1. Anni i niprofesiya ni Isaias meyannung kani Jesus, anna ngatta makapagaram yaw?

GUKABAN na profesiya ni Isaias meyannung ta Yafu tam nga si Jesu-Cristo, mapasikan anna mabanna-bannayan i giffutuattam. Niprofesiya ni Isaias nga si Jesus ay “arianna mangukum segun ta masinganna, onu manisiplina megafu laman ta maginnana.” Kunna paga, “patas noka i panentensiana ta pobre.” (Isa. 11:3, 4) Ngatta makapagaram yaw? Megafu ta mattolay ittam ta mundo nga nepallo i faboritismo anna pangireruma. Talaga karagatattam i perfekto nga Ukum nga ari vuluvuga mangukum base laman ta masingan!

2. Anni i nibilin ni Jesus nga kuattam, anna anni i gigiammuattam taw nga artikulo?

² Kanayun nga egga i makagi tam ta totolay. Ngem megafu ta kina-imperfekto tam, ari tu perfekto i pagimamma tam nga kunna pagimamma ni Jesus. Egga tendensia tam nga mainfluwensian na masingan na mata tam. Maski kunna, nibilin ni Jesus ta keggana taw ta davvun: “Ari kamu nga manentensia segun ta kasissinnan, nu ari segun ta tunung.” (Juan 7:24) Manawag nga kayà ni Jesus nga maparigattam yayya nga ari mangukum base ta masingan. Taw nga artikulo, gigiammuattam i tallu nga aspeto nu sitaw maruddu nga mainfluwensian i totolay na masingadda: lahi,  kinariku, anna edad. Ta kada aspeto, ikonsidera tam i praktikal ira nga makua tapenu matuttul i bilin ni Jesus.

3, 4. (a) Anni ira nesimmu nga nanguli ta pagimamma ni Pedro ta Hentil ira? (Innan i letratu ta gafu na artikulo.) (b) Anni nga bagu nga kinakurug i nipalippawa ni Jehova kani Pedro?

³ Nonopan ngana laman i mamanggulu ta nono ni Pedro turi ta nagalan yayya nga umay ta Cesarea ta balay na Hentil nga si Cornelio. (King. 10:17-29) Kagitta na Judio ira ta kaggawan ni Pedro, nedakallanna i pangurug nga maritta i Hentil ira. Ngem, egga ira i nesimmu nga nanguli ta pagimamma ni Pedro. Angngariganna, egga i sirmata nga nasinganna. (King. 10:9-16) Anni i nasingan ni Pedro? Nappagukag sa i gittana ulo nga alluganan nga ta unag natun ay i ngamin nga klase na ayam nga mekwenta tu maritta, ay egga i ngaral ta langi nga nakkagi: “Pedro, lukka ka! Mapparti ka anna kumak-ka!” Nitagga ni Pedro i nammanaki. Ngem kinagi na ngaral sa nga ‘arianna kagian tu maritta i kanan nga kinagi na Dios tu makan.’ Turi ta nalukag si Pedro ta sirmata, naguluan yayya nu anni i kayà kagian na ngaral sa. Tapus, zimittal ngana gapa i mensaheru ira ni Cornelio. Kabalin nga nakala ni Pedro tu direksion ta masanto nga espiritu, kinagumanna nga umay anna nevulu gabbalaman ta mensaheru ira ta balay ni Cornelio.

⁴ Nu inukum ni Pedro i ganna-gannug base laman ta lahi, arianna nakuan vuluvuga nga simillung ta balay ni Cornelio. Ari nga babbasta nga tullung i Judio ira ta babalay na Hentil ira. Ngem, ngatta nattuloy lagapa si Pedro maski ta nepallo nga pangireruma? Dakal-dakal i efekto sa na sirmata nga nasinganna anna i pamasiguradu nga nalawana ta masanto nga espiritu. Ta pakaginnana ta kinagi ni Cornelio, siguradu nga napagaram si Pedro, nga nakkagi: “Malippawa ku ngana sangoye tu i Dios ay arian na nga padduma-ruman i pangikakua na ta totolay. Ta alawatan na i sinni laman nga matunung anna minakkimoray sa, maski nu anni nga rasa i naggafuan na.” (King. 10:34, 35) Talaga kappabbaw nga bagu nga pakalippawa yatun ta parte ni Pedro​—nga egga paga i efektona adde ta maddaggun! Kunnasi makafekto ta ngamin nga Cristiano yaw nga kinakurug meyannung ta ari pangireruma?

5. (a) Anni i kayà ni Jehova nga malippawa na ngamin nga Cristiano? (b) Maski kagiammu nga ari ka mangireruma, anni i awayyana nga ari paga interamente nga nalsa?

⁵ Gukaban ni Pedro, uuffunan ni Jehova i ngamin nga Cristiano tapenu alippawatan nga ari Yayya nga mamadduma-ruma. Ari importante sa i padduruma megafu ta rasa, lahi, tribu, onu lengguahe. Maski sinni nga lalaki onu babay nga maganassing ta Dios anna kuanna nu anni i matunung ay faboranna. (Gal. 3:26-28; Nep. 7:9, 10) Siguradu nga umanugu ka tatun. Ngem kunnasi nu ziminakal ka ta nasion onu ta balay nga grabe i pangireruma? Maski kagiammu nga ari ka mangireruma, awayyana nga ariammu paga interamente nga nalsa yatun. Maski si Pedro nga nakkapribilehio nga makkagi nga ari mangireruma si Jehova, turi kua nakepasingan lagapa yayya tu pangireruma. (Gal. 2:11-14) Kunnasi tam tuttulan si Jesus anna magimmang nga manentensia base ta masingan?

6. (a) Anni i makoffun nittam tapenu mabattul ta futu tam i tendensia nga mangireruma? (b) Anni i ipasingan na report na tadday nga brother?

⁶ Memmugug nga usitakkan i baggi tam segun ta Biblia tapenu masingattam nu egga paga i nabattang nga pangireruma ta appana-panono anna panageno tam. (Sal. 119:105) Baka mawag tam gapa i meddu nga uffun na tanakuan nga makasingan ta mangireruma nga tendensia tam, maski nu ariattam mapansin yatun. (Gal. 2:11, 14) Awayya nga negamu ngana nittam danaw nga ugali yatutta ariattam mapansin danatun. Ikonsidera i angngarigan na tadday nga responsable nga brother  nga nangipasa tu report ta panga nga ofisina meyannung ta matalikarag nga magatawa nga masserbi ta ngamin-tiempo. Naggafu i atawa nga lalaki ta lahi nga maruddu nga tagibadditan na tanakuan. Ngem ari napansin na responsable nga brother nga egga i pangirerumana tatun nga lahi. Ta reportna, nangikagi yayya tu makkarasta nga gannug meyannung ta atawa nga lalaki; ngem, kunna ta ultimo: “Maski yayya ay [kunnaw i lahina], i kondukta anna i istilo na pattolena ay makoffun ta tanakuan tapenu malippawa nga maski [kunnaw i lahina], arianna kayà kagian nga dugyut, onu mababa i istilo na pattoleda, nga gagangay ta magaru [taw] nga lahi.” Anni i punto? Maski anni paga i responsibilidad tam, memmugug tam nakuan nga usitakkan i baggi tam anna sigga-paran nga alawatan i uffun tapenu mammuattam i seniales nga egga i pangireruma ta futu tam. Anni paga i makua tam?

7. Kunnasi tam mepasingan nga nakavuka tu mapia i futu tam?

⁷ Nu vukatattam tu mapia i futu tam, nga ariattam gaggaddan i pangaya tam, mepamavuluttam nga talianan na aya i pangireruma. (2 Cor. 6:11-13) Neyugaliammu kari nga makikofun laman ta kaparehum nga rasa, lahi, tribu, onu lengguahe? Nu kunna, mappalawa ka. Ngatta kammu imbitan danuri tanakuan i naggafuadda ta ministerio onu ta balenu tapenu kuman onu makipaddibersion? (King. 16:14, 15) Nu kuammu yatun, mapannu i futum tu aya nga awan ngana tu lugar na pangireruma. Ngem egga paga i tanakuan nga aspeto nga ireruma tam i tanakuan base ta masingan. Tumunug nga ikonsidera tam i kinariku ta material.

8. Segun ta Levitico 19:15, kunnasi afektan na kinariku onu kinapobre i pagimamma tam?

⁸ Tadday paga nga makafekto ta pagimamma tam ta tanakuan i kinariku ta material. Kunna Levitico 19:15: “Ariammu mangipasingan tu pangireruma ta pobre onu mangipasingan tu paffabor ta mariku. Gukaban na hustisia ay ukumammu nakuan i kasittolem.” Ngem kunnasi makafekto ta pagimamma tam i kinariku onu kinapobre na tolay?

9. Anni nga kaddaraddam nga kinakurug i nitura ni Solomon, anna anni i ituddu nittam natun?

⁹ Pinaguyu na masanto nga espiritu si Solomon nga itura i kaddaraddam nga kinakurug meyannung ta imperfekto nga totolay. Kunna Proverbio 14:20: “I pobre ay kala-kalussaw na kakarrubana, ngem aru i kokkofun na mariku.” Anni i ituddu nittam naw nga proverbio? Nu kattam magimmugug, awayyana nga kayà tam laman nga kofun i mariku nga wawwaragi anne ta pobre ira. Ngatta delikadu nga gukuran i balor na tanakuan base laman ta material nga kinarikuda?

10. Anni nga problema i kinagi ni Santiago?

¹⁰ Nu ukumattam i tanakuan base ta material nga kinarikuda, mamaddumu-ruma ittam ta kongregasion. Nangabiso i disipulo nga si Santiago nga naggrupo-grupo i ollu-siglo nga kongregasion megafu taw nga problema. (Bibbigan i Santiago 2:1-4.) Magimmugug tam nakuan nga ari ipamavulun nga afektan naw nga appanono i kongregasiottam ta maddaggun. Kunnasi tam labanan i kunnatun nga pangukum base ta masingan?

11. Makafekto kari i pabbalin tu mariku onu pobre ta relasion na tadday kani Jehova? Iyesplika.

¹¹ Imammatattam nakuan i wawwaragi nga kunna pagimamma ni Jehova. Ari nabalor i tadday kani Jehova megafu ta mariku yayya onu megafu ta pobre yayya. Ari vuluvuga nga determinan na karu na material nga pakkukua tam onu na kawan tu pakkukua i relasiottam kani Jehova. Kurug nga kinagi ni Jesus nga “kuruga mariga i attallung na riku nga tolay ta Pammagurayan na Dios,” ngem arianna kinagi nga imposible yatun. (Mat.  19:23) Kunna paga ni Jesus: “Mapalag kamu nga mariga, ta sikamu i makitappaddian ta Pammagurayan na Dios!” (Luc. 6:20) Ngem ari kayà kagian naw nga ngamin nga pobre ay mas mapalag anna mas maginteres ta tuddu ni Jesus. Aru nga pobre i ari nagginna. I punto: Ariattam magukug i relasion na tadday kani Jehova base laman ta material nga pakkukuana ira.

12. Anni nga giya i niyawa na Katurakan ta mariku anna ta pobre?

¹² Mapalag ittam nga aru i wawwaragi tam nga mariku anna pobre nga mangaya anna masserbi kani Jehova tu interu-futu. Ituddu na Katurakan ta riku nga ariadda “mammakatalo ta gannug ira nga mapawan gabbalaman; ngem mammakatalo ira ta Dios.” (Bibbigan i 1 Timoteo 6:17-19.) Tabarangngan gapa na Biblia i ngamin nga totolay na Dios, mariku onu pobre, nga magimmugug ta pangaya ta kuartu. (1 Tim. 6:9, 10) Wan, nu vukatattam i mata tam anna innan i wawwaragi nga kunna paningan ni Jehova nira, kattam matenta nga ukuman ira base ta material nga egga nira onu awan nira. Ngem kunnasi gapa i edad na tolay? Maladda kari nga basehan yatun ta paggukug nira? Innattam.

13. Anni i ituddu na Katurakan nittam meyannung ta pangirespeto ta mannakam?

¹³ Kanayun ittam tudduan na Katurakan nga irespeto i mannakam. Kunna Levitico 19:32: “Ta arubang na egga ubanna ay tumaddag ka, anna ikakuam nakuan i manakam nga lalaki, anna maganassikka nakuan ta Dios mu.” Kunna gapa na Proverbio 16:31 nga “i inubang nga ulu ay korona na kinakasta nu malegan ta dalan na kinatunung.” Kinagianan gapa ni Pablo si Timoteo nga ari nga sobra nga kritikan i mannakam nga lalaki, nu ari, imammatan ira nga yama. (1 Tim. 5:1, 2) Maski egga i relatibo nga autoridad ni Timoteo tatun nga manakam nga lallaki, tratuanna nakuan ira gukaban na allo anna respeto.

14. Ta anni nga situasion nga mepangngo para nittam nga tabarangngan onu disiplinan i tadday nga mas manakam nittam?

¹⁴ Ngem, adde sitaw i pagaddetan natun nga prinsipio? Angngariganna, maobliga ittam kari nga tumulu ta tadday nga mas manakam nu sigga-uray yayya nga mangngua tu liwa onu mangigafa-gafu tu gannug nga ari mamagayayya kani Jehova? Ari mangukum si Jehova base ta edad anna arianna kunsintian i sadya nga mangngua tu liwa megafu laman ta manakam ngana yayya. Sifutan i prinsipio nga mabibbig ta Isaias 65:20: “I minattagaruli ay mebariaw, maski nu magatu ngana i dagunna.” Nepasingan gapa i kunnatun nga prinsipio ta sirmata ni Ezekiel. (Eze. 9:5-7) Yari tu, kanayun nga mas importante nakuan i pangipasingattam tu respeto ta Ollu ta Aggaggaw, si Jehova nga Dios. (Dan. 7:9, 10, 13, 14) Nu kuattam yatun, kattam maganassing nga itunung i tadday nga magawag tu tabarang, maski anni paga i edadna.​—Gal. 6:1.

15. Anni nga leksion i magigiammu tam kani apostol Pablo meyannung ta pangirespeto ta mas abbing ira nga brother?

¹⁵ Kunnasi gapa danuri mas abbing nga brother ta kongregasion? Kunnasim ira imammatan? Kunni apostol Pablo ta abbing nga si Timoteo: “Ariam-mu nga ipamavulun tu egga i mangimelle nikaw megafu ta abbing ka paga. Ipasingam-mu lallagu tu awayya daka nga papparigan ta paguvovug mu, ta pangnga-pangnguam, ta pangaya mu ta ikattolem, ta pangurug mu, tuange ta attolem nga awan tu mancha.” (1 Tim. 4:12) Turi ta nitura yatun ni Pablo, maturu laman tu 30 i dagun ni Timoteo. Ngem, sinunno lagapa yayya ni Pablo nga mangiyabaga ta madammo ira nga responsibilidad. Maski anni paga i rason tatun nga tabarang, manawag i punto. Kattam nakuan ukuman i mas abbing ira nga brother base laman ta edadda. Makasta nu  daddammattam nga maski i Yafu tam nga si Jesus ay sinuppalna i ministeriona taw ta davvun durante nga maturu tu 30 laman i dagunna.

16, 17. (a) Kunnasi determinan na elder ira nu kualipikadu i tadday nga brother nga merekomenda tu ministerial nga aripan onu elder? (b) Kunnasi mekontra i personal nga pagimamma onu kultura ta Katurakan?

¹⁶ Baka parte na kultura tam nga tagibadditan i mas abbing nga lallaki. Nu kunna, awayyana nga magalangan i elder ira ta kongregasion nga irekomenda i kualipikadu nga abbing ira nga brother nga masserbi tu ministerial nga aripan onu elder. Daddamman nakuan na elder ira nga ari nangikagi tu mepangngo nga edad i Katurakan tapenu merekomenda i tadday nga lalaki nga mabbalin tu ministerial nga aripan onu elder. (1 Tim. 3:1-10, 12, 13; Tito 1:5-9) Nu mamadday tu annuttulan i tadday nga elder base ta kultura, arianna matuttul i Katurakan. Magukug nakuan i abbing nga lallaki, ari gukaban na personal nga pagimamma onu kultura, nu ari, gukaban na paggukuran na Uvovug na Dios.​—2 Tim. 3:16, 17.

¹⁷ Ikonsidera nu kunnasi nga ari nerekomenda i karuan nga kualipikadu nga brother megafu ta ari nebase-Biblia nga pagimamma. Ta tadday nga nasion, neddan tu madammo ira nga responsibilidad i tadday nga kualipikadu nga ministerial nga aripan. Maski umanugu i elder ira nga nadde ngana na abbing nga brother i kapa-kapianan nga kualipikasion ta Katurakan para ta tadday nga elder, ari yayya nerekomenda. Egga i piga nga lakay nga elder nga mangipipilit nga abbing i itsura natun nga brother tapenu mabbalin tu elder. Kaddaraddam, nafugaddan i katunnona megafu laman ta kasissinnanna. Maski tadday laman yaw nga ekspiriensa, segun ta report afektadu na kunnaw nga appana-panono i aru nga kongregasion ta mundo. Kuruga importante gafu nga mattalo ittam ta Katurakan imbes ta mismu nga kultura onu personal nga pagimamma tam! Yatun laman i makua tam tapenu tuttulan si Jesus anna iyemmang i pangukum ta tanakuan base ta masingan.

18, 19. Anni i mawag nga kuattam tapenu masingan i tanakuan base ta paningan ni Jehova?

¹⁸ Maski paga imperfekto ittam, magigiammu tam lagapa nga innan i tanakuan segun ta ari mangireruma nga paningan ni Jehova. (King. 10:34, 35) Ngem kawagan i tulu-tuloy nga appursigi ta parte tam anna kanayun nga pangiperaddam na Uvovug na Dios. Nu iyaplika tam danaw nga tabarang, mapprogreso ittam ta panuttul ta bilin ni Jesus nga iyemmang i mangukum base ta masingan.​—Juan 7:24.

¹⁹ Aranni ngana nga ukuman na Patul tam nga si Jesu-Cristo i ngamin nga totolay, ari nga gukaban na masingan na mata onu maginna na talinga, nu ari base ta kinatunung. (Isa. 11:3, 4) Anni mabba i kastana sangaw natun!