I Deuteronomio 22:25-27 ay ari tu meyannung ta pamakurug nu nakaliwa i lalaki, megafu ta manawag nga mabibbig taw ira nga versikulo nga nakaliwa i lalaki. Nakafokus yaw nga dob ta pamakurug nga inosente i babay. Innan i konteksto.

Mabibbig ta nappollu ira nga versikulo i tadday nga lalaki nga sinaddena i babay nga netabba nga maki-atawa nga nasimmuanna “ta siudad.” Gafu tatun nga kingngua na lalaki, nakaliwa yayya tu panallaw megafu ta nebilang ngana nga natawan i babay. Kunnasi gapa i babay? “Ari yayya nakkulle ta siudad.” Nu nakkulle nakuan yayya, magga egga nakuan i tanakuan nga nakaginna nisa anna nangidefensa nisa. Ngem arianna nakkulle. Nakidallaw gafu gapa yayya, yari tu ira dua i nakaliwa.​—Deut. 22:23, 24.

Tumunug gapa nga deskriban na Dob i tanakuan nga situasion: “Ngem nu ta tana nga nasingan na tadday nga lalaki i babay nga netabba ngana nga maki-atawa ay tu finuersa na lalaki i babay nga taddayan yayya, i lalaki laman nga nanadday i mapatay, anna ariammu kastigowan i babay. Awan tu nakua na babay nga liwa nga mepangngo ta patay. Yaw nga situasion ay megitta ta tolay nga zinannal na kasittolena anna pinatena. Megafu ta nasimmuanna ta tana i babay, anna nakkulle i babay nga netabba nga maki-atawa, ngem awan tu tolay nga mangurag nisa.”​—Deut. 22:25-27.

Tatun nga situasion, mangurug i hues ira ta babay. Ngatta kunnatun? Nonopan na hues ira nga “nakkulle i babay nga netabba nga maki-atawa, ngem awan tu tolay nga mangurag nisa.” Yatutta ari nakaliwa tu pakidallaw i babay. Ngem i lalaki ay nakaliwa tu rape anna panallaw megafu ta “finuersa na lalaki i babay nga taddayan yayya.”

Maski gafu nakafokus yaw nga dob ta pabbalin tu inosente na babay, mepangngo laman nga deskriban naw ira nga versikulo nga i lalaki ay nakaliwa tu rape anna panallaw. Makkomfiansa ittam nga ‘imbestigan tu mapia’ na hues ira yaw nga gannug anna mangngua ira tu desision base ta estandarte nga manawag anna mamippiga nga kinagi na Dios.​—Deut. 13:14; 17:4; Ex. 20:14.