1, 2. (a) Anni i kinagi da Elifaz anna Bildad meyannung ta efekto na passerbi ta Dios? (b) Anni i matageno ni Jehova tatun?

“EGGA kari i serbi na tadday nga lalaki ta Dios? Mabenefisiowan kari yaya ta tadday nga egga i pakalippawana? Magayaya kari i Makapangngua-ta-ngamin nu matunukka? Onu mabenefisiowan kari yaya nu tuttulammu i dalan na kinamatalo?” (Job 22:1-3) Nanonomu ngana kari i tabbag tatun ira nga pakkiavu? Turi ta ollu nga niyavu ni Elifaz nga Temanita yatun kani Job, manawag nga mangurug yaya nga ari i tabbag. Kagian gapa na kavuluna nga si Bildad nga Shuhita nga ari posible para ta tolay i matunung nga taddag ta arubang na Dios.—Bibbigan i Job 25:4.

² Kagiadda danaw nga minaggappappe nga mamanna-bannay nga awan vuluvuga tu kuenta kani Jehova na pappursigi tam nga masserbi sa, nga i balor tam ta Dios ay gittana laman na angì, tuggì onu na ulag. (Job 4:19; 25:6) Nu nonopammu, kagittana nangipasingan gapa tu kinapakalinno da Elifaz anna Bildad. (Job 22:29) Nu egga ta tuppag na atannang nga vukig onu ta benta na eroplano, awan tu kuenta na kukukuan na totolay. Ngem, kunnatun kari i pagimamma ni Jehova ta kontribusiottam para ta Pappatulan durante nga iinnanna i planeta tam ta atannang nga lugarna?  Nikagi ni Jehova i matagenona turi ta nivuyana da Elifaz, Bildad anna Zofar ta falso ira nga uvovugda ngem nagayaya yaya kani Job, nga tinukoyna bilang i “aripakku.” (Job 42:7, 8) Yatutta, egga talaga “i serbi na tadday nga lalaki ta Dios.”

3. Anni i kinagi ni Elihu meyannung ta appursigi tam nga masserbi kani Jehova, anna anni i kayàna kagian?

³ Ari tinunung ni Jehova si Elihu ta pangiyavuna: “Nu talaga matunukka, anni i meyawa mu sa; anni i malawàna nikaw?” (Job 35:7) Kayà kari kagian ni Elihu nga awan tu serbi na appursigi tam nga masserbi ta Dios? Ari. Kayàna kagian nga ari maddepende si Jehova ta paddayaw tam. Kumpleto si Jehova. Ariattam mapariku onu mapasikan yaya. Ngem, anni laman nga kapianan, abilidad, onu sikan nga egga nittam ay nitalo nittam na Dios, anna innanna nu kunnasi tam usan yatun.

4. Kunnasi imammatan ni Jehova i kinasippo tam ta tanakuan?

⁴ Imammatan ni Jehova nga personal nga kingngua sa i matalo nga aya nga nepasingan ta aripanna ira. “I mangipasingan tu fabor ta pobre ay mappagatu kani Jehova, anna bala-balakkanna yaya megafu ta kuanna,” kunna Proverbio 19:17. Kayà kari kagian naw nga teksto nga ilista ni Jehova i kada kingngua tam nga kinasippo ta pobre ira? Makagi tam kari nga ikonsidera na Namaratu ta uniberso nga nakagatu yaya ta totolay nga nangipasingan tu allo anna imammatanna nga pagatu yatun nga paganna tu fabor anna bendision? Wan, anna pinakurug yatun na mismu nga Ana na Dios.—Bibbigan i Lucas 14:13, 14.

5. Anni ira nga pakkiavu i ikonsidera tam?

⁵ Inimbita ni Jehova si profeta Isaias nga maguvovug para Sa, nga kinagina i pagayayana ta matalo nga totolay nga makiparte ta ketuppal na gakkagna. (Isa. 6:8-10) Sigga-paran nga inaksepta ni Isaias yatun nga imbitasion. Ta kaggawattam, rinivu i nangidemonstra ta parehu nga “Azzaw ngà! Dobannà!” nga espiritu ta panga tu mariga ira nga asayment ta passerbi kani Jehova. Ngem, awayya paga iyavu na tadday: ‘Egga kari i kuenta na pappursigì? Maski nu mabboluntario ngà onu ari, ari kari nga siguraduan ni Jehova nga matuppal i trabahu? Natagenomu ngana kari yatun?’ Ikonsidera nu kunnasi tabbagan yatun ira nga pakkiavu nga nesimmu turi ta tiempo da Debora anna Barak.

6. Anni i nadduman na Israelita ira kumpara ta armada ni Jabin?

⁶ I Israelita ira ay “vayolente nga ziniga-riga” ni Patul Jabin na Canaan ta unag na 20 dagun. Maganassing nga mallawan i totolay. Ta pagimamma na militar, awan tu pakawayyada, megafu ta awan tu armasda onu paddefensada, ngem egga 900 nga karuahe nga pakiggerra nga konsu balayang nga panabas i kalabadda ira.—Uk. 4:1-3, 13; 5:6-8. *

7, 8. (a) Anni i ollu nga instruksion nga niyawa ni Jehova kani Barak? (b) Kunnasi inaffu na Israel i armada ni Jabin? (Innan i letratu ta gafu na artikulo.)

⁷ Ngem, nangiyawa si Jehova tu manawag nga bilin kani Barak gukaban ni Debora nga profetisa: “Mune ka anna mammartsa ka ta vuku-vukig na Tabor, anna mangivulu ka tu 10,000 nga lallaki na Neftali anna na Zabulon. Iyawà ku nikaw si Sisera, i panakallan na armada ni Jabin, anna i karuahena ira nga pakiggerra anna suddaluna ira  ta bannag na Kison, anna iyawa ku ira ta limam.”—Uk. 4:4-7.

⁸ Nawwara i dumug. Nattaradday i boluntario ira ta Vukig na Tabor. Insigida kingngua ni Barak i instruksion ira ni Jehova. (Bibbigan i Ukum Ira 4:14-16.) Turi ta gerra ta Taanak, gavva laman nagurang tu masikan yari tu naffuyo i pallevu. Zinaddanan ni Barak i armada ni Sisera adde ta Haroset—nga ma-24 kilometro. Ta pattammang ni Sisera, binattanna i kappaganassing ngem awan ngana tu serbina nga karuahe tapus nakkarela yaya ta Zaanannim, nga awayyana tu aranni ta Kedesh. Nattagu yaya ta tolda ni Jael nga atawa ni Heber nga Kenita, anna pinadulona yaya. Megafu ta bannagna ta gerra, nakakatrug yaya. Tiansa ngana ni Jael nga patayan si Sisera. (Uk. 4:17-21) Naffu i kalaban na Israel! *

9. Anni ira nga detalye i iyawa na Ukum Ira 5:20, 21 meyannung ta gerra kontra kani Sisera?

⁹ Maggiddang nakuan nga gigiammuan i kapitulo 4 anna 5 na Ukum Ira megafu ta i kada kapitulo ay mangiyawa tu detalye nga awan ta kataggi-tadday. Angngariganna, netura ta Ukum Ira 5:20, 21: “Ta langi nakillaban i biti-bitun, mamegafu ta pallevutadda nakillaban ira kani Sisera. Neyanug ira na bannag na Kison.” Egga kari nanguffun nira nga anghel, onu egga i nataga ira nga bulalakaw? Ari kagian na rekord. Ngem, anni paga kari fuera ta panguffun na Dios i pangikonektattam ta masikang nga urang anna eksakto nga lokasion anna ta eksakto nga tiempo, nga nangiludag ta 900 nga karuahe nga pakiggera? Namittallu nekagi ta Ukum Ira 4:14, 15, nga i pavviktoria ay megafu kani Jehova. Awan ta 10,000 nga Israelita i makepalagopog meyannung tatun nga kepaliag.

10, 11. Anni i “Meroz,” anna ngatta nebariaw yatun?

¹⁰ Usitakkan i tadday nga gannug nga makapa-interes. Kabalin na pavviktoria na Israel, nakkansion tu paddayaw kani Jehova da Debora anna Barak: “‘Ibariaw i Meroz,’ kunna anghel ni Jehova, ‘wan, ibariom i maddian ira sa, megafu ta ariadda minay tapenu uffunan si Jehova, tapenu uffunan si Jehova nga kavulu i makapangngua ira.’”—Uk. 5:23.

¹¹ Mananawag nga permanente nga nebariaw i Meroz nga mariga ngana mammuan nu anni talaga yatun. Siudad kari yaw na totolay nga ari nagginna ta agal nga mabboluntario? Nu nadalanan ni Sisera yatun ta pattammanna, egga kari i tiansa na totolay tatun nga gafutan yaya ngem ariadda kingngua? Ngatta ariadda nammuan i pangagal ni Jehova tu boluntario ira? Mafulu rivu nga totolay ta rehiodda i pinattaradday para tatun nga gerra. Manonomu nga masingan na taga-Meroz yaw nga vayolente nga suddalu nga makkara-karela ta lugarda nga magitetadday anna desperado. Makakkasta nakuan nga tiansa yatun tapenu metuppal i gakkag ni Jehova anna maekspiriensa i bendisionna. Ngem, turi ta egga i tiansada nga mangngua tu gannug para kani Jehova, awan tu kingnguada. Talaga neruma yatun ta magutu nga kingngua ni Jael nga nerekord ta tumunug ira nga bersikulo!—Uk. 5:24-27.

12. Anni i madduma nga pagimamma na totolay i mabibbig ta Ukum Ira 5:9, 10, anna kunnasi nakuan makafekto yatun nittam?

¹² Ta Ukum Ira 5:9, 10, masingattam paga i madduma nga pagimamma danuri nammartsa kavulu si Barak anna danuri ari nevulu. Kinomendan da Debora anna Barak i “kumandante ira na Israel, nga nabboluntario kavulu i totolay.” Talaga tanakuan ira  turi ta “nakatakay ta makangila nga uzzin ira nga babay nga asno,” nga kuruga mapakatannang nga makipartisipa, anna turi ta ‘nagitubang ta makakkasta ira nga karpet,’ nga mappalapagustu ta pattolay! Ari tu kagitta danuri na ‘liminakag ta dalan,’ nga pinilida i mabi nga dalan, danuri nevulu kani Barak ay sigga-paran nga nakiggerra ta binatu nga vukig na Tabor anna ta finuyo nga lugar na Kison! Ngamin danuri mappalapagustu ay napagaram nga ‘mangusito!’ Wan, kawagadda nga nonopan tu mapia i nawawadda nga oportunidad tapenu manguffun ta gakkag ni Jehova. Yatutta, kunnatun gapa nakuan danuri ariadda siguradu nga masserbi ta Dios.

13. Kunnasi neduma i pagimamma na tribu da Ruben, Dan, anna Aser kumpara kada Zabulon anna Neftali?

¹³ Nemammatan danuri nabboluntario nu kunnasi mismu nipasingan ni Jehova i soberaniana. Egga i makasta nga meyistoriada durante nga “ipaka-pakolida i matunung ira nga kingngua ni Jehova.” (Uk. 5:11) Ngem danuri tribu da Ruben, Dan, anna Aser ay nakagi ta Ukum Ira 5:15-17 ta pangiyawada tu mas aru nga atension para ta material ira nga interes—gittana masingan ta aya-ayam, barku, anna pantaladda ira—anne ta trabahu nga ikiddaw ni Jehova. Tanakuan gapa da Zabulon and Neftali nga “nipeda ta peligro i inangoda adde ta patay” tapenu suportan da Debora anna Barak. (Uk. 5:18) Egga i importante nga leksion para nittam naw nga makkadduma nga pagimamma ta pabboluntario.

14. Kunnasi tam mepasingan i passuporta tam ta soberania ni Jehova?

¹⁴ Ta maddaggun, ari ittam nagalan tapenu makiggera, ngem egga i pribilehio tam nga ipasingan i kinagutu gukaban na matalikarag nga pallayyagayya. Mas aru i pakawagan ta maddaggun tu boluntario ta organisasion ni Jehova. Minillion nga brother, sister, anna abbarabbing i mabboluntario ta nadduruma nga klase na ngamin-tiempo nga serbisio bilang payunir, Bethelite, boluntario ta konstruksion na Kingdom Hall,  anna bilang boluntario ta asembli anna ta kombension ira. Nonopan gapa danuri elder ira nga egga i madammo nga responsibilidadda ta Hospital Liaison Committee anna pangorganisa tu kombension. Makasiguradu ka nga talaga appresian ni Jehova i sigga-paran nga espiritum, anna arianna vuluvuga kattamman yatun.—Heb. 6:10.

15. Kunnasi tam mammuan nga matalikarag tam paga ta trabahu kani Jehova?

¹⁵ Iyavu na kataggi-tadday ta baggi tam: ‘Kontentu ngà kari nga tanakuan laman i mangiyabaga ta madammo ira nga responsibilidad? Ipamavulukku kari nga makefugag ta pabboluntariò i ari mepangngo nga pakkaraga ta material? Kagitta da Barak, Debora, Jael, anna na 10,000 nga boluntario, egga kari i pangurug ku anna sikan na nono nga usan i anni laman nga egga niakan tapenu tuppalan i manawag nga dob ni Jehova? Nu egga planò nga magali ta tanakuan nga siudad onu nasion tapenu magaleg tu mas atannang nga sueldu, sigga-pakimallo ku kari nga ikonsidera i efektona yatun ta familià anna ta kongregasion?’ *

16. Anni i meyawa tam kani Jehova nga awan paga sa?

¹⁶ Iddan ittam ni Jehova tu dignidad gukaban na pangipamavulun nittam nga makiparte ta passuporta ta soberaniana. Namegafu turi ta sinenta na Diablo i totolay nga suportan i pammagurena, daka-dakal i efekto na kani Satanas i passuporta tam ta pammaguray ni Jehova. I pangurug anna integridad nga motibom ta pabboluntario ay talaga makapagayaya kani Jehova. (Prov. 23:15, 16) Nu mammasirib ka, usanna yatun tapenu tabbagan i panutturia ni Satanas. (Prov. 27:11) Yatutta, gukaban na matalo nga panuttulmu, gittana mangiyayawa ka kani Jehova tu ikonsiderana nga mabalor, anna talaga makapagayaya yatun sa.

17. Anni i ipasingan na Ukum Ira 5:31 para ta mappange?

¹⁷ Aranni ngana nga mapannu i davvun tu totolay nga mas piliadda i soberania ni Jehova anne ta tanakuan. Kuruga iddanamattam yatun nga tiempo! Makkansion tam gapa gitta da Debora anna Barak: “Yatutta ipamavulummu nakuan nga madaral i kalabammu ira, O Jehova, ngem ipamavulummu danuri mangaya nikaw nga megitta ta pallattuag na bilag ta pakapangnguana.” (Uk. 5:31) Mesimmu yatun nga pakimallo sonu pangultimuan ni Jehova i marake nga mundo ni Satanas! Sonu mamegafu i gerra na Armagedon, ari ngana mawag i boluntario na totolay ira tapenu affutan i kalaban. Yatun noka i tiempo para nittam nga ‘mattalupaddian nga agga-taddag, anna innan i pangipaliag ni Jehova nittam.’ (2 Cro. 20:17) Ngem ta maddaggun, aru i oportunidad para nittam tapenu suportan i gakkag ni Jehova nga egga sikan na nono anna talikaragna.

18. Anni i efekto na pabboluntariom ta tanakuan?

¹⁸ “Megafu ta pabboluntario na totolay, dayawannu si Jehova!” Yatutta, nigafu da Debora anna Barak i kansion na viktoriada nga idayona, ari i naparatu ira, nu ari, i Katannangan. (Uk. 5:1, 2) Kunnatun gapa, nu masserbi ittam kani Jehova ta maski anni nga kawagan, mapagaram gapa i tanakuan nga ‘dayawan si Jehova!’