MAKAGIM kari nga minappabalo ka nga tolay? Mawag tam ngamin nga pannonopan yatun nga pakkiavu. Niprofesiya na Biblia nga ta tiempo tam, aru nga totolay i “ariad-da nga ammu i mabbala-balo.” (2 Tim. 3:2) Awayyana nga egga kilalam nga totolay nga ekspektadda nga kuan na tanakuan i gannug para nira onu iyawa na tanakuan i gannug para nira. Baka matagenoda nga ariadda ngana nga kawagan nga mappabalo ta gannug ira nga nalawada. Umanugu ka kari nga ari tu makasta i makikavulu ta kunnatun nga totolay?

Ngem nekagi ta aripan ira ni Jehova: “Mabbala-balo kamu gapa nga kanayun.” Mawag tu “mabbala-balo kamu ta anni laman.” (Col. 3:15; 1 Tes. 5:18) Kakuruganna, makasta para nittam i pabbalin tu minappabalo. Aru i rason nu ngatta.

I tadday nga importante nga rason nu ngatta kanayun ittam nakuan nga minappabalo ay makoffun yatun tapenu makkasta i annagenappattam. I tolay nga minappabalo ay siguradu nga magayayya, kunne na gapa i makalawa ta appabalo. Ngatta parehu nga kunnatun i matagenoda? Bueno, ikonsidera yaw nga angngarigan: Nu ammum nga sigga-paran nga massakrifisio i tanakuan para nikaw, ari kari nga kayà kagian natun nga mepangngo ka tatun nga sakrifisio? Ipasingan natun nga ikavurungaddaka. Nu matageno mu yatun nga pangikavurung, magga magayayya ka. Kunnatun i manono tam ta nesimmu kani Ruth. Aru i niyawa ni Boaz kani Ruth. Siguradu nga nagayayya si Ruth ta pakannammuna nga egga i mangikavurung nisa.​—Ruth 2:10-13.

Mas ngana nga mepangngo nga mabbala-balo ittam ta Dios. Siguradu nga nu mittan nononopammu i aru nga espiritual anna material nga niregaluna ngana anna i iyayawana paga. (Deut. 8:17, 18; King. 14:17) Ngem imbes nga pannonopan laman tu manganannuan i kinapia na Dios, ngatta ariammu iddan tu tiempo nga pannonopan tu mapia i aru nga bendision na Dios nga niyawana nikaw anna ta iddeddukammu ira? I monag nga pannonono ta kinavuka-palag na Namaratu i mamadakal ta appresasiommu nisa anna mamatuyag ta pakalippawa mu ta kadakal na pangaya anna pangappresiana nikaw.​—1 Juan 4:9.

Ari laman gafu nga pannonopattam tu mapia i iyayawa ira ni Jehova nittam, nu ari, mabbala-balo ittam gapa ta kinapiana. (Sal. 100:4, 5) Napakurug nga “i pangisikka tu appabalo ay dakal i meyuffunna tapenu mas magayayya i tolay.”

I tadday paga nga rason nu ngatta makasta para nikaw i mabbala-balo ay megafu ta mamatuyag yatun ta pakkorofun. Mawag tam ngamin nga matageno nga maappresia ittam. Nu napafutuan i appabalo mu ta kinasippo na tadday nga tolay, mas maddukko kamu dua. (Roma 16:3, 4) Kunne na paga, danuri minappabalo ay siguradu nga minangnguffun gapa. Masingadda i kinasippo ira nga nakua nira yatutta mapaguyu gapa ira nga mabbalin tu masippo. Wan, magayayya ka nu manguffukka. Kagitta yatun na kinagi ni Jesus: “Mas dakal i pagayaya ta pangiyawa anne ta pangalawa.”​—King. 20:35.

Kunnaw i pinalawan tu punto ni Robert Emmons nga codirector na research na University of California meyannung ta pappabalo: “Tapenu mabbalin tu minappabalo, mawag tu rekunnisiattam nga maddepende ittam ta kataggi-tadday. Nu karuan sittam i mangiyawa anna nu mittan sittam gapa i mangalawa.” Tapenu mattalupaddian nga matolay anna magayayya ta pattolay, nakadepende ittam ta tanakuan ta aru nga gannug. Angngariganna, awayyana nga iddadda ittam tu makan onu uffunadda ittam ta medikal nga pakawagattam.  (1 Cor. 12:21) Siguradu nga appresian na minappabalo nga tolay i uffun nisa na tanakuan. Nu kunnatun gafu, ugalim kari nga ikagi kanayun i appabalo mu ta kingngua na tanakuan para nikaw?

I tadday paga nga rason tapenu kultiban i pappabalo ay makoffun yatun tapenu maffokus ta positibo imbes ta negatibo ira. Megitta gafu i appanono mu ta pattara onu annaran. Megafu tatun, makapaffokus ka ta karuan nga aspeto ta pallevu mu durante nga tarammu i karuan nga gannug. Mas masingammu i positibo ira nga gannug anna ariammu kuruga masingan i problema ira. Nu mas nga minappabalo ka, mas aru nga mapia nga gannug i masingammu, yatutta mas mabbalikka nga minappabalo. Nu maffokus ka ta gannug ira nga ipappabalo mu, makoffun yatun tapenu makuam i nitabarang ni apostol Pablo: ‘Magayayya kamu kanayun ta Yafu.’​—Fil. 4:4.

Duffunan naka na pabbalin tu minappabalo nga ari mannono tu negatibo. Ari kari nga mariga i mabbalin tu minappabalo nu mappassil, maddaddam, onu mapporay ka gapa? Danuri minappabalo ay ari nga materialistiko. Appresiadda nu anni i egga nira anna ariadda maffokus ta pangà ta mas aru paga.​—Fil. 4:12.

Bilang tadday nga Cristiano, ammum nga kayà ni Satanas nga makkafi i nono mu anna madismaya ka gafu ta ziga-riga nga meparubang nikaw taw nga pangurianan nga aggaggaw. Kakayàna nu marake i ugalim anna marreklamo ka ta ngamin nga gannug. Nu kunnatukka, posible nga ari ka mabbalin tu efektibo ta pangilayyagayya ta mapia nga dumug. Kakuruganna, konektadu i pabbalin tu minappabalo ta vunga na espiritu na Dios. Angngariganna, magayayya ittam megafu ta masingattam i makasta ira nga gannug nga niyawa nittam na Dios anna mangurug ittam ta nipromesana ira ta mappange.​—Gal. 5:22, 23.

Bilang tadday ta totolay ni Jehova, magga umanugu ka ta nakagi taw nga artikulo meyannung ta pappabalo. Ngem ammum nga ari tu malogon i kanayun nga pabbalin tu minappabalo anna positibo. Ngem ari nakuan pakkafian natun i nono mu. Posible nga makultibam anna mapattalupaddiammu i minappabalo nga pagimamma. Kunnasi? Iddan tu tiempo nga pannonopan kada aggaw i karuan nga aspeto na pattolem nga puedem nga ipappabalo. Kada kuammu yatun, mas meyugalim i mappabalo. Nu kunnatun, mas magayayya ka anne turi ira ta agga-nonoda i problema ira ta pattolay. Nonopan i makasta ira nga gannug nga kingngua na Dios anna na tanakuan nga namagaram anna namagayayya nikaw. Puedem gapa nga itura danatun. Ilistam i dua onu tallu nga gannug nga ipappabalo mu tatun nga aggaw.

Nadiskubre na researcher ira nga nu kanayuttam mappabalo ta tanakuan, moli natun i paffunsina na uto tam tapenu mas mabi para nittam nga mabbalin tu magayayya ta pattoletam. Mas nga magayayya i minappabalo nga tolay. Yari tu nonopammu i ngamin nga makasta nga gannug nga nalawa mu, magayayya ta makasta ira nga gannug nga nesimmu nikaw, anna kanayun nga mabbala-balo! Imbes nga ari importan danuri makasta nga gannug, ‘mabbala-balo kani Jehova, megafu ta mapia yayya.’ Wan, “mabbala-balo kamu ta anni laman.”​—1 Cro. 16:34; 1 Tes. 5:18.