MAGIGIAMMU NGA ARTIKULO 51
Talaga Kari nga Ammammum si Jehova?
“I makannammu ira nikaw, AFU, ay ed-daka nga pammakatalakkan, ta i umaranni ira nikaw ay ariam-mu vuluvuga nga pagurayan.”—SAL. 9:10.
KANSION 56 Manindigan Ka sa Katotohanan
SUMARIO *
1-2. Kagitta na ekspiriensa ni Angelito, anni nakuan i mawag tu kuan na kada tadday nittam?
SAKSI NI JEHOVA kari i magana mu? Nu wan, daddamman nga ariammu mamana ta magana mu i personal nga relasion kani Jehova. Maski paga nu masserbi ta Dios i magana tam onu ari, kada tadday nittam ay mawag tu mapeggan tu personal nga pakikkofun kani Jehova.
2 Ikonsidera i ekspiriensa na brother nga si Angelito. Ziminakal yayya ta familia na Saksi. Ngem ta kabbinna, arianna natageno nga madukko yayya ta Dios. Inaminna, “Massesserbi ngà laman kani Jehova megafu ta yatun i kukukuan na familià.” Ngem, dinisidi ni Angelito nga iddan tu tiempo i pabbibbig ta Uvovug na Dios anna monag nga pannonopan yatun, anna nigafuna ngana gapa nga kanayun nga makimallo kani Jehova. Anni i resultana? Kunni Angelito, “Nagigiammù nga maddukko ngà laman ta meddu nga Yamà nga si Jehova nu sakan mismu i mangammu nisa.” Ipanono nittam na ekspiriensa ni Angelito danaw nga importante nga pakkiavu: Anni i nadduman na basta pakkakilala laman kani Jehova anna na pakannammu tu mapia nisa? Anna kunnasi tam mas mammammu si Jehova?
3. Anni i nadduman na pakkakilala kani Jehova anna na pakannammu tu mapia nisa?
3 Baka nonopattam nga kilala tam si Jehova megafu ta ammu tam i ngaganna onu i karuan nga kinagi anna kingnguana. Ngem ari kebalinan natun nga ammammu tam ngana
tu mapia si Jehova. Mawag tu egga i tiempo tam nga gigiammuan i meyannung nisa anna i kappabbaw ira nga kualidadna. Tatuttam laman malippawa nu anni i mamaguyu nisa ta kakkagian anna kukukuanna. Yatun sangaw i manguffun nittam tapenu malippawa nu faboranna i opinion, desision, anna kondukta tam ira. Nu nammuattam ngana i uray ni Jehova nittam, mawag tu magguyu ittam segun ta nagigiammu tam.4. Kunnasi makoffun nittam i pangikonsidera ta ehemplo ira ta Biblia?
4 Awayyana nga uyu-uyuwan ittam na karuan nga totolay megafu ta kayà tam nga masserbi kani Jehova, anna mas paga nga kokkontradda ittam nu makistudy ittam ngana. Ngem, nu mattalo ittam kani Jehova, arianna ittam vuluvuga nga pagurayan. Mamammadday ittam tu fundasion para ta mannanayun nga pakikkofun ta Dios. Posible kari nga mammammu tam tu mapia si Jehova? Wan, posible yatun! Pakurugan yatun na ehemplo na imperfekto nga lallaki gitta da Moises anni Patul David. Durante nga gigiammuattam i kingnguada ira, tabbagattam i dua nga pakkiavu: Kunnasida nga nakilala si Jehova? Anna anni ira nga leksion i magigiammu tam ta ehemploda?
NASINGAN NI MOISES “I DIOS NGA ARI NGA MASINGAN”
5. Anni i pinili ni Moises nga kuan?
5 Nagguyu si Moises segun ta nagigiammuna. Tagga ta ma-40 anios ngana si Moises, mas nikayàna i makikavulu ta totolay na Dios, ta Hebreo ira, imbes nga makilala yayya bilang “ana na prinsesa nga ana na Faraon.” (Heb. 11:24) Pinanawan ni Moises i prominente nga posisionna. Nguri ta sinuportan ni Moises i Hebreo ira nga aripan ta Ehipto, ammuna nga mapporay nisa i Faraon. Tadday nga makapangngua nga patul i Faraon, anna mangurug i Ehipsio ira nga dios yayya. Fugurammu i katuyag na pangurugna! Nattalo si Moises kani Jehova. Kunnatun nga pattalo i pinakafundasion na mannanayun nga relasion.—Prov. 3:5.
6. Anni i magigiammu tam ta ehemplo ni Moises?
6 Anni i leksion para nittam? Kagitta ni Moises, mawag tam ngamin i maddesision: Piliattam kari nga masserbi ta Dios anna makikavulu ta totolena? Baka mawag nga egga i isakrifisio tam tapenu makapasserbi ta Dios, anna baka kontran ittam danuri ari masserbi kani Jehova. Ngem nu mattalo ittam ta nelangitan nga Yama tam, siguradu nga suportanna ittam!
7-8. Anni i ari inimmangan ni Moises nga gigiammuan?
7 Ari nagimmang si Moises nga gigiammuan i kualidad ira ni Jehova anna kuan i urena. Angngariganna, turi ta nekiddaw kani Moises nga irolluna i nasion na Israel ta pallawan ta Ehipto, awan tu komfiansana anna namippigana kinagi kani Jehova nga ari yayya kualipikadu. Masingan ta tabbag na Dios nga minangngikallo yayya anna nalippawana i mataga-tageno ni Moises, yari tu zinuffunanna yayya. (Ex. 4:10-16) Megafu tatun, nakagi ni Moises i madammo nga mensahe na pamanunnu ta Faraon. Tapus nasingan ni Moises nu kunnasi inusa ni Jehova i pakapangnguana turi ta nipaliagna i Israelita ira ngem pinatena i Faraon tuange ta armadana ta Uzzin nga Bebay.—Ex. 14:26-31; Sal. 136:15.
8 Kabalin nga nirollu ni Moises i Israelita ira ta pallawan ta Ehipto, kanayun ira nga marreklamo. Maski kunna, nasingan ni Moises i apaddu nga pasensia ni Jehova ta pakilallanna ta totolay nga nipaliagna ta ke-aripan. (Sal. 78:40-43) Nasingan paga ni Moises i nerumu-ruma nga kinapakalinno ni Jehova turi ta nanguli i desisionna gafu ta nikiddaw ni Moises yatun Nisa.—Ex. 32:9-14.
9. Segun ta Hebreo 11:27, kunnasi kadukko i relasion ni Moises kani Jehova?
9 Kabalin na pappanawda ta Ehipto, nabbalin tu kuruga madukko i relasion ni Moises kani Jehova, nga gittana masinganna ngana mismu i nelangitan nga Yamana. (Bibbigan i Hebreo 11:27.) Meyannung ta kadukko na relasiodda, kagian na Biblia: “Makikkiyuvovug si Jehova kani Moises ta arubanna mismu nga kunna paguvovug na dua nga tolay.”—Ex. 33:11.
10. Tapenu mammammu tam tu mapia si Jehova, anni i mawag tu kuattam?
10 Anni i leksion para nittam? Tapenu mammammu tam tu mapia si Jehova, ariattam laman gigiammuan i kualidadna ira, nu ari, ituppal tam gapa i urena. Uray ni Jehova ta maddaggun nga “mapaliag ngamin i totolay anna kannammuad-da i kurug.” (1 Tim. 2:3, 4) I panuddu ta tanakuan meyannung kani Jehova i tadday nga makua tam tapenu matuppal i uray na Dios.
11. Durante nga tudduattam i tanakuan meyannung kani Jehova, kunnasi tam mas mammammu yayya?
11 Maruddu nga mas mammammu tam si Jehova nu ituddu tam ta tanakuan i meyannung nisa. Angngariganna, masingattam mismu i ebidensia na allo ni Jehova nu igiyana ittam ta totolay nga mapia i giffutuadda. (Juan 6:44; King. 13:48, NW) Masingattam i pakapangngua na Uvovug na Dios durante nga maobserba tam nga iyemmang na Bible study tam ira i marake nga annangnguada anna uliadda ngana i kata-katoleda. (Col. 3:9, 10) Masingattam gapa i pamakurug ta pasensia na Dios durante nga iddanna i aru nga totolay ta teritoria tam tu napakaru nga tiansa tapenu magigiammu i meyannung nisa anna mapaliag.—Roma 10:13-15.
12. Kagitta na mabibbig ta Exodo 33:13, anni i nikiddaw ni Moises, anna ngatta?
12 Tinagibalor ni Moises i relasionna kani Jehova. Maski paga nakangngua ngana si Moises tu milagro ira ta ngagan na Dios, marespeto lagapa nga nikiddona kani Jehova nga mas mammammuna paga yayya. (Bibbigan i Exodo 33:13.) Maturu tu 80 anios ngana si Moises turi nikiddona yatun, ngem ammuna nga aru paga i magigiammuna meyannung ta meddu nga nelangitan nga Yamana.
13. Kunnasi tam mapakurug nga tagibalorattam i pakikkofuttam ta Dios?
13 Anni i leksion para nittam? Maski paga nabayag ittam ngana nga massesserbi kani Jehova, kanayun nakuan nga tagibalorattam i relasiottam nisa. Mapakurug tam nga tagibalorattam i pakikkofuttam ta Dios nu makiyuvovug ittam nisa ta pakimallo.
14. Ngatta importante i pakimallo tapenu mas mammammu tam i Dios?
14 Nakadepende ta makasta nga komunikasion i maladda nga relasion. Yatutta makiddukko ka ta Dios gukaban na kanayun nga pakimallo anna ari ka vuluvuga nga magalangan nga ikagi nisa i nononopan anna mataga-tageno mu. (Efe. 6:18) Kunni Krista nga taga-Turkey: “Dumaka-dakal i aya ku anna pattalo ku kani Jehova kada ikagì nisa ta pakimallo i mataga-tageno ku tapus masingakku nu kunnasinà uffunan. Megafu ta masingi-singakku nu kunnasi tabbagan ni Jehova i pakimallo ku ira, nakoffun yatun niakan tapenu imammatakku si Jehova bilang tadday nga Yama anna Kofun.”
LALAKI NGA MEDDU TA FUTU NI JEHOVA
15. Kunnasi dineskriba ni Jehova si Patul David?
15 Neyana si Patul David ta nasion nga dedikadu kani Jehova nga Dios. Ngem ari laman basta sinuttul ni David i relihion na familiana. King. 13:22) Kunnasi napeggan si David tu madukko nga relasion kani Jehova?
Nappursigi yayya tapenu mapeggan tu personal nga relasion ta Dios, yari tu iddiddu yayya ni Jehova. Dineskriba mismu ni Jehova si David bilang ‘tolay nga meddu ta futuna.’ (16. Anni i nagigiammu ni David meyannung kani Jehova gukaban na pangobserba ta pamaratu?
16 Nagigiammu ni David i meyannung kani Jehova ta pamaratu. Ta kabbing ni David, aru nga oras nga egga yayya ta tana tapenu ipastor i karneru ira na yamana. Posible nga tatunna nga negafu nga monag nga pannonopan i pinaratu ira ni Jehova. Angngariganna, kada tangagan ni David i langi ta gabi, ari laman tu napakaru nga biti-bitun i masinganna, nu ari, nalippawana gapa i kualidad ira na Namaratu tatun. Napaguyu si David nga itura: “Mananawag nga ipamamma na langi i gloria na YAFU; maliti-litaw nga ipasingan na ngamin nga pinaratu!” (Sal. 19:1, 2) Nu nononopan ni David nu kunnasi naparatu i totolay, masinganna i kappabbaw nga sirib ni Jehova. (Sal. 139:14) Kada pannonopan tu mapia ni David i pamaratu ni Jehova, matagenona nga balabaddi yayya kumpara kani Jehova.—Sal. 139:6, NW.
17. Anni i magigiammu tam nu pannonopattam tu mapia i pamaratu?
17 Anni i leksion para nittam? Maginteres ta pamaratu. Iddan tu tiempo nga obserban i makakkasta nga mundo nga pinaratu ni Jehova anna mappabbaw tatun! Ta inaggaw nga pattolem, pannonopammu tu mapia nu anni i ituddu nikaw na pinaratu ira nga egga ta pallevu mu—i mulu-mula, aya-ayam, anna totolay—meyannung kani Jehova. Nu kunnatun, kada aggaw nga mas aru paga i magigiammum meyannung ta meddu nga Yamam. (Roma 1:20) Kada aggaw, matageno mu gapa nga mas dumakal i aya mu nisa.
18. Kagitta na mabibbig ta Salmo 18, anni i ammu ni David?
18 Ammu ni David nga dudduffunan yayya ni Jehova. Angngariganna, turi ta pinrotektan ni David i karneru ira na yamana ta leon anna ta oso, ammuna nga si Jehova i manguffu-uffun nisa tapenu patayan danatun nga simaron nga ayam. Turi ta inaffu ni David i higante nga suddalu nga si Goliat, manawag nga nasinganna nga si Jehova i nangigiya nisa. (1 Sam. 17:37) Turi ta nattammang yayya ta minappassil nga si Patul Saul, ammu ni David nga si Jehova i nangipaliag nisa. (Sal. 18, footnote na superskripsion) Nu minappakatannang si David, baka ninonona nga yayya lagapa i nagangngua tatun ira nga gannug. Ngem minappakalinno yayya, yari tu ammuna nga si Jehova i nanguffun nisa.—Sal. 138:6.
19. Anni i magigiammu tam ta ehemplo ni David?
19 Anni i leksion para nittam? Ariattam laman basta makkiddaw tu uffun kani Jehova. Mawag gapa tu ammuattam nu kanni anna nu kunnasina nga iyayawa i uffun nittam. Nu sigga-pakalinno tam nga rekunnisian i limitasiottam ira, mananawag nga masingattam nu kunnasi pannuan ni Jehova i pakkurangattam ira. Kada masingattam i uffun ni Jehova, mas malladda i relasiottam nisa. Napakurug yaw na brother nga taga-Fiji nga si Isaac nga aru dagun ngana nga massesserbi kani Jehova. Kunna: “Nu lipayakku i nappasa, masingakku nu kunnasinà zinuffunan ni Jehova namegafu paga tagga ta mab-Bible study ngà adde sangawe. Megafu tatun, kuru-kurug niakan si Jehova.”
20. Anni i magigiammu tam ta relasion ni David ta Dios?
20 Pinarigan ni David i kualidad ira ni Jehova. Pinaratu ittam ni Jehova nga egga i abilidad nga parigan i kualidadna ira. (Gen. 1:26) Durante nga mas magigiammu tam i meyannung ta kualidad ira ni Jehova, mas maparigattam yayya. Kuruga ammammu ni David i nelangitan nga Yamana, yari tu napariganna Yayya ta pakilallanna ta tanakuan. Ikonsidera i tadday nga angngarigan. Maski nu nakaliwa si David kani Jehova turi ta sinaddena si Bat-seba tapus nipapatena i atawana, pinili ni Jehova nga mangipasingan tu allo kani David. (2 Sam. 11:1-4, 15) Megafu yatun ta pinarigan ni David si Jehova ta pangipasingan tu allo ta tanakuan. Megafu ta makasta i relasion ni David kani Jehova, iddeddu yayya na Israelita ira, anna yayya i inusa ni Jehova nga ehemplo para ta tanakuan ira nga patul na Israel.—1 Pat. 15:11; 2 Pat. 14:1-3.
21. Mekunnay ta Efeso 4:24 anna 5:1, anni ira i efekto nittam nu ‘parigattam i Dios’?
21 Anni i leksion para nittam? Mawag tu ‘parigattam i Dios.’ Nu kuattam yatun, mammakapia ittam anna mas mammammu tam paga yayya. Nu parigattam i kualidad ira na Dios, mapakurug tam nga ánana ittam.—Bibbigan i Efeso 4:24; 5:1.
MAS PAGA NGA AMMUAN SI JEHOVA
22-23. Anni i resultana nu iyaplika tam i nagigiammu tam meyannung kani Jehova?
22 Kagitta na nammuattam, magigiammu tam i meyannung kani Jehova gukaban na pamaratu anna na Uvovugna, i Biblia. Yatun nga nerumu-ruma nga libru ay nallugan tu napakaru nga ehemplo na matalo ira nga aripan na Dios nga awayya tam parigan, gitta da Moises anni David. Kingngua ngana ni Jehova i partena. Egga ngana nittam nu agga-vuka i mata, talinga, anna futu tam nisa.
23 Ariattam noka magimmang ta paggigiammu meyannung kani Jehova. (Ecl. 3:11) I pinaka-importante ay ari tu i karu na ammu tam meyannung nisa, nu ari, nu anni i kuattam ta nagigiammu tam ira. Nu iyaplika tam i nagigiammu tam anna parigan i minaggiddu nga Yama tam, ipamavulunna nga mas maddukko ittam nisa. (Sant. 4:8) Gukaban na Uvovugna, ipasiguraduna nittam nga arianna vuluvuga nga pagurayan danuri magaleg nisa.
KANSION 80 Tikman at Tingnan ang Kabutihan ni Jehova
^ par. 5 Aru nga totolay i mangurug nga egga i Dios, ngem ariadda talaga ammammu yayya. Anni i kayà kagian na ammuan si Jehova, anna anni i magigiammu tam kani Moises anni Patul David meyannung ta kapeggan tu maladda nga relasion Nisa? Tabbagan naw nga artikulo danatun nga pakkiavu.