1. Kunnasi nipasingan ni Abraham i pakkomfiansana ta pagimamma ni Jehova ta hustisia? (Innan i letratu ta gafu na artikulo.)

“ARI kari nga kuan na Ukum na interu davvun i matunung?” (Gen. 18:25) Tatun nga pakkiavu, nikagi ni Abraham i pakkomfiansana nga mangipasingan tu perfekto nga hustisia si Jehova ta situasion na Sodoma anna Gomora. Kumbinsidu si Abraham nga ari vuluvuga mangngua tu ari kinahustisia si Jehova gukaban na “pamatay ta matunung nga tolay kavulu na marake nga tolay.” Para kani Abraham, “arayyu nga mesimmu yatun.” Ma-400 nga dagun i nappasa, kinagi ni Jehova meyannung ta baggina: “I Batu, perfekto i kingnguana ira, ta hustisia i ngamin nga dala-dalanna. Tadday nga Dios na kinamatalo, nga ari vuluvuga nangipasingan tu kawan tu hustisia; fustu anna matunung yaya.”—Deut. 31:19; 32:4.

2. Ngatta makagi nga ari makangngua si Jehova tu ari kinahustisia?

² Ngatta makapakkomfiansa si Abraham nga kanayun nga matunung i pangukum ni Jehova? Megafu ta si Jehova i kapianan nga ehemplo na hustisia anna kinatunung. Kakuruganna, maruddu nga makkavulu nga matukoy ta Hebreo nga Katurakan i termino ira nga “hustisia” anna “kinatunung.” Awan tu nadduman na  makagi nga patas anna nu anni i matunung. Megafu ta si Jehova i ultimo nga estandarte na kinatunung, kanayun nga patas i pagimammana ta ganna-gannug. Segun paga ta netura nga Uvovugna, “ayatan na Yafu ngamin i matunung anna mapia.”—Sal. 33:5.

3. Mangiyawa tu angngarigan na kawan tu hustisia taw nga mundo.

³ Mabanna-bannayan i mapia-giffutuadda ira nga mammuan nga kanayun nga patas si Jehova, megafu ta napannu i mundo tu kawan na hustisia. Megafu tatun, mabiktima i totolay ta grabe ira nga mesimmu. Angngariganna, ari patas nga nasentensian anna nefuku i karuan. Nguri laman ta kadiskubre na ebidensia megafu ta DNA nga napalawan i karuan kabalidda nga nefuku tu piga dekada ta krimen nga ariadda kingngua. Kegafuan na problema anna maski gazzi paga i kunnatun ira nga mali nga kefuku. Ngem egga paga klase na kawan tu hustisia nga mas mariga attamman na Cristiano ira.

4. Kunnasi nga mapurueban i pangurug na tadday nga Cristiano?

⁴ Ekspektan na Cristiano ira nga maka-ekspiriensa ira tu kawan na hustisia ta lawan na kongregasion. Ngem mapurueban i pangurug tam nu makasingan onu maka-ekspiriensa tam tu pagabbo tam nga kawan na hustisia ta unag na kongregasion. Anni i reaksiommu nu mangurug ka nga egga mali nga nakua nikaw ta kongregasion onu ta pakilallammu ta kapangngurug? Ipamavulummu kari nga mabbalin yatun tu kegafuan na kesiddukal?

5. Ngatta ari makaddag i tadday nga Cristiano nu makasingan onu maka-ekspiriensa tu kawan na hustisia ta kongregasion?

⁵ Megafu ta imperfekto tam ngamin anna egga tendensia tam nga makaliwa, ammu tam nga egga posibilidad nga awayyana tu maka-ekspiriensa tam mismu tu kawan na hustisia onu sittam i kegafuanna yatun ta kongregasion. (1 Juan 1:8) Maski nu ari gapa tu kanayun yatun, ari nga makaddag onu mesiddukal i matalo ira nga Cristiano nu mesimmu ira i kawan na hustisia. Makasta ta nangiyawa si Jehova tu praktikal nga tabarang ta Uvovugna tapenu makapattalupaddiattam nga matalo, maski nu mali i pattratu nittam na kapangngurug tam.—Sal. 55:12-14.

6, 7. Anni nga kawan na hustisia ta kongregasion i naekspiriensa na tadday nga brother, anna anni ira nga kualidad i nakoffun sa tapenu marubanna tu mapia yatun?

⁶ Ikonsidera i ekspiriensa ni Willi Diehl. Namegafu turi 1931, matalo yaya nga nasserbi ta Bethel ta Bern, Switzerland. Turi 1946, nagatende yaya ta mekawalu nga klase na Gilead School ta New York, U.S.A. Kabalin na klase, neyasayn yaya nga manangngal ta sirkito ta Switzerland. Ta istoria na pattolena, kunna: “Turi Mayo 1949, nipakannammù ta hedkuarter ta Bern nga planò ngana i mangatawa.” Anni i tabbag na ofisina ta Bern? “Awan tu pribilehio fuera laman ta pabbalin tu regular payunir.” Niyesplika paga ni Brother Diehl: “Ari ngà nga napamavulunan nga mappalappa . . . Aru i ari ngana mangitattannug nikami, nga tratuadda kami nga kagitta na nadisfellowship.”

⁷ Kunnasi nga inarubang ni Brother Diehl yatun nga situasion? Kunna: “Ammumi nga i pangatawa ay ari megamma ta Biblia, yatutta kanayukkami nakimallo anna nammakatalo kani Jehova.” Turi kua, netunung gabbalaman i mali nga pagimamma ta pagatawa nga kegafuan na kawan na hustisia, anna netoli i pribilehio ira ta serbisio ni Brother Diehl. Nabala-balakkan i kinamatalona kani Jehova. * Makasta nu iyavu  ta baggi tam: ‘Makepasingannà kari gapa tu kunnatun nga espiritual ng pagimamma nu meparubannà ta kawan na hustisia? Pasensiakku kari nga innaggan si Jehova, onu egga tendensià nga ipay i ganna-gannug ta limà?’—Prov. 11:2; bibbigan i Mikias 7:7.

8. Ngatta awayyana tu mali i pagabbo tam nga nabiktima ittam onu i tanakuan na kawan na hustisia?

⁸ Awayyana tu mali i pagabbomu nga nabiktima ka na kawan na hustisia onu nabiktima i kakongregasiommu. Mesimmu yatun megafu ta imperfekto nga pagimamma tam ta ganna-gannug onu ariattam ammu i ngamin nga detalye. Maski nu anni paga tatun, fustu onu mali i pakalippawa tam ta ganna-gannug, mafugaddan ittam nga ‘maggazzi mekontra kani Jehova’ nu ipakimallo tam i pangigiyana anna mammakatalo tam sa.—Bibbigan i Proverbio 19:3.

9. Anni ira nga angngarigan i ikonsidera tam taw nga artikulo anna ta tumunug?

⁹ Innattam i tallu nga angngarigan na kawan na hustisia nga nesimmu ta aripan ni Jehova ta tiempo na Biblia. Taw nga artikulo, ikonsidera tam i afu ta tug ni Abraham nga si Jose anna i ekspiriensana ta wawwaragina. Ta tumunug nga artikulo, usitakkattam i pakilallang ni Jehova kani Patul Ahab na Israel kunne na gapa ta ekspiriensa ni apostol Pedro ta Siria Antiokia. Durante nga paguvovugattam yaw ira, innammu nu anni ira magigiammum tapenu moffunakka nga maffokus ta espiritual anna mapattalupaddian i relasiommu kani Jehova, neerulay nu mangurug ka nga naka-ekspiriensa ka tu kawan na hustisia.

10, 11. (a) Anni ira naekspiriensa ni Jose nga kawan na hustisia? (b) Anni i oportunidad ni Jose durante nga nefuku?

¹⁰ Naka-ekspiriensa tu kawan na hustisia si Jose nga matalo nga aripan ni Jehova, ari laman nga ta dayu ira, nu ari, mas mataki paga, ta mismu nga wawwaragina. Turi ta bagitolay ngana si Jose, fuersadu nga inà yaya na wawwaragina tapus nilakuda yaya bilang aripan. Neyangay yaya ta Ehipto mekontra ta urena. (Gen. 37:23-28; 42:21) Pappasa na piga tiempo tatun nga tanakuan nga lugar, falso nga naakusan yaya ta plano nga par-rape anna nefuku yaya maski awan tu kasona. (Gen. 39:17-20) Nabbayag tu 13 dagun i pazziga-rigana bilang aripan anna presu. Anni ira i magigiammu tam ta ekspiriensa ni Jose nga makoffun nittam nu meparubang ta kawan na hustisia megafu ta kapangngurug?

¹¹ Egga i oportunidad ni Jose nga ikagi i kasona ta kasi-presuna. Yatun nga presu ay i dati nga panakallan na katiwala na kopa na patul. Durante nga nakafuku da Jose anna i katiwala, nattatageno i katiwala, tapus nipakanawag yatun ni Jose. Kinagina nga metoli i katiwala ta posisionna ta korte ni Faraon. Ta pangikagi ni Jose taw nga interpretasion nga naggafu ta Dios, niyesplikana gapa i mismu nga situasionna. Dakal i magigiammu tam ari laman ta kinagi ni Jose, nu ari, maski paga ta arianna nga kinagi.—Gen. 40:5-13.

12, 13. (a) Kunnasi nga ipasingan na kinagi ira ni Jose nga arianna ngana laman basta inaksepta i kawan na hustisia ira nga neparubang sa? (b) Anni ira nga detalye i ari nga kinagi ni Jose ta pakiyuvovugna ta katiwala na kopa?

¹² Bibbigan i Genesis 40:14, 15. Daddamman nga tinukoy ni Jose i baggina bilang “fuersadu nga nalà.” Ta orihinal nga termino, egga literal nga kebalinanna yatun nga “nakoko.” Manawag nga biktima yaya na kawan na hustisia. Kinagi paga ni Jose nga ari yaya nga nakakua tu krimen yatutta nefuku yaya. Yatun i rason nga kinagina ta katiwala na kopa nga kagianna kani  Faraon. Ngatta? Niyesplikana i gakkagna: “Tapenu makalawannà taw nga lugar.”

¹³ Tatun kari ira nga kinagi ni Jose, makagi nga basta ngana laman inakseptana i situasionna? Siguradu nga ari. Ammuna nga biktima yaya na aru nga kawan na hustisia. Manawag nga niyesplikana i detalye ira ta katiwala na kopa, nga awayyana tu egga ta posision nga manguffun sa. Ngem takkilalammu nga awan tu kagian na Katurakan nga egga pinakkagianan ni Jose—maski paga kani Faraon—nga i wawwaragina ira i fuersadu nga nangà sa. Kakuruganna, turi ta minay i wawwaragina ira ta Ehipto anna nakippakoma kani Jose, inalawa ira ni Faraon anna inimbitana ira nga maddian ta Ehipto anna magayaya ta “kapianan ta interu nga davvun.”—Gen. 45:16-20.

14. Anni i makoffun nittam tapenu melilli ta silu na negatibo nga paguvovug nu makaekspiriensa ittam tu kawan na hustisia ta kongregasion?

¹⁴ Nu kurugan na tadday nga Cristiano nga nabiktima yaya na kawan na hustisia, arianna nakuan makisali ta makadaral nga tsismis. Siempre, mepangngo nga makiyoffun yaya ta elder ira anna ikagina nira nu egga tadday nga miembro na kongregasion nga nakaliwa. (Lev. 5:1) Ngem aru nga kaso i ari mabba nga madammo nga liwa, yatutta posible nga maresolba i ari pakkarantindian maski nu awan tu mesali nga tanakuan, maski paga i elder ira. (Bibbigan i Mateo 5:23, 24; 18:15.) Matalo tam nakuan nga tangngallan i kunnatun ira nga gannug metonos ta prinsipio ira na Biblia. Ta karuan nga kaso, malippawa tam gabbalaman nga ari ittam biktima na kawan tu hustisia. Mappabalo ittam ta ariattam pinaggrabe i situasion gukaban na panaral ta reputasion na kapangngurug tam! Daddamman nga maski nu fustu onu mali ittam, awan vuluvuga tu meyuffun na makapataki nga paguvovug tapenu makkasta i situasion. Makoffun nittam i kinamatalo kani Jehova anna ta kapangngurug tam ira tapenu malillitan i kunnatun nga liwa. Meyannung ta “makimoray ta Dios ta ngamin nga adde na,”  kinagi na salmista nga yaya ay “ari nga mamara-parake ta ikattolay; ari nga mangngua tu marakay ta kakkofun na, ni mangipala-palakag ta makadaral ta kadduba ira.”—Sal. 15:2, 3; Sant. 3:5.

15. Ngatta makagi nga talaga bendision kani Jose i relasionna kani Jehova?

¹⁵ Egga importante nga leksion nga magigiammu tam ta relasion ni Jose kani Jehova. Ta unag na 13-dagun nga pazziga-riga ni Jose, nipasinganna nga kagitta ni Jehova i pagimammana ta ganna-gannug. (Gen. 45:5-8) Arianna vuluvuga pinaliwa si Jehova megafu ta situasionna. Arianna nakattamman i marake ira nga nappasanna, ngem ari nga nakalussaw megafu tatun. I pinaka-importante ta ngamin, arianna nipamavulun i kina-imperfekto anna kamali na tanakuan nga mangiyarayyu sa kani Jehova. Megafu ta kinamatalo ni Jose, nasinganna i lima ni Jehova nga mangitunung ta kawan na hustisia, nga namendision sa anna ta familiana.

16. Ngatta mawag nga mas umaranni tam kani Jehova nu maka-ekspiriensa tam tu kawan na hustisia ta kongregasion?

¹⁶ Mawag gapa nakuan nga tagibaloran anna immugurattam i relasiottam kani Jehova. Ariattam nakuan pulus ipamavulun nga i kina-imperfekto na wawwaragi tam i mangisinna nittam ta ideddukan anna dayarayawattam nga Dios. (Roma 8:38, 39) Nu maka-ekspiriensa tam lallagu tu kawan na hustisia megafu ta kapangngurug tam ira, parigattam si Jose anna mas umaranni paga kani Jehova, nga mappursigi nga parigan i pagimammana ta ganna-gannug. Nu nakua tam ngana i ngamin tapenu maayus i situasion segun ta Katurakan, mawag nga ipammakatalo tam ngana i ngamin kani Jehova, nga makkomfiansa nga tununganna yatun ta oras anna ta metodona.

17. Kunnasi tam mepasingan nga makkomfiansa tam ta “Ukum na interu davvun”?

¹⁷ Megafu ta mattoletam taw nga sistema na ganna-gannug, ekspektattam nga maka-ekspiriensa tam tu kawan na hustisia. Nu karuan gapa, awayyana tu maka-ekspiriensa onu makemamma ka onu i tanakuan tu pagabbomu nga kawan na hustisia ta kongregasion. Ari ka nakuan mesiddukal. (Sal. 119:165) Sigga-makatalo anna sigga-pakimallo tam lallagu nga mattiwala ta Dios bilang matalo ira nga aripanna. Sigga-pakalinno gapa nga akseptattam nga awayyana tu ariattam ammu i ngamin nga detalye. Ammu tam nga makaliwa ittam megafu ta imperfekto nga pagimamma tam ta ganna-gannug. Durante nga makagigiammu tam ta ehemplo ni Jose, kayà tam nga lillitan i negatibo nga uvovug, megafu ta ammu tam nga mamaggrabe yatun ta situasion. Imbes nga solbattam yatun, determinadu tam nakuan nga mammakatalo anna mapasensia nga maginnag ta pangitunung ni Jehova ta ganna-gannug. Siguradu nga mangirattal yatun ta fabor anna bendision ni Jehova, kagitta na nesimmu kani Jose. Wan, masiguradu tam nga si Jehova, “i Ukum na interu davvun,” ay kanayun nga kuanna i matunung, megafu ta “hustisia i ngamin nga dala-dalanna.”—Gen. 18:25; Deut. 32:4.

18. Anni i ikonsidera tam ta tumunug nga artikulo?

¹⁸ Ta tumunug nga artikulo, ikonsidera tam i dua nga angngarigan na ari patas nga pattratu nga nesimmu ta aripan ni Jehova ta tiempo na Biblia. Nu repasuattuam yaw ira nga rekord, masingattam nu anni i koneksion na kinapakalinno anna pamakoma ta pagimamma ni Jehova ta hustisia.