MAS maggrabe i ziga-riga ta “pangurianan ira nga aggaw,” yatun ta mawag tu mas minappasensia i totolay ni Jehova anne tagga. (2 Tim. 3:1-5) Kakkaru ta pallevu tam i totolay nga ayatadda laman i gibbaggiadda, awan tu alloda ta ikattoleda, anna awan tu pangifugagda ta baggida. Maruddu nga ari tu minappasensia i kuddanatun nga totolay. Iyavu gafu nakuan na kada Cristiano ta baggina: ‘Nainfluensiannà kari na kawan tu pasensia naw nga mundo? Anni kayà kagian na pabbalin tu kurug nga mapasensia? Anna kunnasì mapabbalin tu permanente nga parte na kata-katolè yaw nga makasta nga kualidad na Cristiano?’

Ta Biblia, ari laman tu basta pagattam ta mariga nga situasion i kebalinan na uvovug nga pappasensia. I tolay nga egga makadios nga pappasensiana ay magattam megafu ta egga i gakkagna. Nononopanna ari laman i pakawaganna, nu ari, ikonsiderana gapa i pammakapian na tolay nga namalattuag ta problema. Megafu taw, nu takitan onu ararukadda i tadday nga mapasensia, manakina nga mawanan tu iddanama nga makkasta gabbalaman noka i nadaral nga pakkavulu. Ari gafu kakkadda-kaddag nga nilista na Biblia i “pappasensia” nga ollu ta aru nga makasta nga kualidad nga palawanan na aya. * (1 Cor. 13:4) Mabibbig paga ta Uvovug na Dios nga i “pappasensia” ay aspeto na “vunga na Espiritu.” (Gal. 5:22, 23) Anni gafu i mekiddaw nittam tapenu makultiba yaw nga makadios nga kualidad?

Tapenu mapeggan tu pappasensia, ipakimallo tam i uffun na espiritu ni Jehova, nga iyawana turi ira ta mattalo anna maddepende sa. (Luc. 11:13) Ngem maski nu makapangngua i espiritu na Dios, mawag tu kuattam i parte tam anna itrabahu i pakimallo tam ira. (Sal. 86:10, 11) Kayà kagian natun nga mappursigi ittam kadaggaw nga kultiban i pappasensia tapenu maggamu yaw nga kualidad ta futu tam. Ngem fuera paga tatun, egga paga i mawag tu kuattam tapenu mabbalin tu permanente nga aspeto na kata-katoletam i pappasensia. Anni paga i makoffun nittam?

Makultiba tam i pappasensia nu gigiammuan anna parigattam i perfekto nga ehemplo ni Jesus. Tatun nga ehemplona, dineskriba ni apostol Pablo i “bagu nga kata-katolay,” nga nelavu tatun i kualidad nga “minappasensia,” anna kabalin natun pinagaramna ittam nga ‘mawag tu pammagurayattam ta giffutuattam i imammo nga iyawa ni Cristo.’ (Col. 3:10, 12, 15) Mepamavuluttam nga ‘mammaguray’ ta giffutuattam yatun nga imammo nu parigattam i maladda nga pangurug ni Jesus nga ta mepangngo nga tiempo na Dios, itunungna noka i ganna-gannug nga ikavurungattam. Nu parigattam i ehemplo ni Jesus, ariattam ipamavulun nga mawawan i pasensia tam, maski nu anni i mesissimmu ta pallevu tam.​—Juan 14:27; 16:33.

Maski nu kakayà tam ngana nga masingan i napabagu nga mundo na Dios, magigiammu tam i  mas mappasensia nu nonopattam tu mapia i appasensia ni Jehova nittam. Ipasiguradu na Katurakan nittam: “Ari nga mattalattan i Yafu ta pangngua na ta nitabba na, ta kunna pagabbo na karuan nga totolay. Pasa-pasensian nakamu lallagu ta arian na nga ikaya tu egga i madaral, ngem ikaya na tu pallikuran na ngamin nga totolay i katagaruliad-da.” (2 Ped. 3:9) Durante nga monag nga nonopattam i pappasensia ni Jehova nittam, ariattam kari mapaguyu nga mabbalin tu mas mapasensia ta tanakuan? (Roma 2:4) Nu nononopattam yatun, anni gafu i situasion ira nga magawag tu pappasensia?

Kadaggaw, aru nga situasion i mamurueba ta pappasensia tam. Angngariganna, nu egga i importante nga kayà mu kagian, awayyana nga mawag tu mappasensia ka nga maginnag tapenu ariammu maistorbo i tanakuan nga maddaggun maguvovug. (Sant. 1:19) Awayyana gapa nga mawag tu mappasensia ka nu makilallang ka ta kapangngurug ira nga kalussom i ugalida. Imbes nga sobra i reaksiommu ta kuddanatun nga gannug, masirib nu ikonsideram nu kunnasi i reaksion ni Jehova anna ni Jesus ta pakkafian tam ira. Ariadda sifu-sifutan i baraddi nga pakkamaliattam. Innadda lallagu i makasta ira nga kualidad tam anna mapasensia nga obserban i appursigi tam ira tapenu manguli.​—1 Tim. 1:16; 1 Ped. 3:12.

Tadday paga nga mamurueba ta pappasensia tam ay nu paliwatan ittam na tadday nga tolay nga egga nakagi onu nakua tam nga kamali. Maruddu nga alistu ittam matakitan anna irasonan i baggi tam. Ngem tanakuan i tabarang na Biblia nga kuattam. Kunna: “Mas makasta i mapasensia anne ta palagopog nga espiritu. Ari ka insigida nga matakitan, megafu ta i taki na nono i agga-dian ta gakaw na ulapa ira.” (Ecl. 7:8, 9) Yatutta, maski nu awan talaga tu kakurugan na tadday nga akusasion, mapasensia nakuan nga pannonopan tu mapia i reaksiottam. Sinuttul ni Jesus yatun nga prinsipio turi ta ari patas nga inuyu-uyaw yayya na tanakuan.​—Mat. 11:19.

Mas ngana nga kawagan na mappagana i mangipasingan tu pasensia nu mawag nga tunungadda i mali nga ugali, pakkaraga, onu tendensia nga masingadda ta ánada. Ikonsidera i nesimmu kani Mattias, nga miembro na familia na Bethel ta Scandinavia. Ta katinedyerna, inattattamman ni Mattias i kanayun nga panguyu-uyaw ta eskuela megafu ta pangurugna. Ta ollu, kanna ammu na maganana yaw. Ngem mawag tu arubangadda i efektona kani Mattias na pangokkontra, nga namegafu nga nanguestion nu egga talaga yayya ta kinakurug. “Kawagan i aru nga pappasensia tatun nga situasion,” kunna yama ni Mattias nga si Gillis. Iyava-avu ni Mattias: “Sinni kari i Dios? Kunnasi nu ari mabba nga Uvovug na Dios i Biblia? Kunnasi tam makasiguradu nga yaw onu yatun talaga i kayà na Dios para nittam?” Kakkagianna paga ta yamana: “Ngatta gare ukumannù nu kakku kayà anna kurugan i kurugannu?”

“Nu mittan,” kunni Gillis, “mapporay i ana ku ta pakkiavuna, ngem akkan tu sikami na yenana i kontranna, nu ari, i kinakurug, nga abbona nga nappariga ta pattolena.” Kunnasi nga inarubang ni Gillis yaw nga situasion? “Egga i tiempo nga piga oras nga paguvovugammi na ana ku danatun. Maggigginna ngà laman anna aggi-mittan makkiavu ngà tapenu ammuan i kurug nga mataga-tageno anna pagimammana. Nu mittan iddakku yayya tu eksplanasion nga pannonopanna ta  tangaggaw onu maturu paga nigemi mangana nga ituloy i paguvovugmi. Egga ira tiempo nga kagiakku sa nga mawag ku i piga nga aggaw tapenu pannonopan i nisikkana. Gukaban na kunnaw ira nga regular nga paguvovug, sisinu nga napprogreso si Mattias ta pakalippawa anna pangakseptana ta tuddu ira gitta na tavvu, soberania na Dios, anna aya ni Jehova. Nappasa i aru nga tiempo, maski maruddu nga mariga, sisinu lagapa nga ziminakal ta futuna i ayana kani Jehova. Magayayya kami na atawà nga i mapasensia nga appursigimi nga uffunan i anami durante ta pakka-tinedyerna ay sulit anna nadde natun i futuna.”

Nattalo da Gillis anna atawana ta suporta ni Jehova durante nga mapasensia nga uffunadda i anada. Kunni Gillis ta nappasa: “Kanayukku kagian kani Mattias nga i monag nga ayami sa i namaguyu nikami ni mamana nga mas paga nga makimallo kani Jehova nga uffunan yayya nga mangalippawa.” Talaga mappabalo yatun nga magana nga nipasingadda i importante nga kualidad nga pappasensia!

Fuera paga ta pangiyawa tu espiritual nga uffun, mawag tu kultiban na kurug ira nga Cristiano i meddu nga pappasensia nu asikasuan i pakawagan na kafamilia onu kofudda nga grabe i takina. Ikonsidera i ekspiriensa ni Ellen, * nga taga-Scandinavia gapa.

Mawwalu dagun ngana i nappasa, namiddua nga na-stroke i atawa ni Ellen nga naka-afekto ta utona. Bilang resulta, arianna ngana makatageno tu pangikallo, pagayayya, onu paddaddam. Makkonsimision si Ellen ta situasionna. Kunna: “Ara-aru nga pasensia anna pakimallo i kawagakku.” Kunna paga: “I paboritò nga teksto nga makapabannay niakan ay i Filipos 4:13, nga kunna: ‘Ta ngamin nga gannug ay egga i sikakku megafu ta tadday nga mangiyawa niakan tu pakapangngua.’” (New World Translation) Pia ngana laman megafu tatun nga pakapangngua, mapasensia nga nakapagattam si Ellen gukaban na buu nga pakkomfiansa ta suporta ni Jehova.​—Sal. 62:5, 6.

Siempre, nu meyannung ta pappasensia, si Jehova i kakastan nga ehemplo nga maparigattam. (2 Ped. 3:15) Aru i mabibbig tam ta Biblia nu sitaw dakal nga pappasensia i nipasingan ni Jehova. (Neh. 9:30; Isa. 30:18) Angngariganna, anni i reaksion ni Jehova tagga ta kinuestion ni Abraham i desisionna nga daralan i Sodoma? Ollu ta ngamin, ari finugaddan ni Jehova nga maguvovug si Abraham. Lallagu, mapasensia yayya nga nagginna ta kada pakkiavu anna vuru-vurung ni Abraham. Kabalin natun, pinakurug ni Jehova nga gigginnanna si Abraham gukaban na pamakolina ta kada vuru-vurunna. Nipasiguraduna paga nisa nga arianna daralan i Sodoma maski nu mafulu laman i matunung nga tolay nga malegan tatun nga siudad. (Gen. 18:22-33) Kakkasta yatun nga ehemplo na mapasensia nga pagginna anna ari nga sobra nga reaksion!

I makadios nga pappasensia ay talaga importante nga aspeto na bagu nga kata-katolay nga mawag tu ibaruasi na ngamin nga Cristiano. Nu kuattam i adde na mawayya tam tapenu mapeggan tu kunnaw kabalor anna kaladda nga kualidad, medayaw tam i minangngikavurung anna minappasensia nga nelangitan nga Yama tam, anna mebilang ittam turi ira ta “maninaga noka ta nitabba na Dios, megafu ta angngurug anna pasensia da.”​—Heb. 6:10-12.