1. Anni i kayà nga siguraduan na Cristiano nga magana nige nga mappabawtiso i anada?

“PIGA vulakku ngana nga kakkagian kada Papa anna Mama nga kayà ku ngana i mappabawtiso, anna paggiristoriammi yatun. Kayàda nga siguraduan nga serioso ngà ta desisiokku. Ta Disiembre 31, 1934, zimittal yatun nga espesial nga aggaw ta pattolè.” Kunna i istorian ni Blossom Brandt meyannung ta nikebawtisona. Kunna gabbalaman nga interes i ipasa-pasingan na Cristiano nga mappagana ta panguffun ta ánada nga makapaddesision tu mapia. Mamappeligro ta espiritual i ari kawagan nga pangitalattan onu pangibayag ta bawtismo. (Sant. 4:17) Ngem, kayà na mappagana nga masiguradu nga nige nga mappabawtiso i anada, sigga-paran ngana nga iyabagana i responsibilidad na pabbalin tu disipulo ni Cristo.

2. (a) Anni i ikavurungan na karuan nga manangngal ta sirkito? (b) Anni i ikonsidera tam taw nga artikulo?

² Mavurung i karuan nga manangngal ta sirkito megafu ta egga ira i masimmuadda nga kabataan nga aranni ngana nga mallampas  ta pakka-tinedyer onu maturu tu 20 ngana dagudda nga ziminakal ta Saksi nga familia ngem ari paga bawtisadu. Maruddu nga umu-umay danaw nga kabataan ta study ira anna mallayyagayya ira. Saksi ni Jehova ngana i paningadda ta baggida. Ngem egga ira i mangifugag nira nga idedika i pattoleda kani Jehova anna mappabawtiso. Anni tamma i makagafu tatun? Ta karuan nga kaso, kinagi na maganada nira nga italattan labbi i bawtismo. Taw nga artikulo, ikonsidera i appa nga rason nga nangifugag ta Cristiano nga mappagana ta panguffun ta ánada nga mapprogreso ta bawtismo.

3. Anni i ikavurungan na magana ni Blossom?

³ Ikavurung na magana ni Blossom nga nakagi ta ollu nga parapo nu talaga egga ngana ta fustu nga edad i anada tapenu malippawana i importansia anna kinaserioso na bawtismo. Kunnasi mammuan na mappagana nu mawayya ngana na anada i maddedika?

4. Kunnasi makoffun ta mappagana i bilin ni Jesus ta Mateo 28:19, 20 ta panudduda ta ánada?

⁴ Bibbigan i Mateo 28:19, 20. Kagitta na nagigiammu ta ollu nga artikulo, awan tu kagian na Biblia nga espesipiko nga edad nu kanni nakuan nga mappabawtiso i tadday nga tolay. Ngem makoffun ta mappagana nu nonopadda nu anni i kayàna kagian na pagangngua tu disipulo. I orihinal nga Griego nga termino nga netransleyt nga ‘pabbalinan tu disipulo’ ta Mateo 28:19 kebalinanna i panuddu nga egga gakkag nga mangngua tu estudiante, onu disipulo. I tadday nga disipulo ay maggigiammu anna alippawatanna i tuttuddu ni Jesus anna determinadu nga tuppalan danatun. Yatutta, gakkag nakuan na Cristiano nga mappagana nga tudduan i ánada mamegafu ta kabbidda. Kayàda nga uffunan ira nga mabbalin tu bawtisadu nga disipulos ni Cristo. Siempre, ari kualipikadu nga mabawtisowan i tadday nga beybi. Ngem, ipasingan na Biblia nga maski danuri abbing pagalaman ay makalippawa anna maappresiada i kinakurug ira ta Biblia.

5, 6. (a) Anni i meyuffun na deskripsion na Biblia kani Timoteo meyannung ta pagimamma tam ta bawtismo? (b) Kunnasi nga moffunan na masirib nga mappagana i ánada?

⁵ Si Timoteo ay disipulo nga nangipafutu ta kinakurug ta kabbinna. Kinagi ni apostol Pablo nga nagigiammu ni Timoteo i Katurakan namegafu ta kabbinna. Maski nu madduruma i relihion na kabbalay ni Timoteo, nipatalatto sa na Judio nga yenana anna kakona i appresasion ta Katurakan, gittana malippawa na Judio ira. Megafu tatun, matuyag i pangurugna. (2 Tim. 1:5; 3:14, 15) Turi ta panawanna ngana i pakkatinedyer onu maturu tu 20 ngana yayya, tadday ngana nga disipulo ni Cristo si Timoteo anna mekonsidera ngana yayya para ta espesial ira nga pribilehio ta kongregasion.​—King. 16:1-3.

⁶ Siempre, nadduruma i abbing; ari tu parehu i kalistu onu i tiempo na pammanakam na abbarabbing. Egga danuri abbing ngem manakam ngana i nono anna emosiodda yatutta ikagida ngana i pakkaragada nga mappabawtiso. Ari gapa nga kualipikadu ta bawtismo i karuan megafu ta mawagda paga i magadulto tu baddi. Ari gafu nga fuersan na masirib nga mappagana i ánada nga mappabawtiso. Imbes tu kunna, uffunadda i kada abbing nga mapprogreso ta espiritual segun ta paddakal anna pammanakamda. Magayayya i mappagana nu ipafutu na abbing i mabibbig ta Proverbio 27:11. (Bibbigan.) Ngem ariadda nakuan kattaman i goal-da​—mapabbalin i ánada tu disipulo ni Cristo. Nu agga-nonoda yatun, mawag tu ikonsidera na mappagana yaw nga pakkiavu, ‘Makalanno ngana kari i ammu na ana ku tapenu makapaddedika ta Dios anna mappabawtiso?’

7. Kawagan kari i monag nga pakannammu nige nga maddedika anna mabawtisowan i tolay? Ipakanawag.

⁷ Mepangngo nga bilang mattuddu ta unag na familia, kayà na magana ta ánada nga mapeggan tu maladda nga fundasion na pakannammu nu sitaw nebase i dedikasiodda. Ngem ari kawagan i kuruga monag nga pakannammu nige nga makapaddedika i tadday nga tolay ta Dios anna mabawtisowan. Kabalin na bawtismo, mawag tu tulu-tuloy nga mapprogreso ta fustu nga pakannammu i ngamin nga disipulo. (Bibbigan i Colosas 1:9, 10.) Kunnasi gafu kakaru na pakannammu i mawag ta gafu?

8, 9. Anni ira i leksion nga mala tam ta nesimmu kani Pablo anna ta guardia?

⁸ Makoffun ta mappagana i ekspiriensa na tadday nga familia ta ollu-siglo. (King. 16:25-33) Ta mekadua nga pabbiahe ni Pablo bilang misionero, turi ta 50 C.E., binisitana i Filipos. Ta keggana tatun, naaresto yayya anna i kavuluna nga si Silas megafu ta falsu nga akusasion anna nefuku ira. Tatun nga gabi, nallunig yatutta nagugguyag i fundasion ira na affukutan anna navukatan i ngamin nga puerta. Megafu ta assing na guardia nga nakatammang i presu ira, maggi yayya nga nappakamatay ngem finugaddan yayya ni Pablo. Makasta i pinallayyagayya ni Pablo anni Silas ta guardia anna ta familiana. Megafu ta appresasiodda ta kinakurug ira nga nagigiammuda meyannung kani Jesus, anni kingnguada? Ariadda nitalattan i nappabawtiso. Anni i magigiammu tam taw nga nesimmu?

⁹ Segun ta kostumbre, awayyana nga i guardia ay retiradu nga beteranu nga suddalu. Awan tu ammuna ta Katurakan. Tapenu gafu mapeggan yayya tu masikan nga fundasion na pakannammu ta Katurakan, mawag tu magigiammuna i pamegafuanan ira nga tuddu na Biblia, malippawa i kayàna kagian na pabbalin tu aripan na Dios, anna determinadu nga mattuppal ta tuttuddu ni Jesus. Ta ababba laman nga tiempo, napaguyu yayya natun nga pakannammu ta Katurakan anna na appresasionna tatun ira nga mappabawtiso. Siguradu nga inammunganna paga i pakannammuna kabalin na bawtismona. Nu nonopan yaw nga angngarigan, anni i kuammu nu kagian na ana mu nikaw i napafutuan nga appresasionna ta pamegafuanan ira nga tuddu na Biblia, nelagum ngana i kebalinan anna importansia na dedikasion anna bawtismo? Awayya kagian na Cristiano nga magana sa nga kiyuvovuganna i elder ira ta kongregasion tapenu masingadda nu kualipikadu ngana yayya para ta bawtismo. * Gittana karuan nga bawtisadu nga disipulos, tulu-tuloy nga ammunganna i pakannammuna meyannung ta gakkag ni Jehova ta interu nga pattolena, maski paga mannanayun.​—Roma 11:33, 34.

10, 11. (a) Anni i irason na karuan nga magana? (b) Anni nakuan i prayoridad na tadday nga magana?

¹⁰ Irason na karuan nga magana nga mas makasta nu italattan labbi na anada nga babay onu lalaki i bawtismo tapenu makabalin labbi tu atannang nga edukasion anna makala tu makasta nga trabahu. Awayyana tu makasta i intensiodda, ngem moffunan kari natun i anada nga mapeggan tu kurug nga viktoria? Mas paga importante, mekunnay kari yatun ta Biblia? Anni i ipagaram na Uvovug ni Jehova nga makua?​—Bibbigan i Eclesiastes 12:1.

 ¹¹ Importante nga daddamman nga mekontra yaw nga mundo anna i ngamin nga elementona ta interes anna appana-panono ni Jehova. (Sant. 4:7, 8; 1 Juan 2:15-17; 5:19) I madukko nga relasion kani Jehova i kakastan nga defensa na ana kontra kani Satanas, ta mundona, anna ta ari-makadios nga appanono. Nu iprayoridad na magana i sekular nga goal, maguluan i anana anna ari tu pammakapianna yatun. Talaga kari nga kayà na meddu nga Cristiano nga mappagana nga moldeyan na mundo i pagimamma na anada meyannung ta viktoria? Ta kakuruganna, makaleg ittam tu kurug nga pagayayya anna viktoria nu pagolluattam si Jehova ta pattoletam.​—Bibbigan i Salmo 1:2, 3.

12. Ngatta kayà na karuan nga magana nga italattan na anada i bawtismo?

¹² Turi ta neyavu ta tadday nga yena nga Cristiano nu ngatta kayàna nga italattan na anana nga babay i pappabawtiso, kunna, “Mappasirang ngà kagian nga i pinakarason ay i paddisfellowship.” Kagitta natun nga sister, irason na karuan nga magana nga mas makasta nu italattan labbi na anada i mappabawtiso adde ta mammanakam ngana anna ari ngana makakua tu kamali. (Gen. 8:21; Prov. 22:15) Baka manonoda, ‘Adde ta ari paga bawtisadu i ana ku, ari paga yayya puede madisfellowship.’ Ngatta makelogo yaw nga parrasa-rason?​—Sant. 1:22.

13. Nu metalattan i bawtismo, awan ngana kari tu tattabbagan na tadday kani Jehova? Ipakanawag.

¹³ Makasta gapa nga ari ipamavulun na Cristiano nga mappagana nga mabawtisowan i anada nu ari paga manakam nga maddedika. Maski nu kunna, kamali nga nonopan nga megafu ta ari paga nakibawtiso, awan tu tattabbagan na abbing kani Jehova. Ngatta kunna? Ari nga nebase ta pabbalin tu bawtisadu i panattabbag kani Jehova. Egga i tattabbagan na abbing ta Dios nu ammuna ngana nu anni i fustu anna nu anni i mali ta arubang ni Jehova. (Bibbigan i Santiago 4:17.) Yatutta imbes nga pakkafian na magana i nono na anada nga maya mappabawtiso, mappursigi lallagu i masirib nga mappagana nga mangipasingan tu makasta nga ehemplo. Kayàda nga kultiban na ánada mamegafu ta kabbidda i napafutuan nga appresasion ta neyatannang ira nga moral nga estandarte ni Jehova. (Luc. 6:40) Yatun nga appresasion i kakastan nga proteksion, megafu ta mapaguyu i ana mu nga defensan i matunung nga dalan ni Jehova.​—Isa. 35:8.

14. Kunnasi nga moffunan na elder ira i mappagana ta papprogreso na ánada ta bawtismo?

¹⁴ Bilang espiritual ira nga pastor, moffunan na elder ira ta kongregasion i mappagana nga positibo nga maguvovug meyannung ta espiritual ira nga addetan. Meraddamman na tadday nga sister nga nasserbi bilang payunir tu 70 dagun i pakiyuvovugna kani Brother Charles T. Russell tagga ta annam nga ragun paga laman yayya. Kunna, “Nakistoria yayya niakan tu 15 minuto meyannung ta espiritual ira nga addetakku.” Wan, mabayag i efekto na positibo ira nga uvovug anna i pamagaram. (Prov. 25:11) Puede gapa nga isali na elder ira i mappagana anna i ánada ta proyekto ira ta Kingdom Hall, anna mangiyawa tu trabahu ta abbing ira depende ta dagun anna abilidadda.

15. Anni ira i makua na tanakuan ta kongregasion tapenu mapagaram i abbarabbing?

¹⁵ Makoffun i miembro ira na kongregasion gukaban na pangipasingan tu personal nga interes ta abbarabbing. Kasali tatun i pabbalin tu alerto ta indikasion ira na espiritual nga papprogreso. Egga kari i abbing nga napafutuan anna makakkasta i komentona onu asaymentna ta study ta midweek? Narubang kari na tadday nga kabataan i kapurueba na integridadna onu inapprobetsana  i tiansa nga makapallayyagayya ta eskuela? Insigida nakuan nga mangiyawa tu sinsero nga komendasion. Anni tamma nu praktisammu—nige onu kabalin na study​—i makiyuvovug ta tadday nga abbing onu kabataan, nga ipasingammu i napafutuan nga interes sa? Gukaban danaw anna tanakuan paga, masingan na abbarabbing nga parte ira na “attaraddayan” onu kongregasion.​—Sal. 35:18.

16, 17. (a) Anni i koneksion na bawtismo ta mappange nga iddanama na tadday nga tolay? (b) Anni i pagayayya nga pappursigian na ngamin nga Cristiano nga mappagana? (Innan i letratu ta gafu na artikulo.)

¹⁶ I pamadakal ta ana “ta tuddu anna tabarang nga meyannung ta Yafu” nga Jehova i tadday ta kadakallan nga pribilehio nga meyawa ta Cristiano nga magana. (Efe. 6:4; Sal. 127:3) Ari tu kagitta na nasion na Israel gari, ari nga neyana nga dedikadu kani Jehova i ána na Cristiano nga mappagana. Ari gapa nga mamana i aya ta Dios anna kinakurug. Namegafu ta keyana na anada, mawag tu gakkag na magana nga mabbalin ira tu disipulo, yatutta uffunadda i anada nga mabbalin tu dedikadu, anna bawtisadu nga aripan ni Jehova. Egga paga kari i mas importante anne tatun? Ta kakuruganna, nakadepende ta dedikasion, bawtismo, anna matalo nga serbisio ta Dios nu melinia i tadday nga mamarkan ta kapaliag sonu duttal i dakal nga ziga.​—Mat. 24:13.

¹⁷ Tagga ta dinisidi ni Blossom Brandt nga kayàna ngana i mappabawtiso, kayà na minagganassing ta Dios nga maganana nga siguraduan nu kualipikadu yayya taw nga pinaka-importante nga dakkua na pattolena. Turi ta nasiguraduda nga kualipikadu ngana yayya, sinuportadda i desisionna. Ta gabi nige na bawtismona, egga makakkasta nga kingngua na yamana. Istorian ni Blossom: “Pinappalittukag nakami ngamin, anna naddasal yayya. Kinagina kani Jehova nga fermi i ayayyana nga naddesision i malammaginganayna nga idedika i baggina Sa.” Maturu tu 60 dagun kabalinna, kunni Blossom: “Kagiakku niko, maski piga dagun i mappasa, ariakku vuluvuga makattaman yatun nga gabi!” Sikamu nga mappagana, maekspiriensanu i pagayayya anna i pakkakontentu ta pakasingan ta ánanu nga mabbalin tu dedikadu, anna bawtisadu nga aripan ni Jehova.