1-2. (a) Anni i jubileo? (Innan i kahon nga “ Anni i Jubileo?”) (b) Anni i tukuyan ni Jesus ta Lucas 4:16-18?

TA KARUAN nga nasion, meyunnug i espesial ira nga okasion tapenu iselebra i meka-50 dagun na pammaguray na patul onu reyna. Yatun nga meka-50 dagun ay magalan tu jubileo nga dagun na mammaguray. I selebrasion nga nelagum ta jubileo ay awayyana nga tangaggaw, tanga-ligguan, onu mas apaddu paga, ngem mangultimu gabbalaman, anna insigida makattaman na totolay i pagayayya tatun.

² Usitakkattam i mas makasta nga jubileo anne ta tanga-ragun nga fiesta nga iselebra na Israel tagga kada 50 nga dagun. Yatun nga Jubileo gari i namalubbang ta Israelita ira. Ngatta gigiammuattam yatun? Megafu ta iperaddam na dagun na Jubileo i makakkasta nga probision para ta mannanayun nga kapalubbang nga iyayawa ni Jehova maski ta kaggawattam, nga tinukoy gapa ni Jesus.​—Bibbigan i Lucas 4:16-18.

3. Ta rekord na Levitico 25:8-12, kunnasi nabbenefisio i Israelita ira ta Jubileo?

³ Mas malippawa tam nu anni i tinukoy ni Jesus nga kapalubbang nu ikonsidera tam labbi i Jubileo nga niyunnug na Dios para ta totolena gari. Kinagi ni Jehova ta Israelita ira: “Mawag tu ideklaranu nga masanto i meka-50 dagun anna ipakannammunu i kapalubbang na davvun anna na ngamin nga maddian tatun. Mebilang noka nga Jubileo yatun para nikamu, anna kada tadday nikamu ay manoli ta pakkukuana anna ta familiana.” (Bibbigan i Levitico 25:8-12.) Ta nappasa nga artikulo, nikonsidera tam nu kunnasi nabbenefisio i Israelita ira ta linigguan nga Sabbath. Ngem, kunnasi gapa nabbenefisio i Israelita ira ta Jubileo? Angngariganna, tadday nga Israelita i  nelammag ta gatu, yari tu fuersadu nga nilakuna i davvunna tapenu mapagan i gatuna. Ta dagun na Jubileo, yatun nga davvun ay metoli nisa. Yatun gafu nga tolay ay “manoli ta pakkukuana,” anna rensian gabbalaman na ánana yatun nga davvun. Ta tanakuan nga situasion, nappobre i tolay yatutta kawaganna nga ilaku i baggina onu i tadday ta ánana bilang aripan tapenu mapagan i gatuna. Ta dagun na Jubileo, yatun nga aripan ay ‘manoli ta familiana.’ Yatutta awan tu mabbalin nga permanente nga aripan nga awan tu iddanamana! Fugurammu yatun nga pangikavurung ni Jehova!

4-5. Ngatta importante nga gigiammuattam i meyannung ta Jubileo?

⁴ Anni paga i tanakuan nga benefisio ta Jubileo? Niyesplika ni Jehova: “Awan ngana nikamu i mabbalin tu pobre, ta siguradu nga bendisionan nakamu ni Jehova ta davvun nga nipamana nikamu ni Jehova nga Diosnu.” (Deut. 15:4) Fugurammu i kadakal na neruman natun ta mesissimmu ta kaggawattam nu sitaw mas marriku i mariku ira anna mas mappobre i pobre ira!

⁵ Bilang Cristiano, ari ittam sakup na Mosaiko nga Dob. Kebalinan natun nga ariattam tuttulan i dob meyannung ta Jubileo nga namalubbang ta aripan ira, nangansela ta gatu, anna nangitoli ta davvun na familiada. (Roma 7:4; 10:4; Efe. 2:15) Ngem importante nittam nga gigiammuan i meyannung ta Jubileo. Ngatta? Megafu ta maekspiriensa tam i kapalubbang nga mangiperaddam nittam ta niyunnug ni Jehova para ta Israelita ira.

6. Ta anni nga mawag nga mapalubbangan i totolay?

⁶ Sittam ngamin ay mawag tu mapalubbangan megafu ta aripan ittam ngamin na liwa, nga tadday nga kitaddake nga klase na pangaripan. Megafu ta minakkaliwa ittam, mallakay onu mabbako ittam, mattaki, anna matay. Aru i mamakurug tatun nu magispehu ira onu umay nga mappadoktor. Madismaya gapa ittam nu makaliwa ittam. Kinagi ni apostol Pablo nga ‘nabbalin yayya tu presu na katagarulian nga mammaguray ta baggina.’ Kunna paga: “Pakallallo ngà mabba ta kunnaw nga paddia-paddiak-ku! Sinni i  makapalubbang niakan toye nga baggi nga matay?”​—Roma 7:23, 24.

7. Anni i niprofesiya ni Isaias meyannung ta kapalubbang?

⁷ Makapagayayya nga egga niyunnug na Dios nga probision tapenu mepaliag, onu mapalubbangan ittam ta liwa. Si Jesus i mamapposible ta kapalubbattam. Maturu tu 700 dagun nige nga minay si Jesus ta davvun, niprofesiya ni profeta Isaias i makapabbaw nga kapalubbang ta mappange nga mas makasta anne ta netuppal na Jubileo na Israel. Niturana: “Egga niakan i espiritu na Soberano nga Yafu Jehova, ta sakan i pinili ni Jehova nga mangilayyagayya tu mapia nga dumug ta mapakalinno. Zinognà nga babbaggan i nabigaran nga futu, nga mangipakannammu tu kapalubbang ta aripan ira.” (Isa. 61:1) Sinni i pagaplikan natun nga profesiya?

8. Sinni i pagaplikan na profesiya ni Isaias meyannung ta kapalubbang?

⁸ Namegafu nga natuppal yatun nga importante nga profesiya meyannung ta kapalubbang turi ta pinegafuanan ni Jesus i ministeriona. Turi ta minay si Jesus ta sinagoga ta lugarda nga Nazaret, nibibbigna ta Judio nga naggarammammung tatun i mismu ira nga uvovug ni Isaias. Niyaplika ni Jesus ta baggina danaw nga uvovug: “Egga niakan i Espiritu na Yafu, ta sakan i pinili na nga mangilayya-gayya ta Mapia nga Dumug ta mariga ira. Zinog nà tu mangipakannammu ta kapalubbang danuri na nepresu anna mangiyawa ta paningan na vuling ira. Zinog nà tu mamalubbang gapa ta matazza-tazzian ira, anna mangilammuyag tu tiempo ngana na pamaliag na Yafu ta totolay na.” (Luc. 4:16-19) Kunnasi sinuppal ni Jesus yatun nga profesiya?

9. Anni nga klase na kapalubbang i iddanaman na aru nga tolay ta tiempo ni Jesus?

⁹ Namegafu nga natuppal ta ollu siglo i kapalubbang nga niprofesiya ni Isaias anna nebibbig ni Jesus. Kinumfirma yatun ni Jesus ta pakkagina: “Taw nga aggaw, naparulo i naginna nu nga nebibbig ta Masanto nga Tura.” (Luc. 4:21) Aru ta nakaginna ta nebibbig ni Jesus ay posible nga magiddanama nga mapalubbangan ira ta pammaguray na gobiernu na Roma. Natagenoda gapa i natageno na dua nga lalaki nga nakkagi: “Iniddanamam-mi tu yaya i mamalubbang ta Israel!” (Luc. 24:13, 21) Ngem ammu tam nga ari nipagaram ni Jesus ta disipulosna nga marrebelde ira kontra ta brutal nga pammaguray na Roma. Lallagu, kinagina nira nga pagadda ta “Emperador i kukua ira na Emperador.” (Mat. 22:21) Kunnasi  gafu nga namalubbang si Jesus tatun nga tiempo?

10. Ta anni pinalubbangan ni Jesus i totolay?

¹⁰ Minay i Ana na Dios tapenu uffunan i totolay nga mapalubbangan ta dua nga gannug. Ollu, zinuffunan ni Jesus i totolay nga mapalubbangan ta mamakadammo nga tuttuddu na relihioso ira nga lider. Aru nga Judio tagga i naaripan na tradision ira anna falsu ira nga tuttuddu. (Mat. 5:31-37; 15:1-11) Danuri makkagi nga uuffunadda i totolay nga masserbi ta Dios ngem ari mabba mepangngo i passerbida ta Dios ay megitta ta vuling. Ta pammanakida ta Mesias anna ta kinakurug nga itudduna, nattalupaddian ira ta zibbo anna ta liwa. (Juan 9:1, 14-16, 35-41) Gukaban na fustu nga tuttuddu anna makasta nga ehemplo ni Jesus, nipakannammuna i espiritual nga kapalubbang ta minappakalinno ira.​—Mar. 1:22; 2:23–3:5.

11. Anni i mekadua nga kapalubbang nga kingngua ni Jesus ta totolay?

¹¹ Mekadua, pinapposible ni Jesus i kapalubbang na totolay ta pakka-aripan ta narensia nga liwa. Gukaban na sakrifisio ni Jesus, pakoman na Dios i liwi-liwa danuri mangurug anna mangalawa ta tavvu nga niyawana. (Heb. 10:12-18) Kinagi ni Jesus: “Nu i Ana ay mamalubbang nikamu, kakurugan na tu napalubbangak-kamu ngana.” (Juan 8:36) Siguradu nga mas makasta yatun nga kapalubbang anne ta malawa na tadday nga Israelita ta dagun na Jubileo! Angngariganna, posible nga mabbalin uli tu aripan i tolay nga napalubbangan ta Jubileo, anna matay gabbalaman. Ngem i kapalubbang nga iyawa ni Jesus ay mannanayun.

12. Sinni ira i ollu nga nabbenefisio ta kapalubbang nga nipakannammu ni Jesus?

¹² Ta aggaw na Pentecostes 33 C.E., zinelugan ni Jehova gukaban na masanto nga espiritu i apostoles anna i karuan nga matalo nga lallaki anna babbay. Inampunna ira bilang ánana tapenu ta mappange, mapaginnolay ira ta langi anna makipammaguray kani Jesus. (Roma 8:2, 15-17) Ira i ollu nga nabbenefisio ta kapalubbang nga nipakannammu ni Jesus ta sinagoga ta Nazaret. Danatun nga lallaki anna babbay ay ari ngana naaripan ta falsu nga tuttuddu anna ari nebase-Biblia nga kostumbre na relihioso ira nga lider nga Judio. Para kani Jehova, napalubbangan gapa ngana ira ta liwa nga marresulta ta patay. Namegafu i unnug ni Jehova nga itoli i kapalubbang tagga ta zineluganna i disipulos ni Jesus ta 33 C.E. anna mangultimu yatun noka ta ultimu na Tanga-rivu Dagun nga Pammaguray ni Jesus. Anni ngana noka i netuppal tatun nga tiempo?

13-14. Sinni paga i makalawa ta kapalubbang nga nipakannammu ni Jesus fuera ta nazelugan ira nga Cristiano?

¹³ Ta kaggawattam, minillion nga totolay nga mapia i giffutuadda nga naggafu ta ngamin nga nasion i parte na “tanakuan nga karneru.” (Juan 10:16, NW) Ari ira pinili na Dios nga makipammaguray kani Jesus ta langi. Lallagu, egga i nebase-Biblia nga iddanamada nga mattolay tu mannanayun ta davvun. Yatun kari gapa i iddanamam?

¹⁴ Maski sangawe, maekspiriensam ngana i makkarasta nga gannug nga nalawa danuri nazelugan. Megafu ta mangurug ka ta sakrifisio ni Jesus, awayyam makkiddaw kani Jehova tu pamakoma ta liwi-liwa mu. Marresulta yatun ta makasta nga sinaddag anna marenu nga konsensia ta arubang na Dios. (Efe. 1:7; Nep. 7:14, 15) Nonopan gapa i bendision ira nga maekspiriensam megafu ta napalubbangakka ngana ta falsu ira nga tuddu. Kinagi ni Jesus: “Kannammuan nu i kurug anna yaw i mamalubbang nikamu.” (Juan 8:32) Anni mabba kasta na kapeggan tu kunnatun nga kapalubbang!

15. Anni nga kapalubbang anna bendision i iddanamattam ta mappange?

¹⁵ Magiddanama ka noka ta mas dakal nga kapalubbang. Ta aranni ngana nga mappange, daralan noka ni Jesus i falsu nga relihion anna i marake ira nga gobiernu na tolay. Protektan noka na Dios i “magaru nga totolay”  nga masserbi nisa, anna ipamavulunna nga maekspiriensada i bendision ira ta paraiso nga davvun. (Nep. 7:9, 14) Aru nga totolay i mapaginnolay noka anna mapeggan tu oportunidad nga mapalubbangan ta ngamin nga efekto na liwa ni Adan.​—King. 24:15.

16. Anni nga kappabbaw nga kapalubbang i malawa noka na totolay?

¹⁶ Durante ta Tanga-rivu Dagun nga Pammaguray, uffunan noka ni Jesus tuange ta kakavvuluna nga mammaguray i totolay nga mapeggan tu perfekto nga gawa-gawayyan anna perfekto nga relasion ta Dios. Yaw nga tiempo na pangitoli anna kapalubbang ay megitta ta Jubileo ta Israel. Kayà kagian naw nga perfekto anna ari ngana makaliwa i ngamin nga totolay nga matalo nga masserbi kani Jehova.

17. Anni i niprofesiya na Isaias 65:21-23 para ta totolay na Dios? (Innan i letratu ta vungun.)

¹⁷ Ideskriba na Isaias 65:21-23 (bibbigan) i klase na pattolay ta davvun ta mappange. Ari ittam noka nga agga-tunggo onu agga-dulang laman. Lallagu, kagian na Biblia nga tatun nga tiempo, mangngua noka i totolay na Dios tu makoffun anna makakontentu nga trabahu. Ta ultimu na Tanga-rivu Dagun nga Pammaguray, makasiguradu ittam nga “egga noka i aggaw nga mapalubbangan ngamin i pinaratu ta naripannad-da nga kadaral. Ngamin noka ay mesipo gapa ta makapabbaw nga kapalubbang na ána na Dios.”​—Roma 8:21.

18. Ngatta makapattalo ittam nga makasta i pappangetattam?

¹⁸ Nu kunnasi nga nangiyunnug si Jehova para ta Israelita ira tapenu balanse ira ta trabahu anna ta pagibannag, kunnatun gapa i kuanna ta totolena ta mappange nga Tanga-rivu Dagun nga Pammaguray ni Cristo. Siguradu nga egga noka i tiempo para ta espiritual ira nga aktibidad. Nabalor i paddayaw ta Dios tapenu mabbalin tu magayayya sangawe, anna kunnatun gabbalaman noka ta napabagu nga mundo. Wan, egga i makasta nga rasottam nga magayayya ta mapia nga trabahu anna espiritual nga aktibidad nga iddanamattam sonu i matalo nga totolay ay magayayya ta Tanga-rivu Dagun nga Pammaguray ni Cristo.