Posible nga ari. Ari kinagi na Diablo kani Eva nga nu kananna i vunga nga igamma na Dios, ay tu gittana matay laman yayya ngem egga i ari masingan nga parte na baggina (nga tukuyan na karuan ta maddaggun nga imortal nga kararua) nga sigga-matolay ta tanakuan nga lugar. Gukaban na serpiente, kinagi ni Satanas nga nu kanan ni Eva i vunga na kayu, ‘siguradu nga ari yayya vuluvuga nga matay.’ Pinalawanna nga mattalupaddian yayya nga matolay, nga mas magayayya i pattolena ta davvun—i pattolay nga ari nakadepende ta Dios.​—Gen. 2:17; 3:3-5.

Nu ari nga namegafu ta Eden i falsu nga doktrina na imortal nga kararua nga metuttuddu sangawe, kanni gafu yaw nabuu? Ariattam masiguradu. I ammu tam ay tu ngamin nga falsu nga paddayaw ay napawan ta Delubio ta kaggawan ni Noe. Megafu ta si Noe tuange ta familiana i nepaliag laman ta Delubio, anna fustu i paddayoda, awan gafu tu nabattang nga mangituddu tu maski anni nga falsu nga relihioso nga ideya.

Yatutta i maddaggun nga tuddu meyannung ta imortalidad na kararua na tolay ay namegafu kabalin na Delubio. Turi ta ginulu na Dios i lengguahe ira ta Babel anna nawwawara i totolay “ta interu nga davvun,” siguradu nga vulu-vuluda ngana i ideya nga imortal i kararua na totolay. (Gen. 11:8, 9) Maski kanni paga nga namegafu yatun nga falsu nga ideya, makasiguradu ittam nga “i yama ngamin na siri,” si Satanas nga Diablo, i naggafuan natun anna magayayya yayya nga masingan nga nawwara yatun.​—Juan 8:44.