Matabbag mu kari danaw nga pakkiavu base ta 2019 nga Passifusifutan?

Anni i kebalinan na promesa na Dios: “Awan tu armas nga mapadday kontra nikaw i mavviktoria”? (Isa. 54:17)

Makapattalo ittam nga protektan ittam na Dios ta makadaral ira nga fuersa gittana “fuersa na manattazzi ira.” (Isa. 25:4, 5) Ari vuluvuga makua na kalabattam ira nga permanente nga perwisiuwan ittam.​—w19.01, p. 6-7.

Kunnasi ipasingan na pakilallang na Dios ta Canaanita anna rebelyoso nga Israelita ira i hustisiana?

Kinastigo na Dios danuri makiparte ta maritta ira nga seksual nga ritual onu ta mammaltratu ta awan tu awa-awayyada nga babbay anna abbarabbing. Binendisionanna danuri manuttul nisa anna patas i pattratuda ta tanakuan.​—w19.02, p. 22-23.

Anni i mawag nga kuattam nu presente ittam durante nga makimallo i ari kapangngurug?

Awayyana nga mattalupaddian ittam nga silensio anna marespeto ngem ari makkagi tu “amen” onu makikemmi ta tanakuan nga presente. Puede nga silensio nga makimallo ittam lagapa.​—w19.03, p. 31.

Kunnasi kaserioso i seksual nga pangabuso ta abbing?

Liwa ta biktima, ta kongregasion, ta sekular nga autoridad, anna ta Dios i seksual nga pangabuso ta abbing. Nu egga i sekular nga dorob nga mangikiddaw ta pangireport ta alegasion na pangabuso, tuttulan yatun na elder ira.​—w19.05, p. 9-10.

Kunnasim matalibagu onu mapakasta i appana-panono anna affutu-futum?

I importante ira nga dakkua ay: Makiyuvovug kani Jehova ta pakimallo. Monag nga mannono anna usitakkan i baggim. Masirib nga pilian i kokkofummu.​—w19.06, p. 11.

Anni i makua tam sangawe tapenu makaprepara ta panara-darum?

Mawag tam nga paladdan i relasiottam kani Jehova. Mattalo nga ayatanna ittam anna arianna ittam vuluvuga pagurayan. Bibbigan i Biblia kadaggaw, anna kanayun nga makimallo. Kumbinsidu ka nakuan nga matuppal noka i bendision ira na Pappatulan. Kabisaduan i paboritom ira nga teksto anna kansion ira ta paddayaw.​—w19.07, p. 2-4.

Anni i makua tam tapenu moffunan i kafamilia anna kaparientes tam nga mepaliag?

Importante nga mangipasingan ittam tu empatia, ipamavuluttam nga i makasta nga ehemplo tam i mamakurug, anna mabbalin tu mapasensia anna ariattam ulian i desisiottam.​—w19.08, p. 15-17.

Kunnasi ittam mapasikan uli, gittana nipromesa ni Jesus ta Mateo 11:28?

Egga nittam i minaggiddu ira nga Cristiano nga mangirollu, kapianan nga kokkofun, anna kapianan nga trabahu.​—w19.09, p. 23.

Kunnasi mangiyawa i Dios nittam tu pakkaraga anna pakawayya nga magguyu? (Fil. 2:13)

Durante nga bibbigattam i Uvovug na Dios anna monag nga pannonopan yatun, pasikannan ittam na Dios, anna iyawana nittam i pakkaraga nga kuan i urena anna i pakawayya nga magguyu. Pakastan na masanto nga espirituna i abilidad tam ira.​—w19.10, p. 21.

Anni ira nga masirib nga dakkua i mawag nga kuattam nige tam mangngua tu serioso ira nga desision?

I lima ira nga dakkua ay: Marresearch tu mapia. Ipakimallo i sirib. Nonopan i motibom ira. Mabbalin tu espesipiko. Mabbalin tu realistiko.​—w19.11, p. 27-29.

I ideya kari na imortal nga kararua ay naggafu ta kinagi ni Satanas kani Eva?

Posible nga ari. Kinagi ni Satanas nga ari matay si Eva, ngem arianna kinagi nga gittana matay laman yayya. Ngamin nga falsu nga relihioso nga ideya ay napawan ta Delubio. Awayyana nga limittuag i pangurug ta imortal nga kararua nige nga pinawwara na Dios i totolay nga namadday ta torre na Babel.​—w19.12, p. 15.