 6:15 na gabi. Ngatta? Segun ta anunsio, mas malogon para ta Bethelite ira nga mangiyunnug anna mangaksepta tu pamadulo ta kataggi-tadday nu mas mabi nga mabalin i study. Sinuttul gapa yatun na karuan nga panga nga ofisina. Megafu taw nga unnug, mas naddukko i familia na Bethel.

7, 8. Kunnasi tam makepasingan tu pamadulo ta bisita ira nga representante na organisasion ni Jehova?

⁷ Mangiyawa tu oportunidad nittam nga mamadulo i pabbisita na ispiker ira nga naggafu ta tanakuan nga kongregasion, kunne na gapa i pabbisita na manangngal ta sirkito anna, nu karuan, representante ira na lokal nga panga nga ofisina. (Bibbigan i 3 Juan 5-8.) Pangiprepara tu merienda onu makan i tadday nga makuam tapenu matuppal yatun. Awayyam kari nga makoffun?

⁸ Meraddamman na tadday nga sister ta United States: “Ta nappasa ira nga dagun, egga i tiansami na atawà nga namisita tu aru nga ispiker anna i atawada ta balemi. Talaga makapagayayya i kada pangimbitami​—masaya anna, ta ngamin, makapatuyag ta pangurug. Awan vuluvuga tu pinabbabawyammi.”

9, 10. (a) Sinni i magawag ta mabayag nga pamadulo? (b) Makoffun kari maski danuri simple laman i paddianadda? Mangistoria tu ekspiriensa.

 ⁹ Ta bisita nga makitappaddian tu mabayag: Ta ollu tiempo, maruddu nga nelagum ta pamadulo i pangiprepara ta paddianan na mekatalo ira nga bisita. (Job 31:32; Flm. 22) Egga gapa i pakawagan ta kunnatun ta maddaggun. Mawag na manangngal ira ta sirkito i paddianan nu mabbisita ta kongregasion. Kawagan gapa na estudiante ira ta teokratiko nga eskuela i paddianan, kunne na gapa i boluntario ta konstruksion. Mawanan tu balay i karuan megafu ta kalamidad ira yatutta mawagda i paddianan adde ta mapakappian na boluntariu ira ta konstruksion i paddianadda. Ariattam nakuan nonopan nga danuri komportable laman i babaleda i puede nga manguffun; baka namikkaruda ngana nga kingngua yatun. Iyembitam kari nira nga makitappaddian nikamu maski nu simple laman i paddianannu?

¹⁰ Meraddamman na brother ta South Korea i pamadulona ta estudiante ira nga magatende ta teokratiko nga eskuela. Niturana: “Magalangan ngà ta gafu megafu ta bagu kasal kami anna baddi laman i balemi. Ngem talaga makapagayayya nga ekspiriensa i pamisitami ta estudiante ira. Megafu ta bagu kami pagalaman nga magatawa, naobserbami nu kunnasi kappagayayya i pagatawa nu masserbi kani Jehova anna makkavulu nga gawatan i espiritual ira nga addetan.”

11. Ngatta kawagan danuri bagu ta kongregasion i pamadulo?

¹¹ Bagu ta kongregasion: Puede nga egga i indibidual onu familia ira nga magali ta diannu. Awayyana nga minay ira nikamu megafu ta dakal i pakawagan ta lugarnu. Puede nga meyasayn i papayunir ta kongregasionnu tapenu manguffun. Ngamin ira ay manibagu pagalaman​—ta bagu nga komunidad, bagu nga kongregasion, awayyana gapa ta bagu nga lengguahe onu kultura. Makoffun i pangimbita nira ta merienda, pakkakan, onu pappasiar tapenu mapeggan ira tu bagu nga kofun anna makibagay ta bagu nga paddia-paddian.

12. Anni nga ekspiriensa i mangipasingan nga ari kawagan nga magarbo i pamadulo?

¹² Ari kawagan nga magarbo i pamadulo. (Bibbigan i Lucas 10:41, 42.) Nu meraddamman na brother i ollu nga passerbina bilang misionero, kunna: “Abbikkami paga, kurang i ekspiriensami, anna sikkalabbe kami. Tadday nga gabi, talaga ma-homesick i atawà, anna maski nu anni i kuakku gittana awan tu meyuffukku. Tapus, ma​–7:30 na gabi, egga i nattotto ta puerta. Nangiyangay i tadday nga Bible study tu tallu nga orange ta nikami. Minay yayya tapenu kamustan i bagu ira nga misionero. Pinatallummi yayya anna niddan tu tanga-basu nga danum. Tapus nattempla kami tu tsa anna mapapatu nga tsokolate. Kammi paga ammu maguvovug tu Swahili, anna kanna gapa ammu i mabbida tu English. Ngem yatun i pamegafu na kappagayayya nga pakikkofummi ta lokal nga wawwaragi.”

13. Anni ira i benefisio na pamadulo?

¹³ Magalangan ka kari nga mamadulo? Nu kunnatun, awayyana nga nalonammu i oportunidad ira para ta makapagayayya nga pakkaravvulu anna i pabbuu tu mannanayun nga pakkorofun. I pamadulo i kakastan nga pangontra ta daddam. Ngem baka manono mu, ‘Ngatta gapa magalangan i maski sinni?’ Egga i piga nga rason.

14. Anni i makua tam nu limitadu i tiempo anna sikattam nga mamisita onu makibisita?

¹⁴ Tiempo anna sikan: Okupadu anna ara-aru i obligasion na aripan ira ni Jehova. Matageno na karuan nga awan talaga tu tiempo onu sikadda nga mamisita. Nu kunnatun i matageno mu, baka mawag mu usitakkan  i iskediul na aktibidad mu ta maddaggun. Puedem kari ulian i karuan tapenu mapeggakka tu tiempo anna sikan nga mamisita onu makibisita? Pagaramman na Katurakan i Cristiano ira nga mamadulo. (Heb. 13:2) Ari tu kamali nu mangipay tu tiempo para taw; kakuruganna, yatun i mepangngo nga kuan. Siempre, kawagan nga sigga-parakka nga pakarianan i ari kuruga kawagan nga aktibidad.

15. Ngatta mavurung i karuan nga mamadulo?

¹⁵ I panageno mu ta baggim: Kakayà mu kari nga mamadulo ngem matageno mu nga awan tu pakawayyam? Mappasirang i karuan anna maganassing nga mofutan ira tu istoria onu baka ari magenjoy i bisitada. Mariga i karuan anna matagenoda nga kadda meyawa nu anni i meyawa na tanakuan nga miembro na kongregasion. Daddamman nga i pinaka-importante ta balay ay ari tu i sobra nga dekorasionna. Basta marenu anna maayus yatun anna masippo i totolay nga maddian tatun.

16, 17. Kunnasi mapakarianan i vuru-vurung nga mamisita?

¹⁶ Nu mavurukka nga mamisita, ari ka magitetadday. Inamin na tadday nga elder ta Britain: “Nu mittan kannerbios i mapprepara para ta bisita ira. Ngem nu meyannung ta maski anni nga passerbi kani Jehova, mas dakal i bentaha anna pagayayya anne ta maski anni nga kavurungan. Na-enjoy ku i basta pakiyetubang ta bisita ira nga makistoria maski kafe laman i arubangammi.” Daddamman nga kanayun nga makoffun i pangipasingan tu personal nga interes ta bisita ira. (Fil. 2:4) Aru i maya nga mangistoria ta ekspiriensada. Baka yatun laman ira nga paggarammammung i tiempo nga maginna tam i ekspiriensada. Nitura paga na tadday nga elder: “I pangimbita ta balay tu kokkofun ta kongregasion i nakoffun niakan nga mas malippawa ira anna tiansa tapenu mas makilala ira, mas ngana nu kunnasida nammuan i kinakurug.” Nu mangipasingakka tu meddu nga interes ta bisitam ira, siguradu nga magayayya i ngamin.

¹⁷ Kinagi na payunir nga sister nga namadulo ta estudiante ira nga nagatende ta nadduruma nga teokratiko nga eskuela: “Mavurung ngà ta gafu megafu ta simple laman i paddianakku anna segunda-mano laman i muebles ku ira. Binanna-bannayannà na atawa na tadday nga instruktor. Kinagina nga turi ta mabbisita ira tu kongregasion, pinakagustuda i pakikavvulu ta espiritual ira nga tolay nga maski mariga ngem kaparehuda tu fokus​—i passerbi kani Jehova anna pattolay tu simple. Neperaddam natun i dati nga kakkagian ni yenà nikami ta kabbimmi: ‘Mas mapia i makan nga gugulay nga egga i aya.’” (Prov. 15:17) Aya nakuan i motibom ta pamadulo tapenu ariammu mavurung.

18, 19. Kunnasi makoffun i pamadulo tapenu malsa i negatibo nga panageno ta tanakuan?

¹⁸ I panageno mu ta tanakuan: Egga kari i kukukuan na tadday nga kakongregasiommu nga mamallussaw nikaw? Awayyana nga negatibo i ollu nga mataga-tageno mu sa anna mabbayag yatun nu pagurayammu laman. Baka manaki mu nga imbitan i tadday ta balem megafu ta ariammu kayà i ugalina. Onu egga i tadday nga nakataki nikaw ta nappasa, anna marigatakka nga kattaman yatun.

¹⁹ Tapenu mapakasta i relasion, maski ta kontra ira, irekomenda na Biblia i pamadulo. (Bibbigan i Roma 12:20.) Mapakarianan i tension anna mallapo i nattagga ira nga panageno megafu ta pamadulo. Masingattam i makasta ira nga ugali nga nasingan ni Jehova turi ta niyarannina yayya ta kinakurug. (Juan 6:44) Nu aya i motibo na ari menanaman nga imbitasion, awayyana tu yatun i pamegafuanan na makkasta uli nga relasion. Kunnasim masiguradu nga aya i kurug nga motibom? Gukaban na pattuttul ta pamagaram ta Filipos 2:3: “Mappakalinno kamu lallagu, anna ipay nu nga kanayun ta nono nu tu mas mapia i karuan ira nga totolay anne  nikamu.” Nu innattam nu kunnasi nga mas mapia i wawwaragi anne nittam​—ta pangurug, pagatta-attam, kinagutu, onu ta tanakuan paga nga Cristiano nga kualidad​—mas maponag i aya tam nira anna mas mabbalin tu napafutuan anna mas alappaw i pamadulo.

20. Ngatta anna kunnasi tam mabbalin tu mapammakatalakkan ta imbitasion nga inaksepta tam?

²⁰ Niyavu na salmista nga si David: “Sinni i mekunnay nga tullung ta Templom, O AFU?” (Sal. 15:1) Kabalinna nga nakkiavu kinagina i espiritual ira nga kualidad nga innan na Dios ta bisitana ira. Tadday nga kualidad i mapammakatalakkan: “Magga parulattan i nitabba na, maski nu anni i mesimmu sa.” (Sal. 15:4) Nu akseptattam i tadday nga imbitasion, ariattam nakuan basta-basta nga ikansela. Baka napprepara tu mapia i nagimbita nittam, anna ngamin nga kingnguana ay mawanan tu serbi nu gavva laman ittam nga makkansela. (Mat. 5:37) Egga ira i karuan nga nakkansela ira tu imbitasion tapenu akseptan i mas makasta nga imbitasion. Meddu anna marespeto kari yatun? Akseptattam nakuan i pamadulo nga sigga-appresia ta maski anni nga iyarubang na nagimbita nittam. (Luc. 10:7) Nu talaga egga ira i situasion nga ariattam kontroladu nga mawag nga ikansela yatun, pangipasingan tu aya anna konsiderasion ta mamisita nittam nga kagian yatun insigida.

21. Kunnasi makoffun i pangirespeto ta lokal ira nga kostumbre ta pabbalin tu makasta nga bisita?

²¹ Importante gapa i pangirespeto ta lokal ira nga kostumbre. Ta tanakuan nga kultura, malawà maski danuri ari nembita nga bisita; ta tanakuan gapa, mas mepangngo nga egga i imbitasion nige nga mabbisita. Ta karuan nga lugar, iyarubang na nagimbita i pinakamasingngo ira nga kanan ta bisitada, anna mekadua laman i familia; ngem ta tanakuan, pagararubangadda ngamin yatun nga metunnag. Ta karuan nga lugar, normal laman nga mangivulu i bisita ira tu makan; ta tanakuan gapa, mas magayayya i nagimbita ira nu matageno na bisitada nga ari ira obligadu nga mangivulu tu maski anni. Ta tanakuan nga kultura, normal nga mammanaki i bisita ira ta imbitasion tu mittan onu mamiddua; ta tanakuan, pangipasingan tu kawan tu respeto i pammanaki ta imbitasion. Kuattam nakuan ngamin i adde na mawayya tam tapenu mapagayayya i nagimbita nittam.

22. Ngatta kuruga importante nga “mamadulo ta kakavvulu nu ira ta angngurug?”

²² Kinagi ni Pedro: “Aranni ngana i panuppalan na ngamin nga ganna-gannug.” (1 Ped. 4:7) Mas aranni ngana yatun ta maddaggun. Meparubattam noka ta kadakallan nga ziga nga mesimmu ta mundo. Durante nga marriga, kawagattam i monag nga aya ta nallatanattam nga mawwaragi. Kumpara gari, mas kawagattam nga iyaplika i tabarang ni Pedro: “Mamadulo ta kakavvulu nu ira ta angngurug.” Yatun i kappagayayya anna kawagan nga dalan nga awan noka tu pangultimuanna.​—1 Ped. 4:9.