1. Kunnasi pakurugan na pamaratu nga minangngiyawa si Jehova?

MASKI paga magitetadday si Jehova nigena nga namaratu, ari laman tu baggina i agga-nonona. Niregaluanna paga lagu tu inango danuri intelihente nga pinaratuna nga espiritu anna totolay. Kakayà na “magayayya nga Dios” nga si Jehova nga mangiyawa tu makasta ira nga gannug. (1 Tim. 1:11, NW; Sant. 1:17) Megafu ta kayàna nga magayayya ittam gapa, tudduanna ittam nga mabbalin tu minangngiyawa.​—Roma 1:20.

2, 3. (a) Ngatta magayayya ittam nu mangiyawa ittam? (b) Anni i repasuattam?

² Pinaratu na Dios i tolay segun ta imahena. (Gen. 1:27) Kayàna kagian nga egga i abilidad tam nga ipasingan i personalidadna. Tapenu magayayya anna makontentu gafu, mawag tam parigan i ehemplo ni Jehova gukaban na pangikavurung ta pammakapian na tanakuan anna vuka-palag nga pangiyawa. (Fil. 2:3, 4; Sant. 1:5) Ngatta? Megafu ta meddu nga dinisenio ni Jehova i totolay nga kunnatun. Maski imperfekto ittam, maparigattam lagapa i kinavuka-palag ni Jehova.

³ Kagian na Biblia nu kunnasi ittam mabbalin tu vuka-palag ta  pangiyawa. Repasuattam i karuan nga leksion nga ituddu na Katurakan taw nga topiko. Masingattam nu kunnasi mala i fabor na Dios nu minangngiyawa anna nu kunnasi makoffun i pakkultiba tatun tapenu matuppal i papel nga niyawa na Dios nittam. Usitakkattam gapa nu anni i koneksion na kinavuka-palag ta pagayayya tam anna nu ngatta mawag tam nga kultiban yatun.

4, 5. Anni nga ehemplo na kinavuka-palag i nipasingan ni Jehova anna ni Jesus nittam?

⁴ Kayà ni Jehova nga parigan yayya na totolay, yari tu magayayya yayya nu minangngiyawa ittam. (Efe. 5:1) Manawag ta nikaparatu tam anna ta kasta anna ta kina-abundansia na natural nga kayamanan na davvun nga kayà na Dios nga magayayya ittam. (Sal. 104:24; 139:13-16) Yatutta, medayaw tam yayya nu mappursigi ittam nga mapagayayya i tanakuan.

⁵ Parigan na kurug ira nga Cristiano si Cristo, nga nangiyawa nittam tu perfekto nga ehemplo nu kunnasi mabbalin tu minangngiyawa i totolay. Kunni Jesus: ‘Kagitta na Ana na Tolay nga ari nga minay tapenu maserbian, nu ari, masserbi anna iyawa na i inango na tapenu matavvu i aru nga totolay.’ (Mat. 20:28) Yatutta, pinagaram ni apostol Pablo i Cristiano ira: “Megitta kamu ta appana-panono ni Cristo Jesus: Maski nu egga sa i ka-Dios, . . . sinagapia na nga pinagurayan ngamin i egga sa; . . . ay nabbalin tu aripan yaya.” (Fil. 2:5-7) Yari tu iyavu tam nakuan ta baggi tam, ‘Egga paga kari i makuà ta maddaggun tapenu mas matuttul ku i ehemplo ni Jesus?’​—Bibbigan i 1 Pedro 2:21.

6. Anni nga leksion i nituddu nittam ni Jesus ta ilustrasionna meyannung ta mapia nga Samaritano? (Innan i letratu ta gafu na artikulo.)

⁶ Mala tam i fabor ni Jehova nu parigattam i perfekto nga ehemplona anna na Cristo, anna gukaban na pangikavurung ta pammakapian na tanakuan, anna panguffun ta pakawagadda ira. Manawag ta ilustrasion ni Jesus meyannung ta mapia nga Samaritano nga ekspektanna nga massakrifisio danuri disipulosna nga uffunan i tanakuan, maski paga madduma i naggafuadda. (Bibbigan i Lucas 10:29-37.) Manono mu kari nu ngatta inistoria yatun ni Jesus? Megafu ta niyavu sa na Judio nga lalaki: “Sinni i kakaddubà?” Ipasingan na tabbag ni Jesus nga vuka-palag tam nakuan nga mangiyawa tu abundansia gittana Samaritano tapenu mala tam i fabor na Dios.

7. Kunnasi tam mepasingan nga kurugattam nga kapianan i pangngua ta ganna-gannug segun ta uray ni Jehova? Ipakanawag.

⁷ Aru i rason na Cristiano tapenu mabbalin ira tu vuka-palag. Angngariganna, egga i koneksion naw nga kualidad ta isyu nga pinalattuag ni Satanas ta hardin na Eden. Kunnasi? Palawanan ni Satanas nga da Adan anni Eva​—tuange ta ngamin nga totolay​—ay mas makasta i pabbalinadda nu maffokus ira ta gibbaggiadda anna pagolluadda i pammakapianadda anne ta panuttulda ta Dios. Sinuttul ni Eva i makasarili nga pakkaragana nga megitta ta Dios. Nipasingan ni Adan i makasarili nga pakkaragana nga pagustuan si Eva. (Gen. 3:4-6) Mananawag i nattuppalan na desisiodda. Ari makapagayayya i pabbalin tu makasarili; daddam i resulta natun. Nu minangngiyawa ittam, kumbinsidu ittam nga kapianan i pangngua ta ganna-gannug segun ta uray ni Jehova.

8. Ngatta interesadu nakuan i ollu nga magatawa ta pammakapian na tanakuan?

⁸ Niddan na Dios i ollu nga magatawa tu instruksion nga namappanono nakuan nira ta pammakapian na tanakuan, maski  paga nu ira laman i tolay ta hardin na Eden. Binendisionan ni Jehova da Adan anni Eva anna pinagaramna ira nga maggaka, pannuan i davvun, anna imagurayan yatun. (Gen. 1:28) Nu kunnasi nga kuruga interesadu i Namaratu ta pagayayya na pinaratuna ira, sigga-nono nakuan gapa i ollu nga magana ta pagayayya na ari paga neyana nga ánada. Mabbalin tu paraiso i interu davvun para ta benefisio na gaka-gaka ni Adan. Kawagan natun nga dakal nga proyekto i kooperasion na dumaka-dakal nga familiana.

9. Ngatta nattuppal nakuan ta pagayayya i pamabbalin na totolay tu Paraiso i interu davvun?

⁹ Tapenu mapabbalin na perfekto nga totolay tu Paraiso i interu davvun, makikoopera nakuan ira tu mapia kani Jehova tapenu matuppal yatun nga gakkag anna makatallung ira ta pagibannagna. (Heb. 4:11) Imajinammu nu kunnasi nakuan nga kappagayayya anna makakontentu yatun nga proyekto! Narresulta nakuan nira tu aru nga bendision anna dakal nga pagayayya i passakrifisioda para ta pammakapian na tanakuan.

10, 11. Kunnasi tam metuppal i trabahu nga pallayyagayya anna pagangngua tu disipulos?

¹⁰ Ta maddaggun, niddan ni Jehova i totolena tu trabahu nga mallayyagayya anna magangngua tu disipulos. Tapenu matuppal yatun, mawag nga sinsero ittam nakuan ta pangikavurung ta tanakuan. Makapagattam ittam laman taw nga trabahu nu fustu i motibo tam​—aya ta Dios anna aya ta kasittoletam.

¹¹ Ta ollu-siglo C.E., tinukoy ni Pablo i baggina anna i madukko nga kakavvuluna nga ‘katrabahu na Dios’ megafu ta papelda ta pammula anna pabbaya ta vullung na kinakurug na Pappatulan. (1 Cor. 3:6, 9, NW) Ta maddaggun, puede tam gapa nga mabbalin tu ‘katrabahu na Dios’ gukaban na vuka-palag nga pangiyawa tu tiempo, pakkukua, anna sikattam ta niyawa na Dios nga annungattam nga mallayyagayya. Talaga daka-dakal nga pribilehio yatun!

12, 13. Anni i makagim nga bendision ira na pangngua tu disipulos?

¹² Talaga makapagayayya i pangiyawa tam tu tiempo anna sikan ta trabahu nga pallayyagayya anna pangngua tu disipulos. Kunnatun i kagian na aru nga wawwaragi nga napeggan tu tiansa nga mangikondukta tu paggigiammu ira tu Biblia. Dakal i ayayya tam nu masingattam nga magayayya ira nu malippawada i espiritual ira nga kinakurug, dumakal i pangurugda, manguli ira, anna ibilleda ngana i kinakurug ta tanakuan. Kuruga nagayayya gapa si Jesus turi ta “nanoli nga sigga-pagayayya” danuri 70 nga zinogna ta ministerio megafu ta makasta nga resulta na pinallayyagayyada.​—Luc. 10:17-21, NW.

¹³ Magayayya i wawwaragi tam ta interu mundo nu masingadda nga egga i positibo nga efekto na mensahe na mapia nga dumug  ta totolay. Ikonsidera i ekspiriensa ni Anna, kabataan nga single nga sister nga pinalawana i ministeriona gukaban na pagali ta Eastern Europe tapenu masserbi nu sitaw dakal i pakawagan. * Niturana: “Aru i oportunidad nga mangikondukta tu Bible study taw, anna talaga kakayà ku yatun. Magaya-ayayya ngà ta passerbì. Nu lubbe ngà, awan ngana i oras ku nga nonopan i problemà. Agga-nono ku danuri Bible study​—i problemada anna i pakavurungadda ira. Innakku nu kunnasì ira mapasikan anna moffunan ta praktikal ira nga gannug. Megafu tatun, kumbinsidu ngà nga ‘mas dakal i pagayaya ta pangiyawa anne ta pangalawa.’”​—King. 20:35.

14. Maski paga baddi laman i magginna ta mapia nga dumug, kunnasi lagapa nga magayayya i ministeriom?

¹⁴ Magayayya ittam nu iddattam tu tiansa i totolay nga ginnan i mensahe na mapia nga dumug maski ariadda nga importan. Daddamman nga i annungattam ta maddaggun ay parehu kani profeta Ezekiel, nga kunni Jehova sa: “Ikagim i uvovug ku nira, maski magginna ira onu ari.” (Eze. 2:7; Isa. 43:10) Maski nu ari appresian na karuan i mensahe tam, appresian ni Jehova i appursigi tam. (Bibbigan i Hebreo 6:10.) Kakkasta i pagimamma na tadday nga brother taw nga gannug. Niturana meyannung ta ministeriona, “Sittam i nammula, nabbaya, anna nakimallo ittam nga si Jehova i mamadakal ta interes.”​—1 Cor. 3:6.

15. Mangiyawa tam laman kari ta totolay nu appresiadda yatun? Iyesplika.

¹⁵ Kayà ni Jesus nga magayayya ittam ta pangiyawa. Positibo i reaksion na aru nga totolay ta kinavuka-palag. “Iyugalinu i pangiyawa, tapenu iddan nakamu na totolay,” kunna. “Ivuruda ta uffunu i fustu nga gukug nga natattag, napanna-pannu, anna nammudu-mudul. Ta i gukug nga iyusanu nga paggukug ay yatun gabbalaman i paggukugda nikamu.” (Luc. 6:38, NW) Nu minangngiyawa ka, ari tu ngamin i mangappresia tatun. Ngem danuri mangappresia ta kinavuka-palag mu ay mapaguyu gapa nga mangiyawa. Yari tu kanayun nakuan nga mangiyawa maski appresiadda yatun onu ari. Kammu laman ammu nu anni i mapia nga efekto na maski tadday laman nga pangipasingan tu kinavuka-palag.

16. Anni nakuan i motibo tam ta pangipasingan tu kinavuka-palag?

 ¹⁶ Danuri kurug nga vuka-palag ay ari mangiyawa megafu ta egga i ekspektadda nga katali. Sigga-nono taw si Jesus turi ta nitudduna: “Nu mappabangkete ka, imbitam-mu danuri i mariga, fukul, pilay anna vuling ira. Ay mapalag ka ta ariad-daka awayya nga balattan.” (Luc. 14:13, 14) Kunna Biblia: “Mabendisionan noka i tadday nga minangngiyawa.” Kunna paga: “Mapalag i tolay nga mangikavurung ta mariga, ta uffunan na YAFU nu duttal sa i ziga.” (Prov. 22:9; Sal. 41:1) Wan, mawag tu mangiyawa ittam megafu ta magayayya tam nu uffunattam i tanakuan.

17. Anni ira nga klase na pangiyawa i makapagayayya nikaw?

¹⁷ Turi ta pinakoli ni Pablo i uvovug ni Jesus nga “mas dakal i pagayaya ta pangiyawa anne ta pangalawa,” ari laman nga pangiyawa tu material nga ganna-gannug i tukuyan ni Pablo, nu ari, pangiyawa gapa tu pamagaram, giya, anna uffun turi ira ta magawag. (King. 20:31-35) Gukaban na kakkagian anna ehemplo ni Pablo, nitudduna nittam i importansia na pangiyawa tu tiempo tam, sikattam, atensiottam, anna aya tam.

18. Anni i konklusion na aru nga researcher meyannung ta pangiyawa?

¹⁸ Naobserba danuri researcher na social science nga magayayya i tolay nu mangiyawa. Segun ta tadday nga artikulo, “kakkagian na totolay nga mas magayayya ira kabalidda magangngua tu mapia ta tanakuan.” Kunna researcher ira nga importante i panguffun ta tanakuan ta “pakatageno nga egga i gakkag anna kebalinan” na pattoleda “megafu ta pannuan natun i primeru nga pakawagan na totolay.” Yayya nga, maruddu nga irekomenda na eksperto ira nga mabboluntariu i totolay ta serbisio publiko tapenu mas magawa-gawayyan anna mas magayayya ira. Ari ngana nga kakkadda-kaddag yaw turi ira ta umanugu nga i Biblia ay Uvovug na meddu nga Diseniador na totolay, si Jehova.​—2 Tim. 3:16, 17.

19, 20. Ngatta kayà mu mabbalin tu minangngiyawa?

¹⁹ Mariga pattalupaddianan i minangngiyawa nga espiritu nu napalevutan ittam tu totolay nga agga-nonoda laman i pammakapianadda ari tu i tanakuan. Ngem, kinagi ni Jesus nga i dua ta kadakallan nga dorob ay ayatan si Jehova ta interu futu, kararua, nono, anna sikan anna ayatan i kasittoletam nga kunna pangaya tam ta baggi tam. (Mar. 12:28-31) Kagitta na nagigiammu tam taw nga artikulo, danuri mangaya kani Jehova ay parigadda yayya. Minangngiyawa si Jehova ta tanakuan, kunne na gapa si Jesus. Ipagaramda gapa nga kunnatun i kuattam, megafu ta yatun i kurug nga mamagayayya nittam. Nu mappursigi ittam nga ipasingan i minangngiyawa nga espiritu ta pakilallattam ta Dios anna ta kasittoletam, medayaw tam si Jehova anna mabbenefisio ittam anna i tanakuan.

²⁰ Siguradu nga mappuppursigi ka ngana nga isakrifisio i baggim tapenu uffunan i tanakuan, mas ngana ta kapangngurug mu. (Gal. 6:10) Nu kanayummu nga kuan yatun, magga ayatan anna appresiaddaka, nga mamagayayya gapa nikaw. “I minangngiyawa nga tolay ay mapprogreso,” kunna Proverbio 11:25, anna “i sinni laman nga marrefresko ta tanakuan ay marefreskowan gapa.” Siempre, i ari makasarili nga pangiyawa, kinasippo, anna kinavuka-palag ay mepasingan ta nadduruma nga annangngua anna aru nga aspeto na pattolem anna ministeriom bilang Cristiano, nga marresulta tu aru nga bendision. Ipasingan na tumunug nga artikulo i karuan taw nga annangngua anna aspeto.