1. Anni ira i makua tam tapenu makipattrabahu kani Jehova?

DATI ngana nga plano na Namaratu nga makikoopera nisa i perfekto nga totolay tapenu ituppal i gakkagna ira. Maski nu imperfekto ngana sangawe i totolay, puede lagapa nga inaggaw nga makipattrabahu kani Jehova danuri matalo. Angngariganna, “katrabahu ittam na Dios” gukaban na pangilayyagayya ta mapia nga dumug na Pappatulanna anna pangngua tu disipulos. (1 Cor. 3:5-9) Nonopan ngana laman nu kunnasi kadakal nga pribilehio i mebilang nga mepangngo nga makikoopera ta makapangngua-sa-ngamin nga Namaratu ta uniberso ta trabahu nga importante nisa! Ngem, ari laman tu pallayyagayya anna pangngua tu disipulos i makua tam tapenu makipattrabahu kani Jehova. Magigiammu taw nga artikulo i karuan paga nga makua tam​—gukaban na panguffun ta kafamilia anna kapangngurug, pamadulo, anna pabboluntariu ta teokratiko ira nga proyekto, anna pamalawa ta sagradu nga serbisio tam.​—Col. 3:23.

2. Ngatta ari masirib nu ikumparam i makuam ta serbisio kani Jehova ta makua na tanakuan?

² Ta pangikonsidera taw nga material, ariammu ikumpara i makuam para kani Jehova ta makua na tanakuan. Daddamman nga nadduruma i edad, sikan, sirkumstansia, anna abilidad na kada  tolay. Nitura ni Pablo: “Mawag tu innan na kataggi-tadday i ikalangan na laggapa. Nu mapia, awayya na i magayaya ta kingngua na, anna ari ngana nga mawag tu iparig na ta kingngua na tanakuan nga tolay.”​—Gal. 6:4.

3. Ngatta makagi tam nga ngamin nga manangngal ta kawagan na familiada ay makipattrabahu ta Dios?

³ Ekspektan ni Jehova nga tangngallan na aripanna ira i giffamiliada. Angngariganna, mawag tu mattrabahu ittam tapenu meyawa i finansial nga kawagan na iddeddukattam ira. Maddian gapa ta babalay i yena tapenu tangngawan i ánada. Asikasuan gapa na adulto nga ána i makafi ngana nga maganada. Importante danaw nga aktibidad. Kagian na Biblia: “I tolay nga pagurayan na i parientes na, tallugaring ta kabbalay na, ay nallikuran na i angngurug na anna mas marakay anne paga ta ari nga Cristiano.” (1 Tim. 5:8) Nu egga kunnatun ira nga responsibilidad mu, awayyana nga ariammu ngana meyawa i aru nga tiempo nga kayà mu nakuan para ta teokratiko ira nga aktibidad. Kammu pakkafian i nono mu! Magayayya si Jehova nu iyawa mu i pakawagan na familiam.​—1 Cor. 10:31.

4. Kunnasi nga pagolluan na magana i teokratiko nga interes anne ta sarilida, anna anni i resulta natun?

⁴ Makikoopera i Cristiano ira nga magana kani Jehova nu uffunadda i ánada nga mapeggan tu teokratiko ira nga addetan. Aru nga nangngua tu kunnatun i namakurug nga turi kua, sinallung na anada nga babay onu lalaki i ngamin-tiempo nga serbisio maski nu arayyu ta baleda i asaymentda. Egga ira i nammisionero; nappayunir gapa i karuan nu sitaw mas dakal i pakawagan; nasserbi gapa ta Bethel i karuan. Megafu ta arayyu i asaymentda, ari ngana kuruga makapakkaravulu tu kanayun i familia. Ngem, ipagaram na minassakrifisio nga mappagana nga mattalupaddian i ánada ta asaymentda. Ngatta? Megafu ta kontentu ira anna dakal i ayayyada ta pakannammu nga pagolluan na ánada i interes na Pappatulan. (3 Juan 4) Posible nga matageno na aru taw nga magana i natageno ni Hana, nga nakkagi nga ‘nipekkaw’ na kani Jehova i anana nga si Samuel. Mepangngo laman nga imammatan danaw nga magana nga nabalor nga pribilehio i kunnatun nga pakikoopera. Ariadda karagatan nga tanakuan nakuan i pinili na ánada.​—1 Sam. 1:28.

5. Anni ira i praktikal nga meyuffummu ta kakongregasiommu ira? (Innan i letratu ta gafu na artikulo.)

⁵ Nu awan kuruga tu madammo nga responsibilidad mu ta familiam, awayyam kari uffunan danuri kapangngurug mu nga manangngal ta familiada anna danuri paga makafi, lakay onu bako, onu maski sinni nga magawag? Ngatta ariammu obserban i kongregasiommu anna ammuan nu sinni danuri magawag tu uffun? Baka puedem tubbatan i tadday nga sister ta panangngawna ta lakay onu bako nga maganana durante nga egga tanakuan nga asikasuanna. Onu puede nga uffunammu danuri magawag gukaban na paddaga onu pangitakay nira mappange ta study, vulunan nga maggatang, medog tapenu kuan i ganna-gannug, onu bisitan i mataki ta hospital. Nu kuammu yatun, awayyana tu makipattrabahu ka kani Jehova tapenu tabbagan i tadday nga pakimallo.​—Bibbigan i 1 Corinto 10:24.

6. Anni i nelagum ta pangipasingan tu pamadulo?

⁶ Kilala i katrabahu ira na Dios bilang minammadulo. Ta Cristiano nga Griego nga Katurakan, i kebalinan na termino nga netransleyt tu “mamadulo” ay “masippo ta dayu ira.” (Heb. 13:2) Mabibbig tam ta Biblia i rekord ira nga manuddu nittam nga mangipasingan tu kunnatun nga aya. (Gen. 18:1-5) Mawayya tam anna mawag tu kanayun nga approbetsattam i oportunidad ira nga manguffun​—ta “wawwagi tam ira ta angngurug” onu ari.—Gal. 6:10.

7. Ngatta makasta nga iplanom i mamadulo turi ira ta mabbisita nga egga ta ngamin-tiempo nga serbisio?

 ⁷ Awayyam kari makipattrabahu ta Dios gukaban na pamadulo ta mabbisita ira nga egga ta ngamin-tiempo nga serbisio? (Bibbigan i 3 Juan 5, 8.) Tiansa tam danatun nga tiempo tapenu “makkapasa-pasikan.” (Roma 1:11, 12) Innan i ekspiriensa ni brother Olaf. Meraddammanna nga aru nga dekada i nappasa, awan tu maski tadday ta kongregasionna i makawayya nga mamadulo ta manangngal ta sirkito, nga single. Niyavu na abbing nga si Olaf ta ari-Saksi nga maganana nu puede nga maddian ta baleda i manangngal ta sirkito. Minanugu ira ngem kagiadda nga makkatrug si Olaf ta sofa. Sulit yatun nga sakrifisio. “Kakkasta yatun nga tanga-ligguan!” kunni Olaf. “Kadaggaw, ummumma kami nga malukag na manangngal ta sirkito tapus paguvovugammi dua i napakaru nga interesante nga topiko durante nga maggug kami. Megafu tatun nga nalawà ku nga pamagaram, natolay i pakkaraga ku nga tallungan i ngamin-tiempo nga serbisio.” Ta nappasa nga 40 dagun, nakapasserbi si Olaf ta nadduruma nga lugar bilang misionero.

8. Anni ira i rasottam nu ngatta mangipasingattam tu kinasippo maski nu ari tu appresian yatun na tanakuan ta gafu? Mangistoria tu ekspiriensa.

⁸ Aru i makuam tapenu mepasingan i aya ta dayu ira maski nu ari maappresia i pappursigim ta gafu. Ikonsidera yaw nga angngarigan. Ta tadday nga pab-Bible study, napansin na publisher nga taga-Spain nga ari mafugaddan na estudiantena ta Biblia nga si Yesica nga taga-Ecuador i tumangi. Niyavu na publisher nu ngatta. Niyistoria ni Yesica nga nigena nagali ta Spain, poppobre yayya anna egga mittan nga awan tu makanna. I meyawana laman ta beybina nga babay ay danum. Ihehelena ngana laman i anana tapenu makakatrug, durante nga maddaddasal yayya. Ari nabbayag, egga dua nga Saksi nga nabbisita nisa, ngem ari tu makasta i pinangarubanna nira anna pinisilna i magazina nga niyoferda. “Yaw kari i makan nga kayànu nga iyawa ku ta ana ku?” niyavuna nira. Pinurueban na sister ira nga banna-bannayan yayya, ngem ari lagapa yayya nga nakkalma. Turi kua, nangibattang ira tu tanga-basket na makan ta lawan na balena. Natukkal i futu ni Yesica ta kinasippoda anna makonsensia yayya nga kanna pinansin i tabbag na Dios ta pakimallona. Ngem sangawe, determinadu ngana yayya nga passerbian si Jehova. Talaga makakkasta i efekto na kinavuka-palagda!​—Ecl. 11:1, 6.

9, 10. (a) Anni i karuan nga tiempo nga nagawag tu boluntariu ta Israel tagga? (b) Ta maddaggun, anni ira i pakawagan nga asikasuan na boluntariu nga lallaki ta kongregasion?

⁹ Ta nadduruma nga tiempo ta historia na Israel gari, kawagan i boluntariu ira. (Ex. 36:2; 1 Cro. 29:5; Neh. 11:2) Ta maddaggun, aru gapa i oportunidad mu nga iboluntariu i tiempom, pakkukuam, anna abilidad mu ira tapenu uffunan i wawwaragim. Makatageno ka tu dakal nga ayayya anna makalawa tu aru nga bendision nu iboluntarium i baggim.

¹⁰ Irekomenda na Biblia ta lallaki ta kongregasion nga makipattrabahu kani Jehova gukaban na paggawa ta pribilehio ira ta passerbi anna panangngal. (1 Tim. 3:1, 8, 9; 1 Ped. 5:2, 3) Karagatan danuri mangngua tatun nga uffunan i tanakuan ta praktikal anna ta espiritual. (King. 6:1-4) Neyavu ngana kari na elder nikaw nu sigga-paran ka nga masserbi bilang attendant onu kayà mu i mangasikasu ta literatura, teritoria, pammentena, onu tanakuan paga? Mapakurug danuri nangalawa ta kuddanatun nga trabahu nga talaga kappagayayya i manguffun ta tanakuan.

11. Kunnasi nabenefisiowan i tadday nga sister ta kokkofunna nga naleganna ta teokratiko ira nga proyekto?

¹¹ Maruddu nga makaleg tu bagu nga kokkofun danuri mabboluntariu ta teokratiko  ira nga proyekto. Innan i nesimmu kani sister Margie, nga 18 dagun nga nattrabahu ta proyekto ira ta konstruksion na Kingdom Hall. Ta pappasa na daga-ragun, aru nga kabataan nga sister i sinanayna. Imammatanna yatun nga ekspiriensana nga kakkasta nga tiansa nga makkinnapasa-pasikan ta tanakuan ta espiritual. (Roma 1:12) Ta mariga ira nga tiempo ta pattolay ni Margie, pinasikan yayya na kokkofunna nga naleganna ta konstruksion. Napuruebammu ngana kari i mabboluntariu ta kuddanatun? Maski egga i kalalakiammu onu awan, awayyam kari mabboluntariu?

12. Kunnasi ka makoffun ta tiempo na kalamidad?

¹² Nu egga i kalamidad, egga i tiansa na totolay na Dios nga makipattrabahu nisa gukaban na praktikal ira nga uffun ta wawwaragida. Angngariganna, mangiyawa ira tu finansial nga suporta turi ira ta nafektan. (Juan 13:34, 35; King. 11:27-30) Tadday paga nga praktikal nga makua ay i panguffun ta pappakarenu anna pappakappia. Nagayayya i sister nga taga-Poland nga si Gabriela, turi ta egga i wawwaragi nga naggafu ta kabiko ira nga kongregasion i minay nga nanguffun nisa megafu ta nadanung i balena. “Kakku kayà nga pabbidan i nawawwan niakan​—material laman danari,” kunna. “Kayà ku lagu nga istorian nikamu nu anni i nalà ku. Gafu taw nga ekspiriensa, nepasiguradu niakan nga espesial nga pribilehio i pabbalin tu parte na Cristiano nga kongregasion, anna paggafuan gapa yatun na ayayya anna pakkakontentu.” Aru nga noffunan kabalin na kalamidad i makapakkagi gapa nga natagenoda nga mas narriku ira megafu ta nalawàda nga uffun. Danuri gapa nakipattrabahu kani Jehova gukaban na panguffun ay nakatageno tu dakal nga pakkakontentu.​—Bibbigan i Kingngua 20:35; 2 Corinto 9:6, 7.

13. Kunnasi nga mapaladda na pabboluntariu i relasiottam kani Jehova? Mangistoria tu angngarigan.

¹³ Si Stephanie, kunne na gapa i karuan nga publisher ay nagayayya ta pakipattrabahuda ta Dios gukaban na panguffun ta Saksi ira nga refugee nga zimittal ta Amerika. Nanguffun ira nga magaleg tu balay nga paddianan na familia ira nga nagali maggafu ta lugar nga zinaral na gerra. “Napagaram kami ta ayayya anna appresasiodda durante nga maekspiriensada i aya na interu-mundo nga pawwaragi,” kunni Stephanie. “Abbo na familia ira nga inuffunammi ira, ngem ta kakuruganna,  mas dakal i neyuffudda nikami.” Kunna paga, “I nepasingadda nga aya, pattaradday, pangurug, anna pattaloda kani Jehova ay talaga namaladda ta ayami kani Jehova, anna mas paga naponag i appresasiommi ta ngamin nga malawami gukaban na organisasionna.”

14, 15. (a) Anni nga espiritu i nipasingan ni profeta Isaias? (b) Kunnasi nga maparigan na mangilayyagayya ira ta Pappatulan sangawe i appana-panono ni Isaias?

¹⁴ Kayà mu kari nga mas makipattrabahu paga kani Jehova? Sigga-parakka kari nga magali nu sitaw mas dakal i pakawagan ta trabahador ta organisasionna? Siempre, ari mawag nga umay ta arayyu i aripan ira na Dios tapenu makepasingan tu kinavuka-palag. Ngem egga ira wawwaragi nga ipamavulun na sirkumstansiada nga umay ta arayyu. Neyarig i appana-panonoda ta kani profeta Isaias. Turi ta niyavu sa ni Jehova, “Sinni i dobakku, anna sinni i umay para nikami?” nitabbagna: “Egga ngà taw! Dobannà!” (Isa. 6:8) Egga kari i pakkaraga mu anna ipamavulun kari na sirkumstansiam nga manguffun gapa ta teokratiko ira nga pakawagan? Anni ira i pakawagan?

¹⁵ Meyannung ta trabahu nga pallayyagayya anna pangngua tu disipulos, kunni Jesus: “Kuruga aru i magatab ngem pigi-piga laman i maggatab. Ipakimallo nu ta Yafu nga makakkua ta magatab tu maddog ta maggatab.” (Mat. 9:37, 38) Makapasserbi ka kari nu sitaw mas dakal i pakawagan, gitta na pappayunir? Onu egga kari i meyuffummu tapenu makua yatun na tadday nga kapangngurug? Aru nga brother anna sister ira i nakatageno nga i kakastan nga makuada tapenu mepasingan i aya ta Dios anna ta kasittolay ay i pappayunir ta lugar onu teritorio ira nga mas dakal i pakawagan para ta maggatab. Egga kari paga i tanakuan nga manono mu tapenu palawan onu pakaruan i serbisiom? Dakal nga ayayya i katali natun.

16, 17. Anni paga ira nga oportunidad i vuka nu kayà mu nga palawan i trabahum para kani Jehova?

¹⁶ Kayà mu kari nga masserbi ta Bethel onu manguffun ta konstruksion na teokratiko nga fasilidad, gukaban na pagaplay bilang temporario nga boluntariu onu bilang commuter? Kanayun nga egga i pakawagan turi ira ta mayà nga masserbi kani Jehova maski sitaw ira nga meyasayn anna maski anni nga trabahu i mepakua nira. Awayyana nga mattrabahu ira nu sitaw egga i espesipiko nga kawagan, maski nu tanakuan nakuan i keyusan na abilidad anna ekspiriensada. Ngem, appresian ni Jehova i minassakrifisio nga espiritu nga ipasa-ipasingan na indibidual ira nga sigga-paran nga masserbi nu sitaw egga i pakawagan.​—Sal. 110:3.

¹⁷ Kayà mu kari nga massanay paga tapenu mas kualipikadu ka nga ituppal i sagradu nga serbisiom? Nu kunnatun, awayyana nga kualipikadu ka nga magatende ta School for Kingdom Evangelizers. Yaw nga eskuela i massanay ta nespirituan nga lallaki anna babbay nga egga ta ngamin-tiempo nga serbisio, tapenu mapalawa i serbisioda. Danuri magaplay taw nga eskuela ay mawag tu sigga-paran nga alawatadda i maski anni nga asayment kabalidda naggradua. Sigga-parakka kari nga approbetsan yaw nga oportunidad nga mangivuka tu mas alawa nga pribilehio?​—1 Cor. 9:23.

18. Anni ira i bendisiommu nu inaggaw nga makipattrabahu ka kani Jehova?

¹⁸ Bilang totolay ni Jehova, mapaguyu ittam nga mabbalin tu vuka-palag​—nga pangipasingan tu kinapia, kinasippo, anna aya—anna uffunan i tanakuan kadaggaw. Nu kuattam yatun, mabbalin ittam tu magayayya, memammo, anna kontentu. (Gal. 5:22, 23) Maski anni paga i paddia-paddiammu, makaleg ka tu ayayya gukaban na pamarig ta kinavuka-palag ni Jehova anna gukaban na pabbalin tu tadday ta matagibalor nga katrabahuna!​—Prov. 3:9, 10.